दुई मनिचेञ्जर कम्पनी माथि राष्ट्र बैंकको कारवाही, इजाजतपत्र रद्द

काठमाडौं । नेपाल राष्ट्र बैंकले काठमाडौँका दुई वटा मनिचेञ्जर कम्पनीको इजाजतपत्र रद्द गरेको छ ।

बैंकको विदेशी विनिमय व्यवस्थापन विभागले आइतबार एक सूचना जारी गर्दै तोकिएको समयसीमाभित्र इजाजतपत्र नवीकरण नगर्ने दुई कम्पनीको इजाजतपत्र खारेज गरिएको जानकारी दिएको हो । इजाजतपत्र रद्द हुने कम्पनीहरूमा काठमाडौँ महानगरपालिका ११ सुन्धारा क्षेत्रमा सञ्चालित लर्ड बुद्ध मनि एक्सचेञ्ज प्रा.लि. र स्तुपा मनिचेञ्जर प्रा.लि. रहेका छन् ।

राष्ट्र बैंकका अनुसार ती मनिचेञ्जरहरूले ‘नेपाल राष्ट्र बैंक, मनिचेञ्जर इजाजतपत्र तथा निरीक्षण विनियमावली, २०७७ (चौथो संशोधनसहित)’ को पालना गरेका छैनन् । विनियमावलीको विनियम १९ को उप–विनियम (३) मा इजाजतपत्रको म्याद समाप्त भएको मितिले तीन महिनाभित्र नवीकरण गरिसक्नुपर्ने व्यवस्था छ ।

यी दुवै कम्पनीले तोकिएको उक्त समयसीमाभित्र आफ्नो इजाजतपत्र नवीकरण गर्न नसकेकोले राष्ट्र बैंकले इजाजतपत्र रद्द गर्ने निर्णय गरेको हो ।

यो निर्णयसँगै अब यी कम्पनीहरूले मनिचेञ्जरसम्बन्धी कारोबार गर्न पाउने छैनन् ।