कुमारी बैंकका ग्राहकलाई बन्दिपुर केबलकारमा १३ प्रतिशतसम्म छुट

काठमाडौं । कुमारी बैंक लिमिटेड र बन्दिपुर केबलकार एण्ड टुरिजम लिमिटेडबीच कुमारी बैंकका ग्राहकलाई पर्यटन तथा मनोरञ्जन सेवामा विशेष सुविधा प्रदान गर्ने उद्देश्यले छुट सम्बन्धी सम्झौता सम्पन्न भएको छ।

सम्झौता अनुसार बैंकका ग्राहकले बन्दिपुरस्थित विभिन्न आकर्षक सेवामा १३ प्रतिशतसम्म छुट पाउने भएका हुन् ।

सम्झौता बमोजिम बन्दिपुर केबलकारद्वारा संचालित केबलकार टिकट, स्काई साइक्लिङ, जिपलाइन टिकट तथा डाइभ–इन रेस्टुरेन्टमा खर्च गर्दा कुमारी बैंकका ग्राहकले प्रत्यक्ष छुट प्राप्त गर्न सक्ने व्यवस्था गरिएको छ। बैंकले सेवाग्राहीलाई पर्यटन प्रवर्द्धनसँगै गुणस्तरीय मनोरञ्जन सेवामा सहज पहुँच दिलाउन यस्तो सहकार्य प्रभावकारी हुने विश्वास व्यक्त गरेको छ।

दुवै संस्थाबीचको सम्झौतापत्रमा कुमारी बैंकका गण्डकी प्रदेश प्रमुख सुदर्शन जंग राणा र बन्दिपुर केबल कार एण्ड टुरिजम लिमिटेडका प्रमुख कार्यकारी अधिकृत रोमन मान श्रेष्ठले मंसिर ७ गते हस्ताक्षर गरेका छन्।

सम्झौता हस्ताक्षर कार्यक्रमका क्रममा दुबै पक्षले पारस्परिक सहकार्यले बैंक तथा केबलकार सेवाको प्रभावकारी विस्तारमा सहयोग पुग्ने धारणा व्यक्त गरेका थिए।