नबिल बैंकले हात पार्यो भिसा इन्टरनेशनलद्वारा प्रदान गरिने तीन महत्वपूर्ण विधा

काठमाडौँ । नबिल बैंक भिसा इन्टरनेशनलद्वारा प्रदान गरिने तीन महत्वपूर्ण विधामा अवार्ड प्राप्त गर्न सफल भएको छ।

यस वर्ष बैंकले एक्सिलेन्स इन कन्जुमर डेबिट कार्ड्स बिजनेस, एक्सिलेन्स इन कन्ट्याक्टलेस-इस्युइङ र एक्सिलेन्स इन ई-कमर्स एक्वायरिङ बिजनेस शीर्षकका अवार्ड हात पारेको हो ।

काठमाडौँको मेरियट होटलमा आयोजित विशेष कार्यक्रममा भिसा इन्टरनेशनलले उत्कृष्ट कार्ड सेवा, प्रविधि-आधारित कारोबार प्रवर्द्धन र डिजिटल भुक्तानी विस्तारमा गरेको योगदानका आधारमा नबिल बैंकलाई सम्मान प्रदान गरेको हो। यी विधाहरूमा नबिल बैंकको वर्चस्व विगतदेखि नै कायम रहँदै आएको छ।

अवार्ड ग्रहण गर्दै नबिल बैंकका नायब प्रमुख कार्यकारी अधिकृत आदर्श बजगाईले प्राप्त सम्मानले संस्थालाई अझ नवीन सेवा विस्तार, ग्राहक–अनुकूल प्रविधि विकास र डिजिटल भुक्तानी प्रणालीलाई सुदृढ बनाउन प्रेरित गरेको बताए। उनले अवार्डको श्रेय बैंकका कार्डधारी ग्राहक, कारोबार गर्ने व्यापारी तथा समर्पित कर्मचारीहरूलाई जाने उल्लेख गरे।

भिसा इन्टरनेशनल विश्वकै अग्रणी कार्ड सेवा प्रदायकमध्ये एक हो। नेपालमा यसले प्रत्येक वर्ष आयोजना गर्ने भिसा लिडरसिप कन्क्लेभमार्फत डिजिटल भुक्तानीका नवीनतम प्रवृत्ति, सेवा विस्तारका सम्भावना र वित्तीय नवप्रवर्तनका विषयमा बैंक तथा वित्तीय संस्थासँग संवाद गर्दै आएको छ। भिसा कार्डको प्रयोग हाल बैंकिङ, फिनटेक, इ–कमर्स तथा खुद्रा कारोबारलगायत विविध क्षेत्रमा तीव्र गतिमा बढिरहेको छ।

नबिल बैंक देशभर २६८ शाखा, ३२१ एटिएम तथा २५ लाखभन्दा बढी ग्राहकसहित नेपालको अग्रणी वाणिज्य बैंक मानिन्छ। चार दशकयता बैंकिङ क्षेत्रमा नवीनतम सेवाको सुरुवात गर्दै आएको नबिलले आधुनिक वित्तीय प्रणाली विकासमा महत्वपूर्ण योगदान दिँदै आएको छ।