काठमाडौँ । हेटौँडा बजार क्षेत्र हुँदै जाने पूर्व-पश्चिम राजमार्ग तथा त्रिभुवन राजपथको सडक विस्तार कार्य सुरु भएपछि दैनिक यात्रु र चालकलाई समस्या नहोस भनी अस्थायी वैकल्पिक रुट लागू गरिने भएको छ।

सडक डिभिजन कार्यालय हेटौँडाले मुख्य बजार क्षेत्रमा मेसिन-मानिस तथा निर्माण सामग्रीको भीड बढेसँगै सवारी आवागमन सहज बनाउने जिम्मेवारी स्वरूप वैकल्पिक मार्ग सञ्चालनमा ल्याउने तयारी पूरा गरेको हो ।

कार्यालयले काठमाडौँ र चितवनतर्फ जाने सवारीलाई हेटौँडा-१ को चौकीटोल (तिरतिरे धारा) हुँदै राप्ती पुल र त्यसपछि रातोमाटेतर्फ मोडिने व्यवस्था मिलाएको छ। पूर्वतर्फबाट आउने सवारीलाई पनि रातोमाटेदेखी नै डायभर्ट गरिनेछ।

कार्यालय प्रमुख गुरु प्रसाद अधिकारीका अनुसार निर्माण तथा मर्मत दुवै कामलाई चरणबद्ध रूपमा अघि बढाउने योजना छ। “मुख्य बजार क्षेत्रमा निर्माण निरन्तर जारी रहने भएकाले केही समय वैकल्पिक मार्गमार्फत मात्र सवारी चलाइनेछ,” उनले बताए।

रातोमाटे-त्रिवेणीधाम-राप्ती पुल मार्गलाई प्रमुख वैकल्पिक रुटका रूपमा प्रयोग गरिने छ। त्यही मार्गमार्फत काठमाडौँ-नारायणगढतर्फबाट आएका र वीरगन्जतर्फ लाग्ने सवारीलाई पनि बजार क्षेत्रमा प्रवेश नगरी सीधै मोडिने व्यवस्था गरिएको छ।

यस्तै, पूर्वतर्फ जाने सवारीले राप्ती पुल-त्रिवेणी-रातोमाटे मार्ग प्रयोग गर्नेछ भने पश्चिमतर्फ चितवन वा काठमाडौँतर्फ जाने सवारी पुनः रातोमाटे-राप्ती पुल हुँदै नै सञ्चालन गरिनेछ।

कान्ति र मदन भण्डारी लोकमार्गमा चल्ने सवारीलाई पनि कमाने हुँदै रातोमाटे जोड्ने तयारी कार्यालयले अघि बढाएको छ। वैकल्पिक रुट सहज रूपले सञ्चालन गर्न खाल्डाखुल्डी पुर्ने, ग्राभेल थप्ने लगायतका काम सुरु भइसकेको अधिकारीको भनाइ छ।

सडक विस्तारलाई दीर्घकालीन आवश्यकताका रूपमा लिइएको भए पनि यात्रु तथा व्यवसायीलाई तत्कालीन असजिलो न्यून पार्ने उद्देश्यसहित वैकल्पिक रुट तत्काल लागू गर्न लागिएको हो।

Read More

काठमाडौँ । रुसी राष्ट्रपति भ्लादिमिर पुटिनले युरोपेली देशहरूलाई कडा चेतावनी दिएका छन् । उनले युरोपले रुस विरुद्ध युद्ध सुरु गरेमा रुसले जवाफ दिन तयार रहेको बताएका हुन् । पुटिनले रुस युरोपसँग युद्ध नचाहेको तर युरोपले युद्ध शुरु गरेमा वार्ता गर्न कोही पनि बाँकी नरहने चेतावनी दिएका हुन् ।

पुटिनले रुस युक्रेनमा पूर्ण स्तरको युद्ध नलडेको दाबि गरेका छन् । उनले सर्जिकल अपरेशन जस्ता सीमित अपरेशनहरू गरिरहेको र युरोपसँग प्रत्यक्ष युद्ध भयो भने, अवस्था फरक हुनेछ र रुसले पूर्ण शक्तिका साथ प्रतिक्रिया दिने बताए । युक्रेन युद्ध सुरु भएको चार वर्ष बितिसकेको छ । यो दोस्रो विश्वयुद्ध पछि युरोपमा सबैभन्दा ठूलो द्वन्द्व हो । रूसले अझै छिमेकी युक्रेनलाई पूर्ण रूपमा कब्जा गरेको छैन । युक्रेनले युरोपेली देशहरू र संयुक्त राज्य अमेरिकाबाट बलियो समर्थन प्राप्त गरिरहेको छ ।

युरोपेली देशहरू र युक्रेनले यदि पुटिनले युक्रेन युद्ध जिते भने, तिनीहरूले कुनै पनि नेटो देशमा आक्रमण गर्न सक्ने बताउदै आएका छन् । यद्यपि, पुटिनले बारम्बार यो दाबीलाई अस्वीकार गर्दै आएका छन् । पुटिनले युरोपेली देशहरूले आफैंले रुससँग वार्ताको ढोका बन्द गरेको बताउदै उनीहरु युद्धको पक्षमा रहेको बताएका छन् ।

जर्मन विदेशमन्त्री जोहान वाडेफुलले नोभेम्बर २५ मा रूसले आगामी चार वर्ष भित्र नेटो देशमा आक्रमण गर्न सक्ने बताएका थिए । वाडेफुलले जर्मन गुप्तचर एजेन्सीहरूका अनुसार, रूसले २०२९ सम्ममा नेटो विरुद्ध युद्धको तयारी गरिरहेको बताए । उनले रूसको महत्वाकांक्षा युक्रेनमा मात्र सीमित नभएको र रूसले हालैका वर्षहरूमा आफ्नो सैन्य शक्ति र हतियार उत्पादनमा उल्लेखनीय वृद्धि गरेको दाबि गरेका छन् । उनले रूसले आफ्नो अर्थतन्त्र र समाजलाई युद्धमा धेरै हदसम्म अनुकूलित गरेको र रूसले आवश्यकताभन्दा बढी सैनिकहरू भर्ती गरिरहेको बताएका छन् ।

Read More

काठमाडौँ । पाकिस्तानका पूर्व प्रधानमन्त्री इमरान खानसँग उनकी बहिनी उज्मा खानले रावलपिंडीको अदियाला जेलमा भेट गरेकी छन् ।  मिडिया रिपोर्टका अनुसार बहिनि उज्माले इमरानसँग लगभग २० मिनेटसम्म भेटे गरेकी हुन् ।

उनको अवस्थाको बारेमा अनेक अफवाह फैलिरहेका बेला परिवारका सदस्यले पछिल्लो लगभग एक महिना भेट गरेको यो पहिलो पटक हो । बहिनि उज्माले इमरान खानको स्वास्थ्य राम्रो रहेको बताउदै उनलाई जेलमा मानसिक रूपमा यातना दिइएको दाबि गरेकी छन् । उनले यसका लागि पाकिस्तानी सेना प्रमुख असीम मुनीर जिम्मेवार रहेको बताएकी छन् । साथै उनले आफ्ना परिवारका सदस्यहरुसँग छलफल गरेपछि थप धारणा बाहिर ल्याउने बताएको मिडिया रिपोर्टमा उल्लेख छ ।

अफगानिस्तानका मिडियाबाट इमरान खानको जेलमा मृत्यु भएको भन्ने अफवाह शुरु भएको २७ दिनपछि इमरान खानले परिवारका सदस्यलाई भेटेका हुन् । उनले अन्तिम पटक नोभेम्बर ५ मा आफ्नी बहिनी नौरीन खानलाई भेटेका थिए । गत मंगलबार, इमरान खानका समर्थक र परिवारका सदस्यहरू उनलाई भेट्न गएका थिए, तर जेल प्रशासनले उनीहरूलाई अनुमति अस्वीकार गरेको थियो।

इमरानको मृत्यु भएको हल्ला फैलिए पछि पाकिस्तानभर ठूलो विरोध प्रदर्शन गरियो, जसले गर्दा रावलपिंडीदेखि इस्लामावादसम्म उच्च सतर्कता अपनाइएको थियो ।

पाकिस्तानी सरकारले डिसेम्बर १ देखि ३ सम्म रावलपिंडीमा सार्वजनिक सभा, र्‍याली, जुलुस, धर्ना र पाँच भन्दा बढी व्यक्तिको भेलामा प्रतिबन्ध लगाउने आदेश जारी गरेको छ भने धारा १४४ लागू छ । यस आदेशले हतियार, लाठी, गुलेली, पेट्रोल बम र विस्फोटक पदार्थ बोक्न निषेध गरेको छ । यसबाहेक, घृणायुक्त भाषण, प्रहरीको ब्यारिकेड हटाउने प्रयास, मोटरसाइकलमा पछाडि सवार दुई जना र लाउडस्पीकरको प्रयोगलाई पनि कडाइका साथ निषेध गरिएको छ ।

इमरान खानको पार्टी, पाकिस्तान तहरीक-ए-इन्साफ (पीटीआई) ले मंगलबार इस्लामावाद उच्च अदालत बाहिर र रावलपिंडी (अदियाला जेल) मा ठूलो मात्रामा विरोध प्रदर्शनको घोषणा गरेको थियो ।

Read More

काठमाडौँ । इण्डियन प्रिमियर लिग (आईपीएल) को २०२६ को मिनी अक्सनका लागि कुल १३ सय ५५ खेलाडीहरूले दर्ता भएका छन् ।

खेलाडी दर्ताको अन्तिम मिति नोभेम्बर ३० रहेकोमा यस समयसम्म १३ सय ५५ खेलाडी दर्ता भएका हुन् । फ्रान्चाइजीहरूले अब प्रमुख खेलाडीहरूमा सहमति जनाउनेछन्, र त्यसपछि लिलामीको लागि खेलाडीहरूको अन्तिम सूची तयार गरिने बताइएको छ ।

क्रिकइन्फोको रिपोर्ट अनुसार, यी १३ सय ५५ दर्ता भएका खेलाडीहरू मध्ये ४५ ले उच्चतम श्रेणी २ करोड भारु श्रेणीमा दर्ता गरेका छन् । यस सूचीमा अस्ट्रेलियाका ग्लेन म्याक्सवेलको नाम समावेश गरिएको छैन, यसको अर्थ उनी लिलामीमा समावेश हुने छैनन् । म्याक्सवेलले यस सिजनको अक्सनमा आफु समावेश नहुने जानकारी दिएका छन् ।

त्यस्तै क्यामरुन ग्रीन, लियाम लिभिङस्टोन, स्टिभ स्मिथ, रवि बिश्नोई, वेंकटेश अय्यर, मथिशा पाथिराना र वानिन्दु हसरंगा जस्ता खेलाडी यस सूचीमा समावेश रहेका छन् । खेलाडीको अक्सन यस बर्ष डिसेम्बर १६ मा अबुधाबीमा एकै दिन मात्र हुने बताइएको छ ।

प्रत्येक फ्रान्चाइजीले २५ खेलाडीहरू सम्मको टोली बनाउन सक्ने छन् । यस आधारमा, लिलामीमा बढीमा ७७ खेलाडीहरु मात्र किनिने छन्, जसमध्ये ३१ विदेशी खेलाडीहरू हुने छन् ।

उच्चतम आधार मुल्यमा विदेशी र केही भारतीय दुवै नामहरू समावेश छन्, तर केवल दुई भारतीय खेलाडीहरू, वेंकटेश अय्यर र रवि बिश्नोईले आफूलाई यो उच्चतम आधार मूल्यमा राखेका छन् ।

आइपीएलले अहिलेसम्म सार्बजनिक रुपमा खेलाडीको सूची जारी गरेको छैन तर मिडिया रिपोर्टका अनुसार नेपाली खेलाडी भने दर्ता भएका छैनन् ।

अक्सन सूचीमा अफगानिस्तान, अष्ट्रेलिया, इङ्गल्याण्ड, बंगलादेश, आयरल्याण्ड, न्यूजील्याण्ड, दक्षिण अफ्रिका, श्रीलंका, वेस्ट इन्डिज, जिम्बाब्वे, नेदरल्याण्ड्स, स्कटल्याण्ड र संयुक्त राज्य अमेरिकासहित १४ देशका विदेशी खेलाडीहरू दर्ता भएका छन् । त्यस्तै मलेसियाबाट पनि एक खेलाडीको नाम छ । भारतमा जन्मेका दायाँ हाते अलराउन्डर विरनदीप सिंहले ३० लाखको आधार मूल्यमा आफ्नो नाम दर्ता गरेका छन् ।

Read More

काठमाडौँ । प्रधानमन्त्री सुशिला कार्कीले दिगो विकासको लक्ष्य प्राप्तिको लागि अपाङ्गता भएका व्यक्तिको अपनत्व र नेतृत्वसहितको ऐक्यबद्धतालाई प्राथमिकतामा राखी अपाङ्गता समावेशी विकास र शासन व्यवस्थाको रूपान्तरणलाई अघि बढाउने प्रतिबद्धता व्यक्त गरेकी छन् ।

हरेक वर्ष डिसेम्बर ३ मा अपाङ्गता भएका व्यक्तिहरूको अन्तर्राष्ट्रिय दिवसका अवसरमा शुभकामना सन्देश दिदै अपाङ्गता भएका व्यक्तिको शिक्षा, स्वास्थ्य, रोजगारी, सहभागिता, सामाजिक सुरक्षा एवम् पुनः स्थापनामा सहज पहुँचका लागि सरकार क्रियाशील रहेको रहको उल्लेख गर्दै दिगो विकासको लक्ष्य प्राप्तिको लागि अपाङ्गता भएका व्यक्तिको अपनत्व र नेतृत्वसहितको ऐक्यबद्धतालाई प्राथमिकतामा राखी अपाङ्गता समावेशी विकास र शासन व्यवस्थाको रूपान्तरणलाई अघि बढाउने प्रतिबद्धता व्यक्त गरेकी हुन् ।

उनले भनेकी छन्- ‘नेपालको संविधान, नेपाल पक्ष राष्ट्र भएका अपाङ्गता भएका व्यक्तिको अधिकारसम्बन्धी अन्तर्राष्ट्रिय सन्धि, महासन्धि, विद्यमान कानुनहरूले अपाङ्गता भएका व्यक्तिको आर्थिक, सामाजिक, सांस्कृतिक र राजनैतिक अधिकारलाई अधिकतम रूपमा सम्बोधन गरेका छन्। अपाङ्गता भएका व्यक्तिको आर्थिक-सामाजिक अवस्था एवम् अपाङ्गताको गम्भीरताको आधारमा अपाङ्गता भएका व्यक्तिलाई सेवा सुविधामा प्राथमिकता दिई सबै अपाङ्गता भएका व्यक्तिलाई सम्मानजनक र समतामूलक जीवनयापनको वातावरण निर्माण गर्ने राज्यको नीति रहेको छ ।’

साथै प्रधानमन्त्री कार्कीले अपाङ्गता भएका व्यक्तिले भोगिरहेका भौतिक, दृष्टिकोणजन्य, सञ्‍चारमा रहेका अवरोध, कानुनीलगायत अन्य सबै अवरोधहरू हटाई सबै प्रकारका अपाङ्गता भएका व्यक्तिका लागि सहज, पहुँचयुक्त र सम्मानजनक अवस्थाको सिर्जना गर्नु आजको आवश्यकता रहेको बताएकी छन् । उनले भनेकी छन्- ‘अपाङ्गता भएका व्यक्तिको स्वावलम्बी र आत्मनिर्भर जीवनका लागि अपाङ्गता रोकथाम तथा पुनः स्थापनालगायत रोजगार तथा स्वरोजगारका कार्यक्रममा तीनै तहका सरकारको संयुक्त प्रयासले अपेक्षित उपलब्धि हासिल गर्न सकिने कुरामा विश्‍वस्त रहेको छु ।’

उनले यस दिवसले अपाङ्गता भएका व्यक्तिको क्षेत्रमा कार्यरत सरकारी तथा गैरसरकारी संस्था र सम्बन्धित सबै सरोकारवालाहरूलाई अपाङ्गता भएका व्यक्ति एवम् तिनका अभिभावकको हक, हित, अधिकार, संरक्षण र सुविधाको क्षेत्रमा अझ धेरै कार्य गर्ने प्रेरणा र ऊर्जा मिलोस् भन्‍ने शुभकामना व्यक्त गरेकी छन् ।

Read More

काठमाडौँ । तीव्र गतिमा बढ्दो जलवायु संकटले विश्वका तटीय शहरहरू र बस्तीहरूको भूगोल परिवर्तन गरेको छ । समुद्री सतह वृद्धि, क्षरण, बाढी र चक्रवातको बढ्दो खतराका कारण तटीय जनसंख्या पछि हट्न बाध्य भइरहेको अध्ययनले देखाएको छ । चीनको सिचुआन विश्वविद्यालय र कोपेनहेगन विश्वविद्यालयका अनुसन्धानकर्ताहरूले गरेको नयाँ विश्वव्यापी अध्ययन अनुसार, १९९२ र २०१९ को बीचमा विश्वको ५६ प्रतिशत तटीय क्षेत्र समुद्रबाट हटेको पाइएको छ ।

यसले मानव बस्तीहरूले जलवायु जोखिमहरूसँग अनुकूलन गर्न कदम चालिरहेको देखिएको छ । तटीय परिदृश्यहरू द्रुत गतिमा परिवर्तन भइरहेका छन्, केवल तीन दशकमा महत्त्वपूर्ण भौगोलिक परिवर्तनहरू भइरहेका छन् । तटीय शहरहरू व्यापार, अर्थतन्त्र र मानव बस्तीको प्राकृतिक केन्द्र भएका छन्, र आज पनि, विश्वको लगभग ४० प्रतिशत जनसंख्या समुद्रको सय किलोमिटर भित्र बस्छन् । यद्यपि, बढ्दो जलवायु खतराहरूको बीचमा, तटीय बस्तीहरूको संरचना द्रुत गतिमा परिवर्तन भइरहेको पाइएको छ ।

अध्ययनले १५५ देशहरूमा एक हजार ७१ तटीय क्षेत्रहरूको विश्लेषण गरेको थियो । प्राकृतिक प्रकोपले तटीय क्षेत्रबाट पछि हट्न बाध्य पार्छ भन्ने कुरा लामो समयदेखि विश्वास गरिँदै आएको छ, तर नेचर क्लाइमेट चेन्ज जर्नलमा प्रकाशित यो अध्ययनले विश्वव्यापी रूपमा पहिलो पटक प्रमाणित गरेको छ, वास्तविक कारण प्रकोप होइन, बरु कमजोर सामाजिक-आर्थिक संरचना र कमजोर पूर्वाधार हो । 

मिश्रित-प्रभाव मोडेलिङ प्रविधिहरू प्रयोग गरेर गरिएको अध्ययनले पुष्टि गर्‍यो, अनुकूलन क्षमतामा केवल १ प्रतिशत सुधारले तटीय क्षेत्रबाट पछि हट्ने दरलाई ४.२ प्रतिशतले घटाउँछ, जबकि पूर्वाधार संरक्षणमा १ प्रतिशत वृद्धिले यो दरलाई ६.४ प्रतिशतले घटाउँछ । यसले स्पष्ट रूपमा संकेत गर्छ कि जलवायु संकटको समयमा तटीय समुदायहरूको भविष्य खतराको परिमाणमा होइन, तर यसको प्रतिक्रिया दिनको लागि उनीहरूको तयारीमा निर्भर हुनेछ ।

अध्ययनको निष्कर्षले स्पष्ट रूपमा धेरैजसो क्षेत्रहरू समुद्रबाट टाढा सर्दैछन्, जबकि केवल १६ प्रतिशत समुद्रको नजिक सरेका छन् र २८ प्रतिशतले कुनै उल्लेखनीय परिवर्तन देखेका छैनन् । यसमा विश्वको धेरैजसो भाग समुद्रबाट टाढा सर्दै गर्दा, डेनमार्कको राजधानी कोपेनहेगन सहित केही उच्च आय भएका शहरहरू समुद्रको नजिक बसोबास गरिरहेको अध्ययनले देखाएको छ ।

Read More

काठमाडौँ । स्पेनिस ला लिगा अन्तर्गत बार्सिलोनाले एटलेटिको म्याड्रिडलाई पराजित गरेको छ ।

गएराती सम्पन्न खेलमा बार्सिलोनाले एटलेटिको म्याड्रिडलाई ३-१ गोल अन्तरले पराजित गरेको हो । बार्सिलोनाको जितमा राफिन्हा, डानी ओल्मो र फेरान टोरेजले एक एक गोल गरेका थिए । त्यस्तै एटलेटिको म्याड्रिडका लागि एक गोल एलेक्स बाएनाले गरेका थिए ।

यो जितपछि बार्सिलोनाको १५ खेलमा ३७ अंक भएको छ र शिर्ष स्थानमा कायम छ । त्यस्तै दोस्रो स्थानमा रहेको रियल म्याड्रिडको भने १४ खेलमा ३३ अंक रहेको छ । त्यसैगरी एटलेटिको म्याड्रिडको भने १५ खेलमा ३१ अंक रहेको छ र चौथो स्थानमा रहेको छ ।

Read More

काठमाडौँ । नेपाल प्रिमियर लिग (एनपीएल) अन्तर्गत आज एक खेल हुदैछ । आज विराटनगर किंग्स र लुम्बिनी लायन्सबीच दिउसो ४ बजेदेखि खेल हुदैछ ।

जारी एनपीएलमा विराटनगर किंग्सले ५ खेलमा ४ जित र एक हारसहित ८ अंक रहेको छ । आजको खेल जितेमा विराटनगरले प्लेअफमा आफ्नो स्थान सुनिश्चित गर्नेछ ।

त्यस्तै लुम्बिनी लायन्सका लागि प्लेअफमा आफ्नो स्थान सुरक्षित गर्न यो खेल जित्नैपर्ने अवस्था रहेको छ । लुम्बिनीले हालसम्म ५ खेलमा २ जित हासिल गरेको छ भने २ ३ खेलमा हार बेहोरेको छ ।

सन्दीप लामिछानेको कप्तानीमा रहेको विराटनगरमा लोकेश बम, प्रतिश जिसी जस्ता राष्ट्रिय खेलाडी छन् भने जर्ज मुन्सी, मार्टिन गप्टिल, शुभम सुबहस रंजने, मर्चेन्ट डी लंगे, फाफ डु प्लेसिस, साम्युएल डाली हीजलेट जस्ता विदेशी खेलाडी रहेका छन् । फाफ डु प्लेसिसले सम्भवत आजको खेलमा विराटनगरका लागि खेल्ने छन् ।

त्यस्तै रोहित कुमार पौडेलको कप्तानीमा खेलिरहेको  लुम्बिनीमा सन्दीप जोरा, विवेक यादव जस्ता राष्ट्रिय खेलाडी छन् भने थोमस ड्राका, डार्सी सर्ट, गुलबदीन नाइब, जेजे स्मिथ र रुबेन ट्रम्पलम्यान जस्ता विदेशी खेलाडी रहेका छन् ।

Read More

काठमाडौँ । आज ३४औँ अन्तर्राष्ट्रिय अपाङ्गता दिवस विश्वभर मनाइदैछ । आज नेपालमा पनि विभिन्न कार्यक्रम गरी अन्तर्राष्ट्रिय अपाङ्गता दिवस मनाइँदैछ । 

यस बर्षको अन्तर्राष्ट्रिय अपाङ्गता दिवसको नारा ‘सामाजिक प्रगतिलाई अगाडि बढाउन अपाङ्गता समावेशी समाजहरूलाई प्रवर्द्धन गर्ने’ भन्ने रहेको छ । यस विषयवस्तुको अर्थ समाजलाई न्यायपूर्ण बनाउन र अपाङ्गता भएका व्यक्तिहरूको अधिकारको सम्मान गर्न हामी सबै मिलेर काम गर्नु आवश्यक रहेको छ भन्ने हो ।

संयुक्त राष्ट्र सङ्घले सन् १९८१ लाई अपाङ्ग वर्ष घोषणा गरी विश्वव्यापी रूपमा मनाउन आह्वान गरेपछि प्रत्येक वर्ष डिसेम्बर ३ मा विश्वभर अपाङ्गता दिवस मनाउन सुरु गरिएको हो ।

अपाङ्गता भएका व्यक्तिहरूले गर्नुभएको सकारात्मक र उपलब्धिमूलक कथाहरूलाई पनि आज विश्व समुदायले विभिन्न माध्यम मार्फत अवलोकन गर्दछन् भने अर्कोतर्फ अपाङ्गमैत्री समाज अनि संरचनाका लागि पैरवी पनि गरिन्छ । हरेक सरकार अनि सङ्गठनहरूले अपाङ्गता भएकाहरूलाई प्राथमिकतामा राख्ने अनि समान वातावरण दिने प्रतिबद्धता राखेका हुन्छन् र आज त्यो वाचा गरेका कुराहरू उपलब्धिका रूपमा कति प्राप्त भए वा भएनन् भन्ने याद दिलाउने दिन पनि हो ।अपाङ्गता भएको जनसङ्ख्यालाई साथै लिएर हिँड्न नसक्ने हो भने संसारले दिगो र फराकिलो विकास पाउन सक्दैन ।

अपाङ्गता विभिन्न किसिमको हुन्छ र हरेक प्रकारका अपाङ्गताका लागि विशेष प्रविधि र व्यवस्था जरुरी हुन्छ, सबैको ध्यान यसतर्फ पुग्न जरुरी छ । प्रत्येक विद्यालयहरूमा सहज अपाङ्गमैत्री शिक्षा जस्तै: ब्रेल लिपी अनि साङ्केतिक भाषामा शिक्षाको व्यवस्था, सहज आवत-जावतगर्न अपाङ्गमैत्री संरचना जरुरी छ । अपाङ्गता भएका साथीहरूमा राज्यले गरेका लगानी पक्कै खेर जाँदैन किनकि सक्षम नागरिक उत्पादन गर्न सके वहाँहरूको सेवा र क्षमताले राज्यको विकासमा नै थप टेवा पुग्नेछ ।

Read More

जनकपुरधाम । मधेश प्रदेशका मुख्यमन्त्री सरोज कुमार यादवले आज विश्वासको मत लिने भएका छन् । 

विश्वासको मत लिने प्रयोजनका लागि उपसभामुख बबिता राउत ईश्वरले आज बिहान साढे ८ बजेका लागि प्रदेश सभाको बैठक बोलाएकी छन् । त्यसैगरी प्रदेस सभा अघि कार्य व्यवस्था परामर्श समितिको बैठक बिहान ७ बजे बोलाइएको छ । 

सर्वोच्च अदालतले २४ घण्टाभित्र मुख्यमन्त्री यादवलाई विश्वासको मत लिन परमादेश जारी गरेपछि पत्र प्रतिलिपी पाएको आधारमा मंगलबार प्रदेश सभालाई विश्वासको मत लिने वातावरण मिलाइदिन पत्र पठाएका थिए ।  उनले दिउँसो २ बजेका लागि बैठक बोलाइदिन पत्र पठाए पनि मंगलबार साँझ बसेको सर्वदलीय बैठकमा बिहान साढे ८ बजे बैठक बोलाउन सहमति भएअनुसार बैठक आह्वान गरिएको हो । 

मधेश प्रदेशमा कूल १०७ सदस्यीय मध्य मधेश प्रदेशसभा रहेकोमा बहुमतका लागि ५४ प्रदेश सभा सदस्यको आवश्यकता पर्छ । तर, मुख्यमन्त्री यादवसँग हाल  एमालेका २४ जना प्रदेशसभा सदस्य, नेपाल संघीय समाजवादी पार्टीका एकजना र राष्ट्रिय प्रजातन्त्र पार्टीका एक जना प्रदेशसभा सदस्यको समर्थन छ।

तत्कालीन प्रदेश प्रमुख सुमित्रा सुवेदी भण्डारीले नेपालको संविधानको धारा १६८ को उपधारा ३ बमोजिम सबैभन्दा ठूलो दलको हैसियतले नेकपा एमालेका दलका नेता यादवलाई गत कार्तिक २४ गते मुख्यमन्त्रीमा नियुक्त गरेकी थिइन्  ।  सो नियुक्तिपछि मधेश प्रदेशको राजनीति तरंगित बनेको थियो ।  साथै सो नियुक्तिको विरोधमा सर्वोच्चमा कुल तीन रिट दायर भएका थिए । साथै सरकारले प्रदेश प्रमुख भण्डारीलाई समेत पदबाट हटाएर सुरेन्द्र लाभ कर्णलाई नियुक्त समेत गरिसकेको छ ।

Read More