काठमाडौँ । बेलायतको सार्वजनिक प्रसारण संस्था बीबीसीले ठूलो मात्रामा कर्मचारी कटौती गर्ने निर्णय गरेको छ ।

आगामी दुई वर्षभित्र करिब दुई हजार कर्मचारी हटाइने जनाइएको छ, जसले कुल कर्मचारीको झण्डै १० प्रतिशतलाई असर पार्नेछ । यो निर्णय करिब पाँच अर्ब पाउण्ड बराबरको खर्च बचत गर्ने उद्देश्यले लिइएको हो ।

बीबीसीका कार्यवाहक महानिर्देशक रोड्री टेल्फन डेविसले बुधबार यसबारे जानकारी दिएका हुन् । उनका अनुसार सन् २०११ पछि यो सबैभन्दा ठूलो कर्मचारी कटौती हुनेछ । हाल बीबीसीमा करिब २१ हजार पाँच सय कर्मचारी कार्यरत छन् ।

डेविसले यो निर्णयले कर्मचारीमा चिन्ता र अनिश्चितता बढाउने स्वीकार गर्दै वर्तमान आर्थिक अवस्थाका कारण यस्तो कदम चाल्न बाध्य भएको बताएका छन् । बढ्दो महँगी, लाइसेन्स शुल्कबाट घट्दो आम्दानी, व्यापारिक आम्दानीमा गिरावट र विश्व आर्थिक अस्थिरताले खर्च कटौती गर्नुपर्ने अवस्था आएको उनको भनाइ छ ।

खर्च घटाउन बीबीसीले नयाँ भर्नामा नियन्त्रण गर्ने, यात्रामा हुने खर्च कम गर्ने, व्यवस्थापन परामर्शमा खर्च घटाउने तथा कार्यक्रम र भेलामा हुने खर्च कटौती गर्ने योजना बनाएको छ ।

यसका साथै लागत घटाउन प्रविधिको प्रयोग बढाउनेतर्फ पनि बीबीसीले ध्यान केन्द्रित गरेको छ । बीबीसीको मुख्य आम्दानी बेलायतका घरधुरीबाट उठाइने वार्षिक लाइसेन्स शुल्कबाट आउने गर्छ ।

Read More

काठमाडौँ । ‘भूतपूर्व सैनिक सम्मेलनको प्रण-सैनिक पुनर्मिलन, हिताधिकारीको कल्याण र कोषको दिगोपन’ भन्ने मूल सन्देशका साथ मध्य पूर्वी पृतनाको जिम्मेवारी क्षेत्र अन्तर्गत मधेसका जिल्लाहरूमा भूतपूर्व सैनिक सम्मेलन-२०८२ सञ्चालन भएको छ ।

मुख्य सम्मेलन केन्द्र, मध्य पूर्वी पृतना, बर्दिबासमा प्रधान सेनापति अशोक राज सिग्देल र अन्य २ वटा उपकेन्द्रहरूमा ज्येष्ठ अधिकृतको प्रमुख आतिथ्यमा सञ्चालन भएको यस सम्मेलनमा उक्त क्षेत्रमा बसोबास गर्ने करिब दुई हजार पाँच सय अवकाश प्राप्त सैनिक तथा परिवारजनको उपस्थिति रहेको थियो ।    

नेपाली सेना कल्याणकारी बोर्डको समन्वय तथा संयोजकत्वमा सञ्चालन भएको सम्मेलनमा ज्येष्ठ भूतपूर्व सैनिक तथा ज्येष्ठ एकल महिला र ४ जना सन्ततिलाई नेपाली सेनामा सेवा गर्न प्रेरित गर्ने १ जना अभिभावकलाई सम्मान गर्नुका साथै सर्वोत्कृष्ट र उत्कृष्ट उद्यमीहरूलाई प्रशंसा-पत्र एवं पुरस्कार वितरण गरिएको थियो । सोही क्रममा फरक क्षमता भएका तथा अशक्त ८ (आठ) जना भूतपूर्व सैनिकहरूलाई व्हिल चेयर तथा बैसाखी वितरण गरिएको थियो ।

यस प्रकारको कार्यक्रमले सेवारत र अवकाश प्राप्त सैनिकहरू बिचको सम्बन्धलाई निरन्तरता दिँदै कल्याणकारी कोषको स्थायित्व एवं गुणात्मक सेवा प्रदान गर्न उपयुक्त तथा व्यवहारिक सुझाव सङ्कलन गरी हिताधिकारीहरुलाई शिक्षा, स्वास्थ्य, सहुलियत र स्वरोजगारका क्षेत्रमा समयानुकूल सुविधा प्रदान गर्न मद्दत पुग्ने विश्वास नेपाली सेनाले लिएको छ । 

आर्थिक वर्ष २०८२/०८३ को भूतपूर्व सैनिक सम्मेलन मध्ये मध्य पूर्वी पृतना अन्तर्गतका हिमाली तथा पहाडी जिल्लाहरूमा मिति २०८३ वैशाख ५ गते आयोजना हुने कार्यक्रम रहेको छ ।

Read More

काठमाडौं । अर्थमन्त्री डा. स्वर्णिम वाग्लेले सरकार संबिधानप्रति प्रतिबद्ध रहेको बताएका छन् ।

विहिबार अन्तर सरकारी वित्ति परिषद् तथा विषयगत समितिको बैठकमा बोल्दै मन्त्री वाग्लेले सरकार संबिधानप्रति प्रतिबद्ध रहेको र संबिधान परिवर्तन गर्दा पनि सरकारले संबिधानकै धारामा टेकेर गर्ने स्पष्ट गरेका हुन् । उनले करिब दुई तिहाईको बहुमत आएको अवस्थामा संबिधानमा के के परिवर्तन गर्ने हुन् भन्ने हल्ला चलाइएको बताउदै मन्त्री वाग्लेले सरकार संबिधानप्रति प्रतिबद्ध रहेको स्पष्ट गरेको बताए ।

सरकार सेवामुखी काम गर्न प्रतिबद्ध रहेको बताउदै मन्त्री वाग्लेले यसको शुरुवात समेत गरिसकेको बताए । उनले ठुलो जनमतसाथ आएको सरकारलाई सामान्य काम चलाउ किसिमको काम गर्ने छुट नभएको भन्दै आफुहरुले व्यापक सुधारका काम गर्न शुरु गरेको बताए ।

उनले बजेटमार्फत दर्जनौं ऐन खारेज र संशोधन गर्ने बताउदै नियमन गर्ने ऐन नभएमा नयाँ ऐन ल्याउने तयारीका साथ काम गरिरहेको बताए । 

मन्त्री वाग्लेले विकासको बाधक बनेको भनिएको खरिद ऐनलाई छिटो परिवर्तन गर्ने बताउदै अध्यादेशबाट गर्ने वा संसदको आउदो अधिवेशनबाटै परिवर्तन गर्ने प्रतिबद्धता जनाए ।

उनले सरकारले रुपान्तरणकारी पूर्वाधारको विकास गर्ने तयारीमा सरकार रहेको बताए । मन्त्री वाग्लेले ठुला पूर्वाधारमा निजी क्षेत्रलाई ल्याउने बताउदै भारतले अपनाइरहेको टोल सडकको अवधारणाको सानो अंश नेपालमा ल्याउने बताए ।

Read More

काठमाडौँ । राष्ट्रिय स्वतन्त्र पार्टी (रास्वपा) ले संसदीय समितिको सभापतिका उम्मेदवार टुङ्गो लगाएको छ ।

बिहीबार बसेको रास्वपा संसदीय दलको बैठकले २ संयुक्तसहित १० एकल समितिका सभापतिको उम्मेदवार टुङ्ग्याएको हो ।

त्यस्तै रास्वपाले मुख्य सचेतक र दुई जना सचेतक चयन गरेको छ । बैठकले मुख्य सचेतकमा कबिन्द्र बुर्लाकोटीलाई चयन गर्ने निर्णय गरेको छ । त्यस्तै, बैठकले सचेतकमा प्रकाशचन्द्र परियार र क्रान्तिशिखा धिताललाई चयन गर्ने निर्णय गरेको छ ।

त्यस्तै कानुन समितिको सभापतिमा समीक्षा बास्कोटा, कृषि समितिको सभापतिमा अशोक चौधरी, पूर्वाधार समितिको सभापतिमा आशिष गजुरेल, राज्य व्यवस्था समितिको सभापतिमा हरि ढकाल, शिक्षा समितिको सभापतिमा डा. ओजश्वी शेरचन, सार्बजनिक सुनुवाई संयुक्त समितिको सभापतिमा बोधनारायण श्रेष्ठ, राज्यका निर्देशक सिद्धान्त र दायित्व समितिको सभापतिमा गणेश कार्की, अन्तर्राष्ट्रिय समितिको सभापतिमा सुम्निमा उदास, अर्थ समितिमा कृष्णहरि बुढाथोकी र उद्योग समितिको सभापतिमा रहवर अन्सारीलाई उम्मेदवार बनाउने निर्णय गरेको छ ।

Read More

काठमाडौँ । दलहरु संसदीय समितिको सभापतिको चयनमा जुटेका छन् । आज १ बजेदेखि ४ बजेसम्म प्रतिनिधि सभाका विषयगत समितिका सभापतिको मनोनयन दर्ताको समय रहेको छ  ।

यसैबीच समितिका सभापतिका उम्मेदवारको विषयमा छलफल गर्न रास्वपाको संसदीय दलको बैठक सिंहदरबारमा शुरु भएको छ ।

अर्कोतर्फ सिंहदरबरस्थित नेपाली कांग्रेसको संसदीय दलको कार्यालयमा प्रतिपक्ष दलहरु पनि छलफलमा जुटेका छन् । संसदीय समितिका सभापति चयनको विषयमा नेपाली काँग्रेसम एमाले र नेकपासहितका दलहरु छलफलमा जुटेका हुन् ।

कांग्रेसले सार्वजनिक लेखा समितिको सभापतिमा उम्मेदवारी दिने बताएको छ । तर सत्तारुढ दल रास्वपाले विपक्षी दलहरूलाई समितिको सभापति नदिने संकेत गरेको छ । सामान्यतया सार्बजनिक लेखा समितिको सभापति विपक्षी दललाई दिने प्रचलन रहेकाले यस पटक काँग्रेसले दाबि गरेको छ ।

Read More

काठमाडौँ । धनकुटामा १३ वर्षीया बालिकालाई जबरजस्ती करणी गरेको अभियोगमा महालक्ष्मी नगरपालिका-६ गुठ बस्ने ४२ वर्षीय धन बहादुर गिरीलाई प्रहरीले पक्राउ गरेको छ । 

धन बहादुरले ती बालिकालाई जबरजस्ती करणी गरेको भन्ने उजुरीको आधारमा प्रहरी चौकी लेगुवाबाट खटिएको प्रहरीले उनलाई पक्राउ गरेको हो । 

यस सम्बन्धमा प्रहरीले आवश्यक अनुसन्धान गरिरहेको जनाएको छ ।

Read More

काठमाडौँ । बलिवुडको २०२५ को सुपरहिट फिल्म ‘सैयारा’ को टिम फेरी अर्को फिल्ममा दोहोरिने भएको छ । निर्देशक मोहित सुरी, निर्माता अक्षय विधानी तथा मुख्य कलाकार अहान पाण्डे र अनीत पड्डा नयाँ प्रोजेक्टका लागि पुनः एकजुट भएका छन् ।

‘सैयारा’ टिमले नयाँ फिल्मको घोषणा गरेपनि फिल्मको नाम भने तय गरिएको छैन । सामाजिक सञ्जाल र मिडियामा फिल्मको नाम सैयारा- २ हुनसक्ने अड्कलबाजी चलेपनि निर्माण पक्षले यो फिल्मको नाम सैयारा- २ नहुने स्पष्ट गरेको छ ।   

यो नयाँ फिल्म एक भावनात्मक प्रेमकथामा आधारित हुने बताइएको छ, जसमा गहिरो भाव र संगीतलाई विशेष रूपमा जोड दिइनेछ । निर्माण टिमका अनुसार फिल्मको कथा अझै औपचारिक रूपमा सार्वजनिक गरिएको छैन ।

यशराज फिल्म्सको ब्यानरमा बन्ने यो फिल्म यसै वर्षदेखि छायांकनमा जाने तयारीमा छ । 

सैयारा फेम अभिनेता अहान पाण्डेले यसअघि आफ्नो दोस्रो फिल्म चर्चित निर्देशक अली अब्बास जफरसँग गर्ने घोषणा गरिसकेका छन् ।

Read More

काठमाडौँ । अमेरिका र इरानबीच २१ अप्रिलमा समाप्त हुने अस्थायी युद्धविरामअघि महत्वपूर्ण सम्झौताबारे छलफल तीव्र भएको छ । अमेरिकी सञ्चारमाध्यमका अनुसार पछिल्ला वार्तामा प्रगति देखिए पनि केही मुख्य विषयमा अझै सहमति बन्न सकेको छैन ।

यसैबीच तेहरानमा इरानी अधिकारीहरू र पाकिस्तानका सेनाप्रमुख असिम मुनीरबीच महत्वपूर्ण भेटवार्ता हुने भएको छ । मुनीर यसअघि नै तेहरान पुगेर इरानका विदेशमन्त्री अब्बास अराघाचीसँग भेट गरिसकेका छन् । उनी अमेरिकाको सन्देश लिएर गएको बताइएको छ । यस वार्तामा पाकिस्तान, इजिप्ट र टर्कीलाई मध्यस्थकर्ताको भूमिकामा राखिएको छ । 

उता अमेरिकी पक्षबाट उपराष्ट्रपति जेडी भान्स, स्टीव विटकोफ र जेरेड कुश्नर वार्तामा सक्रिय रहेको र प्रस्तावको मस्यौदा आदानप्रदान भइरहेको बताइएको छ ।

अधिकारीहरूका अनुसार सम्झौताको सम्भावनाका लागि युद्धविराम अवधि थप गर्ने विषयमा छलफल भइरहेको छ, तर अमेरिकाले अहिलेसम्म औपचारिक सहमति जनाएको छैन ।

अमेरिकी पक्षले होर्मुज जलडमरूमध्यमा बढाइएको नौसैनिक दबाब र आर्थिक अवरोधका कारण इरानमाथि सम्झौताका लागि दबाब बढेको दाबी गरेको छ । पछिल्ला दिनमा त्यहाँको अवस्थाले व्यापारिक जहाज आवतजावत प्रभावित भएको उल्लेख गरिएको छ ।

अमेरिकी सेन्ट्रल कमान्डका अनुसार पछिल्ला ४८ घण्टामा इरानी बन्दरगाहतर्फ जान लागेका केही जहाजहरू फिर्ता पठाइएको दाबी गरिएको छ ।

इरानले दैनिक करिब १५ लाख ब्यारेल तेल निर्यात गर्ने गर्छ, जसबाट ठूलो आम्दानी हुने भए पनि हालको अवरोधले त्यसमा असर पर्ने अनुमान गरिएको छ । खार्ग टापुबाट हुने ठूलो हिस्साको तेल निर्यात पनि प्रभावित हुन सक्ने बताइएको छ ।

यदि निर्यात ठप्प भयो भने उत्पादन नै रोक्नुपर्ने अवस्था आउन सक्ने भन्दै इरानको अर्थतन्त्र अझै दबाबमा पर्ने आकलन गरिएको छ । प्रतिबन्धका कारण पहिलेदेखि नै कमजोर रहेको अर्थतन्त्र पछिल्ला घटनाले थप संकटमा पुगेको बताइन्छ ।

यसैबीच इरानको परमाणु कार्यक्रमबारे चलिरहेको वार्तामा केही प्रगति भएको दाबी गरिएको छ। पछिल्ला कूटनीतिक प्रयासपछि दुवै पक्ष समझौताको दिशामा अघि बढिरहेको उल्लेख छ । पाकिस्तानी सेनाप्रमुख असिम मुनीरको तेहरान भ्रमणलाई पनि यही कूटनीतिक प्रक्रियाको महत्वपूर्ण भागका रूपमा हेरिएको छ । यद्यपि वार्तामा प्रगति भए पनि दुवै पक्षबीच अझै मतभेद कायम रहेको र केही पक्षहरू सम्झौताप्रति असन्तुष्ट रहेको बताइएको छ ।

Read More

काठमाडौँ । सडक सुरक्षा, सहरी सुरक्षा र सहरी व्यवस्थापनमा काठमाडौँ महानगरपालिका र नेपाल प्रहरी बिचको सम्बन्ध थप बलियो बनाइने भएको छ ।

काठमाडौँ महानगरपालिकाका कार्यवाहक प्रमुख र प्रहरी महानिरीक्षक दानबहादुर कार्कीका बिचमा भएको भेटघाटका क्रममा सडक सुरक्षा, सहरी सुरक्षा र सहरी व्यवस्थापनमा अहिलेको अवस्था र आवश्यकतामा छलफल गर्दै आपसी सम्बन्धलाई थप बलियो बनाएर नागरिकलाई सेवा प्रत्याभूति गराइने विषयमा कुराकानी भएको हो । 

भेटका क्रममा कार्यवाहक प्रमुख डंगोलले सडक सुरक्षा र ट्राफिक व्यवस्थापन, अतिक्रमित सार्वजनिक जग्गा संरक्षण र सार्वजनिक उपयोग प्रवर्धन, अव्यवस्थित बसोबास व्यवस्थापन, सहरी व्यवस्थापन, सहरलाई सडक मानवमुक्त बनाउने अभियान लगायतका काममा हामी नेपाल प्रहरीसँग सहकार्य गर्न चाहेको बताएकी थिइन् ।

त्यस क्रममा महानिरीक्षक कार्कीले, महानगरपालिकालाई आवश्यक पर्ने सहयोग उपलब्ध गराउन आफू तयार रहेको बताएका थिए ।

छलफलका क्रममा लागू औषधको दुव्र्यसन नियन्त्रण, सार्वजनिक स्थलमा धुमपान र मद्यपान नियन्त्रण, पार्किङ् व्यवस्थापन, सडक संकेत र ट्राफिक व्यवस्थापन, रात्रि बस र विहानी बस सेवाको सुरक्षा, सडक मानव मुक्त काठमाडौँ कार्यक्रमअन्तर्गत सञ्चालन हुने सडक सेवामा नेपाल प्रहरीको सहभागितालगायत विषयमा छलफल भएको थियो । 

छलफलमा महानगरपालिकाका प्रमुख प्रशासकीय अधिकृत सरोज गुरागाईँ सहित महानगरपालिकाका अधिकारीहरु र मानव सेवा आश्रमका अध्यक्ष रामजी अधिकारीसहित प्रतिनिधिहरु सहभागी थिए । 

Read More

काठमाडौँ । टर्कीमा लगातार दोस्रो दिन विद्यालयभित्र गोलीकाण्ड भएको छ ।

बुधबार एक माध्यमिक विद्यालयमा १३ वर्षका विद्यार्थीले अन्धाधुन्ध गोली चलाउँदा एक शिक्षकसहित ९ विद्यार्थीको मृत्यु भएको छ भने करिब १३ जना घाइते भएको स्थानीय मिडियाले उल्लेख गरेका छन् । आक्रमणपछि ती विद्यार्थीले आफैँमाथि पनि गोली प्रहार गरेका थिए । घाइतेमध्ये ६ जनाको अवस्था गम्भीर रहेको छ ।

प्रान्तीय गभर्नर मुकर्रम उनलुएरका अनुसार आक्रमणकारी आठौँ कक्षामा अध्ययनरत विद्यार्थी थिए । उनी विद्यालय आउँदा झोलाभित्र पाँच थान हतियार र सात वटा म्यागजिन रहेको बताइएको छ । प्रारम्भिक जानकारीअनुसार ती हतियार पूर्व प्रहरी अधिकृत रहेका उनका बाबुको हुन सक्ने आशंका गरिएको छ ।

घटनापछि विद्यालय क्षेत्रमा ठूलो संख्यामा सुरक्षाकर्मी परिचालन गरिएको छ र अनुसन्धान सुरु गरिएको छ । गभर्नरका अनुसार आक्रमणकारी विद्यालयभित्र छिरेर पाँचौँ कक्षाका विद्यार्थी पढिरहेको दुई कक्षामा प्रवेश गरी अन्धाधुन्ध गोली चलाएका थिए । घाइतेमध्ये केहीको शल्यक्रिया भइरहेको र अवस्था चिन्ताजनक रहेको बताइएको छ ।

यसबीच सामाजिक सञ्जालमा आएका भिडियोहरूमा गोली चलिरहेको बेला विद्यार्थीहरू ज्यान जोगाउन विद्यालयको माथिल्लो तलाबाट हाम फालेको देखिएको छ । न्यायमन्त्री अकिन गुरलेकले घटनाको गम्भीर छानबिन सुरु गरिएको जानकारी दिएका छन् ।

यसअघि मंगलबार पनि टर्कीको सनलिउरफा प्रान्तमा अर्को गोलीकाण्ड भएको थियो । त्यहाँ १८ वर्षका एक युवकले आफ्नो पुरानो विद्यालयमा प्रवेश गरी अन्धाधुन्ध गोली चलाउँदा १६ जना घाइते भएका थिए । तीमध्ये विद्यार्थी र शिक्षक दुवै थिए । आक्रमणपछि ती युवकले पनि आफैँमाथि गोली प्रहार गरेका थिए । त्यो घटना एक व्यावसायिक उच्च विद्यालयमा भएको थियो । आक्रमणकारी पूर्व विद्यार्थी रहेको र उनले शटगन लिएर विद्यालय पुगेको बताइएको छ । उनले कुनै निश्चित लक्ष्य नछानी गोली चलाएको र पछि विद्यालयभित्र लुकेर बसेको जनाइएको छ । उक्त घटनामा १० विद्यार्थी, ४ शिक्षक, एक क्यान्टिन कर्मचारी र एक प्रहरी अधिकारी घाइते भएका थिए। प्रहरीले विद्यालयलाई घेरेर विशेष कारबाही थालेको थियो। आक्रमणकारीले आत्मसमर्पण गर्न अस्वीकार गरेपछि कारबाहीका क्रममा उनले आफैँमाथि गोली चलाएका थिए । लगातार दुई दिन विद्यालयमा भएका यी घटनाले टर्कीमा सुरक्षा अवस्थाप्रति गम्भीर चिन्ता बढाएको छ ।

Read More