काठमाडौँ । काठमाडौँ उपत्यकामा ट्राफिक प्रहरीले शनिबार सञ्चालन गरेको ‘सप्राइज चेकिङ’ अभियानमा ५७२ जना सवारी चालक कारबाहीमा परेका छन्।

उपत्यकाका विभिन्न स्थानमा आकस्मिक रूपमा गरिएको जाँचका क्रममा ट्राफिक नियम उल्लङ्घन गर्ने चालकहरूलाई नियन्त्रणमा लिएर आवश्यक कारबाही गरिएको हो। महानगरीय ट्राफिक प्रहरीका अनुसार मापसे (मादक पदार्थ सेवन) गरी सवारी चलाउने पाँच जना चालकसमेत फेला परेका छन्।

त्यस्तै, रातो बत्ती उल्लङ्घन गर्ने १९ जना, लेन अनुशासन पालना नगर्ने ४१ जना र अन्य विभिन्न नियम तोड्ने ५०७ जना चालकलाई कारबाही गरिएको प्रहरीले जनाएको छ। ट्राफिक नियम उल्लङ्घनका घटनाहरू न्यूनीकरण गर्न यस्तो अभियानलाई निरन्तरता दिइने बताइएको छ।

प्रहरीले सबै सवारी चालकलाई नियमअनुसार सवारी सञ्चालन गर्न, आफ्नो र अरूको सुरक्षामा सजग रहन आग्रह गरेको छ। साथै, कुनै चालकले मादक पदार्थ वा लागूपदार्थ सेवन गरी सवारी चलाएको शंका लागेमा तत्काल नजिकको प्रहरी कार्यालय वा ट्राफिक कन्ट्रोल रुमको हटलाइन नम्बर १०३ तथा प्रहरीको हटलाइन १०० मा जानकारी दिन समेत अनुरोध गरिएको छ।

ट्राफिक व्यवस्थापनलाई थप प्रभावकारी बनाउन यस्ता आकस्मिक जाँच अभियानलाई अझ सशक्त बनाउने तयारी भइरहेको प्रहरीले जनाएको छ।

Read More

काठमाडौँ । काठमाडौँका विभिन्न स्थानमा रहेका सुकुम्बासी बस्तीमा डोजर चलाइएपछि बासविहीन बनेका परिवारका लागि सरकारले तत्काल खानाको व्यवस्था सुरु गरेको छ।

अवैध संरचना हटाउने अभियानअन्तर्गत बस्ती भत्काइएपछि सयौँ परिवार खुला आकाशमुनि बस्न बाध्य भएका छन्। यस्तो अवस्थामा प्रभावित नागरिकलाई भोकमरीको जोखिमबाट जोगाउन सरकार तथा सम्बन्धित निकायले राहतस्वरूप खाना वितरण गर्न थालेका हुन्।

स्थानीय प्रशासनका अनुसार, अस्थायी रूपमा भोजन उपलब्ध गराउने व्यवस्था मिलाइएको छ भने दीर्घकालीन व्यवस्थापनका लागि थप योजना बनाइँदै छ। पीडितहरूलाई नजिकका सुरक्षित स्थानमा राख्ने र आवश्यक आधारभूत सेवा उपलब्ध गराउने तयारी भइरहेको जनाइएको छ।

तर, बस्ती हटाइएका नागरिकहरूले भने वैकल्पिक बसोबासको ठोस व्यवस्था नभएसम्म समस्या समाधान नहुने बताएका छन्। उनीहरूले खानासँगै बस्नका लागि सुरक्षित स्थान र अन्य आवश्यक सेवाको माग गरेका छन्।

सरकारले भने सुकुम्बासी व्यवस्थापनलाई व्यवस्थित र दीर्घकालीन रूपमा समाधान गर्ने प्रतिबद्धता व्यक्त गर्दै तत्काल राहतलाई प्राथमिकतामा राखेको जनाएको छ।

Read More

काठमाडौँ । काठमाडौँको जडिबुटी क्षेत्रमा पनि रहेको सुकुमवासी बस्तीमा रहेका संरचनाहरू भत्काउने कार्य सुरु गरिएको छ।

महानगरपालिकाको पहलमा सञ्चालन गरिएको यो अभियान अन्तर्गत अव्यवस्थित रूपमा निर्माण गरिएका घरटहरा हटाउन डोजर प्रयोग गरिएको हो।

शनिबार बिहानदेखि नै सुरक्षाकर्मीको उपस्थितिमा बस्ती खाली गराउने र संरचना हटाउने काम अघि बढाइएको छ। लामो समयदेखि सार्वजनिक तथा सरकारी जग्गा अतिक्रमण गरी बसोबास गर्दै आएका सुकुमवासीहरूलाई यसअघि नै सूचना दिइएको जनाइएको छ।

स्थानीय प्रशासनका अनुसार, बस्ती व्यवस्थापन र सहरी सौन्दर्य कायम राख्ने उद्देश्यले यो कदम चालिएको हो। यद्यपि, बस्तीमा बसोबास गर्दै आएका परिवारहरूले भने वैकल्पिक बसोबासको व्यवस्था नगरी जबरजस्ती हटाइएको भन्दै असन्तुष्टि जनाएका छन्।

भत्काउने क्रममा केही स्थानमा स्थानीयवासी र सुरक्षाकर्मीबीच सामान्य तनाव समेत देखिएको थियो। अवस्था नियन्त्रणमा राख्न थप सुरक्षाकर्मी परिचालन गरिएको छ।

महानगरले यसअघि पनि विभिन्न स्थानमा अवैध संरचना हटाउने अभियान सञ्चालन गर्दै आएको छ। जडिबुटी क्षेत्रको बस्ती हटाइएसँगै उक्त स्थानको प्रयोग कसरी गरिने भन्ने विषयमा थप योजना सार्वजनिक हुने अपेक्षा गरिएको छ।

Read More

काठमाडौँ । नेपालले आइसीसी क्रिकेट विश्वकप डिभिजन लिग-२ को सिरिजमा विजयी शुरुवात गरेको छ । शनिबार युएईलाई ३७ रनले पराजित गरेर नेपालले विजयी शुरुवात गरेको हो ।

नेपालले दिएको २०१ रनको लक्ष्य पछाएको युएईले ४८.२ ओभरमा अल आउट हुदै १६३ रन बनौएको थियो ।

युएईका लागि हर्प्रित सिंहले सर्बाधिक ३९ रन बनाए भने कप्तान मुहमद वासीमले ३४ र आकाशदीप नाथले ३० रन बनाएका थिए ।

त्यस्तै नेपाली बलर करण केसीले ४ विकेट लिए भने सोमपाल कामी र सन्दीप लामिछानेले २-२ तथा दिपेन्द्र सिंह ऐरी र ललित राजबंशीले एक एक विकेट लिएका थिए ।  

यसअघि टस हारेर पहिला ब्याटिंग गरेको नेपालले ४८.१ ओभरमा अल आउट हुदै २०० रन बनाएको थियो । नेपालका लागि दिपेन्द्र सिंह ऐरीले सर्बाधिक ७५ रन बनाएका थिए भने कुशल भुर्तेलले २४, करण केसीले २२, बसिर अहमदले २०, आरिफ सेख र सोमपाल कामीले १५-१५ रन बनाएका थिए । त्यस्तै युएईका बलर अजय कुमार र जुनैद सिद्धिकीले ३-३ विकेट लिएका थिए भने  खुजैमा तनवीरले २ विकेट लिएका थिए । त्यस्तै हैदर अली र मुहमद शहदादले एक एक विकेट लिएका थिए ।

यो जितपछि नेपालको लिग-२ मा २१ खेलमा १४ अंक रहेको छ र नेपाल हाल सातौं स्थानमा छ । त्यस्तै युएईको २१ खेलमा १० अंक रहेको छ । अब सिरिज अन्तर्गत अर्को खेल सोमबार युएई र ओमानबीच हुदैछ ।

Read More

काठमाडौँ । जल तथा मौसम विज्ञान विभागले देशका विभिन्न क्षेत्रमा मेघगर्जन र चट्याङसहित वर्षा भइरहेको जनाएको छ।

विभागका अनुसार हाल कोशी, गण्डकी र लुम्बिनी प्रदेशका केही स्थान तथा बागमती प्रदेशका थोरै स्थानमा मध्यम वर्षा भइरहेको छ।

यो मौसम प्रणाली पूर्वतर्फ सर्ने क्रममा रहेकाले आसपासका क्षेत्रमा थप वर्षा हुने सम्भावना रहेको विभागले जनाएको छ।

विभागले मेघगर्जन, चट्याङ तथा वर्षाका कारण हुन सक्ने जोखिमलाई ध्यानमा राख्दै आवश्यक सतर्कता अपनाउन सर्वसाधारणलाई आग्रह गरेको छ।

Read More

काठमाडौँ । नेपाल मेडिकल काउन्सिलले एमबीबीएस तथा बीडीएसपछि प्राप्त एमपीएच, एमडी र एमएस इन बेसिक साइन्सेसको शैक्षिक उपाधिलाई निश्चित मापदण्डका आधारमा समकक्ष मान्ने निर्णय गरेको छ । काउन्सिलको शुक्रबार बसेको पूर्ण बैठकले यस्तो निर्णय गरेको रजिष्ट्रार डा. सतिस कुमार देवले जानकारी दिएका हुन् ।

काउन्सिलका अनुसार एमबीबीएस र बीडीएस दुवै चिकित्साशास्त्रअन्तर्गत समान तहको स्नातक उपाधि मानिन्छ । यी दुवै अध्ययनपछि चिकित्साशास्त्रको स्नातकोत्तर तहमा नन–क्लिनिकल विशेषज्ञता वा एमपीएच, एमडी तथा एमएस अध्ययन गरिने भएकाले ती उपाधिको ज्ञान, सीप र जनस्वास्थ्य तथा स्वास्थ्य व्यवस्थापनमा योगदान समान र विशिष्टीकृत हुने निष्कर्ष निकालिएको छ ।

सम्बन्धित शिक्षण संस्थाको पाठ्यक्रम र अन्तर्राष्ट्रिय अभ्यासलाई ध्यानमा राख्दै एमबीबीएस वा बीडीएसपछि प्राप्त एमपीएच, एमडी तथा एमएस इन बेसिक साइन्सेसलाई निश्चित मापदण्ड पूरा गरेपछि समकक्ष मानिने काउन्सिलले जनाएको छ।

Read More

काठमाडौँ । इरानको राजधानी तेहरानस्थित इमाम खुमैनी अन्तर्राष्ट्रिय विमानस्थलबाट शनिबार बिहानदेखि अन्तर्राष्ट्रिय उडान पुनः सुरु भएको छ ।

इरानी सञ्चारमाध्यमका अनुसार यस विमानस्थलबाट मध्यपूर्वका विभिन्न सहरतर्फ उडान सञ्चालनमा आएको छ । तीमध्ये साउदी अरेबियाको मदिना, ओमानको मस्कट र टर्कीको इस्तानबुल पनि रहेका छन् ।

फेब्रुअरी २८ मा अमेरिका र इजरायलसँग युद्ध सुरु भएपछि इरानको हवाई क्षेत्र अधिकांश रूपमा बन्द भएको थियो । त्यसयता करिब दुई महिनादेखि यात्रुवाहक उडान स्थगित रहेको थियो ।

अप्रिल ८ मा पाकिस्तानले अमेरिका र इरानबीच दुई साताको सशर्त युद्धविराममा सहमति भएको जनाएको थियो ।

अमेरिकी राष्ट्रपति डोनाल्ड ट्रम्पले अप्रिल २१ मा इरानले वार्ताका लागि प्रस्ताव नल्याएसम्म उक्त युद्धविराम अवधि थप्ने सहमति भएको बताएका थिए ।

यसैबीच, इरानका विदेशमन्त्री अब्बास अराघचीको नेतृत्वमा प्रतिनिधिमण्डल अहिले पाकिस्तानमा रहेको छ। विभिन्न प्रतिवेदनमा अमेरिकी प्रतिनिधिमण्डल पनि पाकिस्तानतर्फ प्रस्थान गरेको उल्लेख गरिएको छ ।

Read More

काठमाडौँ । काठमाडौँका नदी किनारामा सार्वजनिक तथा सरकारी पर्ती जग्गामा अनधिकृत संरचना बनाएर राखिएका वस्ती खाली गराउने क्रममा वागमती नदी खण्डको थापाथली क्षेत्रको वस्ती खाली गराइ सकिएको छ । यस्ता अनधिकृत वस्ती खाली गराउन विहीबारदेखि माइकिङ गरेर सूचित गरिएको थियो । 

जारी गरिएको सूचनाको पालना गर्दै शुक्रबार केही परिवारले घर टहरा खाली गराएको र यो क्रम शनिवार विहानसम्म पनि जारी रहेकोले विहान ६ बजेदेखि घरटहरा भत्काउने कार्यक्रम पछि सारेर आफैँ खाली गर्ने अवसर प्रदान गरिएको थियो । शनिबार बिहान करिब ८ बजेबाट संरचना हटाउन थालिएको थियो । थापाथलीका संरचना खाली गरिसकेपछि मध्यान्नपछि गैरीगाउँका संरचना हटाउन थालिएको थियो । 

यस क्रममा घरबारविहीन तथा भूमिहीन व्यक्तिहरुलाई दशरथ रंगशालामा ल्याएर तथ्याङ्क संकलन भइरहेको छ । आज साँझ ६:१५ बजेसम्ममा ६८ परिवारको लगत संकलन भइसकेको काठमाडौँ महानगरपालिकाले जानकारी दिएको छ । उनीहरुमध्ये ३४ परिवार १४१ लाई सुन्दरीघाटस्थित राधास्वामी सत्संग आश्रममा पठाइएको छ । लगत संकलनसँगै १८ जनालाई आधारभूत स्वास्थ्य सेवासमेत प्रदान गरिएको छ र यो क्रम जारी रहेको छ ।

अब भोलि मनोहरासहित अन्य क्षेत्रका अव्यस्थित बस्तीहरु खाली गराउने क्रम जारी रहने महानगरले जनाएको छ । मनोहरा क्षेत्रमा ८० प्रतिशत भन्दा बढीले आफै बस्ति छोडेर गएको प्रहरीले जानकारी दिएको छ ।

Read More

काठमाडौँ । सरकारले काठमाडौं उपत्यकाका नदी किनार, जोखिमपूर्ण सार्वजनिक र सरकारी जग्गा बनाइएका बस्तीहरू खाली गराउने कार्य जारी राखेको छ ।

 यस क्रममा काठमाडौं महानगरपालिका वडा नम्बर ११ स्थित थापाथलीमा रहेको बस्ती खाली गरिएको छ भने वडा नम्बर ९ स्थित गैरीगाउँ र वडा नम्बर ३१ स्थित शान्तिनगरमा बस्ती खाली गर्ने क्रम जारी छ । 

यसैगरी, कागेश्वरी मनोहरा नगरपालिका वडा नम्बर ८ को गोठाटार बुद्धचोक र वडा नम्बर ९ को मनोहरा टोलमा रहेका अनधिकृत बस्तीहरू खाली गर्ने तयारी भएको छ।

अधिकारसम्पन्न बागमती सभ्यता एकीकृत विकास समितिले २०७९ सालमा तयार पारेको प्रतिवेदन अनुसार उपत्यकाका नदी किनारमा ३ हजार ४९६ घरधुरी अव्यवस्थित बसोबासी छन् ।

तीमध्ये काठमाडौं महानगरभित्र २ हजार २४५ घरधुरी छन् भने कागेश्वरी नगरपालिकामा ९०, बुढानीलकण्ठमा १५६, ललितपुर महानगरभित्र १७ र भक्तपुर नगरपालिकामा ७७३ अव्यवस्थित बसोबासी छन । 

तीन वर्ष अन्तरालमा केही घर थपिएका हुन सक्छन् । यस आधारमा काठमाडौं उपत्यकामा झन्डै चार हजार अव्यवस्थित बसोबासी रहेको अनुमान छ ।

बस्ती खाली गराउने क्रममा नेपाल प्रहरी र महानगरका सुरक्षाकर्मीहरूले सामान उठाउन र ढुवानी गर्न प्रत्यक्ष सहयोग गरेका छन्। यी क्षेत्रमा बसोबास गरिरहेकाहरूले पनि सरकारको यस कदममा सहयोग गरेपछि थापाथलीमा शान्तिपूर्ण र सौहार्दपूर्ण रूपमा बस्ती खाली गरिएको छ।

 हालसम्म थापाथलीमा बसोबास गरिरहेका ६८ परिवार सरकारको सम्पर्कमा आएका छन् भने अन्य स्थानबाट पनि सम्पर्कमा आउने क्रम जारी छ । सम्पर्कमा आएका परिवारहरूलाई दशरथ रंगशाला पुर्‍याएर उनीहरूको विवरण सङ्कलन गरी काठमाडौंका विभिन्न होटलहरूमा राख्ने तयारी छ।  हाललाई घरायसी सामानहरू कीर्तिपुरको सुन्दरीघाटस्थित राधास्वामी सत्संग ब्यास नेपालमा भिन्दाभिन्दै ठाउँ बनाएर सुरक्षित रूपमा राखिएको छ ।

अब होटलमा राखिएका परिवारहरू वास्तविक सुकुम्बासी हुन् वा होइनन् भन्ने पहिचान गर्ने कार्य भोलिबाटै सुरु गरिनेछ । वास्तविक सुकुम्बासी ठहरिएका परिवारलाई दुई साताभित्र नागार्जुन नगरपालिका वडा नम्बर १ स्थित सरकारी अपार्टमेन्टमा राखिने र त्यसलगत्तै उनीहरूको दीर्घकालीन व्यवस्थापनको काम सुरु गरिने सरकारको तयारी रहेको छ ।

Read More

काठमाडौँ । प्रतिकूल मौसमका कारण बीपी राजमार्गमा सवारी आवागमन पूर्ण रूपमा बन्द गरिएको छ।

काभ्रेपलाञ्चोक जिल्लाका विभिन्न स्थानमा अत्यधिक वर्षा भइरहेका कारण सम्भावित जोखिमलाई ध्यानमा राख्दै तत्कालका लागि राजमार्ग बन्द गरिएको जिल्ला प्रहरी कार्यालय काभ्रेपलाञ्चोकले जनाएको छ ।

प्रहरीका अनुसार लगातारको वर्षाले सडकमा पहिरो, ढुंगा खस्ने तथा अन्य अवरोधको जोखिम बढेकाले यात्रु र सवारी साधनको सुरक्षाका लागि यो निर्णय गरिएको हो ।

मौसममा सुधार आएपछि र सडकमार्ग सुरक्षित रहेको पुष्टि भएपछि अर्को सूचना जारी गर्दै बाटो सञ्चालनबारे जानकारी गराइने प्रहरीले जनाएको छ । थप जानकारी लिनुपर्ने भएमा १०० र १०३ नम्बरमा सम्पर्क गर्न प्रहरीले आग्रह गरेको छ ।

Read More