काठमाडौं । राष्ट्रिय स्वतन्त्र पार्टी (रास्वपा) ले देशभर आफ्नो संगठन सुदृढ गर्ने उद्देश्यसहित वैशाख १५ गतेदेखि जिल्ला अधिवेशन सुरु गर्ने निर्णय गरेको छ।
वनस्थलीस्थित पार्टी केन्द्रीय कार्यालयमा आइतबार बसेको सचिवालय बैठकले अधिवेशनको मिति तय गर्नुका साथै आवश्यक कार्यविधि पनि स्वीकृत गरेको हो। महामन्त्री कविन्द्र बुर्लाकोटी ले अधिवेशनलाई व्यवस्थित र प्रभावकारी बनाउन स्पष्ट निर्देशिका तयार पारिएको जानकारी दिए।
बैठकले केन्द्रीय संगठन विभागअन्तर्गत विज्ञ समूहमा तीन सदस्य मनोनयन गर्ने निर्णय गरेको छ। यसमा कमल खनाल (रुपन्देही), तोरण बिक (सुर्खेत) र उदय सापकोटा (रौतहट) चयन भएका छन्।
त्यसैगरी, प्रत्यक्ष निर्वाचित सांसद नभएका क्षेत्रमा समानुपातिक सांसदलाई जिम्मेवारी दिने नीति पनि पार्टीले लिएको छ।
बैठकले प्रवास विभाग प्रमुखको जिम्मेवारी दीपक बोहरा लाई दिएको छ। उनी पार्टीका केन्द्रीय सचिवालय सदस्य तथा सांसदसमेत हुन्।
रास्वपाले आगामी महाधिवेशनलाई लक्षित गर्दै कार्यविधि तयार पार्न मस्यौदा समिति गठन गर्ने निर्णय गरेको छ। साथै, केन्द्रीय समिति बैठकका लागि एजेन्डा पनि तय गरिएको छ।
पार्टीका अनुसार आगामी बैठकमा पदाधिकारी मनोनयन, विधान संशोधन तथा महाधिवेशन कार्यविधि जस्ता महत्वपूर्ण विषयमा विस्तृत छलफल हुनेछ।
