काठमाडौँ । राष्ट्रिय प्रजातन्त्र पार्टी (राप्रपा) भित्र महाधिवेशनलाई लिएर विवाद चर्किँदै जाँदा असन्तुष्ट समूहले नेतृत्वमाथि दबाब बढाएको छ।
आइतबार नेता धवलशमशेर राणा को नेतृत्वमा गएको टोलीले पार्टीका पूर्वअध्यक्ष पशुपति शमशेर राणा को निवास ‘विजयवास’ पुगेर महाधिवेशन समयमै गराउन पहल गर्न आग्रह गरेको हो। टोलीले प्रकाशचन्द्र लोहनी र कमल थापा लगायत नेताहरूसँग पनि भेट गर्दै केन्द्रीय कार्यसमितिको निर्णयअनुसार जेठभित्रै महाधिवेशन सम्पन्न गर्न वातावरण बनाउनुपर्ने माग राखेको छ।
भेटका क्रममा असन्तुष्ट पक्षले महाधिवेशनको मिति तत्काल घोषणा गरेर पार्टीभित्र देखिएको अन्योलता अन्त्य गर्नुपर्नेमा जोड दिएको छ। केन्द्रीय कार्यसमितिले जेठभित्र महाधिवेशन गर्ने निर्णय गरिसकेको अवस्थामा ढिलाइ हुनु उचित नभएको उनीहरूको भनाइ छ।
त्यसैगरी, महाधिवेशनलाई निष्पक्ष र विश्वसनीय बनाउन कुनै स्वतन्त्र व्यक्तित्वको संयोजनमा प्रक्रिया अघि बढाउनुपर्ने प्रस्ताव पनि उनीहरूले राखेका छन्। नेता सगुन सुन्दर लावती का अनुसार पार्टीलाई नयाँ दिशा र ऊर्जा दिन महाधिवेशन अपरिहार्य भएको भन्दै रोकिएको प्रक्रिया तुरुन्त अगाडि बढाउनुपर्ने माग गरिएको छ। उनले वर्तमान परिस्थितिमा नयाँ नेतृत्व र स्पष्ट कार्यदिशा आवश्यक रहेको उल्लेख गर्दै पार्टीका अभिभावकहरूले यसमा सक्रिय भूमिका खेल्नुपर्ने बताए।
महाधिवेशनको विषयमा पार्टीभित्र मतभेद बढिरहेका बेला असन्तुष्ट पक्ष पूर्वअध्यक्षहरूकहाँ पुगेको हो। यसलाई राप्रपाभित्र बढ्दो आन्तरिक तनाव र शक्ति संघर्षको संकेतका रूपमा समेत हेरिएको छ।
