काठमाडौँ । सरकारले अबदेखि सरकारी कर्मचारीहरूको तलबभत्ता मासिक होइन, अर्धमासिक रूपमा उपलब्ध गराउने भएको छ।
अर्थ मन्त्रालयले गत शुक्रबार महालेखा नियन्त्रक कार्यालय लाई पत्राचार गर्दै नयाँ भुक्तानी प्रणाली लागू गर्ने निर्णयबारे जानकारी गराएको हो।
यसअघि राष्ट्रसेवक कर्मचारीहरूले प्रत्येक महिनाको अन्त्यमा एकैपटक तलबभत्ता पाउँदै आएका थिए। तर अबदेखि महिनालाई दुई भागमा विभाजन गरेर नियमित अन्तरालमा भुक्तानी गरिने व्यवस्था लागू हुने भएको छ।
मन्त्रालयका अनुसार यो परिवर्तन कर्मचारीहरूको आर्थिक व्यवस्थापनलाई सहज बनाउन ल्याइएको हो।
अर्थ मन्त्रालयका सहसचिव डा. सुमन दाहाल का अनुसार अर्थमन्त्रीस्तरीय निर्णयपछि अर्धमासिक तलब प्रणाली कार्यान्वयनमा ल्याउने तयारी गरिएको हो।
सरकारी भुक्तानी प्रणालीमा गरिएको यो परिवर्तनलाई प्रशासनिक सुधारको रूपमा हेरिएको छ। अबदेखि तलब वितरण प्रक्रिया नियमित र समयमै हुने अपेक्षा गरिएको छ।
सरकारको यो कदमले कर्मचारीहरूको दैनिक खर्च व्यवस्थापनमा सहजता ल्याउने विश्वास व्यक्त गरिएको छ।
