काठमाडौँ । कांग्रेस सभापति गगन कुमार थापाले पार्टीभित्र देखिएको असन्तुष्टि र मतभेदलाई कम गर्दै एकताबद्ध कांग्रेस निर्माण गर्ने उद्देश्यसहित कूटनीतिक पहल सुरु गरेका छन्।
आइतबार साँझ थापा निवर्तमान कार्यवाहक सभापति पूर्णबहादुर खड्कालाई भेट्न गोल्फुटारस्थित निवास पुगेका थिए। सो भेटलाई पार्टीभित्रको एकता मजबुत बनाउने प्रयासका रूपमा हेरिएको छ।
भेटपछि थापाले पार्टीको बृहत्तर एकताका लागि वरिष्ठ नेताहरूसँग छलफल सुरु गरिएको बताए। उनले पार्टीभित्र रहेका असमझदारी हटाउँदै साझा दिशामा अघि बढ्नु आवश्यक रहेको धारणा राखे। “पार्टीलाई एकताबद्ध बनाउने उद्देश्यले हामीले सिनियर नेताहरूसँग संवाद सुरु गरेका छौँ,” थापाले भने।
थापाका अनुसार सर्वोच्च अदालतको पछिल्लो निर्णयले पार्टीभित्र एकता बलियो बनाउन र साझा यात्रामा अघि बढ्न सकारात्मक वातावरण सिर्जना गरेको छ।
नेपाली कांग्रेस का नेताहरूलाई आगामी १५औँ महाधिवेशनलाई केवल प्रक्रिया नभई पार्टी पुनर्गठन र सुदृढीकरणको अवसरका रूपमा लिन उनले आग्रह गरेका छन्।
थापाले महाधिवेशनलाई सफल बनाउँदै पार्टीलाई नयाँ दिशा दिने अवसरका रूपमा उपयोग गर्न सबै नेता–कार्यकर्तालाई आह्वान गरेका छन्। उनका अनुसार पार्टीभित्रको एकता नै आगामी राजनीतिक यात्राको आधार बन्नेछ।
