काठमाडौँ । राष्ट्रिय प्रजातन्त्र पार्टी (राप्रपा) का उपाध्यक्ष तथा पूर्वमन्त्री विक्रम पाण्डेलाई प्रहरीले पक्राउ गरेको छ। सरकारी बोलपत्र (टेन्डर) प्रणालीमा अनधिकृत पहुँच प्रयोग गरी ठेक्का आफ्नै कम्पनीतर्फ मोडेको आरोपमा उनलाई नियन्त्रणमा लिइएको हो।
केन्द्रीय अनुसन्धान ब्युरो (सीआईबी) का एआईजी डा. मनोज केसीले पाण्डे काठमाडौंबाट पक्राउ परेको पुष्टि गरेका छन्। यस प्रकरणमा थप अनुसन्धान भइरहेको प्रहरीले जनाएको छ।
पाण्डे कालिका कन्स्ट्रक्सनका सञ्चालक समेत हुन्। उनीविरुद्ध यसअघि पनि सिक्टा सिँचाइ आयोजनामा अनियमितता गरेको आरोपमा अख्तियार दुरुपयोग अनुसन्धान आयोगले २०७५ सालमा मुद्दा दायर गरेको थियो।
२०७९ सालमा सहरी विकास मन्त्री बनेका पाण्डे पछिल्लो समय पुनः विवादमा तानिएका छन्। पक्राउसँगै उनीमाथि लागेको आरोपबारे विस्तृत छानबिन अघि बढाइएको छ।
