काठमाडौँ । भक्तपुरको मनोहरा क्षेत्रको नदी किनारामा संरचना बनाएर बस्नेमध्ये करिब ८० प्रतिशत बासिन्दाले आफ्नो सामानसहित बस्ती छोडेका छन् ।
जिल्ला प्रहरी परिसर भक्तपुरका प्रहरी उपरीक्षक सूर्यबहादुर खड्काका अनुसार ८० प्रतिशतले आफै छोडेर हिडेको र बाँकी रहेका परिवारले पनि आफ्ना सामान ओसार्ने कार्य जारी राखेका छन् ।
यो बस्तीमा ७७७ घरटहरामा करिब एक हजार ६०० भन्दा बढी मानिस बसोबास गर्दै आएका थिए ।
काठमाडौँ । थापाथली र गौरीघाटस्थित अव्यवस्थित बस्ती खाली गरिएको छ ।
बस्ती खाली गराउँदा २७ परिवारका ८९ जनालाई किर्तिपुरस्थित सुन्दरीघाट राधास्वामी सत्संग आश्रम लगिएको छ । अव्यवस्थित वस्तीहरुबाट भूमिहीन र घरवारविहीन भन्ने व्यक्तिहरुलाई दशरथ रंगशाला ल्याएर स्क्रीनिङ्ग कार्य जारी रहेको काठमाडौँ महानगरले जानकारी दिएको छ ।
वस्तीका टहरा हटाउनु अघि आफैँ स्थानान्तरण भएर जान चाहनेलाई महानगर प्रहरी बल र नेपाल प्रहरीले गन्तव्यमा पुग्न मानवीय र सवारी साधन तथा व्यवस्थापकीय सहयोग गरेका थिए ।
काठमाडौँ । श्रम संस्कृति पार्टीका अध्यक्ष हर्क साम्पाङले प्रधानमन्त्री बालेन्द्र शाहलाई पुरानो जुङ्गाको लडाई छोड्न सुझाव दिएका छन् ।
सरकारले काठमाडौँ उपत्यकाका नदी किनारका सुकुम्बासी बस्तीमा डोजर चलाउन शुरु गरेपछि साम्पाङले प्रधानमन्त्री बालेनलाई पुरानो जुङ्गाको फाइट छोड्न आग्रह गरेका हुन् ।
उनले जग्गा जमीन तेरो न मेरो कसैको हुँदैन भन्दै पुरानो जुङ्गाको फाइट छोडेर विकासमा लाग्न आग्रह गरेका हुन् ।
उनले भनेका छन्:
बालेन जी… तपाइँलाई मेरो सुझाव “जनतालाई धेरै दु:ख नदिनु ! जग्गा जमीन तेरो न मेरो कसैको हुँदैन ! सबै जना एक दिन सडेर या जलेर खरानी हुँदै माटोमा बिलय हुनु पर्छ ! सत्य यही एउटा माटो हो ! त्यसैले चुनाव चिन्ह पनि माटो नै लिएर आएको म त ! बिकासमा लाग्नु ! पुरानो जुङ्गाको फाइट छोड्नु ! आजको मितिमा तपाईकै जुङ्गा लामो छ ! छोड्दिनु भो !”
काठमाडौँ । जारी आइपिएलमा आज दुई खेल हुदैछन् । आज पहिलो खेल दिल्ली क्यापिटल्स र पञ्जाव किंग्सबीच हुदैछ ।
दिल्लीमा हुने यो खेल नेपाली समय अनुसार दिउसो ३:४५ बजेदेखि शुरु हुदैछ ।
जारी आइपिएलमा दिल्लीले अहिलेसम्म ६ खेल खेलेको छ । जसमा ३ जित र ३ हार बेहोरेको छ । त्यस्तै पञ्जाव किंग्स भने अहिलेसम्म अपराजित रहेको एक मात्र टिम हो । अहिलेसम्म खेलेका ६ खेलमा ५ खेल जितेको छ भने एक खेल बर्षाले रद्ध भएको थियो ।
त्यस्तै आज दोस्रो खेल राजस्थान रोयल्स र सनराइजर्स हैदरावादबीच हुदैछ । जयपुरमा हुने यो खेल नेपाली समय अनुसार साँझ ७: ४५ बजेदेखि शुरु हुदैछ ।
जारी आइपिएलमा राजस्थानले अहिलेसम्म ७ खेलमा ५ जित र २ हार बेहोरेको छ र हाल १० अंकसहित दोस्रो स्थानमा छ । त्यस्तै सनराइजर्सले ७ खेलमा ४ जित र ३ हार बेहोरेको छ र ८ अंकसहित चौथो स्थानमा रहेको छ ।
काठमाडौँ । स्मार्टफोन कम्पनीहरूले जानाजानी फोन छिट्टै कमजोर बनाउने गरेको आशंकाबीच युरोपेली संघले यस विषयमा कडाइ थालेको छ ।
नयाँ फोन सुरुमा निकै छिटो चल्ने भए पनि केही समयपछि ब्याट्री छिट्टै सकिने, कार्यक्षमता घट्ने र मर्मत महँगो हुने समस्या बढ्दै गएको भन्दै यसलाई योजनाबद्ध रूपमा पुरानो बनाउने’ रणनीति मानिएको छ ।
युरोपेली संघका नीति निर्माताहरूका अनुसार धेरै कम्पनीहरूले उपकरणलाई यस्तो ढंगले डिजाइन गर्छन्, जसले केही वर्षपछि प्रयोग गर्न असहज बनाउछ। फोन पूर्ण रूपमा बिग्रिँदैन, तर ब्याट्री क्षमता घट्ने, सफ्टवेयर अद्यावधिक बन्द हुने र पार्टपुर्जा नपाइने कारण प्रयोगकर्ता नयाँ फोन किन्न बाध्य हुने अवस्था सिर्जना हुन्छ।
तथ्यांकअनुसार अधिकांश मानिसले २ देखि ३ वर्षभित्र स्मार्टफोन परिवर्तन गर्ने गरेका छन् । यसमा ब्याट्रीको अवस्था, कार्यक्षमता र मर्मत खर्च मुख्य कारण मानिएको छ ।
सन् २०१७ मा पुराना आइफोनको गति घटाइएको विषय सार्वजनिक भएपछि यो बहस अझ चर्किएको थियो। कम्पनीले ब्याट्री कमजोर हुँदा फोन अचानक बन्द हुन नदिन यस्तो गरिएको बताएको भए पनि यसले ब्याट्रीको अवस्थाले फोनको अनुभवमा सीधा असर पर्ने देखाएको थियो ।
पहिले फोनमा ब्याट्री सजिलै फेर्न सकिने भए पनि अहिले अधिकांश स्मार्टफोन बन्द संरचनामा आउने गरेका छन् । यसले फोन पातलो, पानी नछिर्ने र आकर्षक बनाएको भए पनि मर्मत कठिन र महँगो बनाएको छ ।
प्रयोगकर्ता कम्पनीकै सेवा प्रणालीमा निर्भर हुनुपर्ने अवस्था बढेको छ । युरोपेली संघले अब यस्ता उपकरणलाई बढी टिकाउ, सजिलै मर्मत गर्न सकिने र लामो समयसम्म प्रयोग गर्न मिल्ने बनाउने नियम ल्याउने तयारी गरेको छ। नयाँ व्यवस्थाअनुसार ब्याट्री लामो समय टिक्नुपर्ने, स्पेयर पार्ट्स लामो समयसम्म उपलब्ध हुनुपर्ने र सफ्टवेयर सहयोग पनि बढाइनेछ ।
साथै, तेस्रो पक्षबाट मर्मत गर्ने प्राविधिकलाई पनि आवश्यक उपकरण र जानकारी उपलब्ध गराइनेछ । यसले प्रयोगकर्तालाई बारम्बार नयाँ फोन किन्नुपर्ने बाध्यता घटाउने अपेक्षा गरिएको छ ।
काठमाडौँ । सन् १९८३ पछि भारतले सन् २०११ मा दोस्रो पटक एकदिवसीय विश्वकप उपाधि जित्दा टोलीमा रोहित शर्मा समावेश नगरेकोमा भारतीय क्रिकेट बोर्डका पूर्व मुख्य छनोटकर्ता कृष्णामाचारी श्रीकान्तले माफी मागेका छन्
श्रीकान्तले अयाज मेमनको क्रिकेटसम्बन्धि पोडकाष्टमा कुरा गर्दै त्यति बेला टोली छनोट गर्दा बलिङ गर्न सक्ने ब्याट्सम्यानलाई प्राथमिकता दिइएले रोहित छुटेको प्रतिक्रिया दिएका छन् । उनका अनुसार सन् १९८३ को शैलीअनुसार सबै खेलाडीले बहुआयामिक भूमिका खेल्न सक्ने रणनीति अपनाइएको थियो ।
श्रीकान्तले रोहितलाई टोलीमा नराखिएकोमा आफूलाई अहिले पनि दुःख लाग्ने भन्दै पछिल्लो समय व्यक्तिगत रूपमा माफी समेत मागेको खुलाएका छन् । उनले पछिल्लो बर्ष रोहितसँग माफी मागेको खुलाएका हुन् । साथै त्यो निर्णय जानाजानी नभई रणनीतिक सोचका कारण भएको पनि उनले स्पष्ट गरेका छन् ।
त्यतिबेला महेंद्र सिंह धोनीको कप्तानीमा भारतले उत्कृष्ट प्रदर्शन गर्दै फाइनलमा श्रीलंकालाई हराएर २८ वर्षपछि उपाधि जितेको थियो । प्रतियोगितामा युवराज सिंहले ब्याट र बल दुवैबाट उत्कृष्ट प्रदर्शन गर्दै ‘प्रतियोगिताकै उत्कृष्ट खेलाडी’ बनेका थिए । टोलीमा वीरेन्द्र सहवाग, सचिन तेन्दुलकर, सुरेश रैना र युसुफ पठानजस्ता आंशिक बलिङ गर्न सक्ने खेलाडी रहेकाले विशेषज्ञ ब्याट्सम्यानका रूपमा रोहितलाई स्थान दिन नसकिएको उनले बताएका छन् ।
यद्यपि श्रीकान्तले रोहित त्यतिबेला टोलीमा पर्ने योग्य खेलाडी रहेको स्वीकार गरेका छन् । रोहितले पनि २०११ को विश्वकप नखेल्नुपरेकोमा पटक-पटक दुःख व्यक्त गर्दै आएका छन् । उनले पछि सन् २००७ र २०२४ को टी–२० विश्वकप तथा च्याम्पियन्स ट्रफीका संस्करणहरू जिते पनि रोहितले अहिलेसम्म एकदिवसीय विश्वकप भने जितेका छैनन् । रोहितको कप्तानीमा भारत २०२३ को विश्वकपमा फाइनलमा पुगेपनि अस्ट्रेलियासँग पराजित हुन पुगेको थियो ।
काठमाडौँ । फोर्ब्सले विश्वका सबैभन्दा धनी व्यक्तिहरूको बारेमा नयाँ दृष्टिकोण जारी गरेको छ ।
अर्बपतिहरूको सूचीलाई उनीहरूको दानलाई ध्यानमा राखेर पुन: गणना गरिएको छ । यसको उद्देश्य संसारका सबैभन्दा उदार अर्बपतिहरू कस्तो हुन्थे भनेर बुझ्नु हो यदि उनीहरूले कहिल्यै दान नगरेको भए कति सम्पत्ति हुन्थ्यो भन्ने जान्नु रहेको जनाएको छ ।
यसको जवाफ दिन, फोर्ब्सले ‘रियल नेट वर्थ; श्रेणीकरण सिर्जना गर्यो । यसले अर्बपतिहरूले उनीहरूले दान गरेको शेयर राख्नेछन्, र नगद दान बजार दरमा लगानी गरिनेछ।
एलन मस्क दुबै फोर्ब्स सूचीमा शीर्ष स्थानमा छन् । यद्यपि, उनले वास्तवमा आफ्नो सम्पत्तिको सानो भाग मात्र दान गरेका छन्, लगभग ०.०६ प्रतिशत मात्र । बिल गेट्सले माइक्रोसफ्टको लगभग ७३१ मिलियन शेयर दान गरेका छन् । यदि उनले यी शेयरहरू राखेका भए, उनको सम्पत्ति लगभग चार गुणा बढी हुने थियो, जसले गर्दा उनी हाल १९औं को सट्टा विश्वको दोस्रो धनी व्यक्ति बन्ने थिए ।
त्यस्तै, वारेन बफेट ९ औंबाट तेस्रो स्थानमा पुग्ने थिए । उनले दान गरेका शेयरहरूको मूल्य २००६ देखि लगभग ७०० प्रतिशतले बढेको छ । उनले धेरै जसो बर्कशायर हाथवेका शेयर दान गरेका छन् ।
म्याककिन्से स्कट ५८ स्थान माथि चढेर २६ औँ स्थानमा पुग्ने थिए । उनका पूर्व पति जेफ बेजोस शीर्ष पाँचबाट बाहिरिने थिए ।
ईश्वर पोखरेल
एक समयकी नम्बर एक नायिका हो– रञ्जना । ऊ सुन्दर पनि उस्तै; उसको अभिनय पनि उस्तै बेजोड । सुटिङ् स्थलमा रञ्जनाका लागि हरबखत तयारीका अवस्थामा रहन्थे– मेकअपमेनहरू । मानौ, उनीहरूको चिन्ता सधैं रञ्जनाको मेकअपसंग रहन्छ ।
कुन्नि के भएर हो; रञ्जना आफ्ना लालाबालासहित शहरको मध्यम स्तरको होटलमा बस्न आएकी रहिछे– हिजो ।
अनेकन् अनुनय विनय गर्दा पनि सरकारिया गेस्ट रुममा बस्न नपाएपछि त्यही होटलमा बस्न आउनु भएको थियो– पूर्व सिडियो सा’ब हेमलाल पनि ।
बिहान रेस्टुरेन्टमा हेमलाललाई एउटा अनुहार चिनेचिने जस्तो लाग्यो । गहिरिएर हेर्दा स्पष्ट भयो– रञ्जना रहिछे । हेमलालले मनमनै भन्नु भो’– “छ्या, मेकअप नहुँदा त यस्ती पो रहिछे!”
रिटायर हुनुअघि हेमलालको तामझाम नै बेग्लै । दबदबा पनि । मोटर, सुरक्षा, शक्ति के थिएन र! आदेश दिए पुग्थ्यो; आदेश उचित थियो कि अनुचित भन्ने कुरा आदेश फत्ते भएपछि मात्र सोचिन्थ्यो ।
पूर्व सिडियो हेमलालले मनमनै फेरि भन्नु भो’– ‘रञ्जना, मेकअप नहुँदा तिमी बेग्लै; पदमा नहुँदा म पनि बेग्लै ।… तिमीलाई मैले चिनें; हेर न, रिटायर भएको भोलिपल्ट मलाई त पालेले पनि चिन्न इन्कार गरिदियो ।‘
काठमाडौँ । थापाथलीको सुकुम्बासी बस्ती क्षेत्रमा शनिबार बिहानैदेखि डोजर चलाइएको छ ।
यस अघि नै बस्ती हटाउने तयारीसँगै कडा सुरक्षा व्यवस्थाका बीच डोजरले घर तथा टहरा भत्काउन शुरु गरेको हो ।
सरकारले आजदेखि सुकुम्बासी बस्ती खाली गराउने यस अघि नै सूचना दिएको थियो भने कैयौं परिवार शुक्रबारनै सो स्थान छोडेर गएका थिए । शनिबार बिहानसम्म पनि धेरै सुकुम्बासी परिवारहरू आफ्ना सामान निकाल्ने क्रममा नै रहेका छन् । केहीले शुक्रबार नै सामान अन्यत्र सारे पनि तत्काल बस्ने ठाउँ नपाएकोले बस्तीमै रहेको बताएका छन् ।
सरकारले बस्ती खाली गराएर सामानको ढुवानी, अशक्त, अपाङ्ग, बालबालिका, गर्भवती, सुत्केरी, वृद्ध(वृद्धा र दीर्घरोगीहरूलाई प्राथमिकता दिई उद्धार गरी सुरक्षित तवरबाट तोकिएको पहिलो आश्रयस्थलसम्म वा आवश्यकतानुसार अस्पतालसम्म पुर्याउने व्यवस्था मिलाएको बताएको छ । यस कार्यका लागि स्वास्थ्य तथा जनसङ्ख्या मन्त्रालयले आवश्यक एम्बुलेन्स, मेडिकल टिमसमेतको व्यवस्था गर्ने र सामान ढुवानीका लागि आवश्यक पर्ने सवारी साधन र मानिसहरूलाई सुरक्षित स्थलसम्म लिएर जानका लागि आवश्यक पर्ने सवारी साधनको समेत बन्दोबस्त गृह मन्त्रालयको समन्वयमा गर्ने बताएको छ ।
त्यस्तै बस्तीहरूबाट मानिसहरूलाई पहिलो आश्रयस्थलमा ओसारपसार गरेपछि उक्त स्थलमा खाना, खाजा, पानीको व्यवस्था काठमाडौं महानगरपालिकाले गर्ने र मेडिकल टिमसहितको व्यवस्था स्वास्थ्य तथा जनसङ्ख्या मन्त्रालयले मिलाउने निर्णय सरकारले गरेको बताएको छ ।
काठमाडौँ । आइसीसी क्रिकेट विश्वकप डिभिजन लिग- २ अन्तर्गत आजदेखि नेपाल, युएई र ओमानबीचको सिरिज शुरु हुदैछ ।
सिरिजको पहिलो खेल नेपाल र युएईबीच हुदैछ । टियु क्रिकेट मैदानमा हुने यो खेल बिहान साँढे ९ बजदेखि शुरु हुदैछ ।
यो सिरिज खेल्ने नेपाली टिममा रोहित पौडेल (कप्तान), दीपेन्द्र सिंह ऐरी (उप-कप्तान), कुशल भुर्तेल, आसिफ सेख, भीम सार्की, आरिफ सेख, बसिर अहमद, गुलशन झा, सोमपाल कामी, सन्दीप लामिछाने, ललित राजवंशी, विनोद भण्डारी, नन्दन यादव, अर्जुन कुमाल र कारण केसी रहेका छन् ।
आज देखि मे ५ सम्म हुने यस सिरिजमा तिनै देशले एक अर्काविरुद्ध २-२ खेल खेल्ने तालिका रहेको छ । जस अनुसार आज नेपाल र युएई खेल्दैछन् भने अप्रिल २७ मा ओमान र युएई, अप्रिल २९ मा नेपाल र ओमान, मे १ मा नेपाल र युएई, मे ३ मा ओमान र युएई तथा मे ५ मा नेपाल र ओमान खेल्ने तालिका रहेको छ ।
हाल अंक तालिकामा नेपाल २० खेलमा ५ जित, १३ हार र २ खेलको नतिजा नआउदा १२ अंकसहित सातौं स्थानमा रहेको छ । त्यस्तै युएई २० खेलमै ५ जित र १५ हारसहित १० अंक हासिल गरेर पुछारमा रहेको छ । त्यसैगरी ओमानको २४ खेलमा २९ अंक रहेको छ । ओमानले २४ खेलमा १३ जित, ८ हार र ३ खेलको नतिजा नआउदा अंक बाडेको छ ।