८ महिना अगाडि

अगस्त महिनामा विदेशी पर्यटकको संख्या २२ प्रतिशतले बढ्यो

काठमाडौँ । नेपालमा विदेशी पर्यटकको अगामन २२ प्रतिशतले बढेको छ । गत बर्षको अगस्त महिनामा भन्दा यस बर्षको अगस्तमा नेपाल आउने विदेशी पर्यटकको संख्या २२ प्रतिशतले बढेको नेपाल पर्यटन बोर्डले जानकारी दिएको छ ।

यस बर्षको अगस्तमा कुल ८८ हजार ६८० विदेशी पर्यटक आएका छन् भने अघिल्लो बर्षको अगस्तमा ७२ हजार ७१७ पर्यटक आएका थिए । कोभिड शुरु हुनु अघि २०१९ को अगस्तमा यो संख्या ९४ हजार ७४९ रहेको थियो ।

नेपाल आउने विदेशी पर्यटकमा सबै भन्दा बढी ५३ प्रतिशत दक्षिण एशियाका रहेका छन् भने अन्य एशियन देशका १७.८ प्रतिशत रहेको बोर्डले जानकारी दिएको छ । त्यसैगरी युरोपबाट १२.६ प्रतिशत, अमेरिकाबाट ८.२ प्रतिशत पर्यटक अगस्त महिनामा नेपाल आएका छन् ।

त्यस्तै नेपाल आउने सबैभन्दा बढी पर्यटक छिमेकी देश भारतका रहेका छन् । अगस्त महिनामा मात्र नेपालमा ३५ हजार ५०५ भारतीय नेपाल आएका छन् । त्यस्तै अर्को छिमेकी मुलक चीनबाट ७ हजार ५३३ जना नेपाल आएका छन् । त्यस्तै अमेरिकाबाट अगस्त महिनामा ६ हजार ६८ जना आएका छन् भने श्रीलंकाबाट ५ हजार ९५६ जना नेपाल आएका छन् । त्यस्तै बंगलादेशबाट ४ हजार २६२ जना, बेलायतबाट २ हजार ९४७, जापानबाट २ हजार ३९९, अस्ट्रेलियाबाट २ हजार २२३ जना, इटालीबाट एक हजार ७५१ र स्पेनबाट एक हजार ४९१ जना पर्यटक अगस्त महिनामा नेपाल आएका छन् ।

एससीओ शिखर सम्मेलनलाई प्रधानमन्त्री ओलीको सम्बोधन

काठमाडौँ । प्रधानमन्त्री केपी शर्मा ओलीले शाङ्घाई सहयोग संगठन (एससीओ) प्लस को शिखर सम्मेलनलाई सम्बोधन गरेका छन् ।

शनिबार शिखर सम्मेलनमा भाग लिन चीन पुगेका प्रधानमन्त्री ओलीले सोमबार सम्मेलनलाई सम्बोधन गरेका हुन् ।

प्रधानमन्त्री ओलीले यस अघि चिनियाँ राष्ट्रपति सी जिनपिङ, गणतन्त्र माल्दिभ्सका राष्ट्रपति डा मोहमद मिज्जु, लाओ जनप्रजातान्त्रिक गणतन्त्रका राष्ट्रपति थोङलौन सिसौलिथसँग भेटवार्ता गरेका छन् भने भारतीय प्रधानमन्त्री नरेन्द्र मोदीसँग पनि भेट गरेका छन् ।

प्रधानमन्त्रीको सचिवालयका अनुसार प्रधानमन्त्री ओलीले आजै रुसका राष्ट्रपति भ्लादमिर पुटिनसँग भेट गर्ने कार्यक्रम रहेको छ ।

नेपाल ए ले आसामलाई दियो २०९ रनको लक्ष्य

काठमाडौँ । नेपाल ए क्रिकेट टिमले आसाम राज्यलाई २०९ रनको लक्ष्य दिएको छ ।

जारी सिरिजको अन्तिम तथा निर्णायक खेलमा नेपालले टस जितेर पहिला ब्याटिंग गर्दै २० ओभरमा ५ विकेट गुमाउदै २०८ रन बनाएको हो । नेपाल ए का लागि सन्दीप जोराले सर्बाधिक ६४ रन बनाएका थिए भने शुभ कंसाकारले ४२ रन बनाएका थिए । त्यस्तै इशान पाण्डेले ३२ रन बनाए भने मोहमद आदील आलमले ११ बलमा २५ रन बनाए भने अनिल शाहले ११ रन बनाएका थिए ।

५ खेलको सिरिजमा दुवै टिमले २-२ खेल जितेकाले यो खेलको विजेताले सिरिज जित्ने छ ।

युक्रेन युद्ध बारे पुटिनले एससीओ शिखर सम्मेलनमा के भने ?

काठमाडौँ । रुसी राष्ट्रपति भ्लादिमिर पुटिनले गत महिना अलास्कामा भएको भेटवार्तामा अमेरिकी राष्ट्रपति डोनाल्ड ट्रम्पसँग युक्रेन युद्ध अन्त्य गर्ने बारेमा ‘आपसी समझदारी’ भएको बताएका छन् ।

शंघाई सहयोग संगठन (एससीओ ) शिखर सम्मेलनमा पुटिनले ट्रम्पसँग युक्रेन युद्ध अन्त्य गर्ने बारेमा ‘आपसी समझदारी’ भएको बताउदै युक्रेनमाथि आक्रमण गर्ने आफ्नो निर्णयको बचाउ गरेका छन् ।

तर उनले युक्रेनी राष्ट्रपति भोलोडिमिर जेलेन्स्कीसँग शान्ति वार्ताको लागि तयार छन् कि छैनन् भन्ने कुरा स्पष्ट रुपमा भने भनेनन् ।

अलास्का बैठक पछि, अमेरिकी विशेष दूत स्टीव विटकोफले पुटिनले युक्रेनलाई सुरक्षा ग्यारेन्टी प्रदान गर्न सहमत भएको बताएका थिए ।

आफ्नो भाषणमा, पुटिनले अलास्कामा ट्रम्पसँगको भेटवार्तामा भएको सहमतिपछि ट्रम्प सो दिशामा अगाडि बढिरहेको र युक्रेनमा शान्तिको बाटो खोलिरहेको आफुले विश्वास गरेको बताए ।

उनले युद्धको दोष युक्रेनलाई नाटोमा सामेल गराउने उद्देश्यले पश्चिमा देशहरूको निरन्तर प्रयासलाई लगाए । पुटिनले युक्रेनलाई पश्चिमी सैन्य गठबन्धन नाटोमा सामेल गर्ने विचारको निरन्तर विरोध गर्दै आएका छन् ।

२०१४ मा, पुटिनले क्रिमियालाई आफ्नो कब्जामा लिए र रूस समर्थक समूहहरूले पूर्वी युक्रेनका केही भागहरू कब्जा गरेका थिए ।

भदौं १३ गतेको मन्त्रिपरिषद्को बैठकका निर्णयहरु सार्बजनिक

काठमाडौँ । भदौं १३ गते बसेको मन्त्रिपरिषद्को बैठकका निर्णयहरु सार्बजनिक गरिएको छ ।

सञ्चार तथा सूचना प्रविधिमन्त्री तथा सरकारका प्रवक्ता पृथ्वी सुब्बा गुरुङले मन्त्रिपरिषद्को बैठकका २४ निर्णय निर्णयहरु सार्बजनिक गरेका हुन् ।

महिला क्रिकेट विश्वकप विजेतालाई अहिलेसम्मकै धेरै ६३ करोड पुरस्कार दिने आइसीसीको घोषणा

काठमाडौँ । अन्तर्राष्ट्रिय क्रिकेट परिषद (आइसीसी) आगामी आइसीसी महिला क्रिकेट विश्वकपमा विजेता टोलीलाई अहिलेसम्मकै सबैभन्दा धेरै पुरस्कार राशि दिने घोषणा गरको छ ।

यस पटक विश्वकप विजेता महिला टिमले ४.४८ मिलियन अमेरिकी डलर अर्थात् करिब साढे ६३ करोड पाउनेछ, जुन अघिल्लो संस्करणको पुरस्कार राशि १.३२ मिलियन डलर अर्थात् करिब १९ करोड भन्दा लगभग चार गुणा बढी हो ।

यस प्रतियोगिताको कुल पुरस्कार राशि १३.८८ मिलियन अमेरिकी डलर (लगभग १९६ करोड रहेको छ, जुन २०२२ मा न्युजील्याण्डमा आयोजित पछिल्लो विश्वकप ३.५ मिलियन डलर अर्थात् करिब ५० करोड भन्दा धेरै बढी रहेको छ । यो पुरस्कार राशि पुरुष विश्वकप २०२३ को १० मिलियन डलर भन्दा पनि बढी रहेको छ ।

२०२३ मा भएको पुरुष एकदिवसीय विश्वकपको विजेता टोली अष्ट्रेलियाले करिब ५३ करोड रुपैयाँ पाएको थियो । त्यसैगरी उपविजेता भारतले करिब २७ करोड रुपैयाँ पाएको थियो । महिला एकदिवसीय विश्वकपको विजेता रकम योभन्दा धेरै बढी हो । आईसीसीले यो वृद्धिको उद्देश्य महिला क्रिकेटको लोकप्रियता बढाउनु र पुरुष सरह समान सम्मान दिनु भएको बताएको छ ।

विश्वकप विजेता देशले ४.४८ मिलियन डलर अर्थात ६३.२८ करोड पाउने भने भने उपविजेता देशले २.२४ मिलियन डलर अर्थात् ३१.६३ करोड पाउने छ । त्यसैगरी सेमिफाइनलमा हार्ने देशले १.१२ मिलियन डलर अर्थात १५.८२ करोड पाउने छन् । त्यसैगरी समूह चरणको खेल जितेमा हरेक खेलको ३४ हजार ३१४ डलर अर्थात ४८ लाख ४६ हजार पाउने छन् । त्यसैगरी पाँचौं र छैटौं स्थानमा आउने देशले ७ लाख डलर अर्थात् ९ करोड ८४ लाख पाउने छन् । त्यस्तै सातौं र आठौं स्थानमा आउने देशले २.८ लाख डलर अर्थात ३ करोड ३८ लाख पाउने आइसीसीले जनाएको छ । त्यसैगरी सबै सहभागी देशहरुलाई आइसीसीले २.५ लाख डलर करिब ३ करोड ५२ लाख दिने बताएको छ ।

प्रतियोगिता भारत र श्रीलंकाका पाँच स्थानहरू, गुवाहाटी, इन्दौर, नवी मुम्बई, विशाखापट्टनम र कोलम्बोमा खेलिनेछ । यो विश्वकप एकदिवसीय फर्म्याटमा खेलिदैछ ।

भारत र श्रीलंकाको आयोजनामा ३० सेप्टेम्बरदेखि २ नोभेम्बरसम्म आयोजना हुने यो १३औं संस्करणको विश्वकपमा कुल आठ देश खेल्दै छन् । यस प्रतियोगितामा भरत र श्रीलंकासहित अस्ट्रेलिया, न्यूजील्याण्ड, पाकिस्तान, बंगलादेश, इङल्याण्ड, दक्षिण अफ्रिका खेल्दैछन् ।

नेप्से १२.०३ अंकले बढ्यो, ५ अर्ब १० करोडको कारोबार

काठमाडौँ । आज नेप्सेमा वृद्धि भएको छ । आज सोमबार नेप्से १२.०३ अंकले बढेर २७६१.८६ विन्दुमा पुगेर रोकिएको छ ।

आज ३२६ कम्पनिका एक करोड १४ लाख ४० हजार ८४० कित्ता शेयर ५ अर्ब १० करोड ५७ लाख ४६ हजार ६५७ मा कारोबार भएको थियो । आज अन्य र ट्रेडिङ क्षेत्र बाहेक सबै क्षेत्रको शेयरमा वृद्धि भएको छ ।

आज सबै भन्दा बढी हिमस्टार उर्जाको शेयर ६.०७ प्रतिशतले बढेको छ भने स्ट्यान्डर्ड चार्टड बैंकको शेयर मुल्य ४.०८ प्रतिशतले बढेको छ ।

त्यस्तै आज उन्नति सहकार्य लघुवित्तको शेयर मुल्य सबैभन्दा बढी ७.६८ प्रतिशतले घटेको छ ।

त्यस्तै आज नेपाल रिइन्सुरेन्सको सबै भन्दा बढी २८ करोड ८ लाख बराबरको कारोबार भएको छ भने एभरेष्ट बैंकको २४ करोड ४४ लाख बराबरको कारोबार भएको नेप्सेले जनाएको छ ।

आफ्नो भूमिलाई हाम्रो हो भन्दा कुनै देशसँग सम्बन्ध बिग्रिदैन: गृहमन्त्री लेखक

वीरगंज । गृहमन्त्री रमेश लेखकले लिपुलेक-कालापानी नेपालको रहेको बताएका छन् ।

प्रेस युनियन पर्साद्वारा वीरगंजमा सोमबार बिहान आयोजित पत्रकार सम्मेलनमा गृहमन्त्री लेखकले आफ्नो भूमिलाई हाम्रो हो भन्दा कुनै देशसँग सम्बन्ध नबिग्रिने बताउदै मित्र राष्ट्र भारतले चित्त दुखाउनुपर्ने कुनै कारण नभएको बताएका छन् । लेखकले चीन भ्रमणमा रहेका प्रधानमन्त्री केपी शर्मा ओलीले पनि अहिले लिपुलेख-कालापानी नेपालको भूमि रहेको भन्दै भारत र चीनबीच भएको सहमतिप्रति आपत्ति जनाएर ठीक काम गरेको बताए ।

उनले भारत र चीनले नेपालको भूमिलाई लिएर गरेको सम्झौताप्रति प्रधानमन्त्री ओलीले जनाएको आपत्ति ठीक रहेको उनको तर्क छ । उनले भने- ‘त्यो कुरामा हामी प्रष्ट भन्न चाँहन्छौं त्यसपसमा आपति छैन । र, हाम्रो भूमि हाम्रो हो भन्दा कुनै मुलुकले पनि चित्त दुखाउनुपर्ने कारण पनि छैन । यो हाम्रो हो हामी भनिरहन्छौं, यसले सम्बन्ध बिग्रनपर्ने कुरा पनि छैन ।’

संविधान संशोधनका कुरामा सञ्चारकर्मीहरुले राखेको जिज्ञासामा गृहमन्त्री लेखकले संविधान संशोधन हुनेमा नेपाली कांग्रेस र एमाले ‘क्लियर’ रहेको बताए । गृहमन्त्री लेखकले भने- ‘नेपाली कांग्रेस र एमालेले गरेर मात्र हुँदैन, राष्ट्रिय सहमतिको वातावरण गरेर सहमतिका साथ संविधान संशोधन हुनेछ । यसका लागि आ–आफ्नो पार्टीमा कमिटी गठन गरेर अगाडि बढ्ने छलफल भइसकेको छ ।’

वीरगंजको हैजाको सवालमा गृहमन्त्री लेखकले सरकारले गर्ने सबै आवश्यक सहयोग गरिरहेको बताउदै औषधी, थप जनशक्तिसहित आवश्यक अन्य सहयोग गर्न पनि सरकार तयारको उनले बताए ।

अप्पर स्याँङ्गे हाइड्रोपावरको शेयर कारोबार रोक्का

काठमाडौँ । अप्पर स्याँङ्गे हाइड्रोपावर लिमिटेडको शेयर कारोबार नेप्सेले स्थगित गरेको छ। कम्पनीले सञ्चालक समितिको बैठकमा भएको महत्वपूर्ण निर्णयबारे समयमै जानकारी नदिएको भन्दै नेप्सेले यस्तो कदम चालेको हो।

कम्पनीको सञ्चालक समितिले २०८२ भदौ ११ गते बसेको बैठकमा वार्षिक साधारण सभासम्बन्धी निर्णय गरेको थियो। तर, उक्त निर्णय नेप्सेलाई भदौ १६ गतेमात्र जानकारी गराइएको थियो। यसले धितोपत्र सूचीकरण विनियमावली, २०७५ को नियम २२ (१) को उल्लङ्घन भएको नेप्सेको ठहर छ। सो नियमअनुसार, कुनै पनि सूचीकृत कम्पनीले धितोपत्र मूल्यमा असर पार्ने सूचना वा निर्णय त्यही दिन वा भोलिपल्ट कारोबार खुल्नु अघि नै नेप्सेलाई बुझाउनुपर्ने व्यवस्था छ।

कम्पनीले नियमको पालना नगरेपछि नेप्सेले १६ भदौबाट अप्पर स्याँङ्गे हाइड्रोपावरको शेयर कारोबार रोक्का गरेको छ। साथै, कम्पनीलाई ३ कार्य दिनभित्र समयमै जानकारी पेस गर्न नसकेको कारणसहित सञ्चालक समितिको निर्णयको छायाँप्रतिलिपि पेश गर्न निर्देशन दिइएको छ।

मोदी र पुटिनबीच द्विपक्षीय भेटवार्ता

काठमाडौँ । चीनको तियानजिनमा आयोजित सांघाई सहयोग संगठन (एससिओ) सम्मेलनमा भाग लिएपछिभारतीय प्रधानमन्त्री नरेन्द्र मोदीले रुसी राष्ट्रपति भ्लादिमिर पुटिनसँग द्विपक्षीय भेटवार्ता गरेका छन् ।

प्रधानमन्त्री मोदीले पुटिनसँगको भेटवार्ता बारे जानकारी दिदै व्यापार, मल, अन्तरिक्ष, सुरक्षा र संस्कृति लगायत सबै क्षेत्रमा द्विपक्षीय सहयोगलाई अझ सुदृढ पार्ने तरिकाहरूबारे छलफल भएको बताएका छन् ।

मोदीले पुटिनसँग युक्रेन युद्धको मुद्दामा पनि छलफल गरेको बताएका छन् । उनले भने- ‘हामीले युक्रेन द्वन्द्वको शान्तिपूर्ण समाधानमा वार्ता सहित क्षेत्रीय र विश्वव्यापी मुद्दाहरूमा पनि विचार साझा गर्यौं ।’

मोदीले भारत र रुस बीचको सम्बन्धको बारेमा विशेष र विशेषाधिकार प्राप्त रणनीतिक साझेदारी क्षेत्रीय र विश्वव्यापी स्थिरताको एक महत्त्वपूर्ण स्तम्भ बनेको उल्लेख गरेका छन् ।

एससीओ सम्मेलनमा भाग लिएपछि, प्रधानमन्त्री मोदी र राष्ट्रपति पुटिन एउटै कारमा द्विपक्षीय बैठकको लागि प्रस्थान गरेका थिए ।