काठमाडौँ । राष्ट्रपति रामचन्द्र पौडेल समक्ष अख्तियार दुरुपयोग अनुसन्धान आयोगको वार्षिक प्रतिवेदन पेश गरिएको छ ।
अख्तियारका प्रमुख आयुक्त प्रेम कुमार राईले आइतबार आर्थिक वर्ष २०८१-०८२ को वार्षिक प्रतिवेदन पेश गरेको राष्ट्रपतिको कार्यालयले जानकारी दिएको छ ।
नेपालको संविधानको धारा २९४ मा अख्तियारले आफ्नो वार्षिक प्रतिवेदन राष्ट्रपतिलाई बुझाउनुपर्ने व्यवस्था गरेको छ ।
काठमाडौँ । अमेरिकासँग झगडा गर्ने भेनेजुएलाका राष्ट्रपति निकोलस मादुरोको आधिकारिक युट्युब च्यानल अचानक बन्द गरिएको छ । उनी यस च्यानलमा आफ्नो साप्ताहिक टिभी कार्यक्रमका भाषणहरू र मुख्य झलकहरू साझा गर्ने गरेका थिए ।
भेनेजुएलाका राष्ट्रपतिको युट्युब च्यानल बन्द हुनु भारत जस्ता देशहरूका लागि चीन जस्तै आफ्नै सामाजिक सञ्जाल प्लेटफर्महरू किन निर्माण गर्नुपर्छ भन्ने पाठ हो । अल जजीराका अनुसार, राष्ट्रपति निकोलस मादुरोको च्यानलका २ लाख भन्दा बढी सब्सक्राइबर थिए । भेनेजुएलाको राज्य-समर्थित मिडिया आउटलेट टेलिसुरले सामाजिक सञ्जाल प्लेटफर्म एक्समा युट्युबले शुक्रबार राति कुनै स्पष्ट कारण बिना अचानक राष्ट्रपतिको च्यानल निलम्बन गरेको उल्लेख गरेको छ ।
युट्युबको नीति अनुसार, ‘समुदाय निर्देशिकाहरू’ को बारम्बार उल्लङ्घन गरेकोमा मात्र च्यानल हटाइन्छ । घृणायुक्त भाषण, गलत जानकारी, वा लोकतान्त्रिक प्रक्रियामा हस्तक्षेपको आरोप लागेमा मात्र च्यानल निलम्बन गरिन्छ । हालैका वर्षहरूमा, अमेरिकाले आफ्नो सामाजिक सञ्जाल प्लेटफर्महरूलाई हतियारको रूपमा प्रयोग गर्न थालेको छ । त्यसकारण, भारतले चीनको मोडेलमा आफ्नै सामाजिक सञ्जाल प्लेटफर्महरू, अपरेटिङ सिस्टमहरू र खोज इन्जिनहरू विकास गर्नुपर्छ । भूराजनीतिक कारणले गर्दा अमेरिकाले भारतलाई बन्द गरेर कहिल्यै सताउने कुनै ग्यारेन्टी छैन ।
अमेरिकाले धेरै वर्षदेखि वामपन्थी झुकाव राख्ने भेनेजुएलाका राष्ट्रपतिलाई हटाउने प्रयास गरिरहेको छ । अमेरिकाले मादुरोलाई गत वर्षको राष्ट्रपति चुनावमा धाँधली गरेको आरोप लगाएको थियो र उनी वास्तवमा हारेको दाबी गरेको थियो । यद्यपि, मादुरोले कुनै पनि परिस्थितिमा अमेरिकाको अगाडि नझुक्ने दाबी गरेका छन् । शनिबार, मादुरोले अमेरिकी राष्ट्रपति डोनाल्ड ट्रम्पलाई पत्र लेख्दै भेनेजुएलाले लागूपदार्थको तस्करीमा महत्वपूर्ण भूमिका खेल्छ भन्ने दाबीलाई अस्वीकार गरेका थिए । उनले कोलम्बियामा उत्पादन हुने लागूपदार्थको केवल ५ प्रतिशत मात्र उनको देश हुँदै जान्छ, जसमध्ये ७० प्रतिशत भेनेजुएलाका अधिकारीहरूले निष्प्रभावी पारेका छन् ।
अर्कोतर्फ, ट्रम्प प्रशासनले पहिले नै मादुरोविरुद्ध लागूपदार्थको तस्करी र आपराधिक गिरोहहरूसँगको साँठगाँठको गम्भीर आरोप लगाइसकेको छ । ट्रम्पले भेनेजुएलाका राष्ट्रपतिमाथि ५ करोड डलरको इनाम राखेका छन् । यसबाहेक, अमेरिकाले क्यारिबियन सागरमा सात युद्धपोत, एक आणविक शक्ति भएको पनडुब्बी र एफ-३५ लडाकु विमानहरू तैनाथ गरेपछि तनाव बढ्यो । ट्रम्प प्रशासनले यो ‘लागुऔषध विरोधी अभियान’ भएको दाबी गर्छ, तर अहिलेसम्म अमेरिकाले भेनेजुएलासँग सम्बन्धित कुनै पनि जहाजलाई लागूपदार्थ तस्करीको आरोप लगाउन असफल भएको छ । अमेरिकाले विगत दुई हप्तामा भेनेजुएलासँग सम्बन्धित दुई जहाजहरूमा आक्रमण गरेको छ, जसमा १४ जनाको मृत्यु भएको छ । यद्यपि, मानव अधिकारकर्मीहरूले यी हत्याहरूलाई ‘अन्यायिक हत्या’ भनेका छन् । ट्रम्पको आदेशमा अमेरिकी सेनाले मिसाइल आक्रमणमा ध्वस्त पारेका डुङ्गाहरूमा निर्दोष मानिसहरू सवार रहेको दाबी गरिएको छ ।
काठमाडौँ । गृह एवं कानून न्याय तथा संसदीय मामिला मन्त्री ओमप्रकाश अर्यालले असोज ५ गते आईतबार सशस्त्र प्रहरी बल नेपाल प्रधान कार्यालयको निरीक्षण भ्रमण गरेका छन् । सोही अवसरमा भाद्र २३ र २४ गते भएको जेन्जी आन्दोलनको क्रममा दिवंगत सहिदहरुप्रति उच्च सम्मान व्यक्त गर्दै घाईते नागरिक तथा सशस्त्र प्रहरी कर्मचारीहरुको शिघ्र स्वास्थ्य लाभको कामना समेत व्यक्त गरेका थिए ।
मन्त्री अर्यालले सशस्त्र प्रहरी बल नेपालले आफ्नो स्थापना कालदेखि नै मुलुकमा देखा परेका विभिन्न अप्ठ्यारा परिस्थितीहरुमा आईपरेका चुनौतीहरुलाई परास्त गरी राज्य र नागरिकको सेवा र सुरक्षामा समर्पित सुरक्षा निकायको रुपमा स्थापित गराएको चर्चा गर्दै आगामी निर्वाचनमा पूर्ण तयारी र योजनाका साथ परिचालित भई कार्य सम्पन्न गर्न सफल हुने समेत बताए ।
उनले नेपाली जनताको जीवन रक्षा गर्नुभन्दा ठूलो कर्तव्य अरु केही हुन सक्दैन भन्ने कुरा सशस्त्र प्रहरी बल नेपाल तथा अन्य सुरक्षा निकायले समेत राम्रोसँग बुझेका छन् भन्ने कुरामा विश्वास व्यक्त गर्दै आगमी दिनमा समेत कार्यक्षेत्रमा थप हौसलाकासाथ परिचालित हुनुपर्नेमा जोड दिए ।
सशस्त्र प्रहरी बल नेपालले प्राथमिकिकरण गरेका कार्यादेश अन्तर्गत बोर्डर सेक्युरिटी, इन्टरनल सेक्युरिटी, रेभेन्यु सपोर्ट एण्ड डिजास्टर म्यानेजमेन्टमा केन्द्रित भई सीमा स्तम्भ मर्मत तथा सम्भार, सीमापार अपराध नियन्त्रण, अवैध चोरीपैठारी, मानव वेचविखन, हातहतियार तथा लागूऔषधको ओसारपसार नियन्त्रणमा डेडिकेटेड सुरक्षा फौजको रुपमा परिचालन हुँदै राजश्व चुहावट नियन्त्रणमा समेत अहम भूमिका निर्वाह गरेको र राजश्व चुहावट नियन्त्रण तथा संकलनको लागि सम्बन्धित निकायसँग समन्वयात्मक रुपमा साँझा योजनासहित ईमान्दार र प्रतिवद्ध भई कार्य गर्नुपर्ने समेत उनले बताए ।
कार्यक्रममा सशस्त्र प्रहरी महानिरीक्षक राजु अर्यालले राज्य र नागरिकको सेवा र सुरक्षामा समर्पित सशस्त्र प्रहरी बल नेपाल जनअपेक्षा अनुरुप सुरक्षा प्रदान गर्दै आईरहेको बताउदै संगठनले आर्जन गरेको प्रतिष्ठा र जनविश्वासलाई अक्षुण्ण राख्न अनुशासित, कर्तव्यपरायण र सेवाप्रति निष्ठावान रही राष्ट्रिय तथा अन्तर्राष्ट्रिय स्तरमा परिचालित हुँदै आईरहेको बताए ।
उनले राजश्व चुहावट नियन्त्रण र वैध व्यापार प्रवद्र्धन मार्फत राज्यको अर्थतन्त्रमा योगदान पुर्याउन सशस्त्र प्रहरी बलले प्रभावकारी भूमिका निर्वाह गर्दै आईरहेको उल्लेख गनुहुँदै सीमा क्षेत्रमा आवश्यक जनशक्ति र बिओपीको संख्या बृद्धि गर्नसके उल्लेखित उपलब्धिमा थप उल्लेखनिय बृद्धि हुने विश्वास व्यक्त गरे ।
महानिरीक्षक अर्यालले संगठनले सुशासन र नैतिक शासनलाई प्राथमिकतामा राखि नागरिकलाई सुरक्षित अनुभव गराउने कार्यशैली अपनाउँदै परिचालित हुँदै आईरहेको र आगामी घोषित आम निर्वाचनलाई शान्तिपूर्ण, स्वतन्त्र र निश्पक्ष रुपमा सम्पन्न गराउन सशस्त्र प्रहरी बल नेपालले आन्तरिक शान्ति सुरक्षा कायम गर्ने भूमिका निर्वाह गर्न पूर्ण प्रतिवद्ध रहेको समेत बताए ।
उनले सशस्त्र प्रहरी बल नेपालले विभिन्न आन्दोलनहरुको शान्तिपूर्ण व्यवस्थापनको लागि हुल तथा दंगा नियन्त्रणमा सक्षम विशेष इकाईको स्थापना तथा विकास, बख्तरबन्द सवारी, वाटर क्यानन, दंगा नियन्त्रण उपकरण, नियन्त्रित सामाग्री तथा नन लेथल र लेस लेथल हतियारहरुको प्राप्तिका लागि नीतिगत र बजेट व्यवस्थापनमा मन्त्रालयको आवश्यक सहयोग रहने समेत विश्वास व्यक्त गरे ।
निरीक्षणका क्रममा गृह तथा कानून न्याय तथा संसदीय मामिला मन्त्री ओमप्रकाश अर्यालले सशस्त्र प्रहरी बल नेपालले प्रयोगमा ल्याएको विविध सामाग्रीको अवलोकन गरेका थिए भने सशस्त्र प्रहरी बरिष्ठ उपरीक्षक दिगविजय सुवेदीले सशस्त्र प्रहरी बल नेपालको बारेमा प्रस्तुतीकरण गरेका थिए ।
कार्यक्रम देशभरका इकाईहरुमा ‘लाइभ भिडियो स्ट्रीमिङ’, इन्ट्रानेट तथा सशस्त्र प्रहरी संचारद्वारा प्रत्यक्ष प्रसारण गरी हेर्ने र सुन्ने ब्यवस्था मिलाईएको थियो ।
कार्यक्रममा गृहसचिव गोकर्णमणी दुवाडी, सशस्त्र प्रहरी अतिरिक्त महानिरीक्षकहरु, गृहमन्त्रालयका पदाधिकारी लगायत सशस्त्र प्रहरी बल नेपालका अधिकृत तथा विल्लादार जवानहरुको उपस्थिती रहेको थियो ।
काठमाडौँ । गत विहिबार तीन पटक नकारात्मक सर्किट लागेको नेप्से आज भने तिन अंकमा बढेको छ । आज आइतबार नेप्से १११. ७० अंकले घटेर २६२३.६२ विन्दुमा पुगेर रोकिएको छ ।
आज ३२९ कम्पनिका २ करोड ३२ हजार २२४ कित्ता शेयर ९ अर्ब १७ करोड ९५ लाख ७३ हजार ७९ मा कारोबार भएको थियो । आज म्युचुअल फण्ड र नन लाइफ इन्सुरेन्स बाहेक सबै क्षेत्रको शेयरमा वृद्धि भएको छ ।
आज सिन्धु विकास बैंक, भूगोल इनर्जी, गुडविल फाइनान्स, शिभम सिमेन्ट, जोशी हाइड्रो, अपि पावर, अन्खु खोला जलविद्युत, बलेफी हाइड्रो, हिमाल दोलखा हाइड्रोको शेयरमा सकारात्मक सर्किट लागेको छ ।
त्यस्तै आज सिद्धार्थ प्रिमियर इन्सुरेन्सको सबैभन्दा बढी ७.६४ प्रतिशतले गिरावट आएको छ ।
त्यस्तै आज सबै भन्दा बढी नेपाल रिइन्सुरेन्सको ८३ करोड १३ लाख बराबरको कारोबार भएको छ भने हिमालयन रिइन्सुरेन्सको ४८ करोड २६ लाख बराबरको कारोबार भएको नेप्सेले जनाएको छ ।
काठमाडौँ । राष्ट्रपति रामचन्द्र पौडेलले नेपाल नागरिकता ऐन, २०६३ लाई संशोधन गर्न बनेको विधेयक प्रमाणीकरण गरेका छन् ।
संघीय संसद्को दुवै सदनको बैठकबाट पारित भई प्रमाणीकरणका लागि पेस हुन आएको उक्त विधेयक नेपालको संविधानबमोजिम आज प्रमाणीकरण गरेको राष्ट्रपति कार्यालयले जानकारी दिएको छ ।
यस विधेयकमा आमाका नामबाट नागरिकता लिन सकिने, नागरिकताको प्रमाणपत्रमा बाबुको नाम, थर, ठेगाना उल्लेख गर्न नचाहे पाइने जस्ता व्यवस्था गरिएको छ ।
प्रतिनिधिसभाले गत असार १४ गते राष्ट्रिय सभाले भदौ ६ गते उक्त विधेयक पारित गरेको थियो । राष्ट्रिय सभाबाट पारित विधेयक सन्देशसहित प्रतिनिधिसभामा पठाएर सभामुख देवराज घिमिरेले प्रमाणित गरेर प्रमाणीकरणका लागि राष्ट्रपति कार्यालय पठाएका थिए ।
काठमाडौँ । भारतीय प्रधानमन्त्री नरेन्द्र मोदीले राष्ट्रलाई सम्बोधन गर्ने भएका छन् । समाचार एजेन्सी पीटीआईले प्रधानमन्त्री मोदीले आज साँझ ५ बजे राष्ट्रलाई सम्बोधन गर्ने उल्लेख गरेको छ ।
यद्यपि, प्रधानमन्त्री मोदीले राष्ट्रलाई सम्बोधन गर्ने विशेष मुद्दाहरूको खुलासा गरिएको छैन । उनको सम्बोधन नवरात्र सुरु हुनुभन्दा एक दिन अघि हुन लागेको छ ।
वास्तवमा, नयाँ जीएसटी दरहरू सेप्टेम्बर २२ मा, नवरात्रको पहिलो दिनबाट लागू हुनेछन् । यसले ठूलो संख्यामा उत्पादनहरूको मूल्य घटाउने विश्वास गरिएको छ ।
अर्थमन्त्री निर्मला सीतारमणले यस महिनाको सुरुमा जीएसटी परिषद्को बैठकले दुई-दर जीएसटी प्रणालीको घोषणा गरेकी थिइन् । जीएसटीबाट १२ प्रतिशत र २८ प्रतिशत दर स्ल्याबहरू हटाइएको छ र ५ प्रतिशत र १८ प्रतिशतका दुई नयाँ दरहरू घोषणा गरिएको छ ।
काठमाडौं । नेपाली कांग्रेसका महामन्त्री गगनकुमार थापालाई पार्टी फुटाएर भएपनि अघि बढ्न सुझाव आउन थालेको छ ।
जेन–जी पुस्ताको आन्दोलनपछि देश नयाँ राजनीतिक कोर्समा अघि बढिरहेको छ। अहिले अन्तरिम सरकारको नेतृत्व पूर्व प्रधानन्यायाधीश सुशीला कार्कीले गरिरहेकी छिन् ।
यो सरकारलाई आगामी फागुन २१ गते प्रतिनिधिसभाको निर्वाचन गराउने म्याण्डेट छ । निर्वाचनको लागि सबै दलले तयारी थालेका छन् । तर, कांग्रेसभित्र नेतृत्व हस्तान्तरणको विषय जबरजस्त रुपमा उठ्न थालेको छ । जेन–जी आन्दोलनपछि महामन्त्री थापाले तीन पटक भिडिओ सन्देश जारी गरेका छन्। यो बीचमा उनी एकपटक आन्दोलनको क्रममा आगजनीमा परेको पार्टी कार्यालयको निरीक्षणमा पनि पुगेका थिए ।
उनले आफूहरु सच्चिने प्रण गरेका छन् । युवा पुस्ताहरुको भावनालाई समेटेर पार्टी रुपान्तरण गर्ने उनको प्रतिबद्धता छ । हिजो जेन–जी आन्दोलनमा निधन भएकाहरुको १३औं पुण्यतिथिको अवसरमा पनि थापाले भिडिओ सन्देश जारी गरेका थिए । त्यसमा उनले नेपाली कांग्रेस रुपान्तरणको विकल्प नभएको भन्दै सभापति शेरबहादुर देउवालाई मनाउने, फकाउने र नमाने अघि बढ्ने उद्घोष गरेका छन् ।
पार्टीको केन्द्रीय कार्यसम्पादन समितिको बैठकमा थापा र अर्का महामन्त्री विश्वप्रकाश शर्माले विशेष महाधिवेशनमा गएर भएपनि पार्टीको नेतृत्व परिवर्तनको प्रस्ताव गरेका थिए । उपसभापति पूर्णबहादुर खड्कालगायतले महामन्त्रीद्धयको प्रस्तावलाई अस्विकार गरेको र अहिले सभापति अस्पतालमा उपचार गराईरहेको बेलामा यस्तो कुरा गरिनु उचित नहुने धारणा राखेका थिए । थापाले यसपटक पार्टीभन्दा माथि देश छ भन्दै अब चुप लागेर नबस्ने उद्घोष गरेका छन् ।
गगनले नेतृत्व परिवर्तनको लागि विशेष महाधिवेशनको माग गरेपछि सभापति देउवानिकट नेताहरुले सार्वजनिक रुपमा आलोचना गर्न थालेका छन् । प्रवक्ता डा. प्रकाशशरण महतले त पार्टी सभापति देउवामाथि सांघातिक आक्रमण भएर अस्पतालमा उपचार गराईरहेको बेलामा नेतृत्व परिवर्तनको बहस चलाउनु घाउमा नून छर्किनुजस्तै भएको टिप्पणी गरेका छन् ।
आफ्नै निवासमा गरेको पत्रकार सम्मेलनमा महतले भनेका थिए,‘अहिले कांग्रेसभित्र पनि विभिन्न खाले बहस भइरहेको छ । हाम्रो पार्टी सभापतिजी, जसले लोकतन्त्रका लागि लामो संघर्ष गर्नुभएको छ, उहाँमाथि यस्तो त्रासदीपूर्ण आक्रमण भयो । अझै उहाँ उपचारको पूर्ण अवस्थामा पुग्नुभएको छैन । त्यस्तो बेला संवेदनशील हुन नसक्नु दुर्भाग्यपूर्ण कुरा हो।’
आजै कांग्रेसका पाँच शीर्ष नेताहरु छुट्टै छलफलमा जुटेका छन् । प्रकाशमान सिंह, विमलेन्द्र निधि, डा. शशांक कोइराला, कृष्णप्रसाद सिटौला र डा. प्रकाशशरण महतले पार्टीभित्र एकताको खाँचो औंल्याएका छन् । महामन्त्री थापाले विशेष महाधिवेशनको लागि लिएको पहलकदमीप्रति उनीहरुले गुनासो गरेको समाचार बाहिरिएका छन् ।
थापाका शुभेच्छुकहरुले भने तत्काल नयाँ पार्टी खोल्नको लागि सुझाव दिएको पनि चर्चा छ । थापानिकट मानिएका चर्चित डाक्टर रामेश कोइरालाले अब पनि सच्चिन्न भने नयाँ रुख रोप्नु भनेका छन् । उनले सामाजिक सञ्जाल एक्समा लेखेका छन्–‘अब पनि सच्चिन्न् भने नयाँ रुख रोप्नु । कम होलान् तर सोच, विचार र हुटहुटी र पाएको बेलाको क्षमता देखेका जनले पत्याउँछन् । संगठन विस्तारमा लाग्नु । कम सिट आउला तर मलजल गरेपछि बढ्छ नै । तीसौं वर्ष मलजल गरेको रुखमा हरक्षण विष फले अब रुखको माया नगर्नु । सानै सही, आशाको नयाँ बिरुवा रोप्नु ।’
अर्का राजनीतिक विश्लेषक डम्बर खतिवडाले पनि गगनलाई पनि कांग्रेस छोड्न वा फोड्नको लागि सुझाव दिएका छन् । सामाजिक सञ्जाल एक्समै खतिवडाले लेखेका छन्–‘गगनजीले जति आत्मसमिक्षा र आव्हान गरेपनि, त्यो कांग्रेस महामन्त्रीको संस्थागतजस्तो फिटिक्कै लाग्दैन । कांग्रेसलाई बुझ्ने नागरिक नजर भिन्नै छ । गगन त्यसभित्र छैनन् । गगनले कांग्रेस छोड्न नसकेका हुन्, कांग्रेसले गगनलाई छोडिसक्यो । बरु, गगनले पनि अब कांग्रेस छोडे वा फोडे हुन्छ ।’
काठमाडौं । परराष्ट्रविद् तथा पूर्वमन्त्री दीपकुमार उपाध्यायले देशको लागि आगामी दिन अत्यन्तै चूनौतिपूर्ण रहेको औंल्याएका छन् ।
अब देशमा थप द्वन्द्व र क्षति नहोस भनेर सरकार, नागरिक समाज र सबैले आफ्नो दायित्व निर्वाह गर्नुपर्ने उनको मत छ ।
आज आइतबार विहान नेपाली रेडियो नेटवर्कसँगको कुराकानीमा उनले देशकासामू अहिले गम्भीर चुनौति रहेको औंल्याएका हुन् । नेपालका राजनीतिक दलका नेताहरुले आफ्नै नाति पुस्ताको भावनालाई समयमा बुझ्न नसकेको कारण अहिले यस्तो विस्फोट भएको उनको तर्क छ ।
नेपालको राजनीतिमा अध्यात्मिक चेत नै नभएको उनको आरोप छ । दलहरु गम्भीर नभए देशले अर्को संकट व्यहोर्नुपर्ने अवस्था आउनसक्ने भन्दै त्यस्तो नहोस भनेर कामना गरेका छन् । जेन–जी आन्दोलनको क्रममा दमन गर्न आदेश नदिएको र त्यहाँ प्रयोग भएको हतियार नेपाल प्रहरीको होईन भनेर तत्कालिन प्रधानमन्त्री केपी शर्मा ओलीले दिएको अभिव्यक्तिलाई लिएर पनि उपाध्यायले आश्चर्य व्यक्त गरे ।
उनले भने,‘सबभन्दा पहिले यसकै छानबिन हुनुपर्यो, उहाँले झुठो वक्तव्य दिनुभएको रहेछ भने योभन्दा गैरजिम्मेवारीपूर्ण अरु अभिव्यक्ति वा हर्कत हुन सक्दैन । त्यो तहमा बसेका व्यक्तिहरुले यसकिसिमको गैरजिम्मेवारी देखाउने हो र ? उहाँले भनेको कुरा सही रहेछ भने यसको त गम्भीर रुपले छानबिन हुनुपर्यो, सरकारले यसको बारेमा बोल्नुपर्यो । अझै पनि व्यक्तिको पछाडि लागेर, हामीले सधैं भन्ने गरेका थियौं कि अहंकार र दम्भले कहीँ पुर्याउँदैन ।’
काठमाडौं । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले कुनै पनि निर्माण व्यवसायीप्रति पूर्वाग्रही भएर जीर्ण बनेका विकास आयोजनाका ठेक्का नतोड्ने बताएका छन् ।
नेपाल निर्माण व्यवसायी महासङ्घका प्रतिनिधिसँग आइतबार भएको भेटमा मन्त्री घिसिङ काम नगरेर वर्षौंसम्म आयोजना अलपत्र पार्ने निर्माण व्यवसायीसँगको ठेक्का तोडिने प्रष्ट पारे ।
उनले भने- ‘अनुमानित लागतभन्दा कम रकम कबोल गरेर आयोजना लिने तर काम नगर्ने प्रवृति व्यापक छ, कम रकम कबोल गरेर ठेक्का लिएमा मेरो घरवार जान्छ, बैंक जमानत जफत हुन्छ, जरिवाना (पेनाल्टी) हुन्छ भन्ने डर नभएसम्म काम हुँदैन, ठेक्का सम्झौता गर्ने तर लामो समेयदेखि काम नभई जीर्ण भएका आयोजना अब राख्न हुँदैन । बजेट छ, आयोजना तयारी अवस्थामा छ, सबै चिज छ तर किन काम हुँदैन ? म आफैं पनि इन्जिनियर भएकाले सम्पूर्ण ठेक्का प्रक्रियाको पूर्ण जानकार छु, आयोजनातर्फबाट पनि गर्नु पर्ने काम नगरेको पनि त्यो पनि हेर्छौ, अन्यायपूर्वक कसैलाई कारबाही गर्दैनौं,पेनाल्टी हुँदैन जे गर्दा पनि हुन्छ भन्ने प्रवृतिलाई अन्त्य गर्नुपर्छ ।’
उनले बजेट नै भएका आयोजना पनि निर्माण व्यवसायीले काम नगर्ने अवस्था देखिएको बताए । विदेशमा राम्रो काम गरिरहेका निर्माण व्यवसायी नेपालमा काम गर्दा भने असफल नदेखिएको उल्लेख गर्दै मन्त्री घिसिङले आफूले लिएका आयोजना तोकिएको समय र गुणस्तरमा निर्माण सम्पन्न गरी नेपालका निर्माण व्यवसायी पनि सक्षम रहेको सन्देश दिन आग्रह गरे । उनले भने- ‘निर्माण क्षेत्रमा अनियमिता र भ्रष्टाचार रहेका आम बुझाइ छ, जेनजी आन्दोलनपछि गठन भएको अहिलेको सरकारको मुख्य उद्देश्य भ्रष्टाचार नियन्त्रण रहेकाले निर्माण व्यवसायी पनि भ्रष्टाचार निर्मूल गर्नेतर्फ लाग्नुहोस् ।’ उनले देश विकासमा योगदान गर्ने निर्माण व्यवसायीप्रति आफ्नो सम्मान रहेको उल्लेख गरे । महासङ्कातर्फबाट मन्त्री घिसिङ समक्ष निर्माण क्षेत्रका विद्यमान समस्यका विषयमा ज्ञापनपत्र पेश गरिएको थियो ।
काठमाडौँ । मुस्ताङ भन्सार कार्यालयको नेचुङस्थित कोरला नाका पूर्ण रुपमा संचालनमा आएको छ ।
भन्सार विभागका अनुसार गत असार २४ गते रसुवा जिल्लास्थित लेहेन्दे खोलामा आएको वाढीका कारण रसुवा भन्सार कार्यालय पूर्ण रुपमा बन्द भएको र तातोपनी भन्सार कार्यालय तर्फ कोदारी राजमार्गमा आएको पहिरोको कारण अवरोध भएको अवस्थामा मित्रराष्ट्र चीन र नेपालबीचको वैदेशिक व्यपारलाई सहजीकरण गर्न मुस्ताङ जिल्लास्थित मुस्ताङ भन्सार कार्यालय, नेचुङ (कोरला नाका) भदौ ३० गतेदेखि पूर्णरुपमा संचालनमा आएको हो ।
असोज ४ गते सम्म मुस्ताङ भन्सार कार्यालयबाट २०९ वटा विद्युतिय गाडी र १०७ वटा मालबाहक ढुवानी साधनमा रहेका मालवस्तु जाँचपास गरी ३४ करोड ४७ लाख ४५ हजार २५२ रुपैंया राजस्व संकलन भएको भन्सार विभागले जनाएको छ ।
हाल यस नाकामा आशिकुडा प्रणाली समेत संचालन भइसकेको र नेपाल राष्ट्र बैकको भदौ ३१ परिपत्र अनुसार मुस्ताङ भन्सार कार्यालयलाई समेत चिनियाँ भूभाग भई प्रतितपत्र मार्फत सामान आयात गर्न एकिकृत परिपत्र २०८१ मा समावेश गरी सहजीकरण गरिसकिएको भन्सार विभागले जनाएको छ ।