काठमाडौं । नेकपा एमालेका अध्यक्ष केपी शर्मा ओलीले देशलाई माया गर्नेहरूले सिंहदरवार नजलाएको बताएका छन्।
भक्तपुरको गुण्डुस्थित निवासमा नेता-कार्यकर्तालाई सम्बोधन गर्दै अध्यक्ष ओलीले सिंहदरवार जलाउँछु भन्नेहरूले नै जलाएको आरोप लगाए।
‘सिंहदरवार जलाइयो। कसले जलायो? देशलाई माया गर्ने मान्छेले, इतिहासलाई माया गर्ने मान्छेले सिंहदरवार जलायो होला र? पक्कै जलाएनन्। अरु नै कुनै घुसपैठिया तत्त्वहरूले, जो पहिलेदेखि नै भन्दैथिए त सिंहदरवार जलाउँछु भनेर। अन्तर्राष्ट्रिय सम्मेलन केन्द्रतिर हमला गरेको थोरैपल्ट त भएन नि? धैरैपटक भइसक्यो,’ उनले भने।
अध्यक्ष ओली योजनाबद्ध तरिकाले सिंहदरवारलगायत सरकारी संरचनाहरूमा आगजनी गरएको बताए। उनले साँझ परेपछि उज्यालो हुने भन्दै नेता-कार्यकर्तालाई संयमता अनाउन आग्रह गरे। ‘बादल लाग्यो भन्दैमा बादल हट्दैन भन्ने छैन। साँझ पर्यो भन्दैमा भोलि विहान हुन्छ भन्ने कुरा विश्वास गर्नुपर्छ। उज्यालो नहुने कुरा हुँदैन, उज्यालो हुन्छ,’ उनले भने।
जेनजी आन्दोनमा भएको घटनापछि देश बदनाम भएको उनले बताए। भिसा नदिने, काम नदिनेजस्तो अवस्थामा देश पुगेको भन्दै उनले नेपाल इमान्दार मानिसहरूको देश भएको चिनाउनुपर्ने बताए।
‘अहिले भिसा नदिने, काम नदिने अवस्था आइसक्यो। नेपाल एउटा बदनाम अवस्थामा पुगिसक्यो। त्यसबाट हामी जोगाउनुपर्छ। नेपाल इमन्दार र कर्मठ मानिसहरूको देश हो। अत्यन्त जिम्मेवार मानिसहरुको देश हो। सभ्य मानिसहरूको देश हो। सभ्यताको लामो इतिहास बोकेको देश हो। त्यो सभ्यतालाई अगाडि लैजा नयाँ पिँढी तम्तयार भएको देश हो भनेर अगाडी बढ्नुपर्छ,’ उनले भने।
देशमा ठूलो क्षति भएकाले यस्ता घटना हुन नदिन संगठित भएर जानुपर्ने उनको भनाइ छ। अध्यक्ष ओलीले नेता-कार्यकर्तालाई हिम्मत र हरेस नखाइकन अगाडि बढ्न निर्देशन दिए।
Read More
