काठमाडौँ । न्यूनचापीय मौसम प्रणाली नेपालबाट बाहिरिएको छ। वर्षा गराउने न्यूनचापीय मौसम प्रणाली नेपालबाट बाहिरिएसँगै मनसुन कमजोर भई देशभरको मौसममा क्रमिक सुधार आइरहेको छ ।
वरिष्ठ मौसमविद प्रतिभा मानन्धरले देशमा मनसुनी वायूको प्रभाव तथा पूर्वी भू-भागमा बंगालको खाडीबाट आएको जलवाष्प युक्त हावाको प्रभाव घट्दै गएको बताएकी छन् ।
नेपाली रेडियो नेटवर्कसँग कुरा गर्दै आज उनले देशभरको मौसममा क्रमिक सुधार आइरहेकाले भारी वर्षाको सम्भावना टरेको बताईन् ।
उनले भनिन् ‘हाल कोशी प्रदेश, मधेश प्रदेश, बागमती प्रदेश र गण्डकी प्रदेशमा साधारणतया बदली रही कोशी र मधेश प्रदेशका थोरै स्थानरूमा हल्का देखि मध्यम वर्षा भइरहेको छ । सोमबार देखि भारी वर्षाको सम्भावना नरहेकाले थप विपद्को समस्या टरेको देखिन्छ ।
आज दिउँसो कोशी प्रदेश, बागमती प्रदेश, लुम्बिनी प्रदेश, कर्णाली प्रदेश र सुदुरपश्चिम प्रदेशमा साधारणतया बदली रही बाँकी भू-भागमा आंशिक बदली रहने छ भने कोशी प्रदेश, बागमती प्रदेश, लुम्बिनी प्रदेश, कर्णाली प्रदेश र सुदुरपश्चिम प्रदेशका थोरै तथा बाँकी प्रदेशका पहाडी र तराई भू-भागका एक-दुई स्थानहरूमा मेघगर्जनरचट्याङ सहित मध्यम वर्षाको सम्भावना रहेको उनको भनाई छ ।
शुक्रबारदेखि परेको वर्षा रोकिएपनि कतिपय ठाउँमा पहिरो जानेक्रम जारी रहेकाले बाटो र मौसमको अवस्थाबारे जानकारी लिएर मात्रै यात्रामा निस्कन उनले आग्रह गरिन् । वर्षा रोकिएपनि विपद्पछिको जोखिम कायमै रहेको उनको भनाई छ ।
