काठमाडौँ । नेपाली महिला फुटबल टिमले भारतलाई मैत्रीपूर्ण खेलमा पराजित गरेको छ ।
पाल्जोर रंगशाला, सिक्किममा सम्पन्न अनौपचारिक मैत्रीपूर्ण खेलमा नेपालले भारतलाई पेनाल्टी सुटआउटमा ३-० ले पराजित गरेको हो । यसअघि ९० मिनेटसम्मको खेलमा नेपाल र भारतले १-१ गोल गरेपछि खेलको निर्णय पेनाल्टी सुटआउटबाट गरिएको थियो ।
यसअघि सम्पन्न औपचारिक मैत्रीपूर्ण खेलमा पनि नेपालले भारतलाई २-१ गोल अन्तरले पराजित गरेको थियो । यस खेलमा दुवै देशले प्रमुख खेलाडीहरुलाई आराम दिएर दोस्रो रोजाईका खेलाडीलाई अवसर दिएका थिए ।
काठमाडौं । काठमाडौं महानगरपालिकाका प्रहरी बल प्रमुख राजुनाथ पाण्डेको निलम्बनविरुद्धको रिट उच्च अदालत पाटनले खारेज गरेको छ ।
बुधबार न्यायाधीश डालबहादुर खड्का र दीपक खनालको संयुक्त इजलासले बुधवार सुनुवाइ गर्दै पाण्डेको रिट खारेज गरेको हो ।
यसअघि अन्तरिम आदेशमार्फत निलम्बन फुकुवा भएका पाण्डेको रिट खारेजी भएपछि निलम्बन कायमै रहने भएको छ ।
पाण्डेलाई गत जेठ २० गते प्रमुख प्रशासकीय अधिकृत सरोज गुरागाईंले पाण्डेलाई ६ महिनाका लागि निलम्बन गरेका थिए ।
गत बर्षको चैत २१ गते आफू कार्यालय जाँदा हुलहुज्जत गरेको भन्दै गुरागाईंले जेठ ६ गते पाण्डेलाई स्पष्टीकरण सोधेका थिए । पाण्डेले आफूले आफ्नो कर्तव्य पालना मात्रै गरेको उल्लेख गर्दै स्पष्टीकरण बुझाएपछि स्पष्टीकरण चित्त नबुझेको भन्दै उनलाई निलम्बन गरिएको थियो ।
काठमाडौँ । नेपाल प्रिमियर लिग (एनपीएल) च्याम्पियन फ्रेन्चाइजी जनकपुर बोल्ट्सले दक्षिण अफ्रिकाका तिब्र गतिका बलर वाने पर्नेललाई भित्र्याएको छ ।
जनकपुरले ३६ बर्षिय पर्नेललाई भित्र्याएको जानकारी दिएको हो ।
देब्रे हातका मिडियम फास्ट बलर पर्नेलले दक्षिण अफ्रिकाका लागि २०२३ देखि खेलेका छैनन् । उनले दक्षिण अफ्रिकाका लागि ५६ टी-२० खेल्दै ५९ विकेट लिएका छन् ।
आसिफ शेख मार्की खेलाडी रहेको जनकपुरमा अनिलकुमार शाह, ललित राजवंशी, किशोर महतो, रुपेश सिंह, शुभ कंशाकर र तुलबहादुर थापामगर, सचिन भट्ट, आदित्य महता, मयन यादव र विकास आग्रीलगायतका खेलाडी रहेका छन् ।
काठमाडौं । प्रधानमन्त्री सुशिला कार्कीले बोलाएको त्रिपक्षीय छलफल जारी रहेको छ । अहिलेसम्म जेनजीबाट प्रतिनिधि बनेर गएकाहरुले आफ्नो धारणा राखेका छन् ।
जेनजी प्रतिनिधिहरूले चुनाव चाहिएको भन्दै चुनाव गर्नुपर्छ तर चुनाव भनेर मात्र नहुने धारणा राख्दै आन्दोलनको मुख्य माग सुशासन भएकोमा जोड दिएका थिए । उनीहरुले भ्रष्टाचारविरुद्धको कारबाही भएकोले दुवै एजेन्डामा सरकार सँगसँगै अगाडि बढ्नुपर्ने बताएका थिए ।
धारणा राख्ने जेनजी प्रतिनिधिहरुमा रक्षा बम, जेम्स कार्की, दिवाकर दंगाल, पुरुषोत्तम यादव, मिराज ढुंगाना, अमीत खनाल ऊर्जा, रिजन रानामगर, सामना घर्ती, मोनिका निरौला, उपार्जुन चाम्लिङ, खेम साउँद, भोजविक्रम थापा (सहिद परिवार प्रतिनिधि), अभिषेक श्रेष्ठ (घाइते प्रतिनिधि), विवेक ढकाल र सागर ढकालले आ-आफ्नो धारणा राखेका थिए ।
छलफलको शुरुमै प्रधानमन्त्री कार्कीले सबै विचारको आदानप्रदान गरौँ भन्दै मुलुक कसैले बनाइदिने र आफुहरुले नै बनाउनुपर्ने बताएकी थिइन् । उनले एकपटकको कुराकानीले नहुने र बारम्बार हुनुपर्ने बताउदै सरकारले यसको सुरुवात गरेको बताएकी थिइन् ।
काठमाडौं । सरकारले राष्ट्रिय सभा सदस्यको निर्वाचन माघ ११ गते गर्ने निर्णय गरेको छ । बुधबार बसेको मन्त्रिपरिषदको बैठकले आगामी फागुन २० मा रिक्त हुने राष्ट्रियसभाका १९ सदस्यको निर्वाचन माघ ११ गते गर्ने निर्णय गरेको हो ।
फागुन २० मा पदावधि सकिने सांसदमा सबैभन्दा बढी नेकपा एमालेका ८ जना, नेकपा माओवादी केन्द्रका ७ जना, नेकपा एकीकृत समाजवादी, जसपा र लोसपाका एक–एक जना रहेका छन् । त्यस्तै एक जना मनोनीत सांसद छन् ।
पदावधि सकिने एमालेका सांसदमा इन्दिरादेवी गौतम, गोपाल भट्टराई, तुलसाकुमारी दाहाल, देवेन्द्र दाहाल, भगवती न्यौपाने, विमला घिमिरे, शारदादेवी भट्ट र सुमित्रा बीसी रहेका छन् । त्यस्तै माओवादी केन्द्रका नारायणकाजी श्रेष्ठ, गोपीबहादुर अछामी, गंगाकुमारी बेलवासे, जगप्रसाद शर्मा, तारामान स्वाँर, मायाप्रसाद शर्मा र राधेश्याम पासवान रहेका छन् । एकीकृत समाजवादीका डा. बेदुराम भुसाल र बामदेव गौतमको कार्यकाल सकिँदैछ । गौतम राष्ट्रपतिबाट मनोनित सांसद हुन तर हाल उनी एकिकृत समाजवादीमा रहेका छन् । त्यस्तै जसपा नेपालका मृगेन्द्रकुमारसिंह यादव र लोसपाका शेखरकुमार सिंहको पदावधि सकिदैछ ।
राष्ट्रिय सभाको सांसदको निर्वाचनमा प्रदेशका सांसद, नगरपालिका तथा गाउँपालिकाका प्रमुख र उपप्रमुख मतदाता हुने गर्दछन् । ५९ सदस्यीय राष्ट्रिय सभामा प्रत्येक प्रदेशबाट ८-८ जना र ३ जना राष्ट्रपतिबाट मनोनित हुने व्यवस्था रहेको छ । प्रदेशबाट निर्वाचित हुने ८ जनामा तीन जना महिला, एक जना दलित, एक जना अपाङ्गता भएका वा अल्पसङ्ख्यक सदस्य हुने व्यवस्था गरिएको छ भने अन्य तीन जना खुला उम्मेदवार हुने गर्दछन् ।
नेपालको संविधान, २०७२ प्रारम्भ भएपछि पहिलो पटक राष्ट्रिय सभा सदस्यको पदावधि कायम गर्दा गोला प्रथाद्वारा एक तिहाइको दुई वर्ष, अर्को एक तिहाइको चार वर्ष र बाँकी एक तिहाइको छ वर्षको हुने गरी पदावधि कायम गरिएको थियो ।
राष्ट्रिय सभाको सदस्यको पदावधि छ वर्षको हुने भए पनि एक तिहाइ सदस्यको पदावधि प्रत्येक दुई वर्षमा समाप्त हुने हुँदा राष्ट्रिय सभा सदस्यका लागि प्रत्येक दुई वर्षमा निर्वाचन हुन्छ । राष्ट्रिय सभामा निर्वाचित कुनै सदस्यको पदावधि छ महिनाभन्दा बढी कायम रहँदै कुनै कारणले निजको पद रिक्त भएमा रिक्त भएको पैँतीस दिनभित्र नेपाल सरकारले तोकेको मितिमा निर्वाचन आयोगले त्यस्तो रिक्त सदस्यको पद बाँकी अवधिका लागि उपनिर्वाचनद्वारा पूर्ति गर्ने व्यवस्था छ ।
यस्तो उपनिर्वाचन गर्नुपर्ने अवस्थामा जुन समूह र तरिकाबाट निर्वाचित भएको सदस्यको पद रिक्त भएको हो सोही समूह र तरिकाबाट मतदाताले दिने एक मतका आधारमा सबैभन्दा बढी मत ल्याउने उम्मेदवार निर्वाचित हुने व्यवस्था छ ।
काठमाडौं । सर्वोच्च अदालतले प्रतिनिधिसभा विघटनविरुद्ध परेका रिटहरूमाथिको प्रारम्भिक सुनुवाई गर्दै कारण देखाउ आदेश जारी गरेको छ ।
प्रतिनिधिसभा विघटविरुद्ध परेका १६ रिटमाथि बुधबार प्रधानन्यायाधीश प्रकाशमान सिंह राउत नेतृत्वमा गठन भएको संवैधानिक इजलासमा भएको सुनुवाईपछि कारण देखाउ आदेश जारी भएको हो ।
प्रतिनिधि सभा पुनस्थापनाको माग गर्दै दायर गरिएका रिटमा सर्वोच्च अदालतले अन्तरिम आदेश दिन अस्वीकार गरेको छ । संबैधानिक इजलासले ७ दिन भित्र जवाफ दिन भन्दै कारण देखाउ आदेश जारी गरेको छ ।
संबैधानिक इजलासमा प्रधानन्यायाधीश राउतसहित न्यायाधीशहरू सपना प्रधान मल्ल, कुमार रेग्मी, हरिप्रसाद फुयाल र मनोजकुमार शर्मा रहेका थिए ।
काठमाडौँ । भारत र अष्ट्रेलियाबीचको टी-२० सिरिजको पहिलो खेल वर्षाका कारण रद्ध भएको छ ।
बुधबार क्यानबेरामा भारतले टस जितेर पहिला ब्याटिंग गर्दै ९.४ ओभरमा एक विकेट गुमाउदै ९७ रन बनाएपछि बर्षका कारण खेल हुन नसकेको हो । यसअघि बर्षाका कारण खेललाई १८-१८ ओभरमा घटाइएको थियो । वर्षाले खेल दुई पटक अवरोध गरेको थियो । पहिलो पटक पाँच ओभर सकिएपछि खेल रोकिएको थियो, तर दुई ओभर काटेर पुनः सुरु गरिएको थियो । खेल पुनः सुरु हुँदा १८ ओभरको खेल खेल्ने निर्णय गरिएको थियो ।
५ खेलको सिरिजको पहिलो खेल रद्ध भएपछि अब दोस्रो खेल शुक्रबार मेलवर्नमा हुने तालिका रहेको छ ।
काठमाडौँ । इजरायलले गाजामा भिषण आक्रमण गरेको छ । मंगलबार राति गाजामा इजरायली आक्रमणमा लगभग १०४ प्यालेस्टिनीहरू मारिएको रिपोर्टमा बताइएको छ ।
मृत्यु हुनेहरूमा ४६ बालबालिका र २० महिला पनि रहेका छन् भने २५० जना घाइते भएका छन् । इजरायली रक्षा बलले ‘दर्जनौं आतंकवादी लक्ष्य र आतंककारीहरूलाई’ लक्षित गरेको दाबी गरेको छ ।
यो आक्रमणपछि इजरायली सेनाले आफ्नो आक्रमण रोकेको बताएको छ । इजरायलले हमासका ३० अड्डामा आक्रमण गरेको जानकारी दिएको छ ।
सेनाले हमासले युद्धविराम उलंघन गरेमा फेरी आक्रमण गर्ने भन्दै अहिलेका लागि आफुहरुले युद्धविरामको पालना गरेको बताएको छ । इजरायलले यसअघि अमेरिकी राष्ट्रपति डोनाल्ड ट्रम्पको प्रस्तावमा भएको युद्धविरामको पालना नगरेको बन्धकका गलत शव हस्तान्तरण गरेको र पुरै शव पनि अहिलेसम्म हस्तान्तरण नगरेको आरोप लगाएको छ ।
काठमाडौं । राष्ट्रपति रामचन्द्र पौडेल कतार भ्रमणमा जाने भएका छन् ।
बुधबार बसेको मन्त्रिपरिषद्को बैठकले राष्ट्रपति पौडेलको कतार भ्रमण स्वीकृत गरेको सरकारका प्रवक्ता एवं सञ्चार तथा सूचनाप्रविधि मन्त्री जगदिश खरेलले जानकारी दिएका छन् ।
राष्ट्रपति पौडेल कतारको दोहामा हुने दोस्रो सामाजिक विकास विश्व सम्मेलनमा भाग लिन कार्तिक १७ देखि २० गतेसम्म त्यसतर्फ जाने भएका छन् ।
काठमाडौं । गृहमन्त्री ओमप्रकाश अर्यालसँग अमेरिकी राजदूत डिन आर थम्पसनले भेटवार्ता गरेका छन् ।
बुधबार सिंहदरबारमा उनीहरूबीच भेटवार्ता भएको गृहमन्त्री अर्यालको सचिवालयले जनाएको छ । छलफलमा दुई देशबीचको द्विपक्षीय सम्बन्धका विषयमा छलफल भएको जनाइएको छ ।
छलफलमा गृहमन्त्री अर्यालले वर्तमान सुरक्षा अवस्था दिन प्रतिदिन सुधार हुँदै गएको जानकारी गराएका छन् । भेटमा अमेरिकी राजदूतले एमसीसी परियोजनाबारे पनि छलफल भएको मन्त्री अर्यालको सचिवालयले जानकारी दिएको छ ।