काठमाडौं । महालक्ष्मी विकास बैंक लिमिटेडले चाडपर्वलाई लक्षित गर्दै आफ्नो क्रेडिट कार्डमार्फत टुर तथा भ्रमण प्याकेज खरिद गर्न सकिने नयाँ योजना सुरु गरेको छ। ग्राहकलाई अत्याधुनिक, सुरक्षित र सहज बैंकिङ्ग सुविधा उपलब्ध गराउँदै आएको बैंकले चाडपर्वका अवसरमा विदेश भ्रमण गर्ने बढ्दो प्रवृत्तिलाई मध्यनजर गर्दै यो सुविधा ल्याएको हो।
यसका लागि बैंकले विभिन्न प्रतिष्ठित ट्राभल एजेन्सीसँग व्यवसायिक सहकार्यसम्बन्धी सम्झौता गरिसकेको छ। प्रारम्भिक चरणमा, गुरु ट्राभल्स प्रा.लि., दरबारमार्ग र रिसेन्ट एण्ड रिदम टुर्स एण्ड ट्राभल्स, उत्तरढोका, काठमाडौंमार्फत बैंकका क्रेडिट कार्डवाहकहरूले टुर प्याकेज खरिद गर्न सक्नेछन्।
ग्राहकले महालक्ष्मी विकास बैंकको क्रेडिट कार्ड प्रयोग गरी खरिद गरेका प्याकेजको मूल्य बराबरको रकम भुक्तानी ६ देखि १२ महिनासम्मको लचिलो अवधिमा मासिक किस्ताबन्दीमा गर्न सक्नेछन्। बैंकले प्रस्तुत बिलको आधारमा सो कारोबारलाई सहज रूपमा किस्ताबन्दीमा रुपान्तरण गरिदिनेछ। यसरी मासिक किस्तामा रुपान्तरण गर्दा कुनै पनि प्रोसेसिङ शुल्क नलिने व्यवस्था गरिएको छ।
बैंकले यो योजनाबाट ग्राहकलाई सजिलो किस्ताबन्दी सुविधासहित विदेश भ्रमणलाई थप सहज र आकर्षक बनाउने अपेक्षा गरेको छ। साथै, डिजिटल भुक्तानीलाई प्रोत्साहन गर्ने र चाडपर्वलाई थप उत्साहमय बनाउन यो योजना प्रभावकारी हुने विश्वास बैंकले व्यक्त गरेको छ।
