काठमाडौं । सरकारले दर्ता नभएका सामाजिक सञ्जाल बन्द गर्ने निर्णय गरेसँगै संसद्को प्रत्यक्ष प्रसारण (लाइभ स्ट्रिम) समेत रोकिने भएको छ ।
यही विषयमा सभामुख देवराज घिमिरेले संसद्का लाइभ र रेकर्डेड भिडियो सुरक्षित राख्नेबारे गम्भीर चासो राखेका छन्। सभामुखको सचिवालयका अनुसार उनले संसद् सचिवालयलाई वैकल्पिक माध्यम खोज्न निर्देशन दिइसकेका छन्।
सभामुखका प्रेस सल्लाहकार शेखर अधिकारीका अनुसार, “लाइभ प्रसारण र सूचना प्रवाह नरोकिने गरी वैकल्पिक उपायको तयारी गर्न निर्देशन दिइएको छ।”
संघीय संसद्को दुवै सदन-प्रतिनिधिसभा र राष्ट्रिय सभाको बैठक नियमित रूपमा युट्युब लगायतका सामाजिक सञ्जालमार्फत प्रत्यक्ष प्रसारण हुँदै आएको छ। सांसदहरूको अभिव्यक्ति, बहस र कार्यवाही पनि भिडियोका रूपमा युट्युबमा सुरक्षित राखिँदै आएको छ।
तर सरकारले बिहीबारबाट नेपालमा दर्ता नभएका सामाजिक सञ्जाल बन्द गर्ने निर्णय गरेपछि संसद्को सूचना सार्वजनिक गर्ने मुख्य माध्यम नै बन्द हुने अवस्थामा पुगेको हो।
प्रतिनिधिसभाको आगामी बैठक २५ भदौमा र राष्ट्रिय सभाको बैठक २३ भदौमा बस्दैछ। त्यसअघि नै वैकल्पिक डिजिटल उपाय तयार गर्नुपर्ने दवाव संसद् सचिवालयमा देखिएको छ ।
