काठमाडौँ । नेकपा (एमाले)का नेता महेश बस्नेतले ऊर्जा क्षेत्रमा ठूलो नीतिगत भ्रष्टाचारको तयारी भइरहेको दाबी गरेका छन्।
सामाजिक सञ्जालमार्फत सार्वजनिक आरोपमा उनले उर्जामन्त्री कुलमान घिसिङ र अर्थमन्त्री रामेश्वर खनालबीच ५ अर्ब रुपैयाँसम्मको आर्थिक चलखेल हुन लागेको दाबी गर्दै आगामी निर्वाचन खर्च व्यवस्थापनका नाममा ठूलो योजनाबद्ध ‘सेटिङ’ अघि बढेको आरोप लगाएका छन् ।
बस्नेतका अनुसार सरकारले अहिले ५ हजार मेगावाट विद्युत् खरिद (PPA) सम्झौता ‘टेक अर पे’ मोडेलमै गराउने दबाब बनाइरहेको छ, जसमा उपभोक्ताले विद्युत् लिए-नलिए पनि सरकारले भुक्तानी गर्नुपर्ने बाध्यता रहन्छ। उनले भने, “अघिल्लो सरकारले बजेटमार्फत यस्तो PPA नगर्ने स्पष्ट नीति लिएको थियो, तर अहिले यो नीति उल्ट्याएर पुनः कार्यान्वयनको तयारी भइरहेको छ।”
बस्नेतले आन्तरिक विद्युत् खपत नबढेको, निर्यातका लागि भारतीय बजार पूर्णरूपमा सुनिश्चित नभएको र ‘रन अफ दि रिभर’ प्रकारका परियोजना धेरै भएकाले सुक्खायाम र वर्षायाममा विद्युत् सन्तुलन कायम गर्न कठिनाइ हुने बताए। उनले यस्तो अवस्थामै ‘टेक अर पे’ मोडेल लागू गरिए नेपाल विद्युत प्राधिकरण आर्थिक रूपमा थप जोखिममा पर्न सक्ने बताएका छन् ।
बस्नेतले आफ्नो आरोपमा थप्दै भनेका छन्, “५ हजार मेगावाटका लागि ‘टेक अर पे’ मोडेल अपनाउने निर्णय अर्थ मन्त्रालयको सहमतिसहित मन्त्रिपरिषदमा लैजाने तयारी छ। प्रवर्द्धकहरूसँग प्रतिमेगावाट १० लाख उठाएर ५ अर्ब संकलन गरी आगामी निर्वाचन खर्च व्यवस्थापन गर्ने खेल छ।” उनले यो योजनालाई राजनीतिक वित्तीय दुरुपयोगको नयाँ शैली भन्दै कडा चेतावनी समेत दिएका छन् ।
बस्नेतले आफ्नो अभिव्यक्तिमा उर्जामन्त्री कुलमान घिसिङले यस प्रक्रिया पारित भएपछि राजीनामाको तयारी गरेका संकेतसमेत दिएको दाबी गरेका छन्। उनका अनुसार यस्तो निर्णय लागू भएमा NEA दीर्घकालीन रूपमा भारी आर्थिक संकटतर्फ धकेलिनेछ।
यसैबीच, नेपाल विद्युत प्राधिकरणले ५ हजार मेगावाटका लागि ‘टेक अर पे’ मोडेलमा PPA गर्ने सम्बन्धी प्रस्ताव मन्त्रिपरिषद्मा अध्ययन तथा छलफलका क्रममा रहेको तथ्य पुष्टि गरेको छ। तर आर्थिक चलखेल वा राजनीतिक उद्देश्यका आरोपबारे प्राधिकरणले कुनै औपचारिक टिप्पणी गरेको छैन।
