काठमाडौँ । प्रतिनिधिसभा निर्वाचनको तयारीलाई थप सुदृढ बनाउने उद्देश्यले निर्वाचन आयोगले आज प्रधानमन्त्रीसहित राजनीतिक दल र सुरक्षा निकायका प्रतिनिधिहरूसँग छलफल गर्ने भएको छ ।
फागुन २१ गते तोकिएको निर्वाचनलाई केन्द्रमा राखेर आयोगले सरोकारवालासँग समन्वयात्मक संवाद अघि बढाएको हो ।
प्रधानमन्त्री तथा मन्त्रिपरिषद् कार्यालय सिंहदरबारमा सोमबार दिउँसो १ बजे बस्ने उक्त बैठकमा आयोगले हालसम्म सम्पन्न भएका चुनावी तयारीका काम, चुनौती र आगामी कार्ययोजनाबारे जानकारी गराउने कार्यक्रम रहेको छ ।
निर्वाचन आयोगका प्रवक्ता नारायणप्रसाद भट्टराईका अनुसार छलफलमा राजनीतिक दलका शीर्ष नेताहरू तथा सुरक्षा निकायका प्रतिनिधिहरूको समेत सहभागिता रहनेछ । निष्पक्ष, स्वतन्त्र र शान्तिपूर्ण निर्वाचन सुनिश्चित गर्न आवश्यक समन्वय र सहकार्यबारे विस्तृत छलफल हुने अपेक्षा गरिएको छ ।
