काठमाडौं । नेपाली बजारमा आज सुनचाँदीको मुल्य स्थिर रहेको छ ।
नेपाल सुनचाँदी व्यवसायी महासङ्घका अनुसार आइतबार छापावाल सुनको मुल्य स्थिर रहदै तोलाको २ लाख ९४ हजारमा कारोबार भइरहेको छ । यसअघि शुक्रबार पनि सुन तोलाको २ लाख ९४ हजारमा नै कारोबार भएको थियो ।
यस्तै, आज चाँदीको मूल्य पनि स्थिर रहेको छ । महासङ्घका अनुसार आज चाँदी तोलाको ४८३० मा कारोबार भइरहेको छ । यसअघि शुक्रबार पनि चाँदी तोलाको ४८३० मा नै कारोबार भएको थियो ।
काठमाडौँ । इरानले अमेरिकी राष्ट्रपति डोनाल्ड ट्रम्पले दिएको ४८ घण्टाभित्र होर्मुज जलडमरूमध्य खोल्ने अल्टिमेटम अस्वीकार गरेको छ । इरानी सेनाले अमेरिका डराएर धम्की दिइरहेको आरोप लगाएको छ ।
इरानको केन्द्रीय सैन्य मुख्यालय खातम अल अनबिया अन्तर्गतका जनरल अली अब्दोल्लाही अलीअबादीले ट्रम्पको चेतावनीलाई मूर्खतापूर्ण भन्दै पूर्ण रूपमा खारेज गरेका छन् । उनले यस्तो धम्कीले उल्टै ठूलो परिणाम निम्त्याउने चेतावनी दिएका छन् ।
यसअघि ट्रम्पले ४८ घण्टाभित्र होर्मुज खोल्न वा सम्झौता गर्न इरानलाई चेतावनी दिएका थिए । उनले समय सकिँदै गएको भन्दै नमाने ऊर्जा संरचनामा आक्रमण गर्ने बताएका थिए । यस विषयमा ट्रम्पले पटक-पटक अल्टिमेटम दिँदा क्षेत्रीय तनाव झन् बढ्दै गएको छ।
यसबीच इजराइलले इरानको ऊर्जा संरचनामा आक्रमण गर्ने तयारी गरिरहेको बताइएको छ । उक्त योजनाका लागि अमेरिकाको स्वीकृतिको प्रतीक्षा भइरहेको जनाइएको छ ।
रिपोर्टअनुसार इजराइली सैन्य अधिकारीहरूले आगामी चरणमा ऊर्जा क्षेत्रलाई लक्षित गर्ने बताएका छन् । योजनामा विद्युत् गृह, ऊर्जा उत्पादन केन्द्र र वितरण सञ्जालमा आक्रमण गर्ने तयारी रहेको छ ।
शनिबार साँझ इजराइलका प्रधानमन्त्री बेन्जामिन नेतन्याहूले भिडियो सन्देश जारी गर्दै आक्रमणको दायरा विस्तार गरिएको जानकारी दिएका छन् । उनका अनुसार अब सामान्य पूर्वाधारसमेत निशानामा परेको छ, जसमा स्टील उद्योगजस्ता क्षेत्र पनि समावेश छन् ।
इजराइलले हालसम्म इरानको करिब ७० प्रतिशत स्टील उद्योग ध्वस्त पारिएको दाबी गरेको छ । ती उद्योगमा उत्पादन भएको स्टील हतियार निर्माणमा प्रयोग भइरहेको उसको भनाइ छ ।
काठमाडौँ । स्पेनिस ला लिगा अन्तर्गत बार्सिलोनाले एटलेटिको म्याड्रिडलाई पराजित गरेको छ ।
गएराती सम्पन्न खेलमा बार्सिलोनाले एटलेटिकोलाई २-१ गोल अन्तरले पराजित गरेको हो । बार्सिलोनाको जितमा मार्कश राशफोर्ड र रोबेर्ट लेवानडोस्कीले एक एक गोल गरेका थिए । त्यस्तै एटलेटिको म्याड्रिडका लागि गिउलिआनो सिमेओनले एक गोल गरेका थिए ।
यस खेलमा एटलेटिको म्याड्रिडका निकोलस गोन्जालेजले खेलको पहिलो हाफको इन्जुरी समयमा रातो कार्ड पाउदा १० खेलाडीमा सिमित भएको थियो ।
यो जितपछि बार्सिलोनाले ला लिगामा आफ्नो अग्रता बढाएको छ । बार्सिलोनाको ३० खेलमा ७६ अंक भएको छ र दोस्रो स्थानमा रहेको रियल म्याड्रिड भन्दा स्पष्ट ७ अंकले अगाडी भएको छ । त्यस्तै एटलेटिको म्याड्रिडको ३० खेलमा ५७ अंक रहेको छ र लिगमा चौथो स्थानमा छ ।
काठमाडौं । कालिन्चोक हाइड्रोपावर लिमिटेडले आजदेखि सर्वसाधारणका लागि आइपिओ निष्कासन खुला गरेको छ । कम्पनीले यसअघि आयोजना प्रभावित स्थानीय बासिन्दा र वैदेशिक रोजगारीमा रहेका नेपालीहरूलाई शेयर बाँडफाँड गरिसकेको छ ।
कम्पनीले प्रतिकित्ता १०० रुपैयाँ दरमा कुल १३ लाख ७५ हजार कित्ता शेयर निष्कासनको अनुमति नेपाल धितोपत्र बोर्ड बाट पाएको थियो । जसमध्ये केही हिस्सा प्रभावित क्षेत्र र वैदेशिक रोजगारीमा रहेका नेपालीलाई बाँडफाँड भइसकेको छ ।
अब ४१ हजार २५० कित्ता सामूहिक लगानी कोष र १६ हजार ५०० कित्ता कर्मचारीका लागि सुरक्षित गरी बाँकी ६ लाख ८४ हजार ७५० कित्ता शेयर सर्वसाधारणका लागि खुला गरिएको कम्पनीले जनाएको छ ।
लगानीकर्ताले न्यूनतम १० कित्ता देखि अधिकतम १० हजार कित्तासम्म आवेदन दिन सक्नेछन् । आवेदन चैत २५ गतेसम्म खुल्ला रहने छ । आइपिओ निष्कासन तथा बिक्री प्रबन्धक आरबिबि मर्चेन्ट बैंकिङ्ग लिमिटेड रहेको छ । आवेदन सीडीएस एण्ड क्लियरिङ लिमिटेडको मेरो शेयर प्रणाली तथा सि-आस्बा सदस्य बैंक तथा वित्तीय संस्थामार्फत दिन सकिनेछ ।
२०१६ मा स्थापना भएको र पछि २०२२ मा पब्लिक लिमिटेड कम्पनीमा परिणत भएको कालिञ्चोक हाइड्रोपावर लिमिटेडले नेपालको दोलखा जिल्लामा ५ मेगावाटको रन-अफ-रिभर साङ्गु (सोरुण) खोला जलविद्युत परियोजना विकास गरिरहेको छ । यो परियोजना बूट (निर्माण, स्वामित्व, सञ्चालन र हस्तान्तरण) मोडेल अन्तर्गत कार्यान्वयन भइरहेको छ ।
काठमाडौँ । स्पेनिस ला लिगा अन्तर्गत रियल म्याड्रिड माल्लोर्कासँग पराजित भएको छ । गएराती सम्पन्न खेलमा मल्लोर्काले रियल म्याड्रिडलाई २-१ गोल अन्तरले पराजित गरेको हो ।
मल्लोर्काको जितमा मानु मोर्लानेस र भेडाट मुरिकीले एक एक गोल गरेका थिए । त्यस्तै एडर मिलिटाओले एक गोल गरेका थिए ।
यो हारपछि रियल म्याड्रिडको ३० खेलमा ६९ अंक रहेको छ । त्यस्तै जितपछि मल्लोर्काको ३० खेलमा ३१ अंक भएको छ र १७औं स्थानमा उक्लिएको छ ।
काठमाडौँ । राजस्थान रोयल्सले जारी आइपिएलमा लगातार दोस्रो जित हासिल गरेको छ । शनिबार राति सम्पन्न खेलमा राजस्थानले गुजरात टाइटन्सलाई ६ रनले पराजित गरेको हो ।
राजस्थानले दिएको २११ रनको लक्ष्य पछाएको गुजरातले २० ओभरमा ८ विकेट गुमाएर २०४ रन बनाएको थियो ।
गुजरातका लागि साई सुदर्शनले सर्बाधिक ७३ रन बनाएका थिए भने जोस बटलरले २६, राशिद खानले २४ रन बनाएका थिए ।त्यस्तै राजस्थानका लागि रवि विश्नोईले ४ विकेट लिएका थिए ।
यस अघि पहिला ब्याटिंग गरेको राजस्थानले २० ओभरमा ६ विकेट गुमाएर २१० रन बनाएको थियो । राजस्थानका लागि ध्रुव जुरेलले सर्बाधिक ७५ रन बनाएका थिए भने यशस्वी जैसवालले ५५ र वैभव सूर्यवंशीले ३१ रन बनाएका थिए । यो जितपछि राजस्थान रोयल्सको २ खेलमा ४ अंक भएको छ र शिर्ष स्थानमा उक्लिएको छ । त्यस्तै गुजरातले भने लगातार दोस्रो हार बेहोरेको छ ।
काठमाडौँ । प्यूठानको ऐरावती गाउँपालिका-१ को छेडाघाटमा आगलागी हुँदा २४ घर र गोठ जलेर नष्ट भएका छन् ।
गएराती भएको आगलागीमा ९३ लाख बराबरको क्षति भएको प्रारम्भिक अनुमान गरिएको प्रहरीले जनाएको छ । स्थानीय धन बहादुर रानाले घर गोठ र २४ बाख्रा र केहि गाइगोरु जलेको बताएका छन् । आगलागीपछि स्थानीय, प्रहरी सशस्त्र प्रहरीले आगलागी नियन्त्रणमा लिएका थिए ।
काठमाडौं । नेकपा एमालेका अध्यक्ष केपी शर्मा ओली र काँग्रेस नेता रमेश लेखकको बन्दीप्रत्यक्षीकरण रिटमा आज सुनुवाइ हुने भएको छ ।
सर्वोच्च अदालतले यसअघि जारी गरेको कारण देखाउ आदेशपछि विपक्षीले लिखित जवाफ पेश गरिसकेकाले आज सुनुवाइ हुने भएको हो ।
भदौ २३ र २४ गतेको आन्दोलनको जाँचबुझ समितिको सिफारिसका आधारमा ओली र लेखक चैत १४ गते पक्राउ परेका थिए ।
अध्यक्ष ओलीकी पत्नी राधिका शाक्य र नेता लेखककी पत्नी यशोदा लेखकले थुनामुक्त गर्न माग गर्दै बन्दीप्रत्यक्षीकरणको रिट निवेदन दायर गरेका थिए ।
यसअघि सर्वोच्चमा दुवै रिटमा भएको छुट्टाछुट्टै इजलासले सरकारका नाममा कारण देखाउ आदेश जारी गरेका थिए ।
काठमाडौं । प्रतिनिधिसभाका नव निर्वाचित सभामुख डोलप्रसाद (डीपी) अर्यालले आज पद तथा गोपनियताको शपथ लिदैछन् ।
नव निर्वाचित सभामुख अर्यालले आज दिउँसो २: ३० बजे शीतलनिवासमा राष्ट्रपति रामचन्द्र पौडेल समक्ष पद तथा गोपनियताको शपथ लिने कार्यक्रम तय भएको छ ।
राष्ट्रपति कार्यालयका सचिव माहादेव पन्थले सूचना जारी गर्दै सभामुखको शपथ कार्यक्रममा उपस्थित हुन प्रतिनिधिसभा र राष्ट्रियसभाका सदस्यहरु र संसद सचिवालयका सचिवहरुलाई आग्रह समेत गरेका छन् । शुक्रबार सभामुखको मनोनयन दर्ता गर्दा अर्यालको एकल उम्मेदवारी परेपछि निर्विरोध निर्वाचित भएका थिए । अर्यालको प्रस्तावकमा रास्वपा सभापति रवि लामिछाने र समर्थकमा स्वर्णिम वाग्ले, सोविता गौतम र सुनिल लम्साल रहेका थिए ।
आज प्रतिनिधि सभाको बैठकबाट अर्याल निर्वाचित भएको प्रक्रिया पुरा गरेपछि शपथको कार्यक्रम हुने तयारी गरिएको छ ।
काठमाडौँ । जल तथा मौसम विज्ञान विभागले हाल नेपालमा पश्चिमी न्यून चापिय प्रणाली र स्थानीय वायुको प्रभाव रहेको जानकारी दिएको छ ।
हाल देशभर साधारणतया बादल लागेको छ। कोशी, गण्डकी र कर्णाली प्रदेशका पहाडी र हिमाली भू-भागका एक-दुई स्थानमा हल्का वर्षा/हिमपात भई रहेको ।
आज दिउँसो देशको हिमाली र पहाडी भू-भागमा साधारणतया बादल लाग्ने तथा बाँकी भू-भागमा आंशिक बादल लाग्नेछ। देशका पहाडी तथा हिमाली भू-भागका केही स्थानहरूमा मेघगर्जन/चट्याङ्ग/असिना/हावाहुरी सहित मध्यम वर्षा/हिमपात तथा लुम्बिनी र सुदुरपश्चिम प्रदेशका तराई भू-भागका थोरै स्थानहरूमा तथा बाँकी तराई भू-भागका एक-दुई मेघगर्जन/चट्याङ्ग/ सहित हल्का वर्षा/हिमपातको सम्भावना रहेको छ। मधेश र कोशी, बागमती र गण्डकी प्रदेशका तराई भू-भागका केही स्थानहरूमा हावाहुरीको समेत सम्भावना रहेको छ ।
त्यस्तै आज राती देशको हिमाली भू-भागमा साधारणतया बादल लाग्नेछ, पहाडी भू-भागमा आंशिक बादल लाग्नेछ तथा तराई भू-भागमा मौसम मुख्यतया सफा रहने छ। कोशी, गण्डकी, कर्णाली प्रदेशका हिमाली भू-भागका थोरै स्थानहरूमा तथा बागमती, लुम्बिनी र सुदुरपश्चिम प्रदेशको हिमाली भू-भाग, कोशी र गण्डकी प्रदेशको पहाडी भू-भागको एक-दुई स्थानमा मेघगर्जन/चट्याङ्ग सहित हल्का वर्षा/हिमपातको सम्भावना रहेको छ। मधेश र कोशी प्रदेशका तराई भू-भागका केही स्थानहरूमा हावाहुरीको समेत सम्भावना रहेको छ ।