४ दिन अगाडि

गगन-प्रचण्ड भेटवार्ता: समसामयिक मुद्दामा केन्द्रित गोप्य छलफल

काठमाडौँ । नेपाली राजनीतिक वृत्तमा नयाँ हलचल पैदा गर्नेगरी नेपाली कांग्रेसका सभापती गगन थापा र नेकपा संयोजक पुष्पकमल दाहाल प्रचण्ड बीच मंगलबार दिउँसो भेटवार्ता भएको छ। प्रतिनिधिसभा निर्वाचनपछि दुई शीर्ष नेताबीच भएको यो पहिलो औपचारिक संवाद हो ।

भेट प्रचण्ड निवासमा भएको थियो, जहाँ समसामयिक राजनीतिक परिस्थिति केन्द्रित छलफल भएको स्रोतले जनाएको छ। यद्यपि, भेटको एजेन्डाबारे औपचारिक रूपमा विस्तृत खुलासा गरिएको छैन ।

नेपाली कांग्रेसका प्रवक्ता देवराज चालिसे ले भेटको पुष्टि गर्दै “समसामयिक विषयमा सामान्य कुराकानी” भएको बताएका छन्। उनले थप विवरण दिन भने चाहेनन्, जसले भेटलाई अझ अर्थपूर्ण र रणनीतिक बनाएको आकलन गरिएको छ।

शीर्ष तहमा भएको यो संवादलाई अर्थपूर्ण रूपमा हेरिएको छ। अबको केही दिनमा यसको प्रभाव राजनीतिक घटनाक्रममा देखिने अनुमान गरिएको छ।

युएईविरुद्ध नेपालको ८ विकेटको सहज जित

काठमाडौँ । नेपालले युएईलाई ८ विकेटले पराजित गरेको छ ।

युएईले दिएको १२९ रनको लक्ष्य पछाएको नेपालले १५.५ ओभरमा २ विकेट गुमाएर लक्ष्य पुरा गरेको थियो ।

नेपालका लागि कुशल भुर्तेलले अविजित ५७ बलमा ८४ रन बनाएका थिए । त्यस्तै कप्तान दीपेन्द्र सिंह ऐरीले अविजित २३ र कुशल मल्लले १९ रन बनाएका थिए ।

यसअघि टस हारेर पहिला ब्याटिंग गरेको युएईले २० ओभरमा ८ विकेट गुमाउदै १२८ रन बनाएको थियो । युएईका लागि आकाशदीप नाथले अविजित ५३ रन बनाए भने मुहमद अरफानले ३२ र अडीब उस्मानीले ३० रन बनाए । त्यस्तै नेपाली बलर सन्दीप लामिछानेले ३ विकेट लिए भने हेमन्त धामीले २ तथा नन्दन यादव र सहाब आलमले एक एक विकेट लिए ।

नेपालको यो जितसँगै २ खेलको सिरिज १-१ ले बराबरी भएको छ । यसअघि सोमबार सम्पन्न पहिलो खेल युएईले जितेको थियो ।

इरानसँग ठुलो सहमति हुनसक्छ- ट्रम्प

काठमाडौँ । अमेरिकी राष्ट्रपति डोनाल्ड ट्रम्पले अमेरिका र इरानबीच छिट्टै ठूलो सहमति हुन सक्ने बताएका छन् ।

एक अन्तर्वार्तामा उनले यस्तो सहमति भए केही सातादेखि जारी तनाव र द्वन्द्व अन्त्य हुन सक्ने दाबी गरेका हुन् । उनले भने- ‘हामी ठूलो सहमति गर्नेछौँ, उनीहरूसँग विकल्प छैन ।’

ट्रम्पले अमेरिका द्वारा इरानको नौसैनिक तथा वायु शक्तिमा ठूलो क्षति पुर्‍याइएको र त्यसले इरानको सैन्य क्षमता कमजोर भएको दाबी पनि गरेका छन् ।

उनले इरानमा सत्ता परिवर्तनसमेत भइसकेको दाबी गर्दै आफूले प्रत्यक्ष नभए पनि अप्रत्यक्ष रूपमा त्यस्तो परिवर्तन गराएको बताएका छन् ।

सभामुखलाई बुझाइयो प्रतिनिधिसभा नियमावलीको मस्यौदा

काठमाडौँ । प्रतिनिधिसभा नियमावली मस्यौदा समितिले संसदको नयाँ नियमावलीको मस्यौदा सभामुख डोलप्रसाद अर्याललाई बुझाएको छ ।

मंगलबार सिंहदरवारमा मस्यौदा समितिका सभापति गणेश पराजुलीले सभामुख अर्याललाई मस्यौदा बुझाएका हुन् । नयाँ नियमावली मस्यौदा बुझ्दै सभामुख अर्यालले प्रक्रियागत रूपमा नियमावली पारित गरिने जानकारी दिए । नियमावलीमा केही असन्तुष्टि, कमी कमजोरी भए संसदबाट सुधार गर्दै अघि बढ्ने प्रतिबद्धता जनाए ।

त्यस्तै मस्यौदा समितिका सभापति पराजुलीले समयमा नै कानुन बनाएर जनतालाई न्यायको सुनिश्चितता गर्ने, सुशासनको प्रत्याभूति गराउन सक्ने गरि नयाँ नियमावली तयार गरिएको बताए ।

नयाँ नियमावली बनाउन चैत्र २३ गते बसेको प्रतिनिधिसभा बैठकले रास्वपा सांसद पराजुलीको संयोजकत्वमा १५ सदस्यीय मस्यौदा समिति गठन गरेको थियो ।

अर्थमन्त्री डा. वाग्ले र अमेरिकी सहायक विदेशमन्त्री कपुरबीच भेटवार्ता

काठमाडौँ । अर्थमन्त्री डा. स्वर्णिम वाग्लेसँग अमेरिकाको मध्य तथा दक्षिण एसियाली मामिलासम्बन्धी सहायक विदेशमन्त्री समीर पाउल कपुरले भेटवार्ता गरेका छन् ।

मंगलबार भएको भेटवार्तामा नेपालको व्यापार वातावरण सुधार र अमेरिकी कम्पनीहरू भित्र्याउने विषयमा महत्वपूर्ण छलफल भएको बताएका बताइएको छ ।

सहायक विदेशमन्त्री कपूरले दुवै पक्षबीच व्यापारिक सम्बन्ध अझ नजिक बनाउने विषयमा सहमति बनेको छ । यसबाट नेपालको यातायात, ऊर्जा तथा डिजिटल पूर्वाधार क्षेत्रमा सुधार भई आर्थिक वृद्धि हुने विश्वास व्यक्त गरिएको छ ।

कपुरले यस्तो सहकार्यले नेपाल र अमेरिका दुवै देशलाई लाभ पुग्ने बताएका छन् ।

योजना आयोग र नीति अनुसन्धान प्रतिष्ठान जस्ता निकायलाई खारेज होइन सुदृढ बनाउने हो- प्रधानमन्त्री

काठमाडौं । प्रधानमन्त्री वालेन्द्र शाहले राष्ट्रिय योजना आयोग र नीति अनुसन्धान प्रतिष्ठान जस्ता निकायहरूलाई खारेज गर्नुको सट्टा सुधारमार्फत सुदृढ बनाई सरकारको सेवा प्रवाहलाई अझ प्रभावकारी बनाउने स्पष्ट पारेका छन् ।

प्रधानमन्त्री तथा मन्त्रिपरिषद्को कार्यालयमा आज बैसाख ८ गते आयोगका पदाधिकारी तथा कर्मचारीहरूसँग भएको छलफलमा प्रधानमन्त्री शाहले योजना निर्माण र नीतिगत अनुसन्धान व्यवस्थित भएमा मात्र सरकारलाई सेवा प्रवाहमा सहजता मिल्ने बताए ।

नीति अनुसन्धान प्रतिष्ठानका सन्दर्भमा उनले भने- ‘विषय विज्ञ र अनुसन्धानकर्ताको महत्त्व कति रहन्छ भन्ने हामीलाई थाह छ। हामीलाई यस्तो उत्कृष्ट विज्ञता चाहिएको हो, जसले जनप्रतिनिधिले भन्दा पनि गहिरो अध्ययन र दूरगामी सोच प्रस्तुत गर्न सकुन्। सरकारले विज्ञहरूको प्राज्ञिक कार्यलाई पूर्ण रूपमा ग्रहण गर्नेछ।”

प्रधानमन्त्री शाहले कुनै पनि बहानाबाजी नगरी विना सङ्कोच नतिजा निकाल्ने गरी काम गर्न दुवै निकायलाई निर्देशन दिए । “कुनै पनि कार्य सम्पादन गर्दा ठोस योजना र सजग कार्यान्वयन आवश्यक हुन्छ। विकासमा विषय विज्ञको भूमिका अतुलनीय हुन्छ, यो तथ्यलाई आत्मसात् गरेर अघि बढ्नुस्,” उनले भने ।

मन्त्रालयहरूबिच समन्वय नभएको भन्ने तर्क स्वीकार्य नहुने स्पष्ट पार्दै उनले एउटै सरकार मातहत त्यस्तो समस्या हुन नहुने बताए । साथै, बजेट र कानुनी जटिलतालाई काम नगर्ने बहानाका रूपमा प्रयोग नगर्न समेत उहाँले सचेत गराए । “प्रभावकारी अध्ययन र अनुसन्धानबाट मात्रै परिणाम सम्भव छ। पुराना नीति र ऐनकै भरमा ५० वर्षसम्म काम त चलाउन सकिएला तर सुधार नगरेसम्म देश समृद्ध हुन सक्दैन,” प्रधानमन्त्रीको कथन थियो ।

सो अवसरमा अर्थमन्त्री स्वर्णिम वाग्लेले वर्तमान समयलाई सुधारको स्वर्णिम अवसरका रूपमा लिनुपर्ने र उच्च राजनीतिक प्रतिबद्धताअनुसार काम अघि बढ्ने बताए । उनले विज्ञहरूको ज्ञानलाई सरकारी नीति, कार्यक्रम र बजेटमा रूपान्तरण गर्न निर्देशन दिए । स्पष्ट लक्ष्य, पर्याप्त बजेट, तोकिएको जिम्मेवारी र मापनयोग्य परिणामसहितका प्रस्तावहरू सम्बन्धित मन्त्रालयमार्फत ल्याउनुपर्नेमा उनको विशेष जोड थियो।

अर्थमन्त्री वाग्लेले विद्यमान संस्थागत संरचनाको सुदृढीकरण, अप्रासङ्गिक प्रावधानहरूको खारेजी र नयाँ आवश्यकता अनुसार नीति विकास गर्ने प्रक्रिया थालनी गरिने जानकारी दिए । उनले नवप्रवर्तनात्मक कार्यक्रमहरूलाई ‘पाइलट प्रोजेक्ट’ का रूपमा सुरु गरी सफल भएपछि राष्ट्रिय स्तरमा विस्तार गर्ने रणनीतिबारे समेत चर्चा गरे ।

छलफलका क्रममा आयोगका पदाधिकारीहरूले आफ्नो क्षेत्रको कार्य प्रगति, चुनौती र बजेटको अवस्थाबारे प्रधानमन्त्रीसमक्ष बिफ्रिङ गरेका थिए । प्रतिष्ठानका कर्मचारीहरूले हालसम्मका अध्ययन–अनुसन्धान सरकारी कार्य प्रणालीका लागि निकै महत्त्वपूर्ण रहेको उल्लेख गर्दै थप जनशक्ति र स्रोतसाधनको मागसमेत गरे । प्रधानमन्त्रीसँगको यस प्रत्यक्ष संवादले आफूहरूलाई थप ऊर्जा र मेहनतका साथ काम गर्ने प्रेरणा मिलेको उनीहरूले भनाई छ ।

समस्याग्रस्त सहकारीका ऋणलाई १५ दिन भित्र ऋण चुक्ता गर्न सूचना जारी

काठमाडौँ । भूमि व्यवस्था, सहकारी तथा गरिबी निवारण मन्त्रालयले समस्याग्रस्त सहकारी व्यवस्थापन समितिले पूर्णता पाएसँगै मङ्गलवार सूचना जारी गर्दै सहकारीबाट ऋण लिएका सञ्चालक, ऋणी सदस्य, व्यवस्थापक, कर्मचारीहरू, जमानीहरूका नाममा १५ दिने सूचना जारी गरेको छ ।

ऋण चुक्ता नगरेमा ऋणी तथा जमानीको समेत सम्पत्ति रोक्का देखि धितो लिलाम गर्ने जनाएको छ । सूचनामा भनिएको छ,’नेपाल सरकार (भूमि व्यवस्था, सहकारी तथा गरिबी निवारण मन्त्रालय) बाट सहकारी ऐन, २०७४ को दफा १०४ बमोजिम समस्याग्रस्त

घोषणा भई सम्पत्ति व्यवस्थापन तथा दायित्व भुक्तानीका लागि यस समितिको मातहतमा आएका तपसिलबमोजिमका सहकारी संस्थाका सञ्चालक, ऋणी सदस्य, व्यवस्थापक, कर्मचारीहरू, जमानीहरूलाई कार्यालयको वेबसाइट र राष्ट्रिय स्तरको दैनिक पत्रिकामा सूचना प्रकाशन, एसएमएस, फोनलगायतका माध्यमबाट पटक पटक जानकारी गराउँदा पनि हालसम्म ऋण चुक्ता गर्न बाँकी रहेका ऋणीहरूले बुझाउनुपर्ने ऋणको साँवा, व्याज तथा हर्जानासमेत नबुझाएको हुँदा यो सूचना प्रकाशन भएको मितिले १५ (पन्ध) दिनभित्र यस समितिको कार्यालय बुद्धनगर, काठमाडौँमा सम्पर्क गरी आफ्नो हरहिसाब लिई रकम बुझाउनका लागि यो सूचना प्रकाशन गरिएको छ।’

साथै १५ दिन भित्र ऋण फरफारक नगरेमा ऋणी, निजको परिवार र जमानीको नाम नामेसीसहितको विवरण सार्वजनिक गर्ने तथा उनीहरूको नाममा रहेको सम्पत्ति र खाता रोक्का गर्ने जनाएको छ । साथै सार्वजनिक सेवा सुविधा समेत रोक्का गर्ने र कर्जा लिँदा राखिएको धितो लिलाम गर्ने सूचनामा उल्लेख गरिएको छ ।

सूचनामा भनिएको छ, ‘उल्लेखित मितिभित्र पनि ऋण फरफारक नगरेमा ऋणीहरूको नाम नामेसीसहितको विवरण सार्वजनिक गर्ने, ऋणी तथा निजका परिवार र जमानीको सम्पत्ति र खाताका साथै सार्वजनिक सेवा सुविधा रोक्काका लागि सम्बन्धित निकायमा लेखी पठाउनुका साथै सहकारी ऐन, २०७४ र सहकारी नियमावली, २०७५ बमोजिम कर्जा लिंदा लेखिदिएको धितो लिलाम बिक्री वा अन्य व्यवस्था गरी सहकारी संस्थाको सम्पूर्ण लेना रकम असुल उपर गरिने छ।’

आज मात्रै सरकारले समस्याग्रस्त सहकारी व्यवस्थापन समितिलाई पूर्णता दिएको छ । मङ्गलवार को मन्त्रिपरिषद्को बैठकले अध्यक्षमा प्युठानका डिल्लीराज आचार्य तथा धादिङका नवराज सिम्खडा र ललितपुरका रोशनबहादुर शाक्यलाई सदस्य नियुक्त गरेको थियो ।

मन्त्रालयले सहकारीका बचतकर्ताहरूको रकम फिर्ताका लागि चरणबद्ध रुपमा प्रक्रिया अघि बढाएको छ । ऋण असुलीसँगै बचत फिर्तालाई तीव्रता दिने मन्त्रालयको तयारी रहेको छ ।

पुरातत्वका तत्कालीन वरिष्ठ डिभिजनल इन्जिनियरसहित दुई जनाविरुद्ध मुद्दा दायर

काठमाडौँ । अख्तियार दुरुपयोग अनुसन्धान आयोगले पुरातत्व विभागका तत्कालीन वरिष्ठ डिभिजनल इन्जिनियर पूर्णबहादुर श्रेष्ठसहित दुई जनाविरुद्ध घुस लिएको तथा सम्पत्ति शुद्धीकरण गरेको अभियोगमा मुद्दा दायर गरेको छ ।

आयोगका अनुसार श्रेष्ठले निर्माण सेवा सञ्चालन गर्ने व्यवसायी तथा सम्बन्धित संयुक्त उपक्रमहरूबाट देउकला अधिकारीको नाममा रहेको बैंक खातामा रकम जम्मा गराएका थिए । त्यसपछि सोही रकम प्रयोग गरी देउकला अधिकारी र श्रेष्ठको संयुक्त नाममा विभिन्न सम्पत्ति खरिद गरिएको पाइएको छ ।

अनुसन्धानका क्रममा पुरातत्व विभागले गरेका ठेक्का सम्झौतामध्ये करिब ६४ करोड २१ लाख रुपैयाँ बराबरका काममा श्रेष्ठ संलग्न रहेको खुलेको छ । ती ठेक्कामा सहजीकरण गरिदिने नाममा उनले घुस माग्ने र लिने गरेको पुष्टि भएको आयोगले जनाएको छ ।

घुसबापत संकलित करिब ४ करोड २२ लाख ७५ हजार रुपैयाँ विभिन्न मितिमा देउकला अधिकारीको खातामा जम्मा गरिएको र त्यस रकमबाट जग्गा खरिद, सुन खरिद तथा अन्य व्यक्तिलाई भुक्तानी गरिएको अनुसन्धानबाट खुलेको छ ।

आयोगले गैरकानुनी रूपमा आर्जित रकमको स्रोत लुकाउन तथा रूपान्तरण गर्न दुवै जनाले मिलेमतोमा काम गरेको ठहर गर्दै भ्रष्टाचार र सम्पत्ति शुद्धीकरण दुवै कसुरमा कारबाहीको माग गरेको छ ।

अब फिल्म निर्देशन गर्दिन- डेविड धवन

काठमाडौँ । बलिवुडका चर्चित फिल्म निर्देशक डेविड धवनले अब फिल्म निर्देशन नगर्ने बताएका छन् । आफ्नो नयाँ चलचित्र ‘है जवानी तो इश्क होना है’ आफ्नो करिअरको अन्तिम चलचित्र हुने बताएर अब फिल्म निर्देशन नगर्ने स्पष्ट गरेका हुन् ।

यस चलचित्रको टिजर हालै सार्वजनिक भएको छ र छिट्टै प्रदर्शनको तयारीमा रहेको छ। तर प्रदर्शनअघि नै निर्देशक धवनले दिएको अभिव्यक्तिले सामाजिक सञ्जालमा व्यापक चर्चा पाएको छ।

एक अन्तर्वार्तामा उनले स्वास्थ्य अवस्थालाई ध्यानमा राख्दै अब धेरै चलचित्र निर्देशन नगर्ने बताए । ७४ बर्षिय धवनले भने, अब आफूले थप चलचित्र निर्देशनको सम्भावना नरहेको र यो नै अन्तिम भएको बताए । साथै उनले अब आफू केवल छोरा वरुण धवन का बुबाका रूपमा बस्ने इच्छा व्यक्त गरे ।

तीन दशकभन्दा लामो करिअरमा ४५ भन्दा बढी चलचित्र निर्देशन गरेका धवनले आफ्नो यात्राप्रति सन्तुष्टि व्यक्त गरेका छन् । उनले संजय दत्त, अनिल कपूर, गोविंदा र सलमान खान जस्ता चर्चित कलाकारसँग काम गरेका छन् । साथै आफ्नो चलचित्र निर्माण शैली विकास गर्न मनमोहन देसाईबाट प्रेरणा पाएको उनले बताएका छन् ।

उनको नयाँ चलचित्र २२ मे २०२६ मा हलमा प्रदर्शनमा आउने तय भएको छ । डेविड धवन र वरुण धवन को बुबा-छोराको जोडी यसअघि ‘मैं तेरा हीरो’ र ‘जुड़वा २’ पछि यो तेस्रो सहकार्य हो । चलचित्रमा वरुण धवन, मृणाल ठाकुर र पूजा हेग्डे मुख्य भूमिकामा रहेका छन् ।

मन्त्रिपरिषदको बैठकले के के निर्णय गर्यो ?

काठमाडौं । मन्त्रिपरिषद् बैठकले नेपाल धितोपत्र बोर्डको अध्यक्ष नियुक्तिका लागि राष्ट्रिय योजना आयोगका उपाध्यक्ष डा. गुणाकर भट्टको संयोकत्वमा अर्थसचिव घनश्याम उपाध्याय र भुवन कुमार दाहाल सदस्य रहने गरी सिफारिस समिति गठन गर्ने निर्णय गरेको छ ।

मन्त्रिपरिषदको बैठकका निर्णय बारे जानकारी दिदै सञ्चार, सूचना एवं प्रविधिमन्त्री विक्रम तिमिल्सिनाले सरकारले नेपाल विशेष सेवा ऐन २०४२ लाई संशोधन गर्न बनेको विधेयक संघीय संसद्‌मा पेस गर्न स्वीकृति दिने निर्णय गरिएको बताए ।

त्यस्तै प्रतिनिधिसभा सदस्य निर्वाचन ऐन २०७४ संशोधन गर्न बनेको विधेयक संघीय संसद्‌मा पेस गर्न स्वीकृत दिने, मतदाता नामावली ऐन २०७३ लाई संशोधन गर्न बनेको विधेयक संघीय संसद्‌मा पेस गर्न स्वीकृत दिने निर्णय भएको छ ।

त्यसैगरी समस्याग्रस्त सहकारी व्यवस्थापन समितिको अध्यक्ष पदमा डिल्लिराज आचार्य, प्युठान र सदस्य पदमा नवराज सिम्खडा धादिङ र रोशनबहादुर शाक्य ललितपुरलाई नियुक्ति र मनोनयन गर्ने निर्णय भएको मन्त्री तिमिल्सिनाले जानकारी दिए ।