काठमाडौँ । उपत्यकामा सरकारी तथा सार्वजनिक जग्गा अतिक्रमण गरेर बनाइएका बस्तीमाथि सरकारी टोलीले कडा एक्सन थालेको छ। शनिबार र आइतबार दुई दिनको अभियानमै काठमाडौँ र भक्तपुरका विभिन्न स्थानमा गरी एक हजार २७२ घरटहरा भत्काइएको छ।
थापाथली, गैरीगाउँ–बानेश्वर, जडिबुटी र मनोहरा क्षेत्र केन्द्रित यो अभियानमा नेपाल प्रहरी, सशस्त्र प्रहरी र महानगर प्रहरीको संयुक्त परिचालन गरिएको थियो। प्रहरी तथ्याङ्कअनुसार ती क्षेत्रमा कुल एक हजार ६५० संरचना रहेकामा अझै सयौँ घरटहरा हटाउन बाँकी छन्।
थापाथलीमा मात्रै बागमती किनारका १४३ संरचना शनिबार ध्वस्त पारिँदा ३४ परिवार प्रत्यक्ष प्रभावित बने। उनीहरूलाई अस्थायी रूपमा कीर्तिपुरस्थित राधास्वामी सत्सङ्ग भवनमा राखिएको छ।
गैरीगाउँ–बानेश्वर क्षेत्रमा ५७८ मध्ये झण्डै सबै संरचना भत्काइएका छन् भने केही पक्की घर अझै बाँकी छन्। मनोहरा–जडिबुटी क्षेत्रमा पनि डोजर चलेको छ, जहाँ सयौँ बासिन्दालाई सुरक्षित स्थानमा सारिएको छ।
भक्तपुरको मनोहरा बस्तीमा भने ८१५ मध्ये आधाभन्दा बढी संरचना हटाइए पनि वर्षाका कारण बाँकी काम रोकिन पुगेको छ। सरकारले सोमबारसम्म पूर्ण रूपमा अतिक्रमण हटाउने तयारी गरेको जनाएको छ।
सरकारले जोखिमयुक्त क्षेत्रमा बसोबास गर्ने नागरिकलाई स्थानान्तरण गर्दै अस्थायी बसोबास, खाना तथा आधारभूत सुविधा उपलब्ध गराउने दाबी गरेको छ। आवश्यक परे होटल तथा लजसम्मको व्यवस्था मिलाइएको बताइएको छ।
सहरी विकास मन्त्रालयका अनुसार विस्थापितहरूको विवरण संकलन गरी दीर्घकालीन व्यवस्थापनको तयारी भइरहेको छ। प्रारम्भमा जोखिमयुक्त बस्ती हटाइने र त्यसपछि वास्तविक भूमिहीनको पहिचान गरेर बसोबासको विकल्प दिइने योजना अघि सारिएको छ।
यसैबीच, विस्थापित बालबालिकामा पर्न सक्ने मानसिक असरलाई ध्यानमा राख्दै महानगरपालिकाले होल्डिङ सेन्टरमा खेलकुद तथा मनोरञ्जन कार्यक्रम सञ्चालन गर्ने तयारी गरेको छ।
