काठमाडौँ । Embark UnMath ले नेपालमा पहिलोपटक ‘Problem Solving Workshop’ सञ्चालन गरेको छ ।
बालबालिकाले गणित भनेपछि कति डराउछन्, कति टाढै भाग्छन्य-ही व्यवहार बदल्ने लक्ष्यसहित यो वर्कशप सञ्चालन गरिएको हो ।
६ देखि १२ कक्षासम्मका ५० भन्दा बढी विद्यार्थी सहभागी भएको यस कार्यक्रममा, उनीहरूलाई ‘गणित पाठ्यपुस्तकको बोझ’ होइन, जीवनमै प्रयोग हुने ‘सोच्ने तरिका’ सिकाइएको आयोजकले बताएका छन्।
कार्यक्रमका प्रशिक्षकहरूका अनुसार UnMath को उद्देश्य गणितलाई कठोर र सूत्रमूलक विषय होइन, दैनिकीसँग जोडिएको रमाइलो सीपका रूपमा प्रस्तुत गर्ने हो । “विद्यार्थीले कति सूत्र कण्ठ गर्छन् भनेर होइन, उनीहरूले समस्या कसरी बुझ्छन् र समाधान कसरी निकाल्छन् — त्यो नै वास्तविक गणित हो,” प्रशिक्षकले बताए।
विद्यालयका शिक्षकहरूले पनि यो कार्यशालाको प्रभाव महत्त्वपूर्ण रहेको बताए। उनीहरूको भनाइमा, अनौपचारिक गतिविधि, खेलमार्फत समस्या बुझ्ने अभ्यास र समूहमा छलफलले ‘गणित भनेको गाह्रो’ भन्ने मानसिकता तोड्न मद्दत गरेको छ।
Embark UnMath नेपालकी टिम लिड मनिषा आचर्यका अनुसार, गणित सिकाउने परम्परागत शैलीले विद्यार्थीलाई विषयभन्दा टाढा पुर्याइरहेको समयमा UnMath जस्तो कार्यक्रम नेपालमा अत्यन्त आवश्यक छ। “विद्यार्थीको आत्मविश्वास बढाउन, उनीहरूलाई वास्तविक जीवनसँग सम्बन्धित समस्या समाधानमा सक्रिय बनाउन यस्ता कार्यक्रम निरन्तर जारी रहन्छन्,” उनले भनिन् ।
विद्यार्थी र अभिभावक–दुवैबाट उत्साहजनक प्रतिक्रिया आएपछि Embark UnMath ले आगामी महिनाहरूमा ‘Global Math Debate League’, ‘Math Marathon’, ‘Space Math’ जस्ता अन्तर्राष्ट्रियस्तरका कार्यक्रम नेपालमै ल्याउने तयारी गरेको छ।
