पर्सा । पर्सा निर्वाचन क्षेत्र नम्बर ४ मा नेपाली कांग्रेसको घरदैलो अभियानले यतिबेला नयाँ ऊर्जा र उत्साह थपेको छ।
प्रतिनिधि सभाका उम्मेदवार रमेश रिजालको घरदैलो कार्यक्रमप्रति स्थानीय मतदाताको उल्लेखनीय साथ र समर्थन देखिएको छ। बिहानैदेखि टोल-टोलमा पुगेर मतदातासँग प्रत्यक्ष संवाद गर्दै आएका रिजालले विकास, सुशासन र रोजगारी सिर्जनालाई आफ्नो प्रमुख एजेन्डा बनाएका छन्।
घरदैलोका क्रममा स्थानीय बासिन्दाले खानेपानी, सडक स्तरोन्नति, शिक्षा तथा स्वास्थ्य सेवाको गुणस्तर सुधार जस्ता विषय उठाउँदै आफ्ना अपेक्षा राखिरहेका छन्। उम्मेदवार रिजालले ती समस्यालाई प्राथमिकताका साथ समाधान गर्ने प्रतिबद्धता व्यक्त गरेका छन्।
“हामीले अब नारामात्र होइन, परिणाम देखिने काम चाहेका छौं,” एक स्थानीय मतदाताले भने, “रमेशजीले हाम्रो कुरा ध्यानपूर्वक सुन्नु भयो, यसपटक हामीले थप परिवर्तनको आशा गरेका छौं र यो परिवर्तनलाई रमेश रिजालले नै सार्थकता दिनु हुनेछ भन्नेमा हामि विश्वस्त छौ । हिजोका दिनमा पनि पर्सा ४ को बिकासमा उँहाको योगदान सर्हानिय थियो र भोलिका दिनमा पनि पक्कै रहने छ ।”
युवा, महिला तथा जेष्ठ नागरिकको सक्रिय सहभागिताले घरदैलो कार्यक्रम झन् उत्साहपूर्ण बनेको छ। कांग्रेसका स्थानीय नेता तथा कार्यकर्ताहरू पनि संगठित रूपमा परिचालित भई जनताको घरदैलोमा पुगिरहेका छन्। उनीहरूका अनुसार यसपटक पर्सा ४ मा कांग्रेसको माहोल सकारात्मक बन्दै गएको छ।
रिजालले पर्सा ४ लाई समृद्ध र व्यवस्थित निर्वाचन क्षेत्र बनाउने लक्ष्यसहित आफूले उम्मेदवारी दिएको बताउँदै मतदातासँग विश्वासको मत मागिरहेका छन्। “जनताको भरोसा नै मेरो सबैभन्दा ठूलो शक्ति हो,” उनले भने, “यहाँका हरेक समस्यालाई आफ्नो जिम्मेवारी ठानेर काम गर्नेछु।”
घरदैलो अभियानसँगै पर्सा ४ मा चुनावी सरगर्मी बढ्दै गएको छ। मतदातासँग प्रत्यक्ष भेटघाट र संवादमार्फत उम्मेदवार रिजालले विश्वास जित्ने प्रयासलाई तीव्रता दिएका छन्, जसले कांग्रेस कार्यकर्तामा थप उत्साह भरेको छ।
