काठमाडौँ । प्रतिनिधिसभा सदस्य निर्वाचन अन्तर्गत कञ्चनपुर जिल्लाका तीनवटै निर्वाचन क्षेत्रमा राष्ट्रिय स्वतन्त्र पार्टी (रास्वपा)का उम्मेदवारहरूले उल्लेखनीय विजय हासिल गरेका छन्। सार्वजनिक गरिएको मतपरिणाम अनुसार जिल्लाभर रास्वपाले बलियो उपस्थिति देखाएको छ।
कञ्चनपुर–१ बाट रास्वपाका जनकसिंह धामी २४ हजार ३३२ मतसहित विजयी भएका छन्। उनका मुख्य प्रतिस्पर्धी नेपाली कम्युनिष्ट पार्टीकी बिना मगरले ११ हजार ११० मत प्राप्त गरिन्। नेपाली कांग्रेसका गोपीप्रसाद उपाध्यायले आठ हजार ४६७ मत पाउँदा नेकपा (एमाले)का तारा लामा तामाङले आठ हजार ८८ मत प्राप्त गरेका छन्। उक्त क्षेत्रमा कुल ६१ हजार ७४ मत खसेको थियो।
कञ्चनपुर–२ मा पनि रास्वपाले विजय कायम राखेको छ। रास्वपाका दीपकराज बोहराले ३३ हजार ९५२ मत प्राप्त गर्दै नेपाली कांग्रेसका नारायणप्रकाश साउदलाई पराजित गरेका हुन्। साउदले १० हजार ८२७ मत पाए। यस क्षेत्रमा एमालेका बचनबहादुर सिंहले छ हजार ४१८ तथा नेपाली कम्युनिष्ट पार्टीका माधव पन्तले छ हजार ६३७ मत प्राप्त गरेका छन्। यहाँ कुल ६५ हजार ३४७ मत खसेको थियो।
त्यस्तै कञ्चनपुर–३ मा रास्वपाका ज्ञानेन्द्रसिंह महता २७ हजार ११८ मतसहित विजयी भएका छन्। उनका निकटतम प्रतिस्पर्धी नेपाली कांग्रेसका हरिप्रसाद बोहराले नौ हजार ४४३ मत पाए भने एमालेका दीपकप्रकाश भट्टले सात हजार ५७५ मत प्राप्त गरेका छन्। यस क्षेत्रमा कुल ५८ हजार ३६१ मत खसेको थियो।
जिल्लाका तीनवटै निर्वाचन क्षेत्रमा रास्वपाका उम्मेदवार विजयी भएपछि कञ्चनपुरमा पार्टीको प्रभाव उल्लेखनीय रूपमा बढेको देखिएको छ।
