काठमाडौं । नेपाल बैंक लिमिटेडले आफ्ना कर्जा ग्राहकहरूलाई लक्षित गर्दै ब्याज छुटसहित कर्जा चुक्ता वा नियमित गर्ने विशेष योजना सार्वजनिक गरेको छ।
बैंकका अनुसार यो योजना विशेषगरी ती ग्राहकहरूका लागि ल्याइएको हो, जसले विगतमा लिएको कर्जा समयमै तिर्न नसकी ‘खराब कर्जा’को श्रेणीमा पुगेका छन्। वि.सं. २०७९ चैत मसान्तअघि खराब वर्गमा वर्गीकृत भई बक्यौता सावाँ १ करोड रुपैयाँसम्म रहेका ग्राहकहरूले यो अवसर उपयोग गर्न सक्नेछन्।
उक्त योजना अन्तर्गत योग्य ग्राहकहरूले तोकिएको शर्त पूरा गरी वि.सं. २०८३ असार मसान्तभित्र कर्जा चुक्ता गर्दा ब्याजमा विशेष छुट प्राप्त गर्न सक्ने बैंकले जनाएको छ।
त्यसैगरी, वि.सं. २०८० बैशाख १ गतेपछि निष्क्रिय वा सक्रिय अवस्थाका कर्जा ग्राहकहरूले पनि वि.सं. २०८२ चैत मसान्तभित्र आफ्नो बक्यौता रकम र ब्याज भुक्तानी गरी कर्जा नियमित वा पूर्ण रूपमा चुक्ता गरेमा ब्याज छुटको सुविधा लिन सक्नेछन्।
बैंकले यस योजनाबाट लाभ लिन इच्छुक ग्राहकहरूलाई नजिकको शाखा कार्यालयमा सम्पर्क गर्न आग्रह गरेको छ। यो योजना मार्फत ग्राहकलाई आर्थिक बोझ कम गर्दै कर्जा व्यवस्थापन सहज बनाउने लक्ष्य राखिएको बैंकले जनाएको छ।
