काठमाडौं । एभरेष्ट बैंक लिमिटेडले तीन अर्ब रुपैयाँ बराबरको ऋणपत्र जारी गर्ने तयारी गरेको छ। उक्त ऋणपत्रको निष्काशन तथा बिक्री व्यवस्थापनका लागि बैंकले लक्ष्मी सनराईज क्यापिटल लिमिटेडलाई जिम्मेवारी दिएको जनाएको छ।
“एभरेष्ट बैंक लिमिटेड ऋणपत्र २०८८” नाम दिइएको यस योजनाअन्तर्गत बैंकले प्रतिकित्ता एक हजार रुपैयाँ दरका कुल ३० लाख युनिट ऋणपत्र बिक्री गर्नेछ।
यसमा ४० प्रतिशत अर्थात १२ लाख युनिट सर्वसाधारणका लागि खुला गरिनेछ भने बाँकी ६० प्रतिशत अर्थात १८ लाख युनिट व्यक्तिगत (प्राइभेट प्लेसमेन्ट) माध्यमबाट बिक्री गरिने योजना रहेको छ।
६ वर्ष अवधिको यो ऋणपत्रमा लगानीकर्ताले वार्षिक ६.२५ प्रतिशतका दरले ब्याज पाउनेछन्। उक्त ब्याज भुक्तानी हरेक ६–६ महिनामा अर्धवार्षिक रूपमा प्रदान गरिने बैंकले जनाएको छ।
यस सम्बन्धमा भएको सम्झौतामा एभरेष्ट बैंकका प्रमुख कार्यकारी अधिकृत सुदेश खालिङ र लक्ष्मी सन्राइज क्यापिटलका प्रमुख कार्यकारी अधिकृत विजयलाल श्रेष्ठले हस्ताक्षर गरेका छन्।
बैंकले यस ऋणपत्रमार्फत लगानीकर्तालाई स्थिर आम्दानीको अवसर उपलब्ध गराउने लक्ष्य लिएको बताएको छ।
