काठमाडौं । काठमाडौं महानगरपालिकाले टुँडिखेल क्षेत्रमा आयोजना हुने सबै प्रकारका सभा–समारोह, खेलकुद तथा सार्वजनिक कार्यक्रमहरूमा तत्काल प्रभावबाट रोक लगाएको छ। महानगरले एक सूचना जारी गर्दै चैत ८ गतेदेखि उक्त क्षेत्रमा निर्माण कार्य सुरु हुने जानकारी दिएको हो।
महानगरका अनुसार टुँडिखेलको दक्षिण भाग, विशेषगरी सैनिक मञ्चको दक्षिणतर्फको खुला चउरमा घाँसे मैदान निर्माण गरिनेछ। यो परियोजना चालु आर्थिक वर्ष २०८२/८३ को स्वीकृत बजेटअन्तर्गत अघि बढाइएको हो, जसले भविष्यमा व्यवस्थित खुला स्थानको रूपमा विकास गर्ने लक्ष्य राखेको छ।
निर्माण प्रक्रिया जारी रहँदा सो क्षेत्रमा हुने विभिन्न सांस्कृतिक, खेलकुद तथा अन्य सार्वजनिक गतिविधिहरू प्रभावित हुनेछन्। यस कारण महानगरले आयोजनाहरूलाई अस्थायी रूपमा अन्यत्र सार्न आग्रह गरेको छ।
महानगरले निर्माण सम्पन्न नहुँदासम्म टुँडिखेल प्रयोग नगर्न सबै सरोकारवालालाई अनुरोध गर्दै वैकल्पिक स्थानको व्यवस्था गर्न आग्रह गरेको छ।
