काठमाडौँ । उत्तर कोरियाका सर्वोच्च नेता किम जोंग उनकी छोरी किम जु ए पछिल्ला दिनहरूमा पश्चिमी शैलीका महँगा पहिरनका कारण चर्चामा आएकी छन् ।
उत्तर कोरियामा यस्ता पहिरनलाई ‘विद्रोह’को प्रतीक र ‘समाजवाद विरोधी’ मान्दै प्रतिबन्ध लगाइएको छ । तर किम जु ए भने बारम्बार छालाको ज्याकेट, महँगा कोट र आधुनिक शैलीका कपडामा सार्वजनिक रूपमा देखिन थालेपछि उनलाई भावी उत्तराधिकारीका रूपमा तयार पारिएको चर्चा बढेको छ ।
सन् २०१३ मा जन्मिएकी जु ए पहिलो पटक नोभेम्बर २०२२ मा सार्वजनिक रूपमा देखिएकी थिइन् । त्यतिबेला उनी आफ्ना पिता किम जोंग उनसँग अन्तरमहादेशीय क्षेप्यास्त्र अगाडि हिँडिरहेको अवस्थामा देखिएकी थिइन् । लामो कपाल, कालो पाइन्ट र सेतो बाक्लो ज्याकेटमा उनी निकै प्रभावशाली देखिएकी थिइन् । त्यसपछि उनको पहिरन र कपालको शैली झन् पश्चिमी बन्दै गएको बताइएको छ ।
उत्तर कोरियाले सन् २०२० मा ‘प्रतिक्रियावादी विचारधारा तथा संस्कृति अस्वीकृति ऐन’ लागू गर्दै बाहिरी संस्कृतिमाथि कडा रोक लगाएको थियो ।
तर सन् २०२३ मा सार्वजनिक गरिएको एक दृश्यमा जु ए फेरि आफ्ना पितासँग क्षेप्यास्त्र अगाडि देखिएकी थिइन् । यसपटक उनले कालो बाक्लो ज्याकेट लगाएकी थिइन्, जसलाई फ्रान्सको एक चर्चित विलासी फेसन कम्पनीको पोसाक मानिएको थियो । यसको मूल्य करिब १९०० डलर रहेको बताइएको थियो ।
अर्को वर्ष राजधानी प्योङयाङको एक नयाँ आवासीय क्षेत्र उद्घाटन कार्यक्रममा उनले लगाएको पहिरनबारे समेत आलोचना भएको थियो । एक भिडियो सन्देशमा त्यसलाई समाजवाद विरोधी भन्दै यस्ता शैलीले शासनलाई भित्रैबाट कमजोर बनाउने भनिएको थियो । तर अहिले केही युवाहरू किम जु एको पहिरन र शैलीको नक्कल गर्न चाहिरहेको बताइन्छ ।
विशेषज्ञहरूका अनुसार समयसँगै पुस्तागत परिवर्तनले उत्तर कोरियाको समाजमा असर पारिरहेको छ । विदेशमा काम गर्न जाने मजदुरहरूको संख्या बढेसँगै बाहिरी संस्कृतिको प्रभाव पनि भित्रिएको छ ।
कोरिया राष्ट्रिय एकीकरण अध्ययन संस्थानकी शोध प्रमुख जंग युन लीका अनुसार महामारीका बेला चीनमा रहेका धेरै उत्तर कोरियाली मजदुर फर्किंदा स्थानीय संस्कृति पनि सँगै लिएर आएका थिए ।
उनले पहिले विलासी सामान मुख्यतः जापानी ब्रान्डसम्म सीमित रहे पनि अहिले धेरै उत्तर कोरियालीले विभिन्न विदेशी ब्रान्डबारे जानकारी राख्न थालेको बताइन् ।
विशेषज्ञहरूका अनुसार जु ए आफ्नी आमा री सोल जूको शैलीबाट पनि प्रभावित देखिन्छिन् । उनलाई उमेरभन्दा परिपक्व र विशेष देखाउन सूट तथा आकर्षक पहिरन लगाइने गरिएको बताइन्छ ।
उत्तर कोरियाली अध्ययनका प्राध्यापक ली वू यङका अनुसार जिन्सजस्ता पश्चिमी फेसनमाथि प्रतिबन्ध भए पनि किम जोंग उन स्वयं त्यस्ता पहिरनमा देखिएका छन् । किमका लागि त्यहाँ धेरै कुरा असम्भव नहुने उनको भनाइ छ ।
विशेषज्ञ चोंग सोंग चांगका अनुसार जु एले बारम्बार छालाको ज्याकेट लगाउनु पनि उनलाई सर्वसाधारणभन्दा फरक र विशेष देखाउने रणनीतिको हिस्सा हो । राम्रो गुणस्तरको छालाको पहिरन उत्तर कोरियामा विशेष दर्जाको संकेत मानिन्छ । उनले किम परिवारले पहिरनमार्फत आफ्नो अलग सामाजिक हैसियत देखाउने प्रयास गरिरहेको बताए । यसअघि किम जोंग उनले पनि आफ्ना हजुरबा किम इल सुंगजस्तै टोपी र कोट प्रयोग गरेर आफ्नो छवि बलियो बनाउने प्रयास गरेका थिए । विशेषज्ञहरूका अनुसार उत्तर कोरियामा किम इल सुंगलाई देवताजस्तै मानिन्छ, त्यसैले उनको परिवारलाई पनि विशेष स्थान दिइन्छ ।
किम जु एलाई अहिले नै उत्तर कोरियामा ‘राजकुमारी’ भनेर चिनिन थालिएको छ, जसलाई वंशीय उत्तराधिकारको संकेतका रूपमा हेरिएको छ ।
