काठमाडौँ । दक्षिण भारतका सुपरस्टार अभिनेता यश अभिनित चलचित्र ‘टक्सिक’ को प्रदर्शन मिति फेरि स्थगित भएको छ । यसअघि जुन ४ मा प्रदर्शन हुने तय गरिएको चलचित्र अब सो मितिमा नआउने भएको हो । नयाँ प्रदर्शन मिति भने अझै घोषणा गरिएको छैन।
यशले सामाजिक सञ्जालमार्फत जानकारी दिँदै ‘टक्सिक’ आफूहरूको लागि विशेष यात्रा भएको उल्लेख गरेका छन् । उनले चलचित्रलाई विश्वव्यापी रूपमा सही ढंगले प्रस्तुत गर्न आवश्यक तयारी भइरहेको जनाउँदै वितरण र साझेदारी मिलाउन समय लागेकाले प्रदर्शन तालिका परिवर्तन गरिएको बताएका छन् । उनले चलचित्र अब विश्वभरका दर्शकलाई उपयुक्त समय मिलाएर प्रदर्शन गरिने पनि उल्लेख गरेका छन् ।
यो दोस्रो पटक हो जब ‘टक्सिक’ को प्रदर्शन मिति सारिएको छ । सुरुमा चलचित्र मार्च १९ मा प्रदर्शन हुने तय गरिएको थियो, पछि जुन ४ मा सारिएको थियो । त्यसअघि मध्यपूर्वमा बढ्दो तनावका कारण चलचित्र क्षेत्र प्रभावित भएको भन्दै मिति परिवर्तन गरिएको बताइएको थियो । साथै, सोही समयमा अर्को चलचित्रसँग जुध्ने सम्भावनाका कारण पनि मिति सारिएको चर्चा थियो।
यसबीच चलचित्रको डिजिटल अधिकार सम्बन्धी सहमति नजुट्नु पनि ढिलाइको एउटा कारण मानिएको छ । निर्माता पक्षले उच्च मूल्य माग गरेपछि विभिन्न डिजिटल मञ्चसँग सहमति हुन नसकेको बताइएको छ ।
