काठमाडौँ । चीन र भारत जोड्ने राष्ट्रिय गौरवको कालीगण्डकी करिडोरअन्तर्गत म्याग्दीको अन्नपूर्ण गाउँपालिकास्थित महभिर र भिरकाटे क्षेत्रमा सडक विस्तारको काम सुरु भएको छ । जोखिमपूर्ण र साँघुरो मानिने यस खण्डमा अहिले विस्फोटक पदार्थ प्रयोग गरेर पहाड काट्ने काम भइरहेको छ ।
बेनी–जोमसोम–कोरला सडक आयोजना कार्यालयका अनुसार अन्नपूर्ण गाउँपालिका–६ को भिरकाटे र वडा नं ७ अन्तर्गत पर्ने महभिर क्षेत्रमा सडक फराकिलो बनाउन रु सात करोड सात लाख ७४ हजार लागतमा आयोजना अघि बढाइएको हो । निर्माणको जिम्मा कालिमाता–थापाकाजी–रसुवा जेभीले पाएको छ ।
आयोजना प्रमुख तेजस्वी शर्माले हाल चट्टानी पहाडमा ‘ड्रिलिङ’ गरेर विस्फोटको तयारी भइरहेको जानकारी दिए । उनका अनुसार कालीगण्डकी नदी किनारको साँघुरो भूभाग र माथितर्फ रहेको अग्लो चट्टानी पहाडका कारण सडक विस्तार चुनौतीपूर्ण बनेको छ ।
“हाल एकतर्फी रूपमा सञ्चालन भइरहेको सडकलाई दुई लेनको ११ मिटर चौडाइमा विस्तार गरी ढलान गर्ने लक्ष्य छ,” शर्माले भने ।
विसं २०६४ मा नेपाली सेनाले ट्र्याक खोलेको महभिर–भिरकाटे खण्ड करिब ७०० मिटर लामो छ । अहिले पाँचदेखि छ मिटर मात्र चौडाइ रहेको यस सडकमा दुईतर्फी सवारीसाधन सहज रूपमा सञ्चालन हुन सक्दैनन् । मालवाहक र यात्रुवाहक गाडीलाई आलोपालो गरेर गुडाउनुपर्ने अवस्था छ ।
आयोजना कार्यालयले सुरुङमार्ग निर्माणको विकल्पमा समेत अध्ययन गरेको थियो । करिब रु एक अर्ब लागत अनुमानसहित विस्तृत परियोजना प्रतिवेदन (डिपिआर) तयार भए पनि बजेट अभावका कारण तत्कालका लागि पहाड काटेर सडक विस्तार गर्ने विकल्प रोजिएको प्रमुख शर्माले बताए ।
उनका अनुसार सम्भव भएका स्थानमा कालीगण्डकी किनारमा पक्की पर्खाल निर्माण गरी सडक चौडा पारिनेछ भने विस्तार गर्न नसकिने स्थानमा चट्टानी भित्तो विस्फोटमार्फत फुटाइनेछ ।
आगामी असोजसम्म निर्माण सम्पन्न गर्ने लक्ष्य राखिएको यस आयोजनाले कालीगण्डकी करिडोरमा यातायातलाई थप सुरक्षित र सहज बनाउने अपेक्षा गरिएको छ ।
यसैबीच, चीनको सीमावर्ती कोरला नाका जोड्ने २०२ किलोमिटर लामो बेनी–जोमसोम–कोरला सडकअन्तर्गत म्याग्दी खण्डका विभिन्न जोखिमयुक्त स्थानमा पहिरो रोकथामको काम पनि जारी रहेको आयोजना कार्यालयले जनाएको छ । चमेरे, बैसरी, सिरुवारी, गुइँठेभिर, खामभित्ता, लाटाखोला, रुप्से र घोप्टेभिर क्षेत्रमा रु २६ करोड लागतमा पहिरो नियन्त्रणका आयोजना सञ्चालन भइरहेका छन् ।
