काठमाडौँ, १६ साउन। नेपाल पहिलोपटक संयुक्त राष्ट्रसंघको प्रतिष्ठित संस्था ECOSOC (आर्थिक तथा सामाजिक परिषद्) को अध्यक्षमा निर्वाचित भएको छ। बिहीबार सम्पन्न निर्वाचनमार्फत नेपालले आगामी कार्यकालका लागि अध्यक्षता ग्रहण गरेको हो ।
संयुक्त राष्ट्रसंघका लागि नेपालका स्थायी प्रतिनिधि लोकबहादुर थापाले अध्यक्षको जिम्मेवारी सम्हालेका छन् ।
राजदूत थापाले यो उपलब्धिलाई नेपालको बहुपक्षीय कूटनीतिप्रति अटल प्रतिबद्धताको संकेत भनेका छन्। उनले दिगो विकास लक्ष्य (SDGs) हासिल गर्न सशक्त अन्तर्राष्ट्रिय सहकार्य, सामाजिक न्याय, र समान अवसरको प्रवर्द्धनमा सक्रिय भूमिका खेल्ने प्रतिबद्धता व्यक्त गरेका छन्।
नेपालको नेतृत्वमा परिषद्ले समावेशी विकास, सामाजिक न्याय र बहुपक्षीयताको पुनर्जागरणमा काम गर्ने अपेक्षा गरिएको छ। साथै, उपाध्यक्षमा अल्जेरिया, स्पेन, डोमिनिकन गणराज्य र आर्मेनिया निर्वाचित भएका छन्।
ECOSOC विश्वको प्रमुख नीतिनिर्माण संस्था हो, जसले आर्थिक, सामाजिक र वातावरणीय विषयमा महत्वपूर्ण निर्णयहरू गर्छ।
