काठमाडौँ । सभामुख डिपी अर्यालले उपसभामुखको निर्वाचन चैत्र २७ गते शुक्रबारको मिति तोकेका छन् ।
प्रतिनिधि सभाको बुधबारको बैठकमा सभामुख अर्यालले चैत्र २७ गते शुक्रबार उपसभामुखको निर्वाचन हुने बताउदै प्रतिनिधि सभाका सचिव हर्कराज राईलाई उपसभामुखको निर्वाचनको कार्यतालिका आजै सार्बजनिक गर्न निर्देशन दिएका छन् ।
सभामुख रास्वपाबाट निर्वाचित भइसकेको अवस्थामा संबिधान अनुसार अब उपसभामुख फरक दलबाट हुनुपर्ने र पुरुष सभामुख भएको अवस्थामा उपसभामुख महिला हुनुपर्ने व्यवस्था रहेको छ ।
काठमाडौँ । नेप्सेमा वृद्धि भएको छ । आज बुधबार नेप्से ४५.१२ अंकले बढेर २८०२.५२ विन्दुमा पुगेर रोकिएको छ ।
आज ३४६ कम्पनिका एक करोड ८८ लाख १६ हजार ८०८ कित्ता शेयर ८ अर्ब ३१ करोड ८९ लाख ८ हजार ४४१ मा कारोबार भएको थियो । आज सबै क्षेत्रको शेयर मुल्य बढेको छ ।
आज, रिलायन्स स्पिनिग मिल्स, श्रीनगर एग्रो,सोलु हाइड्रो र होटल फोरेस्ट इनको शेयरमा सकारात्मक सर्किट लागेको छ । त्यस्तै, सुपर खुदी, रिज लाइन र सुर्यकुण्ड हाइड्रोको शेयर ९.९९ प्रतिशतले बढेको छ । त्यस्तै आज सबैभन्दा बढी स्वेत गंगा हाइड्रोको शेयर ४. ०३ प्रतिशतले घटेको छ ।
त्यस्तै आज सबै भन्दा बढी एसवाई प्यानलको ४६ करोड ८१ लाख बराबर कारोबार भएको छ भने रिलाइन्स स्पिनिग मिल्सको ४२ करोड १६ लाख बराबरको कारोबार भएको छ ।
काठमाडौं । राष्ट्रिय स्वतन्त्र पार्टी (रास्वपा) का सांसद जगदीश खरेलले तत्कालीन सुशीला कार्की नेतृत्वको सरकार र जेनजीबीच भएको सम्झौताको अक्षरश कार्यान्वयनको माग गरेका छन् ।
बुधबार प्रतिनिधिसभा बैठकको विषय समयमा बोल्दै सांसद खरेलले उक्त सम्झौता यताउता भए स्वीकार्य नहुने चेतावनी दिदै सरकारसँग सो सम्झौता अक्षरश कार्यान्वयन गर्न माग गरेका हुन् ।
उनले बैठकमा फागुन २१ को चुनावले देशमा राजनीतिक कोर्स परिवर्तन गरेको बताउदै राजनीतिको नेतृत्वको परिभाषा समेत परिवर्तन भएको दाबी गरे । उनले पार्टी सभापति रवि लामिछानेलाई राजनीतिको परिभाषा परिवर्तनको नायकको संज्ञा दिएका थिए ।
काठमाडौँ । इरानसँगको युद्धविरामको सम्झौता लेबनानमा पनि लागु हुने भनिएको भएपनि इजरायलले लेबनानको तटीय सहर टायरमा आक्रमण गरेको छ ।
आक्रमणअघि नै इजरायली सेनाले स्थानीय बासिन्दालाई तत्काल घर खाली गर्न निर्देशन दिएको थियो ।
इजरायली सेनाले चेतावनी जारी गर्दै सुरक्षाका लागि जहरानी नदीको उत्तरतर्फ सर्न आग्रह गरेको थियो । सोही चेतावनीपछि सहरमा ठूलो विस्फोट भएको खबर सार्वजनिक भएको छ ।
सेनाका अनुसार उक्त क्षेत्रमा हिजबुल्लाहका ठेगानालाई लक्षित गर्दै आक्रमण गरिएको हो । अल अब्बासियाह र शिब्रीहा क्षेत्रका बासिन्दालाई विशेष रूपमा सतर्क रहन भनिएको थियो ।
इजरायलले हिजबुल्लाहबाट सम्भावित खतरा रहेको भन्दै सर्वसाधारणलाई सुरक्षित स्थानमा सर्न आग्रह गरेको जनाएको छ । प्रभावित क्षेत्रका मानिसहरूलाई दक्षिणी लेबनानबाट जहरानी नदीको उत्तरतर्फ जान निर्देशन दिइएको छ ।
इजरायलले लेबनानमा युद्धविराम नहुने स्पष्ट गर्दै आक्रमण जारी रहेको जनाएको छ ।
काठमाडौँ । राष्ट्रिय योजना आयोगका उपाध्यक्ष डा. गुणाकर भट्टले पद बहाली गरेका छन् ।
बुधवार बिहान भट्टले सिंहदरबारस्थित राष्ट्रिय युजना आयोगको कार्यालयमा पदबहाली गरेका हुन् । भट्टलाई सो क्रममा आयोगका सचिवसहित कमर्चारीहरुले स्वागत गरेका थिए ।
मंगलबार बसेको मन्त्रिपरिषदको बैठकले भट्टलाई राष्ट्रिय योजना आयोगको उपाध्यक्षमा नियुक्त गर्ने निर्णय गरेको थियो ।
डा. भट्टले अमेरिकाको विलियम्स कलेजबाट मास्टर्स र अमेरिकाको वयन स्टेट युनिभर्सिटीबाट अर्थशास्त्रमा पिएचडी गरेका छन् । त्यस्तै त्रिभुवन विश्व विद्यालयबाट मास्टर्समा स्वर्ण पदक जितेका भट्टको अनुसन्धान क्षेत्र मौद्रिक अर्थशास्त्र, वित्तीय अर्थशास्त्र र विकास अर्थशास्त्रमा केन्द्रित रहेको छ । उनले विभिन्न राष्ट्रिय र अन्तर्राष्ट्रिय जर्नलहरूमा अनुसन्धान लेखहरू प्रकाशित पनि गरेका छन् ।
भट्टले यसअघि नेपाल राष्ट्र बैंकको कार्यकारी निर्देशकबाट सात वर्षे कार्यकाल पूरा गर्दै अनिवार्य अवकाश पाएका थिए ।
काठमाडौँ । परराष्ट्र मन्त्रालयले ‘परराष्ट्र मामिला तथा कूटनीतिक आचारसंहिता’ का सम्बन्धमा प्रधानमन्त्री वालेन्द्र शाहको नेतृत्वको सरकारका सबै मन्त्रीहरुलाई प्रस्तुति दिएको छ।
प्रधानमन्त्री तथा मन्त्रिपरिषद्को कार्यालयमा बुधबार आयोजित उक्त प्रस्तुतीकरणमा सबै मन्त्रीहरुलाई परराष्ट्र मन्त्रालयका सचिव अमृतबहादुर राईले प्रस्तुती दिएको प्रधानमन्त्री शाहकी प्रेस विज्ञ दीपा दाहालले जानकारी दिएकी छन् ।
राईले अन्तर्राष्ट्रिय परिवेश, नेपालको अन्तर्राष्ट्रिय सम्बन्ध, राष्ट्रिय हितको प्रवद्र्धन, नेपालको समग्र परराष्ट्र नीतिबारे विस्तृत प्रस्तुती दिएका थिए । सचिव राईले परराष्ट्र नीति सञ्चालन गर्दा अपनाउनुपर्ने विधि, सीमाहरू र कूटनीतिक मर्यादाका सम्बन्धमा सूक्ष्म ढङ्गले जानकारी गराएका थिए ।
नेपालको परराष्ट्र नीतिका प्राथमिकता, सम्बन्धको सन्तुलन र कूटनीतिक आचारसंहिताका प्राविधिक पक्षहरूलाई उनले विशेष जोड दिएका थिए ।
साथै, विदेशी पदाधिकारीहरूसँग हुने भेटवार्ताका क्रममा पालना गर्नुपर्ने सामान्य शिष्टाचारदेखि कूटनीतिक आचारसंहिताका अनिवार्य पालनाका विषयमा समेत मन्त्रीहरूबीच प्रस्तुती गरिएको थियो ।
काठमाडौँ । पश्चिम एसियामा एक महिनाभन्दा बढी समयदेखि जारी द्वन्द्वपछि इरान र अमेरिकाबीच युद्धविराम घोषणा भएको छ ।
यसैबीच भारतले महत्वपूर्ण सूचना जारी गर्दै इरानमा रहेका आफ्ना नागरिकलाई तत्काल देश छोड्न आग्रह गरेको छ ।
तेहरानस्थित भारतीय दूतावासले वर्तमान सुरक्षा अवस्थालाई ध्यानमा राख्दै सबै भारतीय नागरिकलाई दूतावाससँग सम्पर्कमा रही सुरक्षित मार्गमार्फत मात्र इरान बाहिरिन निर्देशन दिएको छ । कुनै पनि नागरिकले दूतावासको सल्लाह बिना अन्तर्राष्ट्रिय सीमातर्फ जान नहुने स्पष्ट चेतावनी समेत दिइएको छ ।
यसअघि अप्रिल ७ मा जारी सूचनामा नागरिकलाई सतर्क रहन भनिएको थियो भने नयाँ सूचनामा देश छोड्नै आग्रह गरिएको हो।
भारतीय नागरिकको सहायताका लागि दूतावासले आपतकालीन सम्पर्क नम्बरहरू पनि सार्वजनिक गरेको छ । साथै, आवश्यक जानकारी वा समस्याका लागि इमेलमार्फत सम्पर्क गर्न सकिने व्यवस्था गरिएको छ ।
इरानमा बदलिँदो अवस्था र सुरक्षालाई ध्यानमा राख्दै यस्तो कदम चालिएको जनाइएको छ । भारतीय पक्षले आफ्ना सबै नागरिक सुरक्षित रूपमा स्वदेश फर्कून् भन्ने उद्देश्य राखेको बताइएको छ।
काठमाडौँ । नेपाली काँग्रेसका निवर्तमान सभापति एवं पूर्वप्रधानमन्त्री शेरबहादुर देउवा र उनकी पत्नी डा. आरजु राणा देउवाविरुद्ध पक्राउ पुर्जी जारी भएको छ ।
सम्पत्ति शुद्धीकरणसम्बन्धी मुद्धाको अनुसन्धानका लागि देउवा दम्पतिविरुद्ध पक्राउ पुर्जी जारी भएको स्रोतले पुष्टि गरेको छ ।
गत भदौ २४ गते मा जेनजी अन्दोलनका क्रममा देउवाको निवासमा आगजनी र उनीहरुमाथि दुर्व्यबहार समेत भएको थियो । सो क्रममा उनको निवासमा नगद पैसा जलेको अवस्थामा भेटिएको थियो ।
देउवा दम्पति हाल विदेशमा रहेका छन् । उनीहरु शुरुमा उपचारको लागि सिंगापुर गएको र त्यसपछि हङकङ गएको बताइएको छ ।
काठमाडौँ । प्रहरीले कैलाली, कपिलवस्तु र ओखलढुंगाबाट जबरजस्ती करणी गरेको अभियोगमा पक्राउ परेका छन् ।
कैलालीमा, २७ वर्षीया महिलालाई जबरजस्ती करणी गरेको अभियोगमा लम्कीचुहा नगरपालिका-८ सोनपुर बस्ने ३० वर्षीय कासिम अलि जागालाई प्रहरीले पक्राउ गरेको छ । कासिमले ती महिलालाई जबरजस्ती करणी गरेको भन्ने उजुरीको आधारमा इलाका प्रहरी कार्यालय टीकापुरबाट खटिएको प्रहरीले उनलाई पक्राउ गरेको हो ।
त्यस्तै कपिलवस्तु, १४ वर्षीया बालिकालाई जबरजस्ती करणी गरेको अभियोगमा शिवराज नगरपालिका-५ ग्यालेक्सी टोल बस्ने २५ वर्षीय चन्दन तिवारीलाई प्रहरीले पक्राउ गरेको छ । चन्दनले ती बालिकालाई जबरजस्ती करणी गरेको भन्ने उजुरीको आधारमा वडा प्रहरी कार्यालय चन्द्रौटाबाट खटिएको प्रहरीले उनलाई पक्राउ गरेको हो ।
त्यसैगरी ओखलढुङ्गा, २० वर्षीया महिलालाई जबरजस्ती करणी गरेको अभियोगमा रौतहट देवाही गोनाही नगरपालिका-६ बस्ने ४९ वर्षीय चुनचुन साह कानुलाई प्रहरीले पक्राउ गरेको छ । चुनचुनले ती महिलालाई जबरजस्ती करणी गरेको भन्ने उजुरीको आधारमा अस्थायी प्रहरी पोष्ट केतुकेबाट खटिएको प्रहरीले उनलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ ।
भोजपुर । भोजपुरको षडानन्द नगरपालिका-१३ बस्ने २४ वर्षीय सम्मर बहादुर तामाङको हत्या भएको घटनामा संलग्न रहेको अभियोगमा ४ जनालाई बुधबार बिहान प्रहरीले पक्राउ गरेको छ ।
पक्राउ पर्नेहरूमा सोही नगरपालिका-१४ बेखम्चा बस्ने २१ वर्षीय सुनिल राई, ४४ वर्षीय चन्द्र कुमार राई, २७ वर्षीय सुरज राई र २६ वर्षीय राजेश दर्जी रहेका छन् । उनीहरूले कुटपिट गर्दा सम्मर बहादुरको मंगलबार राति घटनास्थलमै मृत्यु भएको भन्ने खबर प्राप्त हुनासाथ प्रहरी चौकी बोयाँबाट खटिएको प्रहरीले उनीहरूलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ ।