काठमाडौँ । राष्ट्रिय प्रजातन्त्र पार्टी (राप्रपा) का उपाध्यक्ष तथा पूर्वमन्त्री विक्रम पाण्डेलाई प्रहरीले पक्राउ गरेको छ। सरकारी बोलपत्र (टेन्डर) प्रणालीमा अनधिकृत पहुँच प्रयोग गरी ठेक्का आफ्नै कम्पनीतर्फ मोडेको आरोपमा उनलाई नियन्त्रणमा लिइएको हो।

केन्द्रीय अनुसन्धान ब्युरो (सीआईबी) का एआईजी डा. मनोज केसीले पाण्डे काठमाडौंबाट पक्राउ परेको पुष्टि गरेका छन्। यस प्रकरणमा थप अनुसन्धान भइरहेको प्रहरीले जनाएको छ।

पाण्डे कालिका कन्स्ट्रक्सनका सञ्चालक समेत हुन्। उनीविरुद्ध यसअघि पनि सिक्टा सिँचाइ आयोजनामा अनियमितता गरेको आरोपमा अख्तियार दुरुपयोग अनुसन्धान आयोगले २०७५ सालमा मुद्दा दायर गरेको थियो।

२०७९ सालमा सहरी विकास मन्त्री बनेका पाण्डे पछिल्लो समय पुनः विवादमा तानिएका छन्। पक्राउसँगै उनीमाथि लागेको आरोपबारे विस्तृत छानबिन अघि बढाइएको छ।

Read More

काठमाडौँ । अन्तर्राष्ट्रिय बजारमा कच्चा तेलको मूल्य लगातार तेस्रो दिन पनि प्रतिव्यारेल १०० डलरभन्दा माथि कायम रहेको छ। यसले विश्व बजारसँगै आयातमा निर्भर देशहरूमा चिन्ता बढाएको छ ।

वैश्विक मापदण्ड ब्रेन्ट क्रुड शुक्रबार १ दशमलव ८ प्रतिशतले बढेर प्रतिव्यारेल १०१.२ डलर पुगेको छ। यसअघि बुधबार र बिहीबार पनि यसको मूल्य १०० डलरभन्दा माथि बन्द भएको थियो। अमेरिकी मापदण्ड डब्लुटिआई पनि १.८ प्रतिशतले बढेर प्रतिव्यारेल ९७.६ डलरमा कारोबार भएको छ।

विश्लेषकहरूका अनुसार अमेरिका–ईरान तनाव अन्त्यतर्फ कुनै ठोस प्रगति नदेखिएकाले बजारमा अनिश्चितता कायम छ। इजरायल–लेबनानबीच युद्धविराम अवधि थपिए पनि क्षेत्रीय तनाव अझै कम भएको छैन ।

होर्मुज जलडमरूमध्यमा जहाज नियन्त्रणमा लिने घटना र समुद्री सुरक्षामाथि उठेका प्रश्नहरूले पनि तेल आपूर्तिको चिन्ता बढाएको छ ।

तेलको मूल्य बढिरहँदा विश्व शेयर बजारमा मिश्रित प्रभाव देखिएको छ। जापान र हङकङका बजारमा सुधार देखिए पनि युरोपेली बजार भने दबाबमा रहेका छन्।

विशेषज्ञहरूले कच्चा तेलको मूल्य लामो समयसम्म १०० डलरभन्दा माथि रहे भारतजस्ता आयातमुखी देशमा महँगी र व्यापार घाटाको दबाब थप बढ्न सक्ने बताएका छन्।

Read More

काठमाडौँ । नेपाली कांग्रेसले सुकुम्बासी समस्याको दीर्घकालीन समाधानप्रति सबै राजनीतिक दल प्रतिबद्ध रहेको भन्दै यसको समाधान विधिको शासनको पूर्ण पालना गर्दै खोजिनुपर्ने जनाएको छ।

शुक्रबार बसेको केन्द्रीय कार्यसम्पादन समितिको बैठकले सुकुम्बासी समस्या कुनै एक दल वा समूहको मात्र नभई समग्र राष्ट्रको साझा समस्या भएको उल्लेख गर्दै आफ्नो प्रतिज्ञापत्रमार्फत यस विषयमा स्पष्ट दृष्टिकोण र समाधानका आधार सार्वजनिक गरिसकेको बताएको छ ।

कांग्रेसले सम्मानित अदालतका आदेश र विगतका संसदीय समितिका निर्णयलाई मार्गदर्शक मानेर सरकार अघि बढ्नुपर्ने धारणा राखेको छ। बल प्रयोगभन्दा अघि विवेकपूर्ण, न्यायोचित र मानवीय उपाय अपनाउन आवश्यक रहेको पार्टीको भनाइ छ।

सबैभन्दा पहिले वास्तविक सुकुम्बासी को हुन् र को होइनन् भन्ने स्पष्ट पहिचान सुनिश्चित गर्नुपर्ने कांग्रेसले जनाएको छ। वास्तविक सुकुम्बासीलाई जमिन र आवास उपलब्ध गराउनु केवल नीतिगत दायित्व मात्र नभई उनीहरूको मौलिक अधिकारको संरक्षणसँग जोडिएको संवैधानिक कर्तव्य भएको पार्टीको ठहर छ।

यसपछि मात्रै सुकुम्बासीको नाममा गलत फाइदा लिनेहरूमाथि कानुनअनुसार कारबाही गर्ने बाटो खुल्ने कांग्रेसले उल्लेख गरेको छ।

नेपाली कांग्रेसले आफ्नो दायित्व पूरा नगरी बल प्रयोगमार्फत समस्या समाधान खोज्नु शासन सञ्चालनको अपरिपक्व र अविवेकी शैली भएको भन्दै सरकारलाई संवेदनशीलता, कानुनी आधार र न्यायपूर्ण दृष्टिकोणका साथ दिगो समाधानतर्फ अघि बढ्न आग्रह गरेको छ।

Read More

काठमाडौँ । भारतको आम आदमी पार्टीका नेता तथा राज्यसभा सांसद राघव चड्ढासहित राज्य सभाका ७ सांसद भारतीय जनता पार्टीमा प्रवेश गरेका छन् ।

राघव चड्ढासँगै सन्दीप पाठक, अशोक मित्तल, हरभजन सिंह, विक्रमजीत सिंह साहनी, राजिन्दर गुप्ता तथा दिल्लीबाट राज्यसभा सांसद स्वाती मालीवाल पनि भारतीय जनता पार्टीमा सामेल भएका छन् ।

भाजपामा प्रवेशपछि राघव चड्ढा, सन्दीप पाठक र अशोक मित्तल पार्टी मुख्यालय पुगेका थिए । त्यहाँ उनीहरूले भाजपा अध्यक्ष नितिन नवीनसँग भेट गरेका थिए । 

राघव चड्ढाले सामाजिक सञ्जालमार्फत जानकारी दिँदै संविधानको प्रावधानअनुसार आम आदमी पार्टीका दुई तिहाइभन्दा बढी राज्यसभा सांसद भाजपा प्रवेश गरेको बताएका छन् । उनका अनुसार सात सांसदले विलयसम्बन्धी कागजातमा हस्ताक्षर गरेका छन् र ती दस्तावेज राज्यसभा सभापतिलाई बुझाइएको छ ।

पत्रकार सम्मेलनमा उनले आम आदमी पार्टी आफ्नो मूल सिद्धान्त, मूल्य र नैतिकताबाट विचलित भएको आरोप लगाए । पार्टी अब राष्ट्रिय हितभन्दा व्यक्तिगत स्वार्थका लागि काम गरिरहेको भन्दै आफू ‘गलत पार्टीमा सही मान्छे’ बनेको महसुस भएको उनको भनाइ थियो । सन्दीप पाठकले पनि देशको सेवा गर्ने उद्देश्यले राजनीतिमा आएको र त्यही लक्ष्यका साथ अब नयाँ राजनीतिक यात्रा अघि बढाउने बताएका छन् ।

Read More

सुर्खेत । प्रहरी महानिरीक्षक दानबहादुर कार्कीले शुक्रबार नेपाल पुलिस स्कुल वीरेन्द्रनगर सुर्खेतको शैक्षिक तथा प्रशासनिक भवन तथा कर्णाली प्रदेश प्रहरी कार्यालय परिसरमा नवनिर्मित सिनियर प्रहरी अधिकृत निवास भवन उद्घाटन गरेका छन्।

उद्घाटनपछि उनले भवनहरूको अवलोकन गर्नुका साथै प्रदेश प्रहरी कार्यालय र विद्यालय परिसरमा वृक्षारोपण पनि गरेक थिए । कार्यक्रममा भवन निर्माणमा सहयोग पुर्‍याउने विभिन्न व्यक्तिहरू, शिक्षक तथा विद्यार्थीलाई पुरस्कार र प्रशंसापत्र प्रदान गरिएको थियो।

प्रहरी महानिरीक्षक कार्कीले प्रहरी कर्मचारीका सन्तति तथा स्थानीय बालबालिकालाई सहज, सुलभ र गुणस्तरीय शिक्षा उपलब्ध गराउने उद्देश्यले विद्यालय भवन निर्माण गरिएको बताए । उनले नयाँ भवन केवल भौतिक संरचना मात्र नभई बालबालिकाको उज्ज्वल भविष्य निर्माण गर्ने थलो भएको उल्लेख गरे।

नेपाल पुलिस स्कुलको भवन ११ करोड २४ लाख रुपैयाँभन्दा बढी लागतमा तथा सिनियर प्रहरी अधिकृत निवास भवन ५ करोड ४४ लाख रुपैयाँभन्दा बढी लागतमा निर्माण सम्पन्न भएको हो। कार्यक्रममा स्थानीय जनप्रतिनिधि, सुरक्षा निकायका प्रमुख, समाजसेवी तथा स्थानीयवासीको उपस्थिति रहेको थियो।

Read More

काठमाडौँ । परराष्ट्रमन्त्री शिशिर खनालसँग नेपालका लागि पाकिस्तानका राजदूत अबरार एच. हाश्मीलाई शिष्टाचार भेटवार्ता गरेका छन् ।

शुक्रबार सिंहदरबारस्थित मन्त्रालयमा भएको भेटका क्रममा नेपाल–पाकिस्तान द्विपक्षीय सम्बन्धलाई थप सुदृढ बनाउने तथा आपसी हितका विभिन्न क्षेत्रमा सहकार्य विस्तार गर्ने विषयमा छलफल भएको परराष्ट्र मन्त्रालयले जनाएको छ।

दुवै पक्षबीच आपसी समझदारी, सहकार्य र सम्बन्धलाई अझ मजबुत बनाउने विषयमा सकारात्मक संवाद भएको बताइएको छ ।

Read More

काठमाडौँ । नेपाली कांग्रेसले संसद अधिवेशनको बैठक नै नबस्दै पुनः स्थगित गरिएको घटनाप्रति गम्भीर ध्यानाकर्षण भएको जनाएको छ ।

शुक्रबार बसेको केन्द्रीय कार्यसम्पादन समितिको बैठकले नेपाल सरकारको सिफारिसमा राष्ट्रपतिबाट आह्वान गरिएको अधिवेशन बैठक सञ्चालन हुनुअघि नै स्थगन गर्नु संसदीय परम्परा, अभ्यास र संवैधानिक नैतिकताको विपरीत भएको निष्कर्ष निकालेको प्रवक्ता देवराज चालिसेले जानकारी दिएका छन् ।

कांग्रेसले संसदीय शासन प्रणालीको मूल आधार कार्यपालिका संसद्प्रति उत्तरदायी हुने सिद्धान्तमा आधारित रहेको उल्लेख गर्दै संसदलाई स्वतन्त्र विमर्श र निर्णय गर्ने सर्वोच्च जनप्रतिनिधिमूलक संस्था मानिनुपर्ने बताएको छ। बैठक नै नबस्दै स्थगन गर्नुले संसदलाई कार्यपालिकाको सुविधा अनुसार चल्ने ‘औजार’ का रूपमा प्रस्तुत गर्ने गम्भीर जोखिम पैदा गरेको उसको भनाइ छ ।

पार्टीले “विशेष कारण” जस्तो अस्पष्ट आधारमा संसद स्थगन गर्नु र नागरिकलाई स्पष्ट जानकारी नदिनु सरकारको पारदर्शिता र नियतमाथि प्रश्न उठाउने विषय भएको जनाएको छ। यस्तो प्रवृत्तिले नागरिकको सुसूचित हुने अधिकारमाथि आघात पुग्ने र जनआवाजलाई सीमित गर्ने प्रयास हुने कांग्रेसको ठहर छ।

आर्थिक चुनौती, सुशासनका समस्या तथा जनजीविकासँग जोडिएका विषयमा संसदमा हुने छलफलबाट सरकार पन्छिन खोजेको आरोप लगाउँदै कांग्रेसले यसले लोकतन्त्रको नियन्त्रण र सन्तुलनको आधार कमजोर बनाउने चेतावनी दिएको छ।

नेपाली कांग्रेसले अविलम्ब संसद बैठक सञ्चालन गर्न, स्थगनका वास्तविक कारण सार्वजनिक गर्न र संसदप्रति सरकारको पूर्ण जवाफदेहिता सुनिश्चित गर्न माग गरेको छ। अन्यथा संसदलाई प्रभावहीन बनाउने प्रयासविरुद्ध सदन र सडक दुवैबाट सशक्त आवाज उठाइने चेतावनी पनि दिएको छ।

Read More

काठमाडौँ । पक्राउ परेका उद्योगी शेखर गोल्छालाई चार दिन हिरासतमा राख्न अदालतले अनुमति दिएको छ ।

जिल्ला अदालत काठमाडौँले हिमालयन रिइन्स्योरेन्सका पूर्व अध्यक्ष समेत रहेका गोल्छालाई चार दिन हिरासतमा राखेर अनुसन्धान गर्न अनुमति दिएको हो ।

केन्द्रीय अनुसन्धान ब्यूरोले गोल्छालाई धितोपत्र बोर्डको प्रारम्भिक जाँचबुझ प्रतिवेदन समेतको आधारमा उनलाई विहिबार पक्राउ गरेको थियो ।

Read More

काठमाडौँ । नेपाली सेनाले पछिल्लो समय विभिन्न सञ्चारमाध्यम र सामाजिक सञ्जालमा सेना तथा यसको नेतृत्वलाई लिएर फैलाइएका तथ्यहीन सूचना र अभिव्यक्तिप्रति गम्भीर ध्यानाकर्षण भएको जनाएको छ।

सेनाले यस्ता कपोलकल्पित र भ्रामक सामग्रीहरूले आम नागरिकमा भ्रम सिर्जना गर्ने भएकाले त्यस्ता सूचना प्रसारण नगर्न र नगराउन आग्रह गरेको छ ।

नेपाली सेनाले यस्ता उच्छृङ्खल तथा अराजक गतिविधिहरूको नियमित निगरानी भइरहेको पनि स्पष्ट पर्दै यस्ता कार्यमा संलग्न व्यक्तिहरू प्रचलित कानुनको दायरामा आउने भन्दै सेनाले चेतावनी दिएको छ ।

साथै, आम जनमानसलाई आधारहीन र द्वेषपूर्ण समाचार तथा टिप्पणीहरूमा विश्वास नगर्न अनुरोध गरिएको छ । आधिकारिक जानकारीका लागि नेपाली सेनाले जारी गर्ने प्रेस विज्ञप्ति, सामाजिक सञ्जाल, वेबसाइट तथा जनसम्पर्क तथा सूचना निर्देशनालयसँग समन्वय गर्न सेनाले आग्रह गरेको छ ।

Read More

काठमाडौं । नेकपा एमालेको प्रमुख सचेतकमा ऐनबहादुर महरलाई मनोनयन गरिएको छ ।

प्रतिनिधिसभामा एमाले संसदीय दलका नेता रामबहादुर थापाले महरलाई प्रमुख सचेतकमा मनोनयन गरेका हुन् । एमालेको सङ्घीय संसदीय दलको विधान २०७७ बमोजिम आजदेखि लागू हुनेगरी महरलाई प्रतिनिधि सभाको प्रमुख सचेतकमा मनोनयन गरिएको हो ।

महर गत फागुन २१ गते भएको प्रतिनिधिसभाको निर्वाचनमा बझाङबाट प्रत्य्क्ष निर्वाचित भएका थिए ।

त्यस्तै सचेतकमा निता घतानीलाई मनोनयन गरिएको छ ।

Read More