विराटनगरस्थित नोबेल मेडिकल कलेजमा दुःखद घटना: भवनबाट खसेका इन्टर्न डाक्टरको मृत्यु

विराटनगर। विराटनगरस्थित नोबेल मेडिकल कलेजमा कार्यरत इन्टर्न डाक्टरको भवनबाट खसेर मृत्यु भएको छ।

प्रहरीका अनुसार आइतबार बिहान करिब ६:३० बजे, मेडिकल कलेजको मुख्य गेटतर्फ रहेको भवनको पाँचौँ तलाबाट खसेर ३४ वर्षीय अमित यादव गम्भीर घाइते भएका थिए। घाइते यादवको उपचारको क्रममा निधन भएको हो । उनी सप्तरीको राजविराज नगरपालिका-९, जगदरी निवासी हुन् ।

घटनापछि गम्भीर अवस्थामा रहेका यादवलाई तत्काल नोबेल शिक्षण अस्पतालको आकस्मिक कक्षमा भर्ना गरी उपचार सुरु गरिएको थियो। तर टाउकोमा गहिरो चोट लागेकाले उपचारका क्रममा आज बिहान उनको निधन भएको अस्पताल प्रशासनले जनाएको छ।

नोबेल शिक्षण अस्पतालका व्यवस्थापक दिपेश राईका अनुसार चिकित्सकहरूको अथक प्रयासका बाबजुद यादवलाई बचाउन नसकिएको हो। उनी नोबेल मेडिकल कलेजमै एमबीबीएस इन्टर्न डाक्टरका रूपमा कार्यरत थिए।

घटनाको कारणबारे प्रहरीले थप अनुसन्धान गरिरहेको जनाएको छ। यस दुःखद घटनाले सहकर्मी, विद्यार्थी र परिवारजनलाई स्तब्ध बनाएको छ।