६ महिना अगाडि

चुनाव र संसद् पुनर्स्थापनाको मुद्दा एकसाथ अघि बढ्छ: प्रदीप ज्ञवाली

काठमाडौँ । नेपाल कम्युनिष्ट पार्टी (एमाले) का उपमहासचिव प्रदीप ज्ञवालीले आफ्नो पार्टीले चुनावको तयारी र संसद् पुनःस्थापनाको मुद्दासँगसँगै अगाडि बढाउने बताएका छन् । नवलपरासीको सुनबलमा आयोजित कार्यकर्ता भेटघाट कार्यक्रममा उनले सरकार नै फागुन २१ मा निर्वाचन गराउने वातावरण बनाउन नलागेको भन्दै संसद् पुनःस्थापनाको ‘एजेन्डा’ पार्टीले नछोडेको बताए ।

उपमहासचिव ज्ञवालीले ‘जेनजी’ युवा पुस्तासहितका माग सम्बोधन गर्न पनि संसद् पुनःस्थापना आवश्यक रहेको जिकिर गरे । उनले चुनाव गराउन प्रदर्शनका क्रममा लुटिएका सुरक्षाकर्मीका हतियार र पाँच हजारभन्दा बढी कैदी अझै बाहिरै रहेकाले चुनावका लागि सुरक्षा चुनौती रहेको धारणा राखे ।

‘फेरि पनि समझदारीका साथ अगाडि बढ्न सकिन्छ । भदौ २३ र २४ का घटनाको निष्पक्ष छानबिन, जेनजी प्रतिनिधिसँग बसेर वार्ताका माध्यमबाट न्यूनतम विषयमा समझदारीपछि संसद् पुनःस्थापनासहित निर्वाचित जनप्रतिनिधिबाट सहमतिमा चुनाव गरेर अगाडि बढ्न सकिन्छ,’– उपमहासचिव ज्ञवालीले भने ।

उनले पार्टीको महाधिवेशन तोकिसकेकाले अब नेतृत्वको विषयमा महाधिवेशनले नै टुङ्गो लगाउने बताए ।

मेरो दौड अझै सकिएको छैन, २०२८ मा राष्ट्रपतिको उम्मेदवार हुन सक्छु- कमला ह्यारिस

काठमाडौँ । पूर्व अमेरिकी उपराष्ट्रपति कमला ह्यारिसले २०२८ मा राष्ट्रपति पदको लागि उम्मेदवार हुन सक्ने बताएकी छिन् ।

बिबिसीसँगको कुराकानीमा ह्यारिसले आफु एक दिन अमेरिकाको राष्ट्रपति बन्नसक्ने बताएकी हुन् । साथै उनले एक दिन एक महिला ह्वाइट हाउसमा प्रवेश गर्ने दाबी गरेकी छन् । उनले भनिन्- ‘मेरो दौड अझै सकिएको छैन । म फेरि राष्ट्रपति पदको लागि उम्मेदवार हुन सक्छु ।’

गत वर्ष डोनाल्ड ट्रम्पसँग हारेपछि, ह्यारिस २०२८ मा राष्ट्रपति पदको लागि उम्मेदवार बन्ने बारेमा आवाज उठाइरहेकी छिन् । उनले अर्को चुनावको लागि बाहिरी डेमोक्र्याटिक उम्मेदवारको रूपमा प्रस्तुत गरिएका सर्वेक्षणहरूलाई खारेज गरेकी छन् । उनले आफ्नो चुनावी अभियानको क्रममा ट्रम्पको बारेमादिएका चेतावनीहरू अहिले सत्य साबित भएको बताएकी छन् ।

कमला ह्यारिस २०२४ मा डेमोक्र्याटिक पार्टीकी उम्मेदवार थिइन्, तर रिपब्लिकन उम्मेदवार डोनाल्ड ट्रम्पबाट पराजित भइन् । त्यस समयमा, राष्ट्रपति जो बाइडेनलाई सुरुमा डेमोक्र्याटिक पार्टीको उम्मेदवारको रूपमा मनोनित गरिएको थियो । यद्यपि, उमेरसँग सम्बन्धित समस्याका कारण, कमला ह्यारिसलाई पार्टीको नयाँ उम्मेदवार बनाइएको थियो ।

महिला क्रिकेट विश्वकपको सेमिफाइनलको समीकरण पुरा

काठमाडौँ । अस्ट्रेलियाले जारी महिला क्रिकेट विश्वकपमा दक्षिण अफ्रिकाविरुद्ध शानदार ७ विकेटको जित हासिल गरेको छ । शनिबार सम्पन्न लिग चरणको आफ्नो अन्तिम खेलमा अस्ट्रेलियाले दक्षिण अफ्रीकालाई ७ विकेटले पराजित गरेको हो ।

दक्षिण अफ्रिकाले दिएको केवल ९८ रनको लक्ष्य पछाएको अस्ट्रेलियाले १६.५ ओभरमा ३ विकेट गुमाउदै पुरा गरेको थियो ।

यसअघि टस हारेर पहिला ब्याटिंग गरेको दक्षिण अफ्रिकाले २४ ओभरमा अल आउट हुदै ९७ रन मात्र बनाएको थियो । दक्षिण अफ्रिकाको ब्याटिंग लाइन ध्वस्त गर्नेक्रममा अस्ट्रेलियाकी बलर अलाना किङले ७ ओभरमा २ मेडनसहित १८ रन दिएर ७ विकेट लिएकी थिइन् ।

यो जितपछि अस्ट्रेलिया लिग चरणमा ७ खेलमा १३ अंकसहित शिर्ष स्थानमा रहेर सेमिफाइनलमा पुगेको छ । त्यस्तै दक्षिण अफ्रिकाको ७ खेलमा १२ अंक रहेको छ र दोस्रो स्थानमा रहेको छ ।

दक्षिण अफ्रिका पनि यसअघि नै सेमिफाइनलमा पुगिसकेको छ । त्यस्तै इङल्याण्ड र भारत पनि सेमिफाइनलमा पुगिसकेका छन् । अब यस विश्वकपको लिग चरणको अन्तिम दुई खेल आइतबार हुदैछन् ।

आइतबारका खेल अघि नै सेमिफाइनलको समिकरण तय भएको छ । आइतबारका खेल अघि नै सेमिफाइनलको समिकरण तय भएको छ । आइतबार हुने दुई खेलले सेमिफाइनलको समीकरणलाई कुनै असर नगर्ने भएको छ ।

अंकतालिकामा हाल अस्ट्रेलिया शिर्ष स्थानमा रहेको छ भने दक्षिण अफ्रीका दोस्रो, इङल्याण्ड तेस्रो र भारत चौथो स्थानमा छ । आइतबारको खेल जिते पनि भारत चौथो स्थानमै रहने हुनाले सेमिफाइनलको समीकरणमा कुनै असर नगर्ने भएको हो ।

जस अनुसार पहिलो सेमिफाइनलमा इङल्याण्ड र दक्षिण अफ्रिका अक्टोबर २९ मा खेल्ने भएका छन् भने दोस्रो सेमिफाइनलमा अस्ट्रेलिया र भारत अक्टोबर ३० मा खेल्ने भएका छन् । यस विश्वकपको फाइनल खेल नोभेम्बर २ मा हुने तालिका छ ।

अमेरिकी सरकारलाई सैनिकको तलब खुवाउन १३० मिलियन डलर गोप्य दान

काठमाडौँ । अमेरिकी रक्षा विभाग पेन्टागनले सैन्य तलबको लागि १३० मिलियन डलरको गोप्य दान स्वीकार गरेको जानकारी दिएको छ ।

यो दान राष्ट्रपति डोनाल्ड ट्रम्पको एक अज्ञात ‘मित्र’ ले सरकारी बन्दको समयमा सैनिकहरूको तलब सुनिश्चित गर्न गरेको बताइएको छ । यद्यपि, यो दानको पारदर्शिताको विषयमा धेरै प्रश्नहरू उठाइएको छ । ट्रम्पले बिहीबार ह्वाइट हाउसमा यो दानको घोषणा गर्दै दातालाई देशभक्त भनेका थिए । दाताको नाम भने उनकै इच्छा अनुसार गोप्य राखिएको छ ।

अक्टोबर १ मा सुरु भएको अमेरिकामा सरकारी बन्द भएको २५ दिन भइसकेको छ । दुई प्रमुख दलहरू, डेमोक्र्याट र रिपब्लिकन, ओबामा स्वास्थ्य सेवा अनुदान कार्यक्रमलाई लिएर विवादमा छन् ।

दानामा प्राप्त यो पैसा सैनिकहरूको तलब र अन्य सुविधाहरूको लागि प्रयोग गरिने बताइएको छ । यद्यपि, यो १३ करोड डलर सैनिकहरूलाई तिर्न आवश्यक पर्ने अर्ब डलरभन्दा धेरै कम हो । गत हप्ता, ट्रम्प प्रशासनले सैनिकहरूलाई तिर्न ६.५ अर्ब डलर प्रदान गरेको थियो । अर्को तलब केही दिनमा आउनेछ, र सरकारले फेरि पैसा कसरी व्यवस्थापन गर्नेछ भन्ने कुरा स्पष्ट छैन । सैनिकहरूको तलब प्रमुख मुद्दा बनेको छ । गत हप्ता, सरकारले सैन्य अनुसन्धानका लागि छुट्याइएको ८ अर्ब डलरको केही भाग तलबको लागि प्रयोग गरेको थियो । तर अर्को हप्ता फेरि त्यसो गर्नु गाह्रो हुन सक्छ । पुनः सुरु भए पनि, उनीहरूले निरन्तर काम गर्न आवश्यक छ, तर उनीहरूले आफ्नो तलब पाइरहेका छैनन्।

तलब स्थिर भएको कारण, हजारौं नियन्त्रकहरू आफ्ना आधारभूत आवश्यकताहरू पूरा गर्न संघर्ष गरिरहेका छन्। अवस्था यति भयावह छ कि धेरै नियन्त्रकहरू आफ्नो नियमित शिफ्ट पछि दोस्रो काम गर्न बाध्य छन् । तिनीहरू उबर चलाइरहेका छन्, खाना डेलिभर गरिरहेका छन्, वा रेस्टुरेन्टहरूमा काम गरिरहेका छन् ताकि गुजारा चलाउन सकियोस् ।

सरकारी बजेट पारित नहुदा हाल अमेरिकामा साढे ७ लाख सरकारी कर्मचारीहरू बेतलबी बिदामा छन् । सेना, प्रहरी, सीमा सुरक्षा, र हवाई ट्राफिक नियन्त्रकहरू जस्ता अत्यावश्यक कामदारहरू बिना तलब काम गर्न बाध्य भएका छन् ।

धर्ना, जुलुस र आन्दोलन नगर्न गृह मन्त्रालयको आग्रह

काठमाडौँ । गृह मन्त्रालयले हाल सामाजिक सञ्जालमार्फत् विभिन्न व्यक्ति तथा समूहका नाममा धर्ना, जुलुस, विरोध प्रदर्शनलगायत आन्दोलनका कार्यक्रमहरू सार्वजनिक भएको विषयमा गम्भीर ध्यानाकर्षण भएको जनाएको छ ।

शनिबार विज्ञप्ति जारी गर्दै गृह मन्त्रालयले देशमा अस्थिरता निम्त्याउन खोज्ने स्वार्थ समूहले यस्ता कार्यक्रममा घुसपैठ गरी अशान्ति एवम् अराजकता निम्त्याउन सक्ने हुँदा त्यसतर्फ आयोजकहरू समेत सचेत हुनुपर्ने देखिन्छ भन्दै आफ्ना माग राख्दा जनताको शान्तिपूर्वक बाँच्न पाउने, निर्वाध सार्वजनिक सेवा प्राप्त गर्ने र निर्वाचनमा भाग लिन पाउने समेतका हक अधिकारहरू कुण्ठित हुन नदिन र सार्वजनिक सुरक्षा साथै राष्ट्रिय सुरक्षा खलल् हुन नदिई मुलुकमा साम्प्रदायिक सद्भाव कायम राख्दै राष्ट्रिय हितको प्रवर्धन गर्ने कार्यमा योगदान गर्न सबैमा अनुरोध गरेको ।

गृह मन्त्रालयको विज्ञप्ति:
जेनजी पुस्ताको अगुवाइमा भएको प्रदर्शनपश्चात् गठन भएको वर्तमान सरकार आगामी फागुन २१ गतेका लागि तय भएको निर्वाचनको वातावरण बनाउनेतर्फ क्रियाशील रहेको छ। सोही अनुसार सरकारले निर्वाचनसम्बन्धी कानूनमा संशोधन, श्रोत र साधनको व्यवस्थापन, राजनीतिक दलहरू एवम् सरोकारवालाहरूसँग वार्ता र संवाद गरिरहेको विषय सबैमा अवगतै छ ।

देशमा शान्ति सुरक्षा कायम गर्दै घोषित मितिमा स्वच्छ, निष्पक्ष एवम् भयरहित वातावरणमा निर्वाचन सम्पन्न गर्न सबैको योगदान महत्वपूर्ण एवम् अपरिहार्य रहेको हुँदा सोही बमोजिमको भूमिका र दायित्व अपेक्षित छ ।

२०८२ भाद्र २३ र २४ गतेको प्रदर्शन पश्चात्, सार्वजनिक सेवा पुनः सुचारु गर्नुको साथै क्षतिग्रस्त संरचनाहरूको पुनर्निर्माण प्रकृया आरम्भ गरी शान्ति सुरक्षाको अवस्था सामान्य तुल्याई निर्वाचन केन्द्रीत वातावरण निर्माण हुँदै गरेको स्थितिमा हाल सामाजिक सञ्जालमार्फत् विभिन्न व्यक्ति तथा समूहका नाममा धर्ना, जुलुस, विरोध प्रदर्शनलगायत आन्दोलनका कार्यक्रमहरू सार्वजनिक भएको विषयमा गृह मन्त्रालयको गम्भीर ध्यानाकर्षण भएको छ। देशमा अस्थिरता निम्त्याउन खोज्ने स्वार्थ समूहले यस्ता कार्यक्रममा घुसपैठ गरी अशान्ति एवम् अराजकता निम्त्याउन सक्ने हुँदा त्यसतर्फ आयोजकहरू समेत सचेत हुनुपर्ने देखिन्छ ।

आफ्ना माग राख्दा जनताको शान्तिपूर्वक बाँच्न पाउने, निर्वाध सार्वजनिक सेवा प्राप्त गर्ने र निर्वाचनमा भाग लिन पाउने समेतका हक अधिकारहरू कुण्ठित हुन नदिन र सार्वजनिक सुरक्षा साथै राष्ट्रिय सुरक्षा खलल् हुन नदिई मुलुकमा साम्प्रदायिक सद्भाव कायम राख्दै राष्ट्रिय हितको प्रवर्धन गर्ने कार्यमा योगदान गर्न सबैमा अनुरोध छ। सबैको जायज माग, चासो एवम् सरोकारलाई सम्वोधन गर्न सरकार सदा तत्पर र गम्भीर रहेको हुँदा यस्ता धर्ना, जुलुस, प्रदर्शन, आन्दोलन लगायतका कार्यक्रमहरू नगरी वार्ता र संवादका माध्यमबाट कुनैपनि मागको विधिसम्मत समाधान खोज्न सबैमा हार्दिक अनुरोध छ ।

निर्माणाधीन संसद भवनमा कुलमानको अनुगमन, सम्झौता बमोजिम समपन्न नभए कारबाहीको चेतावनी

काठमाडौं । ऊर्जा जलस्रोत तथा सिँचाइ, भौतिक पूर्वाधार र शहरी विकास मन्त्री कुलमान घिसिङले शनिबार सिंहदरबार परिसरमा निर्माणाधीन संघीय संसद भवनको स्थलगत अनुगमन गरेका छन् ।

मन्त्री घिसिङ, शहरी विकास मन्त्रालयका सचिव गोपाल सिग्देल,शहरी विकास तथा भवन निर्माण विभागका महानिर्देशक मचाकाजी महर्जनलगायत सम्मिलित टोलीले निर्माणस्थलको अनुमगन गर्नुकासाथै निर्माण सम्पन्न हुन समय तालिकाका विषयमा छलफल गरेको थियो ।

संसद भवन तीन वर्षभित्र निर्माण सम्पन्न गर्ने गरी २०७६ असोजमा ठेक्का सम्झौता भएको थियो। पाँचौपल्ट थपिएको ठेक्का सम्झौताको म्याद आगामी १६ पुसमा सकिँदैछ । आयोजनाको सिभिललगायतका संरचना निर्माणको प्रगति करिब ८७ प्रतिशत रहेको छ । इन्टेरियर, सुरक्षा प्रणालीलगायतका काम गर्न २०८० मा अर्को ठेक्का सम्झौता भएको थियो । यस प्याकेजको निर्माण प्रगति ३० प्रतिशत रहेको छ ।

मन्त्री घिसिङले दुवै निर्माण व्यवसायीलाई निर्माणस्थलमै सम्पन्न हुने तालिकाका विषयमा प्रतिवद्धता माग गरेका थिए । उनले नेपालमा निर्माण भइरहेको भवनहरुमध्ये सबैभन्दा ठूलो र महत्वको परियोजना रहेकाले १६ पुसभित्र सम्पन्न सुनिश्चित हुने गरी हरेक दिनको कार्यतालिका बनाएर काम गर्न आग्रह गरे ।

धेरै मेहनत नगरिएमा तोकिएको समयमा निर्माण सम्पन्न हुन गाह्रो रहेकाले हरेक दिनको बेलुका निर्माण कार्य प्रगतिको समीक्षा गरी सोहीअनुसार आवश्यक स्रोतसाधन परिचालन गर्न निर्देशन दिंदै उनले निर्माण कार्यको आफैंलेसमेत नियमित अनुमगन गर्ने बताए ।

‘जेन—जी आन्दोलनका क्रममा पुरानो संसद भएन क्षतिग्रस्त भएको छ, राष्ट्रिय सभाको बैठक चलाउनु पर्नेछ, आगामी २१ फागुनको चुनावपछि प्रतिनिधि सभा पनि चलाउनु पर्ने हुन्छ, संसद भवनको निर्माण छिटोभन्दा छिटो सम्पन्न गरिएन भने धेरै असर पर्ने देखिएको छ, आजको निर्माण गति हेर्दा तोकिएको समयमा सम्पन्न गर्न गाह्रो देखिएको छ, दुवै निर्माण व्यवसायी एक आपसमा समन्वय गरेर काम गर्नुहोस्,’ मन्त्री घिसिङले भने, ‘कामको गति बढाउनतर्फ लाग्नु भएन भने ठेक्का सम्झौता बमोजिम कारबाहीको प्रक्रिया अगाडि बढ्छ, त्यसको सम्पूर्ण दायित्व निर्माण व्यवसायीले बहोर्नुपर्नेछ, त्यसैले सबै गम्भीर भएर लाग्नुहोला ।’

उनले संसद भवन निर्माण राष्ट्रिय महत्वको परियोजना भएकाले यसको प्रगति बारे नियमित रुपमा खवरदारी गर्न सञ्चारमाध्यमसहित आम नागरिकलाई आग्रह गरे ।

सचिव सिग्देले तोकिएको समयमा निर्माण सम्पन्न गर्न मन्त्रालयकातर्फबाट आवश्यक सहयोग, समन्वय सहजीकरण र अनुगमन गरिने बताए । निर्माण व्यवसायीका प्रतिनिधिबाट तोकिएकै समयका काम सम्पन्न गर्ने लक्ष्यका साथ काम गरिरहेको बताइएको थियो । उनीहरुबाट तालिकाभन्दा केही पछाडि भएता पनि अहिले देखिएको ढिलाइलाई पूर्ति गरी काम गर्ने प्रतिबद्धता जनाइएको थियो ।

राष्ट्रिय र प्रतिनिधि सभा हलमा फल्स सिलिङका लागि थप ट्रस तथा दुवै भवनको पहिलो तलामा रहेको मल्टिपरपोज हलमा फल्स सिलिङ लागि थप ट्रसको निर्माण, इलेक्ट्रिकलअन्तर्गत मेन एलटी प्यानल, सब एलटी प्यानल, मेन, सम्पूर्ण स्यानेटरी, इलेक्ट्रिकल फायर फाइटिङ, एचभिएसी परीक्षण तथा सञ्चालन लगायतका काम बाँकी रहेका छन् ।

बलिवुडका चर्चित अभिनेता सतिश शाहको निधन

काठमाडौँ । बलिवुडका चर्चित अभिनेता सतिश शाहको निधन भएको छ ।

७४ बर्षिय अभिनेता शाहको शनिबार दिउसो निधन भएको हो । उनी पछिल्लो समय मृगौलासम्बन्धि रोगबाट पिडित थिए ।

कमेडीदेखि गम्भीर भूमिकाका लागि परिचित शाहले कैयौं टिभी सिरियलमा काम गरेका छन् । ‘भगवान परशुराम’ बाट आफ्नो करियर सुरु गरेका थिए । उनको पहिलो प्रमुख भूमिका १९८१ को फिल्म ‘उमराव जान’ मा दिलावरको रूपमा आयो । त्यसपछि उनी १९८३ को फिल्म ‘जाने भी दो यारों’ मा कमिश्नर डी’ मेलोको भूमिकाबाट घरपरिवारको नाम बनेका थिए । उनले ‘हम आपके है कौन’ मा डाक्टरको भूमिका होस् वा ‘अकेले हम अकेले तुम’ मा गुलबदन कुमारको भूमिका होस्, सतीशले ९० को दशकमा धेरैजसो चलचित्रहरूमा हास्य भूमिका खेलेका थिए । जसमा ‘जुडवा’, ‘साजन चले ससुराल’, ‘घरवाली बहरवाली’ र ‘अनारी नम्बर वान’ जस्ता चलचित्र थिए ।

उनले शाहरुख खानसँग चलते चलते, सलमान खानसँग मुझसे शादी करोगी र आमिर खानसँग अकेले हम अकेले तुम जस्ता चलचित्रहरूमा पनि अभिनय गरेका थिए । आफ्नो करियरमा सतीशले तीनै खानसँग धेरै फिल्ममा काम गरे। उनी पछिल्लो पटक २०१४ मा फिल्म ‘हमशकल्स’ मा देखिएका थिए ।

त्यस्तै ‘घर जमाई’ र ‘साराभाई भर्सेस साराभाई’ जस्ता टिभी कार्यक्रमहरूमा देखा पर्दै र ‘कमेडी सर्कस’ मा निर्णायकको रूपमा देखा पर्दै, सतीशले टेलिभिजन संसारमा आफ्नो छाप छोडेका थिए ।

पोखरामा सामान्य वादविवाद हुदा चक्कु प्रहार गरि हत्या, एक जना पक्राउ

पोखरा । कास्कीको पोखरा महानगरपालिका-५ बस्ने ४५ वर्षीय अनिल पराजुलीको हत्या भएको घटनामा संलग्न रहेको अभियोगमा पोखरा महानगरपालिका-१८ सराङकोट घर भई सोही महानगरपालिका-५ मालेपाटन बस्ने २४ वर्षीय किशोर तिमिल्सिनालाई शनिबार बिहान प्रहरीले पक्राउ गरेको छ ।

पोखरा महानगरपालिका-५ चिल्डेल पार्क नजिकै अनिल शनिबार बिहान अचेत अवस्थामा रहेको भन्ने सूचना प्राप्त हुनासाथ तत्काल वडा प्रहरी कार्यालय बैदामबाट खटिएको प्रहरीले अनिललाई उपचारको लागि पश्चिम क्षेत्रीय अस्पताल पोखरा पठाएकोमा उनको उपचारको क्रममा मृत्यु भएको थियो । घटनाको अनुसन्धानको क्रममा किशोर तिमिल्सिना र अनिलबीच सामान्य वादविवाद हुँदा चक्कु प्रहार भएको भन्ने खुल्न आए पश्चात तिमिल्सिनालाई घटनामा प्रयोग भएको १ थान चक्कु सहित प्रहरीले पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको जनाएको छ ।

रोहित शर्माको शतकमा भारतको अस्ट्रेलियाविरुद्ध सान्त्वना जित

काठमाडौं । भारतले अस्ट्रेलियाविरुद्धको एकदिवसीय सिरिजमा सान्त्वना जित हासिल गरेको छ । शनिबार सम्पन्न सिरिजको तेस्रो खेलमा भारतले अस्ट्रेलियालाई ९ विकेटले पराजित गरेको हो ।

अस्ट्रेलियाले दिएको २३७ रनको लक्ष्य पछाएको भारतले ३८.३ ओभरमा एक विकेट गुमाउदै लक्ष्य पुरा गरेको थियो ।

भारतको जितमा रोहित शर्माले शतकीय पारी खेल्दै अविजित १२१ रन बनाए भने विराट कोहलीले अविजित ७४ रन बनाएका थिए । त्यस्तै कप्तान शुभमन गिलले २४ रन बनाएका थिए ।

यस अघि टस जितेर पहिला ब्याटिंग गरेको अस्ट्रेलियाले माट रेनशाको ५६ र कप्तान मिचेल मार्शको ४१ रनको मद्धतले ४६.४ ओभरमा अल आउट हुदै २३६ रन बनाएको थियो । त्यसैगरी भारतीय बलर हर्षित रानाले ४ विकेट लिए भने वाशिंटन सुन्दरले २ विकेट लिएका थिए । योसँगै अस्ट्रेलियाले एकदिवसीय सिरिज २-१ ले जितेको छ ।

अब भारत र अस्ट्रेलियाबीच ५ खेलको टी-२० सिरिज हुने छ । सिरिजको पहिलो खेल अक्टोबर २९ मा हुने छ ।

मोफसलका दर्शक भेट्न पुग्यो ‘वरिष्ठ बलराम’ को टिम

काठमाडौं । फिल्म ‘वरिष्ठ बलराम’को टिम मोफसल पुगेको छ । दर्शक भेट्न भन्दै कलाकारसहितको टिम मोफसल पुगेको हो ।

काठमाडौंका दर्शकसँगको साक्षात्कारपछि ‘वरिष्ठ बलराम’का कलाकार विजय बराल, समृद्धि अर्याल र निर्देशक सुरेन्द्र पौडेल मोफसलका दर्शक भेट्न निस्किएको हो । शुक्रबारदेखि ‘वरिष्ठ बलराम’को टिम पश्चिम नेपालका विभिन्न हलमा पुगेको छ । हलमा पुगेर दर्शकको प्रतिक्रिया लिइरहेको छ ।

निर्देशक पौडेलले धेरै शो हाउसफूल भएका र हाउसफूल नभएका शोमा पनि ७० प्रतिशतभन्दा माथि अकुपेन्सी रहेको जानकारी दिए । तिहारको भाइटीकाको अवसर पारेर प्रदर्शनमा आएको चलचित्र ‘वरिष्ठ बलराम’ ले देशभरका सिनेमा हलमा उत्साहजनक अकुपेन्सीमा प्रदर्शन भइरहेको छ ।

रिलिजको पहिलो दिन देखिनै यो चलचित्रले हाउसफूल दर्शकहरूको साथ पाउँदै आइरहेको छ भने कतिपय हलहरूमा ७० देखि ८० प्रतिशतसम्म अकुपेन्सी हासिल गरेको छ । राजधानीदेखि बाहिरी सहरका सिनेमा हलहरूमा समेत दर्शकको भीड देखिएको छ । ‘वरिष्ठ बलराम’को अकुपेन्सी राम्रो भएपछि केही हलहरूले आज शनिवारलाई शोमा समेत थप गरेका थिए ।

पहिलो दिन बिहानैदेखि धेरै शोहरू हाउसफूल हुनु र दोस्रो दिन पनि सिनेमा हलमा दर्शकको उपस्थिति उच्चसँगै हाउसफूल हुनुले चलचित्रको राम्रो वर्ड अफ माउथ बनेको बुझाउँछ । दयाहाङ राई र विजय बराल स्टारर यो चलचित्रले पहिलो दिनदेखि नै दर्शकको सकारात्मक रिभ्यु पाएसँगै चलचित्रको निर्माण पक्ष व्यापारप्रति आशावादी देखिएको छ ।

चलचित्र ‘वरिष्ठ बलराम’लाई सुरेन्द्र पौडेलले निर्देशन गरेका छन् । वृषभ सिद्धी इन्टरटेनमेन्ट को प्रस्तुतिमा आन्भी फिल्म्सको सहकार्यमा बनेको यो चलचित्रमा दयाहाङ राई, विजय बराल, समृद्धि अर्याल, पशुपति राई, माओत्से गुरुङ, भोलाराज सापकोटा, रामबाबु रेग्मी, प्रदीप कुमार चौधरी (पीके) लगायत कलाकारहरूको अभिनय छ ।

चलचित्रको कथा र सम्पादन निर्देशक पौडेलकै रहेको छ भने पटकथा महेश दवाडी ले लेखेका हुन् । निर्मातामा आशिष एच तामाङ र श्रीराज कार्की, कार्यकारी निर्मातामा प्रदीप जी धामी र पुष्कर बी. घिमिरे छन् । लाइन प्रोड्युसर राम विष्ट हुन् ।

मनकृष्ण महर्जन को छायांकन, प्रशान्त सिवाकोटी को संगीत, सम्राट बस्नेत को एक्सन निर्देशन र प्रदीप लामो को नृत्य निर्देशन रहेको चलचित्रलाई उपत्यकामा डीसीएन र उपत्यका बाहिर कुवेर सिने डिस्ट्रीब्युसनले वितरण गरेको हो ।