काठमाडौँ । नेपाल प्रिमियर लिग (एनपीएल) अन्तर्गत पोखरा एभेन्जर्सले जनकपुर बोल्ट्सलाई १५६ रनको लक्ष्य दिएको छ ।
टस जितेर पहिला ब्याटिंग गरेको पोखराले २० ओभरमा ६ विकेट गुमाउदै १५५ रन बनाएको हो ।
पोखराका लागि सुमित बर्माले सर्बाधिक ५० रन बनाए भने दिनेश खरेलले ३८, तृत राज दासले २९ र एडम रोसिंगटनले २४ रन बनाएका थिए ।
त्यसैगरी जनकपुरका बलर संजय कृष्णमुर्थीले ३ विकेट लिए भने ललित राजबंशी र अनिल शाहले एक एक विकेट लिए ।
काठमाडौँ । अख्तियार दुरुपयो अनुसन्धान आयोगले धनुषाको कमला नगरपालिकाका तत्कालीन नगर प्रमुख राम उदगार गोइतसमेत १० जना र ईन्फ्रास्ट्रक्चर एस एण्ड बि विल्डर्सविरुद्ध मुद्धा दायर गरेको छ ।
अख्तियारले नगरपालिकाको लग्मा बजारस्थित पोखरीको माटो पुर्ने तथा घाट निर्माण गर्ने कार्यमा २९ लाख ४४ हजार १३७ अनियमितता गरेको आरोपमा विशेष अदालत काठमाडौँमा मुद्धा दायर गरेको जानकारी दिएको छ ।
मुद्धा दायर गरिएकोमा कमला नगरपालिकाका तत्कालीन नगर प्रमुख राम उदगार गोइत, तत्कालीन निमित्त प्रमुख प्रशासकीय अधिकृत वीरेन्द्र कुमार सढान, लेखापाल संजिव कुमार महतो र जिन्सी शाखा प्रमुख जुगल किशोर यादव, नगरपालिका धनुषाका तत्कालीन कार्यपालिका सदस्यहरु धनेश्वर यादव, धर्मनाथ मण्डल, पल्टु कवारी, विनोद राम र समसुल मिया मोमिन रहेका छन् । त्यस्तै ईन्फ्रास्ट्रक्चर एस एण्ड बि विल्डर्स र कम्पनीका अध्यक्ष सन्तोष कुमार यादव समेत रहेको अख्तियारले जानकारी दिएको छ ।
अख्तियारले सबैविरुद्ध २९ लाख ४४ हजार १३७ बराबरको बिगो दाबि गर्दै कानुन अनुसार सजायको माग गर्दै मुद्धा दायर गरेको छ ।
काठमाडौँ । बंगलादेशको एक अदालतले पूर्व प्रधानमन्त्री शेख हसिनालाई शक्तिको दुरुपयोग लगायतका आरोपमा २१ वर्षको जेल सजाय सुनाएको छ ।
साथै अदालतले उनकी छोरी साइमा वाजेद र छोरा सजीब वाजेदलाई पाँच-पाँच वर्षको जेल सजाय सुनाएको छ ।
फैसला सुनाउँदा, अदालतले शेख हसिना र उनको परिवारलाई कुनै पनि आवेदन बिना नै आफ्नो क्षेत्राधिकार बाहिर जग्गा बाँडफाँड गरिएको बताएको छ । ढाकाका पाँचौं विशेष न्यायाधीश मोहम्मद अब्दुल्लाह अल मामुनले यो निर्णय सुनाएका हुन् ।
यसअघि बंगलादेशको अन्तर्राष्ट्रिय अपराध न्यायाधिकरणले पूर्व प्रधानमन्त्री शेख हसिनालाई मृत्युदण्डको सजाय सुनाएको थियो ।
काठमाडौँ । सरकार र नेकपा एमालेबीच द्विपक्षीय संवाद आज बालुवाटारमा भइरहेको छ ।
संवादमा सरकारका पक्षबाट प्रधानमन्त्री सुशीलाका कार्की र सञ्चार तथा सूचना प्रविधि मन्त्री जगदीश खरेल सहभागी छन् भने एमालेबाट महासचिव शंकर पोखरेल, उपमहासचिव प्रदीप ज्ञवाली र युवा नेता महेश बर्तौला सहभागी रहेका छन् ।
एमालेले सुशिला कार्की नेतृत्वको सरकार असंबैधानिक भएको भन्दै विघटन गरिएको प्रतिनिधिसभा पुनर्स्थापना हुनुपर्ने माग गर्दै आएको छ भने सडक प्रदर्शन र सर्वोच्च अदालतमा रिट समेत दायर गरेको छ ।
काठमाडौं । ‘पूर्वको गौरव’ भनी परिचित सप्तकोशी सिमेन्ट लिमिटेडले सार्वजनिक प्राथमिक शेयर (आइपोओ) निष्कासन गर्ने तयारी गरेको छ। यसका लागि कम्पनीले सिद्धार्थ क्यापिटल लिमिटेडलाई निष्कासन तथा बिक्री प्रवन्धकको रुपमा नियुक्त गरेको छ।
कम्पनीले रु. १०० (एक सय) दरका चुक्ता पुँजीको २० प्रतिशत शेयर सर्वसाधारणमा निष्कासन गर्ने योजना बनाएको छ । सम्झौतापत्रमा सप्तकोशी सिमेन्ट लिमिटेडका तर्फबाट अध्यक्ष श्रीमती मोना जालान र सिद्धार्थ केपिटल लिमिटेडका तर्फबाट प्रमुख कार्यकारी अधिकृत सन्दिप कार्कीले हस्ताक्षर गरेका छन् ।
सप्तकोशी सिमेन्ट लिमिटेड उच्च स्तरीय सिमेन्ट उत्पादक कम्पनी हो, जसको दैनिक उत्पादन क्षमता ६०० टन रहेको छ । कम्पनीले नेपाल गुणस्तरको निर्धारित मापदण्ड अनुसार पी.पी.सी. ४३ र ५३ ग्रेडको ओ.पी.सी. सिमेन्ट उत्पादन गर्दै आएको छ। नेपाल सिमेन्ट बजारमा अग्रणी भुमिका निर्वाह गर्दै आएको यस कम्पनीले सन् २०१९ देखि निरन्तर संचालन नाफा कायम राख्न सफल भएको छ।
पूर्वी नेपालमा करिब २० प्रतिशत बजार हिस्सा ओगटेको कम्पनीले अन्य क्षेत्रीय प्रतिस्पर्धीहरुसँग उत्कृष्ट प्रदर्शन गर्दै आएको छ । आर्थिक वर्ष २०८१/८२ मा कम्पनीले गत वर्षको तुलनामा २७ प्रतिशत बढी विक्री लक्ष्य हासिल गरेको छ । साथै, आ.व. २०८१/८२ को नाफाबाट कम्पनीले १२ प्रतिशत बोनस शेयर पनि जारी गरेको छ ।
प्रस्तावित आइपिओबाट उठ्ने पुँजी नयाँ क्लिङ्कर प्लान्ट स्थापना तथा हाल सञ्चालनमा रहेको प्लान्टको क्षमता विस्तार गर्न प्रयोग गरिने बताइएको छ । यसले उत्पादन प्रक्रियामा एकीकृतता ल्याई कम्पनीको प्रतिस्पर्धात्मक क्षमता, वित्तीय प्रदर्शन र दीर्घकालीन वृद्धिलाई थप बलियो बनाउने अपेक्षा गरिएको छ ।
काठमाडौँ । राष्ट्रपति रामचन्द्र पौडेलले फागुन २१ गते हुने प्रतिनिधिसभाको निर्वाचन सम्पन्न गर्न सुरक्षा व्यवस्थाका लागि नेपाली सेना परिचालन गर्ने स्वीकृति प्रदान गरेका छन् ।
राष्ट्रपति पौडेलले प्रधानमन्त्रीको सिफारिस तथा नेपाल सरकार, मन्त्रिपरिषद्को मङ्सिर ८ गतेको निर्णयमा उल्लेख भए बमोजिम हुने गरी फागुन २१ गते हुने प्रतिनिधिसभाको निर्वाचन सम्पन्न गर्न सुरक्षा व्यवस्थाका लागि नेपाली सेना परिचालन गर्ने स्वीकृति प्रदान गरेको राष्ट्रपतिको कार्यालयले जानकारी दिएको छ ।
काठमाडौँ । विश्वको अग्रणी वित्तीय केन्द्रहरू मध्ये एक हङकङ आफ्नो इतिहासकै सबैभन्दा ठूलो आगलागीसँग जुधिरहेको छ । अहिलेसम्म ५५ जनाको मृत्यु भइसकेको छ र २७९ जना बेपत्ता छन् । आगलागीले आवासीय ब्लकका धेरै भवनहरूलाई सखाप पारेको छ ।
आगलागीमा अठसठ्ठी जना घाइते भएका छन्, जसमध्ये धेरैको अवस्था गम्भीर छ । बुधबार दिउँसो स्थानीय समय अनुसार २:५० बजेतिर हङकङका आवासीय भवनहरूमा आगो लागेको थियो । कम्प्लेक्समा आठ टावरहरू छन्, जसमा लगभग २००० अपार्टमेन्टहरू छन् । आगलागी शुरु भएको पाँच मिनेटमै ३२ तालासम्म फैलिएको थियो ।
केही निर्माण कार्य भइरहेको थियो र भवन वरिपरि बाँसको मचान खडा गरिएको थियो । यसले गर्दा आगो द्रुत गतिमा फैलिएको बताइएको छ । प्रहरी अनुसन्धानले आवासीय भवनहरूमा प्रयोग हुने सुरक्षा जाली, वाटरप्रुफ क्यानभास र प्लास्टिकका पानाहरूले पनि ब्लकभरि आगो द्रुत गतिमा फैलिन योगदान पुर्याएको खुलासा गरेको छ । यसका साथै, झ्यालहरू बन्द गर्न प्रयोग गरिने अत्यधिक ज्वलनशील पोलियुरेथेन फोमले पनि आगो फैलिनमा योगदान पुर्याएको पाइएको छ । प्रहरीले आगलागीको सम्बन्धमा निर्माण कम्पनीका निर्देशक र परामर्शदाता सहित तीन जनालाई पक्राउ गरेको छ ।
अधिकारीहरूले ठूलो आगलागीबाट प्रभावित हङकङ परिसर वाङ फुक कोर्टको मर्मतसम्भारसँग सम्बन्धित “सम्भावित भ्रष्टाचार” को अनुसन्धान गरिरहेका छन् । हङकङको वैधानिक भ्रष्टाचार विरोधी निकाय, भ्रष्टाचार विरुद्धको स्वतन्त्र आयोगले यस विषयमा उल्लेखनीय सार्वजनिक चासोलाई ध्यानमा राख्दै अनुसन्धान गर्न कार्यदल गठन गरेको जानकारी दिएको छ ।
काठमाडौँ । बलिवुडकी अभिनेत्री हेमा मालिनीले आफ्ना दिवंगत पति धर्मेन्द्रलाई भावुक श्रद्धाञ्जली अर्पण गर्दै आफ्ना भावना पहिलो पटक सार्बजनिक गरेकी छन् ।
सामाजिक सञ्जालमा लेख्दै हेमा मालिनीले धर्मेन्द्रको निधनले आफ्नो जीवनमा अपूरणीय शून्यता छोडेको उल्लेख गरेकी छन् । उनले भनेकी छन्- ‘धर्मेन्द्र मेरो लागि सबै थोक थिए, साथी, दार्शनिक, मार्गदर्शक, कवि, जसको निधनले मेरो जीवनमा अपूरणीय शून्यता छोडेको छ ।’
धर्मेन्द्रको ८९ वर्षको उमेरमा सोमबार निधनपछि हेमा मालिनीको यो पहिलो सार्वजनिक प्रतिक्रिया हो ।
हेमा मालिनीले धर्मेन्द्रको सरलता र सहज स्वभावले आफ्नो परिवारका हरेक सदस्यको मन जितेको उल्लेख गर्दै सबैप्रति उनको स्नेह र चासो सधैं स्पष्ट रहेको बताएकी छन् । उनले लेखेकी छन्- ‘सार्वजनिक व्यक्तित्वको रूपमा उनको लोकप्रियताको बावजुद, उनको प्रतिभा, उनको उदारता र जीवनका सबै क्षेत्रका मानिसहरूप्रति उनको अपीलले उनलाई सबै महान व्यक्तिहरूमाझ एक अद्वितीय आइकन बनाएको छ ।’
उनले धर्मेन्द्रसँगका विशेष क्षणहरूलाई सम्झनाहरू मार्फत मात्र पुन: जीवित गर्न सक्षम हुने बताएकी छन् । उनले भनेकी छन्- ‘मेरो व्यक्तिगत क्षतिको वर्णन गर्न गाह्रो छ। सिर्जना भएको शून्यता मेरो बाँकी जीवनभर मसँगै रहनेछ। यति धेरै वर्षको साथपछि, म ती विशेष क्षणहरूलाई सम्झनाहरू मार्फत मात्र पुन: जीवित गर्न सक्षम हुनेछु ।’
काठमाडौँ । पूर्वसभामुख तथा नेपाली कम्युनिस्ट पार्टीका नेता कृष्णबहादुर महरालाई उच्च अदालत पाटनले धरौटीमा रिहा गर्न आदेश दिएको छ ।
इलेक्ट्रिक सिगरेट (भेप) मार्फत भएको सुन तस्करी प्रकरणमा पुर्पक्षका लागि थुनामा रहेका महरालाई बिहीबार उच्च अदालतका न्यायाधीशद्वय अर्जुनप्रसाद कोइराला र तेजेन्द्रप्रसाद शर्मा सापकोटाको संयुक्त इजलासले महरालाई २० लाख रुपैयाँ धरौटीमा छाड्न आदेश दिएको हो ।
महरालाई यसअघि काठमाडौं जिल्ला अदालतले महरालाई पुर्पक्षका लागि थुनामा पठाउने आदेश दिएको थियो । उच्च अदालतले जिल्ला अदालतको आदेशलाई बदर गर्दै महराको उमेर, स्वास्थ्य अवस्था र मिसिलमा देखिएका प्रमाणहरूका आधारमा थुनामा राखिराख्न नपर्ने ठहर गर्दै धरौटीमा रिहा गर्न आदेश दिएको छ ।
इ–सिगरेटमार्फत सुन तस्करी प्रकरणमा महरालाई केन्द्रीय अनुसन्धान ब्युरो (सीआईबी) ले असोज २६ गते पक्राउ गरेको थियो । त्यसपछि असोज २९ गते जिल्ला अदालत काठमाडौंले महरालाई पुर्पक्षका लागि थुनामा पठाउने आदेश गरेको थियो ।
काठमाडौँ । नेप्सेमा दोहोरो अंकको वृद्धि भएको छ । विहिबार नेप्से १०.४३ अंकले बढेर २६७६.०३ विन्दुमा पुगेर रोकिएको छ ।
आज ३३३ कम्पनिका एक करोड ४६ लाख ९३ हजार ८०७ कित्ता शेयर ६ अर्ब ६६ करोड २३ लाख ८३ हजार १४३ मा कारोबार भएको थियो ।
आज फाइनान्स, उत्पादन, माइक्रोफाइनान्स, अन्य र ट्रेडिङ बाहेक सबै क्षेत्रको शेयर मुल्य बढेको छ ।
आज सागर डिस्टिलरीको शेयरमा सकारात्मक सर्किट लागेको छ भने स्वस्तिक लघुवित्त, झापा इनर्जी र श्रीनगर एग्रोको शेयर ९.९९ प्रतिशतले बढेको छ । त्यस्तै आज सबैभन्दा बढी हिमस्टार उर्जाको शेयर ७.७८ प्रतिशतले घटेको छ ।
त्यस्तै आज सबै भन्दा बढी एनआरएन इन्फ्रास्ट्रक्चर एण्ड डेभलपमेन्ट लिमिटेडको ४० करोड १७ लाखको कारोबार भएको छ भने एनगाडी ग्रुप पावरको १६ करोड ३६ लाख बराबर कारोबार भएको छ ।