काठमाडौँ । निर्वाचन आयोगले ६ राजनीतिक दल खारेज गरेको छ ।
आयोगले मंगलबारको निर्णय बमोजिम राजनीतिक दल सम्बन्धि ऐन, २०७३ को दफा ५४ को उपदफा ४ बमोजिम जरिवाना नबुझाउने ६ राजनीतिक दल खारेज गरेको प्रवक्ता नारायण प्रसाद भट्टराई जानकारी दिएका छन् ।
खारेज हुने दलमा आम आदमी पार्टी नेपाल, नेपाल कम्युनिष्ट पार्टी (लोकतान्त्रिक), नेपाल राष्ट्रवादी पार्टी, आधुनिक नेपाल समाजवादी पार्टी, नेपाल कम्युनिष्ट पार्टी (गौरवशाली) र माओवादी जनमुक्ति पार्टी नेपाल रहेका छन् ।
काठमाडौँ । नेपाली काँग्रेसका महामन्त्री गगन थापाले वडा र क्षेत्रको अधिवेशनपछि महाधिवेशन गर्न प्रस्ताव गरेका छन् ।
बुधबार बसेको केन्द्रीय कार्यसम्पादन समितिको बैठकमा महामन्त्री थापाले महाधिवेशनको कार्यतालिकाका विषयमा नयाँ प्रस्ताव राख्दै वडा र क्षेत्रको अधिवेशनपछि सिधै महाधिवेशन गर्न प्रस्ताव गरेको प्रवक्ता डा. प्रकाश शरण महत्तले जानकारी दिएका हुन् ।
महामन्त्री थापाको प्रस्ताव छलफलमै रहेको र व्यावहारिक कार्यान्वयन गर्न नसकिने गरि प्रस्ताव पारित नगर्न सुझाव आएको महतले बताए । नेताहरुले बोल्नेक्रम जारी रहेकोले महाधिवेशनको विषय र राष्ट्रिय सभाको उम्मेदवार तथा प्रतिनिधि सभाको समानुपातिक सूची तयार गर्ने विषयमा भोली पनि छलफल हुने प्रवक्ता महतले जानकारी दिएका छन् ।
आजको बैठकपछि महामन्त्री थापाले बोल्दै महाधिवेशनको मुख्य मितिमा कुनै हेरफेर गर्न नपाइने भन्दै वडा र क्षेत्रको अधिवेशन गरेर महाधिवेशनमा जान सकिने प्रस्ताव आफुले बैठकमा राखेको बताए । साथै महामन्त्री थापाले नयाँ नेतृत्व नछानी काँग्रेस निर्वाचनमा नजाने बताउदै नियमित महाधिवेशन हुन नसके विशेष महाधिवेशन गर्ने स्पष्ट गरेका छन् ।
कांग्रेसले १५औ महाधिवेशन आगामी पुस २६ देखि २८ सम्म गर्ने निर्णय गरेको छ । काँग्रेसको गाउँ/नगर वडा अधिवेशन पुस १६ गते, गाउँ/नगरपालिका अधिवेशन पुस १७ गते, प्रदेश सभा क्षेत्रीय अधिवेशन पुस १९ गते, प्रतिनिधि सभा क्षेत्रीय अधिवेशन/एक मात्र प्रतिनिधि सभा निर्वाचन क्षेत्र भएको जिल्ला अधिवेशन पुस २१ गते , दुई वा दुईभन्दा बढी प्रतिनिधि सभा क्षेत्र भएको जिल्ला अधिवेशन पुस २२ गते र प्रदेश अधिवेशन पुस २३ र २४ गते हुने कार्यतालिका पारित गरिएको छ । त्यस्तै केन्द्रीय महाधिवेशन पुस २६, २७ र २८ गते काठमाडौंमा हुने तालिका रहेको छ ।
काठमाडौं । राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले सरकारसमक्ष चुनावअघि व्यापक राजनीतिक समझदारी आवश्यक रहेको प्रस्ताव अघि सारेका छन् ।
सरकारका मन्त्रीहरू र प्रधानमन्त्रीका प्रमुख राजनीतिक सल्लाहकारसहितको प्रतिनिधिमण्डलले बुधबार राप्रपाको केन्द्रीय कार्यालय धुम्बाराही पुगेर अवलोकन तथा छलफल गरेपछि यस्तो कुरा बाहिर आएको हो ।
सरकारी टोलीमा मन्त्रीद्वय जगदीश खरेल र अनिल कुमार सिन्हा तथा प्रधानमन्त्री सुशीला कार्कीका प्रमुख राजनीतिक सल्लाहकार अजयभद्र खनाल सहभागी थिए । अवलोकनका क्रममा समसामयिक राजनीतिक अवस्था, निर्वाचनको तयारी र भावी सहकार्यका विषयमा सरकार र राप्रपा नेतृत्वबीच संवाद भएको बताइएको छ ।
छलफलका क्रममा सरकारका प्रतिनिधिहरूले निर्वाचनका लागि अनुकूल वातावरण बनाउन सरकार अधिकतम प्रयासरत रहेको, निर्वाचन आयोग आवश्यक तयारीमा जुटिसकेको र सुरक्षाका हिसाबले पनि संयन्त्र सक्षम रहेको भन्दै राप्रपा नेतृत्वलाई आश्वस्त गराउने प्रयास गरेका थिए ।
यता राप्रपा अध्यक्ष लिङ्देनले भने मुलुकलाई निर्वाचनभन्दा अघि ‘नवीन समझदारीको फराकिलो बाटो’मा लैजान आवश्यक रहेको धारणा सरकारसमक्ष स्पष्ट रूपमा राखेको राप्रपाका प्रवक्ता मोहनकुमार श्रेष्ठले जानकारी दिए । लिङ्देनले राप्रपा एक जिम्मेवार प्रजातान्त्रिक दल भएकाले निर्वाचन प्रक्रियालाई सदुपयोग गर्ने प्रतिबद्धता पनि व्यक्त गरेका छन् ।
यसै क्रममा राप्रपाले विदेशमा रहेका नेपाली नागरिक र एक जिल्लाबाट अर्को जिल्लामा रहेका मतदाताले समेत मतदान गर्न पाउने व्यवस्था यसै निर्वाचनबाट सुनिश्चित गर्न सरकारको गम्भीर ध्यानाकर्षण गराएको छ ।
राप्रपाले लामो समयदेखि राजनीतिक दल, सरकार र राजसंस्थाबीच नयाँ समझदारी गरेर राजसंस्था पुनर्स्थापना, नेपाललाई हिन्दु अधिराज्य घोषणा तथा संघीय संरचना खारेज गर्नुपर्ने माग गर्दै आएको छ । पछिल्लो भेटघाटसँगै यी मुद्दा फेरि राष्ट्रिय राजनीतिक बहसको केन्द्रमा आउने संकेत देखिएको छ ।
काठमाडौं । प्रतिनिधिसभा पुनर्स्थापनाको माग गर्दै सर्वोच्च अदालतमा दायर भएका सबै रिटहरूको एकसाथ सुनुवाइ हुने भएको छ ।
बुधबार प्रधानन्यायाधीश प्रकाशमान सिंह राउत,न्यायाधीश सपना प्रधान मल्ल, हरिप्रसाद फुयाल,मनोजकुमार शर्मा र नहकुल सुवेदी सम्मिलित पूर्ण इजलासले संसद विघटनविरुद्ध दायर सबै रिटहरू सँगै राखेर सुनुवाइ गर्न आदेश दिएको हो।
कांग्रेसका ५७ तथा जनमत पार्टीकी गोमालाभ सापकोटा,अशोक राई नेतृत्वको जनता समाजवादी पार्टी (जसपा) की हसिना खातुन,स्वतन्त्र सांसद योगेन्द्र मण्डलले प्रतिनिधिसभा पुनर्स्थापनाको पक्षमा दिएको पूरक निवेदनमा सर्वोच्चको संबैधानिक इजलासले सुनुवाई गरेको हो ।
प्रतिनिधिसभा विघटनविरुद्ध विभिन्न अधिवक्ताहरु, नेकपा एमाले र नेपाली काँग्रेसका सांसदहरुले रिट दर्ता गराएका छन् ।
भदौ २३ र २४ को जेनजी आन्दोलनपछि सांसद समेत नरहेकी पूर्वप्रधानन्यायाधीश सुशीला कार्कीलाई राष्ट्रपति रामचन्द्र पौडेलले भदौ २७ गते प्रधानमन्त्रीमा नियुक्त गरेका थिए । लगत्तै मन्त्रिपरिषदको बैठकबाट निर्णय गर्दै कार्कीले राष्ट्रपतिसमक्ष प्रतिनिधिसभा विघटनको सिफारिस गरेकी थिइन् । राष्ट्रपति पौडेलले प्रतिनिधिसभा विघटन गर्दै फागुन २१ गते चुनाव गराउन कार्की नेतृत्वको सरकारलाई कार्यादेश दिएका थिए ।
बुटवल । बुटवल उपमहानगरले चिसो बढेपछि सामुदायिक र संस्थागत विद्यालयमा तीन दिनको बिदा दिएको छ ।
उपमहानगरले केहि दिनदेखि बाक्लो हुस्सुसहित शीतलहरसँगै चिसो बढेकोले विद्यार्थीहरुको स्वास्थ्यलाई मध्यनजर गर्दै बार्षिक बिदाबाट कट्टी हुने गरि पुस ११, १३ र १४ गतेसम्म तीन दिन विद्यालय बन्द हुने जानकारी दिएको छ ।
काठमाडौं । नेत्रविक्रम चन्द विप्लव नेतृत्वको नेपाल कम्युनिस्ट पार्टी (माओवादी) ले राष्ट्रपति रामचन्द्र पौडेललाई १३ बुँदे मागसहितको ज्ञापनपत्र बुझाउदै १० दिनको अल्टिमेटम दिएको छ । बुधबार शीतल निवास पुगेर महासचिव विप्लवले मुलुकको पछिल्लो राजनीतिक अवस्था र सुधारका विभिन्न मागसहितको ज्ञापनपत्र बुझाउदै माग पुरा गर्न १० दिनको अल्टिमेटम दिएका हुन् ।
विप्लवले वर्तमान सुशिला कार्की नेतृत्वको सरकार भंग गरेर सर्वपक्षीय अन्तरिम सरकार गठन गर्नुपर्ने तथा भदौ २३-२४ भएका गोलीकाण्ड र विध्वंसको निष्पक्ष छानबिन गरी दोषीलाई कडा कारवाही गर्नुपर्ने माग गरेका छन् ।
विप्लव नेतृत्वको नेकपा माओवादीले राष्ट्रपति पौडेललाई पेश गरेको १३ बुँदे माग:
१- वर्तमान अन्तरिम सरकारलाई भंगगरी सर्वपक्षीय अन्तरिम सरकार गठन गर्नु पर्छ ।
२- जेन-जी विद्रोहको भावना अनुरुप साथै विशेष परिस्थितिमा अवलम्बन गरिने आवश्यकताको सिद्धान्तलाई प्रयोग गरी संविधानलाई संशोधन गर्नु पर्छ ।
३- २३-२४ गते भएका गोलीकाण्ड र विध्वंसको निष्पक्ष छानविन गरी दोषीलाई कडा कार्वाही गर्नुपर्छ ।
४- संविधान निर्माणदेखि असन्तुष्ट वर्ग, जाति, लिङ्ग, क्षेत्र, समुदाय र युवा लगायतका मागहरुलाई समेटेर संविधानको पुनर्लेखन गर्नु पर्छ ।
५- नयाँ संविधान अनुरुप राज्यको पुनरसंरचना गर्नु पर्छ । राज्यको पुनरसंरचना गर्दा अग्राधिकार सहितको समाजवादी संघीय ढाँचामा गरिनु पर्छ ।
६- राजनीतिक स्थिरताका लागि कार्यकारी प्रमुखको छनौट प्रत्यक्ष निर्वाचनद्वारा गर्नुपर्छ ।
७- राज्यले उच्चस्तरीय भूमि आयोग बनाएर निष्पक्षताका आधारमा छानबिन गर्नु पर्छ । वास्तविक सुकुमवासीलाई वासको सुनिश्चित हुनेगरी जमिन उपलब्ध गराउनु पर्छ ।
८- भ्रष्टाचारको निष्पक्ष छानबिन गर्ने उच्चस्तरीय नागरिक आयोग गठन गर्नु पर्छ ।
९- भ्रष्टाचारीमाथिको मुद्दा हेर्ने शक्तिशाली न्यायलय गठन गर्नु पर्छ । उक्त न्यायलयको फैसला नै अन्तिम फैसला हुनु पर्छ ।
१०- राज्यको सम्पत्ति हिनामिना गर्ने भ्रष्टाचारीको सम्पत्ति राष्ट्रियकरण गरी जन्म कैद गर्नु पर्छ ।
११- गैर-कानूनी रुपले आर्जन गरेको कालोधनलाई राज्यको मातहत ल्याउन ५ सय र १ हजारका नोटलाई खारेज गरेर नयाँ नोट प्रचलनमा ल्याउनु पर्छ ।
१२- अस्थिर राजनीतिक परिस्थितिमा देशको स्वाधीनता र सार्वभौमिकतामाथि भइ रहेको साम्राज्यवादी हस्तक्षेप रोकी घुसपैठियाहरुलाई कडा कार्वाही गर्नु पर्छ ।
१३- नेपाली मौलिक जनसंस्कृतिमाथि भइरहेको साम्राज्यवादी सांस्कृतिक हस्तक्षेप बन्द गर्नुपर्दछ ।
हाम्रा यी मागहरुलाई १० दिनभित्र सम्बोधन नगरिए सडक संघर्षमा अगाडि बढ्ने जानकारी पनि यसै माग पत्र मार्फत अवगत गराउन चाहन्छौं ।
काठमाडौँ । मन्त्रीसहितको सरकारी उच्चस्तरीय राजनीतिक संवाद कार्यदलको राजनीतिक टोलीले राष्ट्रिय स्वतन्त्र पार्टी (रास्वपा) को केन्द्रीय कार्यालय वनस्थलीमा अवलोकन तथा छलफल गरेको छ ।
सरकारी टोलीले रास्वपासँग निर्वाचनको वातावरण बनाउने विषयमा छलफल गरेको थियो ।
छलफलका लागि कार्यदल संयोजक तथा कानुनमन्त्री अनिलकुमार सिन्हा, सुचना तथा सञ्चारमन्त्री जगदीश खरेल, प्रधानमन्त्रीका प्रमुख सल्लाहकार अजय भद्र खनालसहितको टोली रास्वपा कार्यालय पुगेको थियो । कार्यालयमा रास्वपाका उपसभापति डिपी अर्याल, डा. स्वर्णिम वाग्ले, महामन्त्री कविन्द्र वुर्लाकोटी, सह महामन्त्री विपीन आचार्य र प्रवक्ता मनिष झा लगायत अन्य केन्द्रीय सदस्य सहितको समुहले सरकारी टोलीलाई स्वागत गर्दै छलफल गरेको थियो ।
सरकारी टोलीले आजै जनमत पार्टी र राप्रपा कार्यालय पुगेर छलफल गरेको थियो ।
ललितपुर । ललितपुर ब्याडमिन्टन संघ र बालकुमारी रिमिक्स क्लबको संयुक्त आयोजनामा चौथो ललितपुर मेयर कप राष्ट्रिय ब्याडमिन्टन प्रतियोगिता २०८२ पौष २२ गते बाट हुने भएको छ । पाँच दिन सम्म संचालन हुने प्रतियोगिता ललितपुरस्थित बालकुमारी रिमिक्स क्लबको कभर्डहलमा संचालन हुने छ ।
ललितपुर महानगरपालिकाको मुख्य प्रायोजन रहने प्रतियोगितामा पुरुष एकल र महिला एकल खुला, उच्च २० बरियता बाहेकको पुरुष युगल, यु–१७ पुरुष तथा महिला एकल खुला, ४५ बर्ष माथिको मास्टर युगल खुला गरि ६ विधामा करिव ४ सय खेलाडीहरुले प्रतिस्पर्धा गर्ने आयोजकले अनुमान गरेका छन् ।
तीन संस्करण सफलतापूर्वक सम्पन्न गरिसकेको यस प्रतियोगितामा यस पटक पुरस्कार रासीमा बृद्धि गरिएको सचिव रदीप महर्जनले जानकारी गराए । अघिल्लो संसकरणमा पुरुष एकल, महिला एकल र पुरुष युगल तर्फ शिर्ष तीन स्थान हासिल गर्नेले नगद ४० हजार, २० हजार र १० हजार प्राप्त गरेकोमा यस पटक पुरस्कार रकममा थप गरि ५० हजार, २५ हजार र १० हजार गरिएको महर्जनले बताए । यस्तै यु–१७ पुरुष तथा महिलाका शिर्ष तीन स्थान हात पार्नेले नगद २० हजार, १० हजार र ५ हजार तथा मास्टर युगल तर्फका बिजेताले नगद ३० हजार, १५ हजार र ७ हजार ५ सय सहित मेडल, प्रमाणपत्र र ट्रफी प्राप्त गर्नेछन् ।
प्रतियोगितामा सहभागी हुने खेलाडी, प्रशिक्षक र अफिसियलहरुलाई विहानको खाजा तथा खानाको ब्यवस्था आयोजक स्वयंले गर्नेछन् ।
अनुमानित ३२ लाख २० हजार ५ सयको अनुमानित लागत रहेको प्रतियोगिताको पुरस्कार रासी ४ लाख २५ हजार रहेको छ ।
काठमाडौँ । उर्जामन्त्री कुलमान घिसिङले चुनावको मनोनयन दर्ता गर्ने समयमा राजीनामा बारे निर्णय लिने स्पष्ट गरेका छन् ।
आफ्नो सय दिनको कार्यकालमा गरेका कामको विवरण सार्बजनिक गर्न आयोजित पत्रकार सम्मेलनमा बोल्दै मन्त्री घिसिङले मन्त्री बनेपछि आफु राजनीतिमा प्रवेश गरेको बताउदै निर्वाचनका लागि मनोनयन गर्ने समयमा राजीनामा बारे निर्णय लिने स्पष्ट गरेका हुन् ।
उनले भने- ‘ मन्त्रीको हैसियतमा आएपछि मैले राजनीतिमा इन्ट्री भए भनेको छ । मन्त्रीको हैसियतले अहिले जिम्मेवारीलाई बहन गरेको छ । उपयुक्त समयमा जुन बेला हामी चुनावमा जान्छौं, मनोनयनको समय आउछ, उपयुक्त समयमा आवश्यक निर्णय गर्छौं भने पछि तपाइहरुले बुझ्नु भएको होला ।’
मन्त्री घिसिङले चुनावमा सबै नयाँ शक्तिहरु मिलेर जानुपर्छ भन्नेमा एक रहेको बताउदै आगामी चुनावपछि सहि नेतृत्व आउनका लागि सबैले आआफ्नो क्षेत्रबाट योगदान पुर्याउनुपर्ने बताए । उनले आफै मात्र ठिक भनेर जान नहुने भन्दै नयाँ शक्तिहरु सबै एक ठाउमा आउनुपर्ने बताए ।
काठमाडौँ । नेप्सेमा आजपनि सामान्य करेक्सन भएको छ । बुधबार नेप्से १.३७ अंकले बढेर २५८५.८७ विन्दुमा पुगेर रोकिएको छ ।
आज ३३४ कम्पनिका ७२ लाख २४ हजार ९१७ कित्ता शेयर ३ अर्ब २२ करोड ४६ लाख ६४ हजार ६६३ मा कारोबार भएको थियो । आज विकास बैंक,फाइनान्स, हाइड्रो, लगानी, जीवन वीमा, माइक्रोफाइनान्स, अन्य बाहेक सबै क्षेत्रको शेयर मुल्य बढेको छ ।
आज इन्फिनिटी लघुवित्तको सबै भन्दा बढी ५.३२ प्रतिशतले बढेको छ भने नेशनल हाइड्रोको शेयर ४.२६ प्रतिशतले बढेको छ । त्यस्तै आज सबैभन्दा बढी ग्रामिण विकास लघुवित्तको ४.२३ प्रतिशतले घटेको छ ।
त्यस्तै आज सबै भन्दा बढी एसवाई प्यानलको १४ करोड ४९ लाख कारोबार भएको छ भने मन्जुश्री फाइनान्सको १२ करोड ७९ लाखको कारोबार भएको छ ।