काठमाडौँ । हिमालयन लाइफ इन्स्योरेन्सको सहायक कम्पनी हिमालयन इन्भेष्टमेन्ट बैंकर लिमिटेडले आजदेखि आफ्नो पहिलो बन्दमुखि म्युचुअल फण्ड योजना ‘एचएलआई लार्ज क्याप फण्ड’ निष्काशन तथा बिक्री खुला गरेको छ।
कम्पनीले प्रतिइकाई १० रुपैयाँ अंकित दरमा कुल ४० करोड इकाई जारी गर्न लागेको हो, जसको मूल्य ४ अर्ब रुपैयाँ बराबर हुनेछ।
यस फण्डमा ५० प्रतिशत अर्थात २० करोड इकाई (२ अर्ब रुपैयाँ बराबर) कोष प्रवर्द्धक हिमालयन लाइफ इन्स्योरेन्सका लागि सुरक्षित गरिएको छ भने बाँकी २० करोड इकाई सर्वसाधारणका लागि खुला गरिएको छ। लगानीकर्ताले न्यूनतम १०० इकाईका लागि आवेदन दिनुपर्नेछ भने अधिकतममा ४ करोड इकाईसम्म आवेदन गर्न सक्ने व्यवस्था छ।
यस योजना अन्तर्गत इकाई बाँडफाँड भएको मितिदेखि १० वर्ष अवधिसम्म सञ्चालन हुनेछ। लगानीकर्ताले भदौ १८ गतेसम्म आवेदन दिन सक्नेछन् भने सो अवधिमा पर्याप्त आवेदन नपरेमा आवेदन म्याद भदौ २९ गतेसम्म थप गर्न सकिनेछ। बिक्री अवधिभित्र न्यूनतम ५० प्रतिशत अर्थात २० करोड इकाई बिक्री नभएमा योजना खारेज गरी लगानीकर्ताको रकम १५ दिनभित्र फिर्ता गरिने व्यवस्था गरिएको छ।
उक्त योजनाको निष्काशन तथा बिक्री प्रबन्धक स्वयं हिमालयन इन्भेष्टमेन्ट बैंकर लिमिटेड नै रहेको छ। लगानीकर्ताले नेपाल धितोपत्र बोर्डबाट अनुमति प्राप्त आश्वा सेवामा सहभागी बैंक तथा वित्तीय संस्था र तिनका शाखा कार्यालयहरू वा सीडीएस एण्ड क्लियरिङ्ग लिमिटेडद्वारा विकास गरिएको ‘मेरो शेयर’ अनलाइन प्रणालीमार्फत आवेदन दिन सक्नेछन्।
