काठमाडौँ । सरकारले चाडपर्वलाई लक्षित गरी गुणस्तरीय उपभोग्य वस्तुको सहज र सुपथ आपूर्ति गर्ने तयारी गरेको छ। आइतबार सिंहदरबारमा मुख्यसचिव एकनारायण अर्यालको अध्यक्षतामा बसेको केन्द्रीय अनुगमन तथा मूल्याङ्कन समितिको ७१औँ बैठकले खाद्य, यातायात, रोग नियन्त्रणदेखि सुरक्षा व्यवस्था सम्मका बहुआयामिक निर्णय गरेको हो।
बैठकले उद्योग, वाणिज्य तथा आपूर्ति मन्त्रालयमार्फत खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन लिमिटेडका पसल सञ्चालन गरी काठमाडौँ उपत्यका र बाहिरका प्रमुख स्थानमा आवश्यक उपभोग्य वस्तु सुपथ मूल्यमा उपलब्ध गराउने निर्णय गरेको छ। यससँगै वाणिज्य, आपूर्ति तथा उपभोक्ता संरक्षण विभागले गुनासो संकलन र समाधानका लागि टोल फ्री नम्बरको व्यवस्था गर्नेछ।
खाद्य प्रविधि तथा गुण नियन्त्रण विभागले दूध, तरकारी, फलफूल, मासु लगायतका वस्तुमा गुणस्तरीय परीक्षण गर्न नमूना सङ्कलन गर्ने र खाद्य स्वच्छताका लागि मोबाइल भ्यान प्रयोग गर्ने जनाएको छ। यसैगरी गृह मन्त्रालयले जिल्ला प्रशासन कार्यालयमार्फत बजार अनुगमनलाई कडा बनाउने, अखाद्य वस्तुको बिक्री तथा कालोबजारी नियन्त्रणमा सक्रिय भूमिका खेल्ने निर्णय गरेको छ।
सार्वजनिक यातायातमा चाडपर्वका यात्रुहरूलाई सहज बनाउन भौतिक पूर्वाधार तथा यातायात मन्त्रालय र गृह मन्त्रालयले लामो दूरीका रुटमा अनलाइन टिकटिङ, भाडादर नियमन, यात्रु क्षमताअनुसारको व्यवस्थापन गर्नेछन्। सडक विभागले अवरुद्ध राजमार्ग असोज १० भित्र सञ्चालनमा ल्याउने प्रतिवद्धता जनाएको छ। विमानस्थलमा उडान संख्या बढाउने, अस्वाभाविक भाडादर वृद्धि रोक्ने जिम्मा संस्कृति, पर्यटन तथा नागरिक उड्डयन मन्त्रालयले पाएको छ।
कृषि तथा पशुपन्छी विकास मन्त्रालयले चौपायामा फैलिएको लम्पीस्किन रोग नियन्त्रणमा जोड दिनेछ। त्यस्तै, आन्तरिक राजस्व विभागले बिक्री हुने वस्तुमा वास्तविक कारोबार मूल्यमा बिलबिजक जारी गर्ने व्यवस्था कडाइका साथ कार्यान्वयन गर्ने भएको छ। राजस्व अनुसन्धान विभागले अवैध कारोबार नियन्त्रण गर्न निगरानी र अनुगमनलाई सघन बनाउने निर्णय गरेको छ।
बैठकले यी सबै निर्णयको कार्यान्वयन प्रगतिलाई पाक्षिक रूपमा प्रधानमन्त्री तथा मन्त्रिपरिषद्को कार्यालयमा पेस गर्न सम्बन्धित निकायलाई निर्देशन दिएको छ।
