काठमाडौँ । नेकपा एमालेका नेता गोकुल बाँस्कोटाले भदौ २३ र २४ गते जेनजी आन्दोलनका क्रममा वितण्डा मच्चाउने सबै अपराधीहरूलाई कानुनको दायरामा ल्याउनुपर्ने बताएका छन् ।
संविधान दिवसका अवसरमा शुक्रबार काभ्रेको बनेपास्थित चारदोबाटोमा भएको कार्यक्रममा बोल्दै नेता बास्कोटाले यस्तो बताएका हुन् ।
‘यो वितण्डा गर्ने सबै अपराधीहरूलाई कानुनको दायरामा ल्याउनुपर्दछ र उनीहरूबाटै क्षतिपूर्ति दिलाउने व्यवस्था गर्नुपर्छ’,बास्कोटाको भनाइ छ । समयले परिवर्तन माग्ने र युग परिवर्तन हुने भन्दै परिवर्तित चाहाना र भावनालाई सम्मान गर्न सक्नुपर्नेमा जोड दिँदै बाँस्कोटाले कुनै पनि सैनिक तानाशाह, व्यक्तिको तानशाह वा परेड नेपाली जनतालाई स्वीकार्य नभएको बताए ।
उनले अहिलेको अवस्थामा तीन वटै पुस्ता मिलेर देशलाई समृद्धिमा पुर्याउनुपर्ने बताए । उनले वर्तमान सरकारले पाएको म्यान्डेट अनुसार समयमा निर्वाचन गरोस् भन्दै एमाले निर्वाचनको सामना गर्न तयार रहेको बताए । ‘हामी अवश्य पनि खरानीको टिको लगाएर नयाँ इतिहास रच्नका निम्ति तम्तयार भएर बसेका छौँ’, बास्कोटको भनाइ छ ।
