काठमाडौं । एनआईसी एशिया बैंकको प्रमुख कार्यकारी अधिकृत (सीईओ) मा सुजितकुमार शाक्य नियुक्त भएका छन् ।
शाक्य बैंकिंग क्षेत्रमा अनुभवी र दूरदर्शी व्यक्तित्वको रुपमा चिनिन्छन । कात्तिक १७ गते बसेको एनआईसीको सञ्चालक समितिको निर्णयले शाक्यलाई नयाँ प्रमुख कार्यकारी अधिकृत (सीईओ) का रूपमा नियुक्त गरेसंगै बैंकको भविष्यलाई अझ ऊर्जाशील र परिणाममुखी बनाउने संकेत गरेको छ ।
तीन दशकभन्दा बढी लामो बैंकिङ यात्रामा शाक्यले सिभिल बैंक, जनता बैंक, ग्लोबल आईएमई र नवील बैंकजस्ता प्रतिष्ठित संस्थाहरूमा महत्वपूर्ण जिम्मेवारी सम्हाल्दै उत्कृष्ट नेतृत्व कौशल प्रदर्शन गरिसकेका छन्।
नवील बैंकका वरिष्ठ डेपुटी सीईओका रूपमा कार्यरत शाक्यले बैंकको कार्यकारी प्रमुखको भूमिका समेत निर्वाह गरिसकेका छन् । अब उनले एनआईसी एशिया बैंकलाई नयाँ उचाइमा पुर्याउने दृढ संकल्पका साथ जिम्मेवारी सम्हाल्न लागेका हुन् ।
शाक्यको नियुक्तिबाट एनआईसी एशिया बैंकका कर्मचारी र ग्राहक दुवैमा नयाँ उत्साह जागेको छ। उनी बैंकभित्र पारदर्शिता, नवीनता र ग्राहकमुखी सेवामा जोड दिने नेतृत्वको रूपमा परिचित छन् । एनआईसी एशिया बैंकलाई नेपालको डिजिटल बैंकिङको अग्रणी संस्थाका रूपमा अझ मजबुत बनाउने शाक्यको दृष्टि आगामी वर्षहरूमा बैंकको विकास यात्रामा ऐतिहासिक मोड ल्याउने अपेक्षा गरिएको छ ।
शाक्यको समृद्ध अनुभव, दृढ नेतृत्व र रणनीतिक सोचले एनआईसी एशिया बैंकलाई अझ प्रतिस्पर्धी, ग्राहकमैत्री र नवीनतम प्रविधिमुखी संस्थाका रूपमा रूपान्तरण गर्ने विश्वास गरिएको छ। बैंकका निकट स्रोतका अनुसार, शाक्यको आगमनले संस्थागत स्थायित्व र प्रगतिमा नयाँ उर्जा भर्नेछ।
सन् २०१० तिर तत्कालीन एशिया बैंकबाट स्वेच्छिक अवकाश लिएर केही समय बैंकिङ क्षेत्रबाट टाढा रहेका शाक्य पुनः आफ्नो अनुभव र दृष्टिकोणका साथ त्यही बैंक परिवारमा शीर्ष नेतृत्वका रूपमा फर्कन सफल भएका छन् ।
एनआईसी एशिया बैंक सञ्चालक समितिले चार वर्षका लागि शाक्यलाई सीईओमा नियुक्त गर्दै ३० दिनभित्र औपचारिक रूपमा कार्यभार सम्हाल्ने तयारी थालिएको जनाएको छ।
यसअघि तत्कालीन सीईओ रोशनकुमार न्यौपानेले राजीनामा दिएपछि बैंक कार्यवाहक सीईओ सन्तोषकुमार राठीको नेतृत्वमा सञ्चालन हुँदै आएको थियो।
