काठमाडौँ । प्रचण्ड-माधव नेतृत्वमा एकीकृत भएर बनेको नयाँ दल नेपाली कम्युनिष्ट पार्टी (नेकपा) अब देशभर आफ्नो उपस्थिति जनाउँदै जनतामाझ पुग्ने तयारीमा लागेको छ।
माओवादी केन्द्र, एकीकृत समाजवादीसहित १० भन्दा बढी कम्युनिस्ट समूह एउटै संरचनामा आएपछि निर्मित नेकपाले सातै प्रदेशमा ‘सन्देश सभा’ गर्ने निर्णय गरेको हो।
आइतबार पेरिसडाँडामा बसेको पूर्व पदाधिकारीहरूको बैठकमा पार्टी एकताको पृष्ठभूमि, आगामी योजनाहरू र जनतामाझ दिनुपर्ने सन्देशबारे विस्तृत छलफल भएको थियो। बैठकपछि नेता राजेन्द्रप्रसाद पाण्डेले देशभर पार्टीको एकता, लक्ष्य र आगामी कार्यक्रमबारे स्पष्ट सन्देश दिन सातै प्रदेशमा सभा आयोजना गर्ने निर्णय गरिएको बताए।
हालसम्म कुन प्रदेशमा कुन मितिमा कार्यक्रम हुने भन्ने अन्तिम निर्णय भने भइनसकेको बैठकमा सहभागीले जनाए । पाण्डेका अनुसार, आज सोमबार बेलुकासम्म प्रत्येक प्रदेशका कार्यक्रमको स्थान र मिति ठोस रूपमा तय गरिनेछ। पार्टीका अनुसार सन्देश सभामा शीर्ष नेतृत्व, प्रदेश नेतृत्व तथा हजारौं कार्यकर्ताको सहभागिता रहनेछ।
पार्टी एकता घोषणा भइसकेपछि आधारभूत संरचना, संगठन विस्तार, नीति तथा दिशा–निर्देशबारे जनतालाई जानकारी दिन आवश्यक देखिएकाले यस्तो कार्यक्रम अघि सारिएको बताइएको छ। पार्टी नेतृत्वको बुझाइमा, “एकता मात्रै पर्याप्त हुँदैन, जनतालाई विश्वास गराउने, योजनाबारे सुनाउने र कार्यकर्तालाई सक्रिय बनाउन ठूला जनसभाहरू अनिवार्य छन्।”
यो कार्यक्रम नयाँ नेकपाले एकतापछि गर्ने पहिलो राष्ट्रिय-स्तरीय गतिविधि हुने भएकाले संगठनभित्र पनि यसको विशेष महत्व छ। पार्टी स्रोतका अनुसार, सन्देश सभामा एकीकृत पार्टीको नीति र मार्ग, आगामी आन्दोलन तथा योजनाको खाका, सरकारप्रति पार्टीको धारणा, संगठन विस्तारको रणनीति लगायतका विषय सार्वजनिक गरिनेछ ।
