काठमाडौँ । धनुषाको गणेशमान चारनाथ नगरपालिका–५ टोडकीटोलस्थित कमल खोलामा पौडी खेल्ने क्रममा बेपत्ता युवकको शव फेला पारेको छ ।
सोह जिल्लाको जनकपुरधाम उपमहानगरपालिका–६ बस्ने १८ वर्षिय महमद आयन कमड चैत्र २८ गते पिकनिक गएका उनी सो खोलामा पौडी खेल्ने क्रममा डुवेर बेपत्ता भएका थिए ।
आइतबार बिहान सशस्त्र प्रहरीको गोताखोरको टोलीले घटनास्थलबाट करीव ४० मिटर तल झण्डै ४० मिटर गहिराईबाट उनको शव निकालेको हो ।
काठमाडौँ । नेकपा माओवादीका महासचिव नेत्र विक्रम चन्द विप्लवले विद्यार्थी संगठन खारेज गर्ने सरकारी नीतिको कडा आलोचना गरेका छन् ।
विप्लवले विद्यार्थी संगठन खारेज गर्ने सरकारी नीतिको कडा आलोचना गर्दै विद्यार्थी संगठनको घाटी निमोठ्न खोजे सरकारकै जरो उखेल्ने चेतावनी दिएका हुन् ।
उनले सरकारको यो सोच निरङ्कुश प्रवृत्तिको अभिव्यक्ति भएको बताउदै विद्यार्थी संगठनहरू सचेतता, खबरदारी, न्याय, बिद्रोह र अग्रगमनका वहाक भएको उल्लेख गरेका छन् ।
उनले विद्यार्थी संगठन खारेज गर्ने सरकारी नीति विरूद्ध विद्यार्थी संगठनहरूले गरेको विरोध कार्यक्रमप्रति आफुहरुको पूर्ण समर्थन रहेको बताउदै आन्दोलनलाई सशक्त बनाउँदै अगाडि बढन सुझाव दिएका छन् ।
उनले नेपालका सबै निरङ्कुश शासकहरूको अन्त्यमा विद्यार्थीको भूमिका अग्रस्थानमा रहेको उल्लेख गर्दै जुन संस्था र शक्तिको योगदानले यी परिवर्तन भएका छन् र सरकार खडा भएकाछन् तिनकै घाटी निमोठ्न खोजे सरकारकै जरो उखेलिने चेतावनी दिएका छन् ।
काठमाडौँ । श्रम संस्कृति पार्टीका अध्यक्ष हर्क साम्पाङले प्रधानमन्त्री बालेन शाहलाई भारतसँग महाकालीमा सिमा अतिक्रमण बन्द गर्न र लिम्पियाधुरा लिपुलेकमा नाका खोल्दा नेपालको स्वीकृति अनिवार्य लिने प्रबन्ध मिलाउने विषयमा कुरा गर्न आग्रह गरेका छन् ।
सामाजिक सञ्जालमा लेख्दै अध्यक्ष साम्पाङले प्रधानमन्त्री बालेनको भारत भ्रमणको समाचार बाहिरिएको भन्दै भारतसँग महाकालीमा सिमा अतिक्रमण बन्द गर्न र लिम्पियाधुरा लिपुलेकमा नाका खोल्दा नेपालको स्वीकृति अनिवार्य लिने प्रबन्ध मिलाउने विषयमा कुरा गर्न आग्रह गरेका हुन् ।
उनले भनेका छन्-
सम्मानीय प्रधानमन्त्री बालेन्द्र शाह ज्यु… तपाइँको भारत भ्रमण निकट भविष्यमै हुने भन्ने समाचार बाहिरिएको छ ! भ्रमण उपलब्धिमूलक रहोस् ! महाकालीमा सिमा अतिक्रमण बन्द गरियोस् र लिम्पियाधुरा लिपुलेकमा नाका खोल्दा नेपालको स्वीकृति अनिवार्य लिने प्रबन्ध मिलाइयोस् ! यति भए पुग्छ अहिलेलाई !
काठमाडौं । नेपाली बजारमा आज सुनचाँदीको मुल्य सामान्य बढेको छ ।
नेपाल सुनचाँदी व्यवसायी महासङ्घका अनुसार आइतबार छापावाल सुनको मुल्य तोलाको २ सयले बढेर तोलाको २ लाख ९७ हजार १ सयमा कारोबार भइरहेको छ । यसअघि शुक्रबार सुन तोलाको २ लाख ९६ हजार ९ सयमा कारोबार भएको थियो ।
यस्तै, आज चाँदीको मूल्य पनि सामान्य बढेको छ । महासङ्घका अनुसार आज चाँदी तोलाको १५ रुपैयाँले बढेर ४९७५ मा कारोबार भइरहेको छ । यसअघि शुक्रबार चाँदी तोलाको ४९६० मा कारोबार भएको थियो ।
काठमाडौँ । इस्लामाबादमा अमेरिका र इरानबीचको वार्ता निष्कर्षमा पुग्न नसकेपछि अब के हुन्छ भन्ने कौतुहलता बढेको छ ।
अमेरिकी वार्ता टोलीको नेतृत्व गरेका उपराष्ट्रपति जेडी भान्सले इरानले अमेरिकाले राखेका शर्त मान्न अस्वीकार गरेका कारण वार्ता निष्कर्षमा पुग्न नसकेको बताउदै अमेरिकातर्फ लागेका छन् ।
त्यस्तै इरानको विदेश मन्त्रालयका प्रवक्ता इस्माइल बकाईले वार्तामा दुवै पक्षबीच पटक-पटक सन्देश र लिखित कागजात आदानप्रदान भएको बताउदै वार्तामा होर्मुज जलडमरु, परमाणु कार्यक्रम, युद्ध क्षतिपूर्ति, इरानमाथि लगाइएका प्रतिबन्ध हटाउने विषय र क्षेत्रभर जारी द्वन्द्व अन्त्य गर्ने विषयमा विस्तृत छलफल भएको बताएका छन् ।
यसैबीच वार्तामा सबैभन्दा ठूलो अड्चन होर्मुज जलडमरु बनेको बताइएको छ । यस विषयमा अमेरिकाको स्पष्ट धारणा नआउँदा वार्ता झन् जटिल बनेको उल्लेख गरिएको छ । पछिल्ला दिनमा अमेरिकी राष्ट्रपति डोनाल्ड ट्रम्पले यस विषयमा फरक–फरक अभिव्यक्ति दिएका छन् । सुरुमा उनले अमेरिकालाई उक्त क्षेत्रप्रति खास चासो नभएको बताएका थिए भने केही दिनमै त्यसलाई वार्ताको सबैभन्दा महत्वपूर्ण अंश भएको भन्दै खुला नराखिए कुनै सहमति सम्भव नहुने बताएका थिए । यी दुई धारणा आपसमा नमिल्दा अमेरिकाको वास्तविक अडानबारे अन्योल कायम भएको देखिन्छ । उता इरानले भने होर्मुज जलडमरुमाथिको नियन्त्रणलाई आफ्नो प्रमुख शक्ति मानेको छ र पर्याप्त लाभबिना त्यसमा सम्झौता नगर्ने संकेत दिएको छ ।
यसैबीच पाकिस्तानका विदेशमन्त्री इशाक डारले आइतबार पत्रकार सम्मेलन गर्दै सबै पक्षले युद्धविरामको पालना गर्नुपर्नेमा जोड दिएका छन् । उनले पाकिस्तानले आगामी दिनमा पनि वार्तालाई अघि बढाउन सहजीकरण गर्ने बताएका छन् ।
काठमाडौँ । इन्धन कटौतीपछि काठमाडौँ महानगरपालिकाले अधिकारीहरुलाई उपलब्ध गराएको सवारी साधनलाई आलोपालो चलाउने प्रणाली ‘कार पुलिङ्’ कार्यक्रम कार्यान्वयनमा ल्याएको छ ।
कार्यवाहक प्रमुख सुनिता डंगोलका अनुसार इन्धन अभावबाट सिर्जना भएको अवस्था र यसले दीर्घकालमा पार्न सक्ने नकारात्मक प्रभाव घटाउन यस्तो निर्णय गरिएको हो ।
उनले भनेकी छन्- ‘विश्वभर इन्धनको अभाव छ । यसबेला पहिलेकै अवस्थामा सवारी साधन सञ्चालन गर्दा अत्यावश्यक काम र सेवाका लागि आवश्यक पर्ने इन्धन पनि नपाइने हुन सक्छ । यस्तो समस्या आउन नदिन इन्धनको प्रयोगलाई घटाउनुको विकल्प छैन । यसकारण इन्धनजन्य सम्भावित समस्या आउन नदिन ‘कार पुलिङ्’ कार्यक्रम कार्यान्वयनमा ल्याएका हौँ ।’
महानगरपालिकाले ४८ औँ कार्यपालिका बैठकबाट इन्धन कोटामा कटौती गरिसकेको छ ।
‘कार पुलिङ्’ कार्यक्रममा बसोबास क्षेत्रका आधारमा एउटै ठाउँबाट आउने जाने अधिकारीहरुको समूह बनाइएको छ । यस समूहमा हुनेले आफूसँग भएको सवारी साधन आलोपालो सञ्चालन गरेर आफू नजिकका अधिकारीलाई पनि ल्याउने लाने गर्नुपर्छ । यसो गर्दा कार्यालयमा आउने जाने सवारी साधनको संख्या र इन्धनको प्रयोग घट्नेछ ।
काठमाडौँ । अल नासरले साउदी प्रो लिग अन्तर्गत अल अखडोउडलाई पराजित गरेको छ ।
गएराती सम्पन्न खेलमा अल नासरले अल अखडोउडलाई २-० गो अन्तरले पराजित गरेको हो । अल नासरको जितमा क्रिस्टियानो रोनाल्डो र जोआओ फेलिक्सले एक एक गोल गरेका थिए ।
यो जितपछि अल नासरको २८ खेलमा ७३ अंक भएको छ र लिगको शिर्ष स्थानमा रहेको छ । अल नासर दोस्रो स्थानमा रहेको अल हिलाल भन्दा ५ अंकले अगाडी रहेको छ ।
त्यस्तै अल अखडोउडको २८ खेलमा १६ अंक रहेको छ र लिगमा १७औं स्थानमा रहेको छ ।
काठमाडौँ । बार्सिलोनाले स्पेनिस ला लिगा अन्तर्गतको खेलमा इस्पेनियोललाई पराजित गरेको छ ।
गएराती सम्पन्न खेलमा बार्सिलोनाले इस्पेनियोललाई ४-१ गोल अन्तरले पराजित गरेको हो । बार्सिलोनाको जितमा फेरान टोरेजले २ गोल गरेका थिए भने लामीन यमल र मार्कस राशफोर्डले एक एक गोल गरेका थिए ।
त्यस्तै इस्पेनियोलका लागि पोल लोजानोले एक गोल गरेका थिए ।
यो जितपछि बार्सिलोनाको ३१ खेलमा ७९ अंक भएको छ र शिर्ष स्थानमा कायम रहेको छ । बार्सिलोना दोस्रो स्थानमा रहेको रियल म्याड्रिड भन्दा स्पष्ट ९ अंकले अगाडी भएको छ ।
त्यस्तै इस्पोनियलको ३१ खेलमा ३८ अंक रहेको छ र हाल १०औं स्थानमा रहेको छ ।
काठमाडौँ । प्रधानमन्त्री बालेन्द्र शाहलाई भारतीय प्रधानमन्त्री नरेन्द्र मोदीले भारत भ्रमणको निम्तो दिएका छन् । परराष्ट्रमन्त्री शिशिर खनालले प्रधानमन्त्री शाहले पदभार ग्रहण गरे लगत्तै मोदीले बधाई सन्देशमार्फत भारत भ्रमणको निम्तो दिएको बताएका हुन् ।
मोरिससमा मन्त्री खनालले भारतीय सञ्चारमाध्यम वीअनसँगको कुराकानीमा मोदीले दिएको भ्रमणको निमन्त्रणा प्रधानमन्त्री बालेन्द्रले स्वीकार गरिसकेको बताएका हुन् ।
यद्यपी प्रधानमन्त्री बालेन्द्र शाहको भारत भ्रमण कहिले हुन्छ भन्ने स्पष्ट भएको छैन । आन्तरिक गृहकार्य भइरहेको परराष्ट्र स्रोतले बताए पनि भ्रमणको मिति अहिले नै भन्न नसकिने बताइएको छ ।
मन्त्री खनाल भारतको विदेश मन्त्रालय, मोरिसस सरकार र इन्डिया फाउन्डेसनद्वारा आयोजित नवौं हिन्द महासागर सम्मेलन (आईओसी) मा सहभागी हुन मौरिसस पुगेका थिए । उनले शनिबार सो सम्मेलनलाई सम्बोधन गरिसकेका छन् । सो क्रममा उनले भारतीय विदेशमन्त्री एस जयशंकरसँग समेत भेटवार्ता गरेका थिए ।
काठमाडौँ । झापा र सर्लाहीबाट सशस्त्र प्रहरीले ८ लाख १२ हजार ३ सय ३० रुपैयाँ बराबरको ३ सय ३२ क्यूफिट काठ बरामद गरेको छ ।
झापा जिल्लाको मेचीनगर नगरपालिका–२ बाट ७ लाख ४४ हजार रुपैयाँ बराबरको १८६ क्यूफिट खयरको गोलिया काठ बरामद गरिएको छ ।
बेवारिसे अवस्थामा रहेको उक्त काठ सशस्त्र प्रहरी बल नेपाल बोर्डर आउट पोष्ट बाहुनडाँगीले बरामद गरेको हो ।
त्यसैगरी सर्लाही जिल्लाको विष्णु गाउँपालिका–२ स्थित नदियापकडीबाट चैत्र २७ गते ६८ हजार ३ सय ३० रुपैयाँ बराबरको १३६ क्यूफिट सिमल लगायतको गोलिया काठ बरामद गरिएको छ ।
ज १ त २९४९ नम्बरको ट्याक्टरमा लोड गरी गोडैताबाट फुलपरासीतर्फ लैजाँदै गरेको उक्त काठ सशस्त्र प्रहरी बल नेपाल बोर्डर आउट पोष्ट बलराले नियन्त्रणमा लिएको हो ।
बरामद काठ तथा ट्याक्टर आवश्य कारवाहीको लागि सम्बन्धित निकायमा बुझाईएको छ ।