काठमाडौँ । सुनसरीको बराहक्षेत्र नगरपालिका-६ पटवारीबाट अवैध लागूऔषध गाँजा करिब २२५ किलोग्राम सहित बराहक्षेत्र नगरपालिका-६ बस्ने २० वर्षीय बिशेष माझीसमेत २ जनालाई प्रहरीले पक्राउ गरेको छ ।
इलाका प्रहरी कार्यालय महेन्द्रनगरबाट खटिएको प्रहरीले उनीहरूलाई उक्त परिमाणको गाँजासहित पक्राउ गरेको हो । प्रहरीले उनीहरूले प्रयोग गरेको को.३० प ९४७५ नम्बरको मोटरसाइकल समेत बरामद गरेको छ ।
यस सम्बन्धमा प्रहरीले आवश्यक अनुसन्धान गरिरहेको जनाएको छ ।
काठमाडौँ । सातदोबाटोस्थित अन्तर्राष्ट्रिय खेलकुद परिसर हातामा रहेको आउटडोर पौडी पोखरी सर्वसाधारणका लागि सञ्चालनमा आएको छ ।
बुधबार राष्ट्रिय खेलकुद परिषद् (राखेप) अन्तर्गत प्रसाशन विभागका विभागीय प्रमुख भोजानन्द राईले पूजा गरेपछि पौडी पोखरी सञ्चालनमा आएको हो ।
सो अवसरमा आपूर्ति तथा भण्डार शाखाका प्रमुख देवराज कट्वाल, अन्तर्राष्ट्रिय खेलकुद परिसरका प्रमुख लीलाराम बस्नेतलगायतको उपस्थिति रहेको थियो ।
हरेक दिन पौडी पोखरी १०–१२, १–३ र ४–७ बजेसम्म गरी ३ सिफ्टमा सञ्चालन हुनेछ । पहिलो र दोश्रो सिफ्टका लागि २ सय तथा तेश्रो सिफ्टका लागि २ सय ५० रुपैयाँ शुल्क निर्धारण गरिएको छ । ज्येष्ठ नागरिक र फरक क्षमता भएका लागि विशेष छुटको व्यवस्था गरिएको छ ।
काठमाडौं । सर्वोच्च अदालतले नेपाली कांग्रेस नेता दीपक खड्कालाई थुनामा राख्नुको कारण सोधेको छ ।
बुधबार न्यायाधीश तिलप्रसाद श्रेष्ठ र शान्तिसिंह थापाको संयुक्त इजलासले खड्कालाई थुनामा राख्नुको कारणसहित लिखित जवाफ समेत पेश गर्न भोलीसम्मको समय दिएको हो । सर्वोच्चले खड्कालाई राजश्व अनुसन्धान विभागको अनुरोधमा ललितपुर जिल्ला अदालतले म्याद थप गरेको भन्ने कागज अप्रमाणित देखिएको र अदालतमा महान्यायाधिवक्ताको कार्यालयमार्फत पेश गरिएको उक्त पत्र आधिकारिक पुष्टि नभएकोले सो सम्बन्धी सम्पू्र्ण कागज विहिबार पेश गर्न आदेश दिएको हो ।
राजश्व अनुसन्धान विभागको अनुरोधमा ललितपुर जिल्ला अदालतले थुनामा राख्न म्याद थप गरेको हो भने त्यससम्बन्धी सबै मिसिल म्याद थप गर्दा तयार गरिएको पर्चासहितका कागजात पेश गर्न आदेश दिएको छ ।
खड्काको रिहाइका लागि उनकी पत्नी बिनिता थापाले बन्दीप्रत्यक्षीकरण रिट दायर गरेकी थिइन् ।
काठमाडौं । सरकारले थप चार देशका लागि पुनः श्रम स्वीकृति खुला गरेको छ । वैदेशिक रोजगार विभागले इजरायल, कुवेत, वहराइन र लेवनानको पुनः श्रम स्वीकृति खुलाएको जानकारी दिएको हो ।
मन्त्रालयको फागुन १७ गतेको निर्णय वमोजिम मध्य पूर्व तथा खाडी क्षेत्रमा देखिएको विष परिस्थितिलाई मध्यनजर गर्दै यी देशको श्रम स्वीकृति रोकिएको थियो ।
यस्तै नेपालीको अर्को श्रम गन्तव्य देश इराकको हकमा भने नेपाल सरकार मन्त्रिपरिषदको २०८२ पुस ११ गतेको निर्णय वमोजिम श्रम स्वीकृति प्रदान हुने पनि विभागले जनाएको छ । यसअघि साउदी अरेबिया, युएइ, कतार, ओमान, यम, जोर्डन र टर्कीको पुनः श्रम स्वीकृति सुचारु गरिसकिएको विभागले जनाएको छ ।
काठमाडौँ । नेप्से आज बढेको छ । आज बुधबार नेप्से ३३.२७ अंकले बढेर २८६६.८७ विन्दुमा पुगेर रोकिएको छ ।
आज ३४४ कम्पनिका २ करोड ६४ लाख ३८ हजार ५२१ कित्ता शेयर १० अर्ब ५३ करोड ७० लाख ८ हजार ७९६ मा कारोबार भएको थियो । आज सबै क्षेत्रको शेयर मुल्य घटेको छ ।
आज, रिज लाइन इनर्जी, सुर्यकुण्ड हाइड्रो, होटल फोरेस्ट इन, सिन्धु विकास बैंक र पाल्पा सिमेन्टको शेयरमा सकारात्मक सर्किट लागेको छ । त्यस्तै, सुपर खुदीको शेयर ९.९९ प्रतिशतले बढेको छ । त्यस्तै आज सबैभन्दा बढी रिलायन्स स्पिनिंग मिल्सको शेयर ५.६१ प्रतिशतले घटेको छ ।
त्यस्तै आज सबै भन्दा बढी शिभम सिमेन्टको ५८ करोड ९ लाख बराबर कारोबार भएको छ भने रिनेशनल हाइड्रोको ५७ करोड ११ लाख बराबरको कारोबार भएको छ ।
काठमाडौँ । प्रधानमन्त्री कप (पीएम कप) पुरुष राष्ट्रिय क्रिकेट प्रतियोगिताअन्तर्गत लिग चरणका खेल सकिएका छन् ।
बुधबार सम्पन्न खेलमा त्रिभुवन आर्मी क्लब र मधेश प्रदेसले जित हासिल गरेसँगै यस सिजनको पीएम कपका लिग चरणका खेल सकिएका हुन् ।
आज सम्पन्न खेलमा आर्मीले लुम्बिनी प्रदेशलाई एक विकेटले पराजित गरेको थियो । लुम्बिनीले दिएको १३९ रनको लक्ष्य पछाएको आर्मीले २५.२ ओभरमा ९ विकेट गुमाउदै लक्ष्य पुरा गरेको थियो ।
त्यस्तै अर्को खेलमा मधेश प्रदेशले नेपाल पुलिस क्लबलाई ४ विकेटले पराजित गरेको थियो । पुलिसले दिएको १३१ रनको लक्ष्य पछाएको मधेशले २४.१ ओभरमै ६ विकेट गुमाएर लक्ष्य पुरा गरेको थियो ।
जितसँगै अर्को बर्ष तेस्रो संस्करणको जय ट्रफी खेल्ने ६ टिमको पनि टुंगो लागेको छ । त्रिभुवन आर्मी क्लब, सुदूरपश्चिम, एपीएफ क्लब, मधेश प्रदेश, नेपाल पुलिस क्लब र लुम्बिनी प्रदेश जय ट्रफीका लागि छनौट भएका हुन् । यसअघि प्रधानमन्त्री कपका शीर्ष चार टोलीले जय ट्रफी खेल्दै आएका थिए। नेपाल क्रिकेट संघ (क्यान)ले यस वर्षदेखि शीर्ष ६ टोलीलाई जय ट्रफीमा सहभागिता गराउने निर्णय गरेको हो।
त्यस्तै प्रधानमन्त्री कपका शीर्ष दुई टोली फाइनलमा पुगेका छन् । फाइनल खेल शुक्रबार त्रिभुवन आर्मी क्लब र सुदूरपश्चिम प्रदेशबीच हुने भएको छ ।
काठमाडौँ । जेनजी अभियन्ता रक्षा बमले प्रधानमन्त्री बालेन शाहले संसदमा सम्बोधन नगरेको विषय उठाएकी छन् । संसदको पहिलो अधिवेशनमा प्रधानमन्त्रीको सम्बोधन सुन्न नपाएको उल्लेख गर्दै संसद मार्फत राष्ट्रलाई संबोधन गर्नु प्रधानमन्त्रीको कर्तव्य भएको बताएकी छन् ।
सामाजिक सञ्जालमा लेख्दै रक्षाले प्रधानमन्त्रीले संसदलाई सम्बोधन नगरेर निजी शैलीमा शासन चलाउने सोचेको भए पहिलो खुड्किलाबाटै फर्किन सुझाव दिएकी छन् । उनले भनेकी छन्- ‘यदि तपाईंले आफ्नै निजी शैलीमा शासन चलाउने सोच्नु भएको छ भने, पहिलो खुड्किलाबाटै फर्किनुस् र पछिल्लो आमनिर्वाचनले दिएको यो उत्कृष्ट लोकतान्त्रिक अवसरलाई संकुचित सोच र सीमित शैलीमा प्रयोग गरेर उपलब्धि हासिल गर्न सकिन्छ भन्ने कुरालाई सच्याउनुस् ।’
रक्षाले लोकतान्त्रिक शासन व्यवस्थामा नेताको निजी स्वभाव वा शैलीभन्दा पनि लोकतान्त्रिक मूल्य-मान्यता र अभ्यासले राज्य शासन व्यवस्थालाई र जनतालाई सम्बोधन गरिनु पर्दछ भन्दै जनतालाई आफ्ना समस्याहरूको प्राविधिक समाधान मात्रै होइन, नेतृत्वको मनोवैज्ञानिक साथ पनि चाहिने उल्लेख गरेकी छन् ।
उनले प्रधानमन्त्री बालेन शाहलाई सम्बोधन गर्दै सक्षम र सबल भए पनि अब एक व्यक्तिका हिसाबले सीमित नभएको र पुरानाहरू जस्तै आफूलाई असीमित ठान्ने भूल नदोहोर्याउन चेतावनी समेत दिएकी छन् ।
उनले भनेकी छन्:
सम्माननीय प्रधानमन्त्रीज्यू, संसद्को पहिलो अधिवेशनदेखि आजसम्म हामीले देशका प्रधानमन्त्रीको आवाज सुन्न पाएका छैनौं। चुनाव जितिसकेपछि जनतालाई धन्यवाद दिन पनि तपाईंले बोल्नुपर्थ्यो। यो परिवर्तनलाई स्वीकार्दै जनतालाई सम्बोधन गर्नु तपाईंको जिम्मेवारी थियो। तर तपाईंले संसदमा नबोली अधिवेशन सक्नु भयो।
हामी तपाईंको आवाज सुन्न चाहन्छौं। “कुरा कम, काम बढी” भन्ने धारणा तपाईंको व्यक्तिगत विश्वास होला तर संसद मार्फत राष्ट्रलाई संबोधन गर्नु पनि तपाईको कर्तव्य हो। लोकतान्त्रिक शासन व्यवस्थामा नेताको निजी स्वभाव वा शैलीभन्दा पनि लोकतान्त्रिक मूल्य–मान्यता र अभ्यासले राज्य शासन व्यवस्थालाई र जनतालाई सम्बोधन गरिनु पर्दछ।जनतालाई आफ्ना समस्याहरूको प्राविधिक समाधान मात्रै होइन, नेतृत्वको मनोवैज्ञानिक साथ पनि चाहिने गर्दछ।
यदि तपाईंले आफ्नै निजी शैलीमा शासन चलाउने सोच्नु भएको छ भने, पहिलो खुड्किलाबाटै फर्किनुस् र पछिल्लो आमनिर्वाचनले दिएको यो उत्कृष्ट लोकतान्त्रिक अवसरलाई संकुचित सोच र सीमित शैलीमा प्रयोग गरेर उपलब्धि हासिल गर्न सकिन्छ भन्ने कुरालाई सच्याउनुस्।
काठमाडौँ । अण्डमान सागरमा एउटा डुङ्गा डुब्दा करिब २५० रोहिंग्या र बंगलादेशी नागरिक बेपत्ता भएका छन् ।
संयुक्त राष्ट्रसंघको शरणार्थी तथा आप्रवासन निकायका अनुसार गत साता खराब मौसम र अत्यधिक यात्रु चढाइएका कारण दुर्घटना भएको हो । उक्त डुङ्गा बंगलादेशबाट मलेसियातर्फ जाँदै थियो । बंगलादेश तटरक्षकले अप्रिल ९ मा आफ्नै जहाजमार्फत ९ जनालाई उद्धार गरेको जनाएको छ । तर बाँकी यात्रुहरूको अवस्था अझै अज्ञात रहेको छ ।
सन् २०१७ मा म्यानमारमा भएको हिंसापछि ठूलो संख्यामा रोहिंग्या समुदाय बंगलादेशमा शरण लिन बाध्य भएका थिए । म्यानमार सरकारले उनीहरूलाई नागरिकता दिएको छैन । उता बंगलादेशका शरणार्थी शिविरमा कमजोर अवस्थाका कारण धेरैजसो रोहिंग्या राम्रो जीवनको खोजीमा मलेसिया लगायत देशतर्फ जोखिमपूर्ण समुद्री यात्रा गर्ने गरेका छन् ।
उद्धार गरिएका रफिकुल इस्लामले आफू करिब ३६ घण्टा समुद्रमा पौडिएर बाँचेको बताएका छन् । उनले डुङ्गाबाट बगेको तेलका कारण शरीर जलेको पनि बताएका छन् । उनले मलेसियामा काम पाउने आशामा यो यात्रा सुरु गरेको बताएका छन् ।
काठमाडौँ । नेपाली काँग्रेसले पूर्व कार्यवाहक सभापति पूर्णबहादुर खड्कालाई स्पष्टीकरण सोधेको छ ।
बुधबार बसेको केन्द्रीय अनुशासन समितिको बैठकले कार्यवाहक सभापतिको हैसियतमा विज्ञप्ति निकालेका खड्कालाई सात दिने भित्र जवाफ दिन स्पष्टीकरण सोधेको हो ।
समितिका सभापति तारामान गुरुङका अनुसार कार्यवाहक सभापतिको हैसियतमा प्रेस विज्ञप्ति जारी गर्नु विधान विपरीत भएको भन्दै अनुसशासन समितिले सातदिने स्पष्टीकरण सोधेको छ ।
काँग्रेसका पूर्व कार्यवाहक सभापति पूर्ण बहादुर खड्काले सोमबार पुन: कार्यवाहक सभापतिको हैसियतमा पार्टीले क्रियाशील सदस्यता अध्यावधिक गर्ने निर्णय गरेको विरोधमा विज्ञप्ति जारी गरेका थिए । यसअघि खड्काले कार्यवाहक सभापतिको हैसियतमा विज्ञप्ति निकाले पछि अनुशासन समितिले सचेत गराएको थियो ।
काठमाडौँ । इरानले हालैको युद्धमा करिब २७० अर्ब डलर बराबरको क्षतिको दाबी गर्दै क्षतिपूर्ति माग गरेको छ ।
संयुक्त राष्ट्रसंघमा इरानका प्रतिनिधिले आक्रमणमा क्षेत्रीय देशहरूको समेत भूमिका रहेको आरोप लगाउँदै उनीहरूले पनि यसको मूल्य तिर्नुपर्ने बताएका छन् ।
इरान सरकारकी प्रवक्ता फातमेह मोहाजेरानीका अनुसार फागुन २८ देखि सुरु भएको युद्धपछि देशलाई प्रत्यक्ष र अप्रत्यक्ष रूपमा करिब २७० अर्ब डलरको क्षति पुगेको छ। उनले एक अन्तर्वार्तामा यस्तो जानकारी दिएकी हुन् ।
संयुक्त राष्ट्रसंघस्थित इरानी दूतले पाँच वटा क्षेत्रीय देशको भूमिबाट इरानमाथि आक्रमण भएको आरोप लगाएका छन् । त्यसैले ती देशहरूले पनि क्षतिपूर्ति दिनुपर्ने उनको भनाइ छ । यसैबीच इरानले क्षतिपूर्ति उठाउन होर्मुज जलडमरूमध्यबाट आवतजावत गर्ने जहाजमा कर लगाउने प्रस्तावसमेत अघि सारेको छ ।
उता अमेरिकासँग सम्भावित वार्ताको तयारी पनि भइरहेको जनाइएको छ । तर क्षेत्रीय देशहरूको मध्यस्थताबीच पनि इरान आफ्नो अडानमा कडा देखिएको छ ।