काठमाडौँ । नेपाली कांग्रेसको संसदीय दलको नेता चयनको लागि वैशाख ११ गते निर्वाचन हुने भएको छ ।

निर्वाचन समितिले संसदीय दलको कार्यालय, सिंहदरबारमा ११ वैशाख दिउँसो ४ देखि ५ बजेसम्म मतदान हुने सूचना प्रकाशित गरेको छ ।

समितिले संसदीय दलको विधान अनुसार निर्वाचन कार्यतालिका सार्बजनिक गरेको जानकारी दिएको छ ।

जस अनुसार, १० गते दिउँसो १ बजे मतदाता नामावली प्रकाशन गरिने, अन्तिम नामावली भने ११ गते दिउँसो साढे ३ बजे गरिने, बैशाख ११ गते बिहान ११ बजेदेखि १२ बजेसम्म उम्मेदवारी दर्ता र ११ गते दिउसो ४ बजेदेखि ५ बजेसम्म मतदान हुने कार्य तालिका सार्बजनिक गरिएको छ ।

मतदान सिंहदरबारस्थित कांग्रेस संसदीयदलको कार्यालयमा हुने जानकारी निर्वाचन समितिले दिएको छ  ।

Read More

काठमाडौँ । जापानमा शक्तिशाली भूकम्प गएपछि सुनामीको चेतावनी जारी गरिएको छ । अधिकारीहरूले प्रभावित क्षेत्रका बासिन्दालाई सतर्क रहन र सुरक्षित स्थानमा सर्न आग्रह गरेका छन् ।

जापानी सञ्चारमाध्यमका अनुसार ७.४ तीव्रताको भूकम्प सानरिकु तट नजिक समुद्रभित्र करिब १० किलोमिटर गहिराइमा गएको हो । भूकम्पको तीव्रता जापानी मापन प्रणालीमा ५ प्लस स्तरमा मापन गरिएको छ ।

भूकम्पपछि प्रधानमन्त्री सनाए ताकाइचीले प्रभावित क्षेत्रका नागरिकलाई उच्च स्थानतर्फ जान अपिल गरेकी छन् । सरकारले सुनामीको जोखिम रहेका क्षेत्रहरूको सूचीसमेत सार्वजनिक गरेको छ ।

Read More

काठमाडौँ । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले गृहमन्त्री सुधन गुरुङ बारे सरकारले आफ्नो धारणा तत्काल सार्वजनिक गर्नुपर्ने माग गरे ।

सोमबार सांसदहरूसँगको बधाई तथा शुभकामना आदान–प्रदान कार्यक्रममा बोल्दै अध्यक्ष लिङदेनले  सम्पत्ति शुद्धीकरण मुद्दामा पक्राउ परेका विवादास्पद व्यवसायी दीपक भट्टसम्बद्ध कम्पनीमा गृहमन्त्री गुरुङको साझेदारी भेटिएको बारे सरकारले आफ्नो धारणा तत्काल सार्बजनिक गर्न माग गरेका हुन् ।

उनले भने- ‘अहिले प्रारम्भमा नै जुन किसिमका समाचारहरु बाहिर आइरहेका छन् । त्यसको बारेमा सरकारले तत्काल आफ्नो धारणा प्रष्ट पार्नुपर्छ । गृहमन्त्रीले आफ्नो पोशिजन क्लियर गर्नुपर्छ । पार्टी सभापतिले गृहमन्त्रीको बारेमा आफ्नो पोजिशन क्लियर गर्नुपर्छ ।’

Read More

काठमाडौँ । अख्तियार दुरुपयोग अनुसन्धान आयोगले घुस मुद्दामा बयान फेरेको आरोपमा एक निर्माण व्यवसायीविरुद्ध विशेष अदालतमा आरोपपत्र दायर गरेको छ ।

आयोगका अनुसार काभ्रेको बनेपा नगरपालिका–३ का हिमाल तराई कन्सट्रक्सनका सञ्चालक राजमान तामाङले यसअघि अनुसन्धानका क्रममा दिएको बयानविपरीत अदालतमा बकपत्र गरेका थिए । सोही आधारमा उनीविरुद्ध मुद्दा दायर गरिएको हो ।

यसअघि नेपाल सरकारविरुद्ध चन्द्रबहादुर अधिकारीसमेत संलग्न घुस प्रकरणमा तामाङलाई सरकारी साक्षीका रूपमा पेश गरिएको थियो । अनुसन्धानमा सहयोग गरेकाले उनलाई सजाय छुट दिइएको थियो । तर, विशेष अदालतमा उनले दिएको बयान अनुसन्धानका तथ्यसँग मेल नखाने देखिएको आयोगले जनाएको छ ।

अनुसन्धानबाट नेपाल बैंकसँग सम्बन्धित ऋण मिलाइदिने नाममा पाँच लाख रुपैयाँ घुस लेनदेन भएको तथ्य खुलेको आयोगको दाबी छ । उक्त रकमसम्बन्धी चेक पनि बरामद भएको उल्लेख गरिएको छ ।

आयोगले तामाङले गैरकानुनी लाभ लिन सहयोग गरेको ठहर गर्दै भ्रष्टाचार निवारण ऐनअनुसारकारबाहीको माग गरेको छ । पाँच लाख रुपैयाँ बिगो कायम गरी कैद, जरिवाना र घुस रकम जफतको मागसहित विशेष अदालतमा मुद्दा दायर गरिएको जनाइएको छ ।

Read More

काठमाडौँ । नेप्से आज गिरावट आएको छ । आज सोमबार नेप्से १३.१७ अंकले घटेर २८२५.२३ विन्दुमा पुगेर रोकिएको छ ।

आज ३४९ कम्पनिका एक करोड १६ लाख ५३ हजार ३७० कित्ता शेयर ५ अर्ब ४३ करोड ४२ लाख ४०  हजार २७६ मा कारोबार भएको थियो । आज होटल्स क्षेत्र बाहेक सबै क्षेत्रको शेयर मुल्य घटेको छ ।

आज, सुर्यकुण्ड हाइड्रो र होटल फरेस्ट इनको शेयरमा १५ प्रतिशत बढेर सकारात्मक सर्किट लागेको छ । त्यस्तै, पाल्पा सेन्ट र शिखर पावरको को शेयर १४.९९ प्रतिशतले बढेको छ ।  त्यस्तै आज सबैभन्दा बढी डोल्टी पावरको शेयर ५.३५ प्रतिशतले घटेको छ ।

त्यस्तै आज सबै भन्दा बढी होटल फरेष्ट इन्को ३६ करोड एक लाख बराबर कारोबार भएको छ भने सोलु हाइड्रोको २९ करोड ८१ लाख बराबरको कारोबार भएको छ ।

Read More

काठमाडौँ । भारत र रुसबीच भएको सैन्य सहयोगसम्बन्धी ‘रेसिप्रोकल एक्सचेन्ज अफ लजिस्टिक सपोर्ट’ सम्झौता कार्यान्वयनमा आएको छ । यसअन्तर्गत दुवै देशले एक–अर्काको भूमिमा तीन हजारसम्म सैनिक तैनाथ गर्न सक्ने भएका छन् ।

सम्झौताअनुसार पाँचवटा युद्धपोत र दशवटा सैन्य विमानसम्म तैनाथ गर्न अनुमति दिइएको छ । साथै, दुवै देशका सेनाले एक–अर्काका सैन्य आधार, हवाई आधार र बन्दरगाह प्रयोग गर्न सक्नेछन्, जसले दीर्घकालीन तैनाथी र सञ्चालन सहज बनाउने अपेक्षा गरिएको छ ।

यस सम्झौतामा इन्धन, पानी, मर्मत, प्राविधिक स्रोतसाधन लगायत आवश्यक सामग्री उपलब्ध गराउने व्यवस्था पनि समावेश गरिएको छ । विमानका लागि हवाई यातायात नियन्त्रण तथा उडानसम्बन्धी सेवासमेत प्रदान गरिनेछ ।

सम्झौता सन् २०२५ फेब्रुअरीमा हस्ताक्षर भएको थियो भने सोही वर्ष डिसेम्बरमा रुसले अनुमोदन गरेको थियो । यो पाँच वर्षका लागि लागू हुनेछ र आपसी सहमतिमा अवधि थप गर्न सकिनेछ ।

यद्यपि, यो सम्झौता युद्धका लागि नभई शान्तिकालमा तालिम, संयुक्त अभ्यास र लजिस्टिक सहयोगका लागि मात्र प्रयोग हुने जनाइएको छ ।

यसलाई भारत–रुसबीचको रणनीतिक साझेदारी सुदृढ गर्ने महत्वपूर्ण कदमका रूपमा हेरिएको छ ।

Read More

काठमाडौं । पछिल्लो समय चलचित्र ‘बोक्सीको घर’ मार्फत बक्स अफिसमा ऐतिहासिक सफलता हात पारेकी अभिनेत्री तथा निर्मात्री केकी अधिकारीले आफ्नो नयाँ चलचित्र ‘स्टेशन’को निर्माण कार्य औपचारिक रुपमा सुरु गरेकी छिन् ।

सोमबार अक्षय तृतीयाको अवसर पारेर ललितपुरस्थित बंगलामुखी मन्दिर परिसरमा चलचित्रको शुभमुहूर्त गरिएको हो । मुहूर्त कार्यक्रममा चलचित्रका निर्देशक, निर्माता तथा प्राविधिक टोलीको उपस्थिति रहेको थियो ।

अभिनेत्री केकी अधिकारीले नयाँ वर्षको अवसर पारेर यो चलचित्र निर्माणको घोषणा गरेकी थिइन् । निर्माण घोषणासँगै सार्वजनिक गरिएको ‘थिम पोस्टर’ले चलचित्रको विषयवस्तुप्रति दर्शकमाझ कौतुहलता जगाएको छ । पोस्टरमा एउटा पुरानो काठको दराज र त्यहाँभित्र केही रहस्यमय सामग्रीहरू देखिन्छन् । यसले चलचित्र सोसल ड्रामामा आधारित रहने संकेत गरेको छ ।

२०८१ सालको सफल चलचित्र ‘बोक्सीको घर’ पछि केकीले सोही टिमसँगको सहकार्यलाई ‘स्टेशन’मा पनि निरन्तरता दिएकी छिन् । केकी अधिकारी फिल्मसको ब्यानरमा निर्माण हुने यस चलचित्रलाई सुलक्षण भारतीले निर्देशन गर्नेछन् । चलचित्रको कथा पनि स्वयं भारतीकै रहेको छ । चलचित्रका निर्माता बद्री अधिकारी हुन् ।

चलचित्रको मुहूर्त गरिए पनि निर्माण पक्षले यसमा अभिनय गर्ने कलाकारहरूको बारेमा भने अझैसम्म केही खुलाएको छैन । ‘स्टेशन’मा कुन-कुन कलाकारले मुख्य भूमिका निर्वाह गर्नेछन् भन्ने कुरालाई गोप्य राख्दै निर्माण टिमले दर्शकमाझ कौतुहलता कायम राखेको छ ।

केकी आफैं चलचित्रमा देखिनेछिन् वा निर्मात्रीको रुपमा मात्र रहनेछिन् भन्ने विषय पनि अझै प्रस्ट भइसकेको छैन । तेस्रो सातादेखि छायाकंन सुरु गरिने तयारीमा रहेको यो चलचित्र आगामी भदौ १९ गते देशभरका सिनेमाघरमा रिलिज हुने निर्माण पक्षले जानकारी दिएको छ ।

‘बोक्सीको घर’ जस्तो सामाजिक र गम्भीर विषयवस्तुलाई दर्शकले रुचाएका कारण केकीको यो नयाँ प्रोजेक्ट ‘स्टेशन’लाई पनि निकै प्रतिक्षित चलचित्रको रुपमा हेरिएको छ ।

Read More

काठमाडौं । अध्यागमन विभागले युएई जाने नेपाली नागरिकलाई शर्त तोकेर प्रस्थान अनुमति दिने दुई कर्मचारीलाई जिम्मेवारीबाट हटाएको छ ।

यूएई जान लागेका नेपाली नागरिकको राहदानीमा केरमेट गर्ने  दुई जना अध्यागमन अधिकृतहरुलाई अध्यागमन कार्यालय, त्रिभुवन अन्तराष्ट्रिय विमानस्थलको जिम्मेवारीबाट हटाइएको प्रवक्ता टीकाराम ढकालले जानकारी दिएका छन् । उनीहरुमाथि आवश्यक छानबिन भइरहेको विभागले जनाएको छ ।

विभागले भनेको छ- ‘अरब ईमिरेट्स प्रस्थान गर्न लागेका कुनै नेपाली नागरिकको राहदानीमा प्रस्थान छापसँगै ‘Employment is strictly prohibited. Visit till १० / ६ / २०२६’ लेखेको विषयमा मिति २०८२। १। ३ को निर्णयबाट छानविन समिति गठन गरिएको व्यहोरा अवगत नै छ।’ जारी विज्ञप्तिमा भनिएको छ, ‘नेपाली नागरिकलाई शर्त तोकेर प्रस्थान अनुमति दिने अध्यागमन प्रशासनको कुनै नीति वा निर्णय नभएको हुँदा प्रचलित कानुन र विभागीय निर्णय बाहिर गई गैरकानूनी अभ्यास गर्ने दुई जना अध्यागमन अधिकृतहरुलाई अध्यागमन कार्यालय, त्रिभुवन अन्तराष्ट्रिय विमानस्थलको जिम्मेवारीबाट हटाइ सो सम्बन्धमा आवश्यक छानबिन भइरहेको व्यहोरा अनुरोध गरिन्छ।’

अनावश्यक कागजात माग गर्ने र तजबिजीको आधारमा निर्णय गरी हुने गरेको अनियमिततालाई नियन्त्रण गर्न सरकारले भिजिट भिसामा नेपालबाट प्रस्थान गर्ने नेपाली नागरिकहरूको सरलीकृत र व्यवस्थित मापदण्ड बनाइएको विज्ञप्तिमा उल्लेख छ ।

यस अगाडि विज्ञप्तिमा भनिएको थियो, ‘कुनै पनि नेपाली नागरिकलाई कानुनभन्दा बाहिर गई शर्त तोकेर प्रस्थान अनुमति दिने अध्यागमन प्रशासनको कुनै नीति वा निर्णय नभएको हुँदा प्रचलित कानुन र विभागीय निर्णय बाहिर गई गैरकानूनी अभ्यास गर्ने कर्मचारीलाई कारबाहीको लागि आन्तरिक छानबिनको प्रक्रिया अगाडि बढाइएको व्यहोरा जानकारीका लागि अनुरोध गरिन्छ ।’

Read More

काठमाडौं । मानव बेचबिखन तथा ओसारपसारमा संलग्न रहेको अभियोगमा ४ जनालाई प्रहरीले पक्राउ गरेको छ ।

पक्राउ पर्नेहरूमा पोखरा महानगरपालिका-२६ बुढीबजार बस्ने ५० वर्षीय विष्णु बहादुर राजभाट, पोखरा महानगरपालिका-९ नयाँबजार बस्ने भारत घर भएका ३१ वर्षीय अमिर उल्ला मिया, पोखरा महानगरपालिका-१७ बस्ने मोरङ घर भएकी २१ वर्षीया महिला र पोखरा महानगरपालिका- ८ बस्ने सिन्धुली घर भएकी ३१ वर्षीया महिला रहेका छन् । 

पोखरा महानगरपालिका-८ जाल्पारोडस्थित विभिन्न खाजाघरहरूमा अनैतिक गतिविधि भइरहेको भन्ने सूचनाको आधारमा जिल्ला प्रहरी कार्यालय कास्कीबाट खटिएको प्रहरीले उक्त कार्यमा संलग्न उनीहरूलाई पक्राउ गरेको हो । प्रारम्भिक अनुसन्धानको क्रममा पीडितहरूलाई विभिन्न प्रलोभन देखाई खानबस्न सुविधा सहित राम्रो तलबमा होटलको काममा लगाई दिन्छु भनी अनैतिक कार्य गर्न लगाउने गरेको खुल्न आएको छ । 

उनीहरू उपर जिल्ला अदालत कास्कीबाट मानव बेचबिखन तथा ओसारपसार सम्बन्धी कसूरमा ५ दिन म्याद थप अनुमति लिई यस सम्बन्धमा प्रहरीले आवश्यक अनुसन्धान गरिरहेको छ ।

Read More

काठमाडौँ । गृहमन्त्री सुदन गुरुङले आफूमाथि उठिरहेका विभिन्न आरोपप्रति प्रतिक्रिया दिँदै सत्यतथ्य बाहिर ल्याउन अनुसन्धानमा पूर्ण साथ दिने बताएका छन्। सामाजिक सञ्जालमार्फत सार्वजनिक धारणा राख्दै उनले पार्टीको निर्णयलाई सम्मान गर्दै आवश्यक सहयोग गर्न तयार रहेको स्पष्ट पारे।

पछिल्ला दिनहरूमा आफ्नो नाम जोडेर विभिन्न चर्चा र आरोपहरू फैलिएको उल्लेख गर्दै उनले तथ्य र हल्लाबीच छुट्याउन आग्रह गरेका छन्। विशेषगरी २५ लाख रुपैयाँ बराबरको सेयर लुकाएको भन्ने आरोपलाई उनले निराधार भन्दै खारेज गरेका छन्। उनका अनुसार आफ्ना सबै लगानीहरू सम्पत्ति विवरणमै उल्लेख गरिएका छन्।

गुरुङले धितोपत्र बजारमा सूचीकृत कम्पनीहरूमा दुई करोड रुपैयाँभन्दा बढी लगानी खुलाइसकेको जानकारी दिए। स्टार माइक्रो र लिबर्टी माइक्रोमा रहेको लगानी पनि सोही दायराभित्र पर्ने बताउँदै उनले यो ‘लुकाउने’ नभई ‘वर्गीकरण’ को विषय भएको स्पष्ट पारे।

उनले मन्त्री बन्नुअघि सेयर खरिद गर्नु गैरकानुनी नभएको जिकिर गर्दै सबै आर्थिक कारोबार बैंकिङ प्रणालीमार्फत गरिएको बताए। लगानीका लागि लिइएको कर्जा सम्बन्धी सम्पूर्ण कागजात र बैंक रेकर्ड उपलब्ध रहेको उनको भनाइ छ।

विवादित व्यक्तिसँग साझेदारी गरेको आरोपबारे उनले एउटै कम्पनीमा धेरै सेयरधनी हुने भएकाले सेयर खरिद गर्नु सबैसँग साझेदारी गर्नु जस्तो नहुने बताए। यस्तो आरोप आधारहीन भएको उनको दाबी छ।

‘स्वार्थको द्वन्द्व’ सम्बन्धी विषयमा भने सम्बन्धित निकायबाट छानबिन भइरहेको र त्यसमा आफूले कुनै हस्तक्षेप नगरेको उनले प्रष्ट्याए।

गुरुङले लगानीमा जोखिम स्वाभाविक हुने उल्लेख गर्दै पछिका घटनालाई आधार बनाएर अघिका निर्णयलाई दोष दिनु उपयुक्त नहुने बताए। कानुनी रूपमा संवेदनशील विषय भएकाले हतारमा प्रतिक्रिया दिन नहुनेमा पनि उनले जोड दिएका छन्।

अन्त्यमा उनले आरोप र सत्य फरक कुरा भएको भन्दै कुनै पनि निर्णय प्रमाणका आधारमा हुनुपर्ने धारणा राखे। साथै, अनुसन्धान प्रक्रियामा पूर्ण सहयोग गर्ने आफ्नो प्रतिबद्धता दोहोर्‍याए।

Read More