काठमाडौँ । १५ वर्षीया बालिकालाई जबरजस्ती करणी गरेको अभियोगमा ताप्लेजुङ सिरिजङ्घा गाउँपालिका-७ बस्ने ३० वर्षीय मुक्ति भट्टराईलाई प्रहरीले पक्राउ गरेको छ ।
मुक्तिले ती बालिकालाई जबरजस्ती करणी गरेको भन्ने उजुरीको आधारमा इलाका प्रहरी कार्यालय झिलझिलेबाट खटिएको प्रहरीले उनलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ ।
काठमाडौं । नेपाल मेडिकल काउन्सिलले नेपाली नागरिकता त्यागेका १७ डाक्टरको लाइसेन्स खारेज गरेको छ ।
शुक्रबार काउन्सिलले नेपाली नागरिकता त्यागी विदेशी नागरिकता लिएका १७ जना डाक्टरको नाम नेपाल मेडिकल काउन्सिलको दर्ता कितावबाट खारेज गरेको जानकारी गराएको छ ।
काउन्सिलले नेपाल मेडिकल काउन्सिल ऐन २०२०, नियमावली २४, नेपाल नागरिकता ऐन २०६३, नेपाल मेडिकल काउन्सिलको निर्णयअनुसार उनीहरुको नाम खारेज गरिएको बताएको छ ।
यसरी नाम खारेज हुनेहरुमा हङकङ नागरिक डा. शर्मिला गुरुङ, अस्ट्रेलियन नागरिक डा. रोशन भुषाल, ब्रिटिस नागरिक डा. मोती गुरुङ, अस्ट्रेलियन नागरिक डा. देवराज रेग्मी, ब्रिटिस नागरिक डा. मेरिना गुरुङ, अमेरिकी नागरिक डा. निरन्जनदेव पाण्डे, ब्रिटिस नागरिक डा. रोजन केसी, ब्रिटिस नागरिक डा. ममता गुरुङ, पोर्चुगाली नागरिक डा. राजीव हमाल, ब्रिटिस नागरिक डा. सलुजासिंह थारु, अमेकिी नागरिक डा. सुजना केसी, ब्रिटिस नागरिक डा. जोस्ना शाही, अमेरिकी नागरिक डा. मनिपा हमाल, क्यानेडियन नागरिक डा. सुप्रिया शाक्य, क्यानेडियन नागरिक डा. इच्छा न्यौपाने, अमेरिकी नागरिक डा. दिपेन ढकाल र भारतीय नागरिक डा. तुपार सरवजना रहेका छन् ।
काठमाडौँ । निजी क्षेत्रका तीन प्रमुख संस्था नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्शले पछिल्ला घटनाक्रमप्रति गम्भीर ध्यानाकर्षण भएको बताएका छन्।
व्यवसायी शेखर गोल्छा पक्राउ परेपछि तीन संस्थाले संयुक्त रूपमा प्रतिक्रिया जनाउँदै उद्यमी व्यवसायीमाथि भइरहेको धरपकड र थुनछेकले निजी क्षेत्र निरुत्साहित भएको बताएका हुन्।
संस्थाहरूले नयाँ सरकार गठनपछि मुलुकमा स्थिरता कायम भई लगानीको वातावरण बन्ने अपेक्षा गरिएका बेला यस्ता घटनाले निजी क्षेत्र त्रसित बनेको उल्लेख गरेका छन्। अर्थतन्त्रमा ८१ प्रतिशत र रोजगारीमा ८६ प्रतिशत योगदान पुर्याइरहेको निजी क्षेत्र असुरक्षित महसुस गर्न थालेमा त्यसको असर अर्थतन्त्र, रोजगारी, राजस्व संकलन तथा पूर्वाधार निर्माणमा समेत गम्भीर रूपमा पर्ने चेतावनी दिएका छन्।
उनीहरूले आर्थिक कसुरसम्बन्धी मुद्दामा नियामकीय निकायको प्रतिवेदनका आधारमा मात्रै पक्राउ नगरी पहिले सुनुवाइ गर्ने र कसुर प्रमाणित भएपछि मात्रै कारबाहीको प्रक्रिया अघि बढाउन सरकारसँग आग्रह गरेका छन्।
उद्यमी व्यवसायीहरूले अनुसन्धानमा पूर्ण सहयोग गर्ने र प्रहरीले बोलाएको समयमा उपस्थित हुने जानकारी गराउँदा गराउँदै पनि पक्राउ गरिनुले समग्र निजी क्षेत्र चिन्तित र दुःखी बनेको उनीहरूको भनाइ छ।
संस्थाहरूले व्यक्तिमात्र नभई लाखौं रोजगारी, आपूर्ति श्रृंखला, बैंकिङ क्षेत्र र समग्र आर्थिक प्रणालीमा यसले गम्भीर धक्का पुग्न सक्ने बताएका छन्।
निजी क्षेत्रको सुरक्षा र प्रवर्द्धनका लागि सरकारले नीति तथा कानुन निर्माणमा निजी क्षेत्रलाई सहभागी गराउन थालेको र निजी क्षेत्र संरक्षण तथा प्रवर्द्धन रणनीति मन्त्रिपरिषदबाट पारित भइसकेको अवस्थामा भइरहेको धरपकडले थप शंका उत्पन्न गरेको पनि उनीहरूले बताएका छन्।
कसुर प्रमाणित भए दोषीलाई कारबाही हुनुपर्नेमा निजी क्षेत्रको कुनै विमति नरहेको स्पष्ट पार्दै संविधानले दिएको सम्मानपूर्वक बाँच्न पाउने अधिकार र कसुर प्रमाणित नभएसम्म कसुरदार नमानिने व्यवस्थाको सम्मान गर्न सरकारसँग आग्रह गरिएको छ।
विगत चार वर्षदेखि शिथिल बनेको अर्थतन्त्र नयाँ सरकारको व्यवसायमैत्री नीति र व्यवहारबाट पुनः गतिशील बन्ने अपेक्षा गरिएको भए पनि यस्ता गतिविधिले लगानी वृद्धि र लगानीकर्ताको विश्वासमा असर नपरोस् भन्ने निजी क्षेत्रको चाहना रहेको संयुक्त वक्तव्यमा उल्लेख छ ।
काठमाडौँ । इरानका सर्वोच्च नेता मोजतबा खामेनी पत्रहरू मार्फत इरानी शासनसँग सम्पर्कमा रहेको एक रिपोर्टमा दाबी गरिएको छ । इरानका नयाँ सर्वोच्च नेता आयतोल्ला मोजतबा खामेनी सर्वोच्च नेता बनेदेखि सार्वजनिक रूपमा देखा परेका छैनन् । रिपोर्टमा दाबी गरिएको छ कि मोज्तबा खामेनी आफ्नो पहिलो सार्वजनिक सम्बोधनमा कमजोर र असुरक्षित देखिन चाहँदैनन् ।
इरानी अधिकारीहरूलाई उद्धृत गर्दै द न्यूयोर्क टाइम्सले प्रकशित गरेको रिपोर्टमा, सुरक्षा कारणहरूले गर्दा र अमेरिकी र इजरायली निगरानीबाट बच्न, मोज्तबा खामेनीलाई सन्देशहरू पुर्याउने विधि अत्यन्त गोप्य राखिएको उल्लेख छ । सन्देशहरू हस्तलिखित, खाममा बन्द गरिन्छन्, र त्यसपछि विश्वसनीय कुरियरहरूको श्रृंखलाबाट पारित गरिन्छ । यी कुरियरहरूले सन्देशहरू आफ्नो गन्तव्यमा पुर्याउन मुख्य सडकहरू र भित्री मार्गहरूमा कार र मोटरसाइकलबाट यात्रा गर्छन् । मोजतबा खामेनीले इलेक्ट्रोनिक उपकरणहरू प्रयोग गर्दैनन्।
न्यूयोर्क टाइम्सको रिपोर्टका अनुसार, आफ्नो बुबाको मृत्युपछि सत्ता सम्हालेका मोज्तबा खामेनी गम्भीर घाइते छन् र हाल लुकेर बसिरहेका छन् । प्रतिवेदनमा इरानका सर्वोच्च नेता मोजतबा खामेनी होशमा रहेको तर सार्वजनिक रूपमा देखा नपरेको र उनको भूमिका बिस्तारै घट्दै गएको पनि उल्लेख छ ।
प्रतिवेदनमा उनी पूर्ण रूपमा मानसिक रूपमा सक्रिय रहेको तर उनको शारीरिक चोटपटक गम्भीर रहेको उल्लेख छ। उनको एउटा खुट्टामा तीनवटा शल्यक्रिया भइसकेको छ र अब कृत्रिम अंगको आवश्यकता समेत रहेको रिपोर्टमा दाबि गरिएको छ । उनको एउटा हातको पनि शल्यक्रिया गरिएको छ र बिस्तारै निको हुँदैछ । उनको अनुहार र ओठ गम्भीर रूपमा जलेको छ, जसले गर्दा बोल्न गाह्रो भइरहेको छ र भविष्यमा उनलाई प्लास्टिक सर्जरीको आवश्यकता पर्न सक्ने समेत दाबी गरिएको छ ।
मोजतबा खामेनीको बारेमा यो जानकारी यस्तो समयमा आएको हो जब इरानको राजनीतिक र सैन्य नेतृत्व भित्र एकताको अभाव रहेको दाबी गरिँदैछ। अमेरिकी राष्ट्रपति डोनाल्ड ट्रम्पले पनि इरानको राजनीतिक र सैन्य नेतृत्व बीच आन्तरिक कलह रहेको दाबी गरे । यद्यपि, इरानले यी दाबीहरूलाई पूर्ण रूपमा अस्वीकार गरेको छ । इरानी राष्ट्रपतिले भनेका छन्- ‘इरानमा कुनै पनि कट्टरपन्थी वा उदारवादी छैनन्। हामी सबै इरानी र क्रान्तिकारी हौं। देशमा एकता छ। हामी आक्रमणकारीहरूलाई पछुताउनेछौं। एक भगवान, एक देश, एक नेता, र एक मार्ग… इरानको विजय हाम्रो लागि हाम्रो जीवन भन्दा बढी महत्त्वपूर्ण छ ।’
काठमाडौँ । नेकपा एमालेका सचिव महेश बस्नेतले सिन्धुलीको खुर्कोटमा प्रहरी हिरासतमा शंकास्पद रुपमा श्रीकृष्ण विकको मृत्यु राज्यको जिम्मेवारीमाथि उठेको गम्भीर प्रश्न भएको बताएका छन् ।
सामाजिक सञ्जालमा लेख्दै नेता बस्नेतले एकातिर दलित समुदायसँग क्षमायाचना अर्कोतिर अन्तरजातीय विवाहको उजुरीकै आडमा हिरासतभित्रै दलित युवकको मृत्युले दोहोरो चरित्र देखाएको भन्दै उनले सरकारको कडा आलोचना गरेका छन् ।
उनले भनेका छन्- ‘सिन्धुलीको खुर्कोट प्रहरी हिरासतमा २२ वर्षीय कृष्ण विकको शंकास्पद मृत्यु राज्यको जिम्मेवारीमाथि उठेको गम्भीर प्रश्न हो । एकातिर दलित समुदायसँग क्षमायाचना, अर्कोतिर अन्तरजातीय विवाहको उजुरीकै आडमा हिरासतभित्रै दलित युवकको मृत्यु! दोहोरो चरित्र होइन। न्याय देऊ सरकार।’
सदनमा माफी माग्ने रवि लामिछानेहरूको स्टण्डबाजी आज लाजको पसारो बनेको भन्दै नेता बस्नेतले हिजो सन्तोष परियारजस्ता बौद्धिक व्यक्तिलाई रुवाउँदै पार्टी छोड्न बाध्य पारेको तर आज यस्ता घटनामा जिम्मेवारीबाट पन्छिन खोजिएको बताए ।
नेता बस्नेतले पिडितलाई वास्तविक न्याय चाहिने भन्दै नौटंकी बन्द गर्न सरकारलाई आग्रह गरेका छन् ।
उनले भनेका छन्- ‘सदनमा माफी माग्ने रबि लामिछानेहरूको स्टण्डबाजी आज लाजको पसारो बनेका छन् । हिजो सन्तोष परियारजस्ता बौद्धिक व्यक्तिलाई रुवाउँदै पार्टी छोड्न बाध्य पारियो, तर आज यस्ता घटनामा जिम्मेवारीबाट पन्छिन खोजिँदैछ । यत्रो मन्त्रिपरिषद् गठन हुँदा समेत एक जना दलित मन्त्रीसमेत नबनाइनु यो पनि एउटा कटु यथार्थ हो। धामी पनि आफैँ, झाँक्री पनि आफैँ बन्ने होइन, गोहीको आँसु होइन। पीडितलाई वास्तविक न्याय चाहिन्छ। नौटंकी बन्द गर सरकार।’
काठमाडौँ । लेबनान र इजरायलबीच जारी संघर्षमा तीन हप्ताका लागि युद्धविराम थप गरिएको छ । अमेरिकी राष्ट्रपति डोनाल्ड ट्रम्पले ह्वाइट हाउसमा भएको दोस्रो चरणको उच्चस्तरीय वार्तापछि युद्धविराम विस्तारको घोषणा गरेका हुन् ।
ट्रम्पले सामाजिक सञ्जालमार्फत छिट्टै इजरायलका प्रधानमन्त्री बेन्जामिन नेतन्याहू र लेबनानका राष्ट्रपति जोसेफ आउनलाई ह्वाइट हाउसमा बोलाएर थप छलफल गर्ने योजना रहेको जानकारी दिएका छन् ।
इरानसँग सम्भावित सम्झौताबारे बोल्दै ट्रम्पले कुनै पनि सहमति अमेरिकाको हितमा मात्र हुने स्पष्ट पारे । उनले यस विषयमा कुनै निश्चित समयसीमा नरहेको र हतारमा निर्णय नगर्ने बताएका छन् ।
यस्तै, इरानविरुद्ध परमाणु हतियार प्रयोग नगर्ने पनि उनले उल्लेख गरेका छन् । उनका अनुसार परम्परागत आक्रमणबाटै इरानलाई ठूलो क्षति पुगिसकेकोले परमाणु हतियार प्रयोगको आवश्यकता नरहेको बताएका छन् ।
काठमाडौं । नेपाली बजारमा आज सुनचाँदीको मुल्य घटेको छ ।
नेपाल सुनचाँदी व्यवसायी महासङ्घका अनुसार शुक्रबार छापावाल सुनको मुल्य तोलाको २२ सयले घटेर तोलाको २ लाख ९६ हजार ५ सयमा कारोबार भइरहेको छ । यसअघि विहिबार सुन तोलाको २ लाख ९८ हजार ७ सयमा कारोबार भएको थियो ।
यस्तै, आज चाँदीको मुल्य पनि घटेको छ । महासङ्घका अनुसार आज चाँदी तोलाको ७५ रुपैयाँले घटेर ४९४५ मा कारोबार भइरहेको छ । यसअघि विहिबार चाँदी तोलाको ५०२० मा कारोबार भएको थियो ।
काठमाडौँ । नेपाली कांग्रेसका महामन्त्री प्रदिप पौडेलले आह्वान भएको २४ घण्टा नबित्दै संसद अधिवेशन स्थगन गरिनुले गम्भीर प्रश्नहरू उब्जाएको टिप्पणी गरेका छन् ।
सामाजिक सञ्जालमा लेख्दै महामन्त्री पौडेलले बलियो बहुमत प्राप्त सरकारले नीति निर्माणका विषयमा संसदलाई विश्वासमा लिएर पारदर्शी रूपमा अघि बढ्नु पर्नेमा अध्यादेशको बाटो रोज्न खोजेको त होइन भन्ने आशंका उब्जाएको उल्लेख गरेका छन् ।
उनले सहज संसदीय अंकगणित र अनुकूल राजनीतिक परिस्थिति हुँदाहुँदै पनि सरकारको राजनीतिक आत्मविश्वास किन यति कमजोर ? भन्दै प्रश्न समेत गरेका छन् ।
लोकतन्त्रमा विधि र प्रक्रियाको पारदर्शितालाई उच्च महत्त्व दिइनुपर्दछ भन्दै उनले प्रक्रिया छलेर परिणाम खोज्नु पद्धति र मर्यादा दुवैको अवमूल्यन हुने टिप्पणी गरेका छन् ।
महामन्त्री पौडेलले जननिर्वाचित संस्थाको गरिमा उच्च राख्न र गरिमामय संसदलाई पूर्ण विश्वासमा लिएर पारदर्शी रूपमा अघि बढ्न सरकारलाई अनुरोध गरेका छन् ।
काठमाडौँ । सिन्धुलीको सुनकोसी गाउँपालिका-३ का २३ वर्षीय श्रीकृष्ण विकको प्रहरी हिरासतमा शंकास्पद मृत्यु भएको घटनापछि सत्तारुढ राष्ट्रिय स्वतन्त्र पार्टी (रास्वपा) का सांसदहरू आफ्नै सरकारसँग न्याय माग्दै धर्नामा बसेका छन् ।
सिन्धुलीको इलाका प्रहरी कार्यालय खुर्कोटको हिरासतमा रहेका विकको शव वैशाख ७ गते साँझ शौचालयको झ्यालमा झुन्डिएको अवस्थामा फेला परेको थियो । मृतकका परिवार र आफन्तले भने प्रहरीको यातनाका कारण उनको मृत्यु भएको दाबी गरेका छन् ।
सांसद खगेन्द्र सुनार र रीमा विश्वकर्मा विहिबारदेखि जिल्ला प्रशासन कार्यालय सिन्धुलीको गेटमा धर्नामा बसेका छन् । सुनारले लेखेका छन्- ‘हिजोदेखि रातभर जिल्ला प्रशासन कार्यालय सिन्धुलीको गेटमा छौं ! प्रहरीले हत्या गरेको श्रीकृष्ण विकको न्यायको लागि अहिले १० बजे सबैलाई CDO गेटमा उपस्थितिको लागि अपिल छ !!’
रास्वपा सांसद रिमा विश्वकर्माले सामाजिक सञ्जालमा एकातिर दलित समुदायसँग क्षमायाचना अर्को तिर अन्तरजातीय विवाहसम्बन्धी उजुरीकै आडमा हिरासतभित्रै (दलित) नागरिकको शंकास्पद मृत्यु भएको भन्दै सरकारसँग न्याय मागेकी छन् ।
धर्नामा रास्वपा सांसद सुनारसहित रिमा विश्वकर्मा, सुस्मा स्वर्णकार, गणेश विक, खिमा विश्वकर्मा र आसिस गजुरेल सहभागी रहेका छन् । उनिःरुले प्रमुख जिल्ला अधिकारी, प्रहरी एसपी र खुर्कोट इलाकाका इन्स्पेक्टरलाई तत्काल निलम्बन गर्न र उच्च स्तरीय संसदीय छानबिन समिति गठन गर्न माग गरेका छन् ।
मृतककी आमा विन्दामाया विकले एक ज्ञप्तिमार्फत आफ्नो छोराको प्रहरीको यातनाबाट मृत्यु भएको आरोप लगाएकी छन् ।
ललितपुरको सातदोबाटोबाट अन्तरजातीय विवाहको विषयमा पक्राउ परेका विकलाई वैशाख ४ गते खुर्कोट लगिएको थियो । प्रहरीले जबरजस्ती करणीको मुद्दा चलाउन दबाब दिँदै छोरालाई मानसिक र शारीरिक यातना दिएको आमा विन्दामायाले विज्ञप्तिमार्फत बताएकी छन्।
यस घटनाप्रति राष्ट्रिय दलित आयोगले पनि गम्भीर ध्यानाकर्षण भएको जनाउदै प्रहरी हिरासतमा व्यक्तिको मृत्यु हुनु मानव अधिकारको दृष्टिले गम्भीर विषय भएको बताएको छ ।
काठमाडौँ । नेपाली कांग्रेसका सभापति गगन थापाले संविधानको मर्मलाई व्यवहारमा उतार्दै सुशासन र विकासमार्फत जनताको विश्वास जित्नु आजको आवश्यकता भएको बताएका छन् ।
लोकतन्त्र दिवसको अवसरमा सभापति थापाले जनअधिकार र लोकतन्त्रका लागि आफ्नो जीवन उत्सर्ग गर्ने महान् सहिदहरूप्रति श्रद्धाञ्जली व्यक्त गर्दै लोकतान्त्रिक संघर्षबाट प्राप्त उपलब्धिहरूलाई केवल इतिहासका पानामा सीमित होइन, जनजीवनमा अनुभूत हुने व्यवस्था बनाउन सक्नु नै साझा दायित्व भएको बताएका छन् ।
उनले आजको यथार्थमा अपेक्षा र उपलब्धिबीचको दूरी घटाउन नसकिएको गुनासो रहेको उल्लेख गर्दै यसको समाधान लोकतन्त्रको विकल्प होइन, अझ सुदृढ, उत्तरदायी र जनमुखी लोकतन्त्र नै भएको बताएका छन् ।