काठमाडौं । राष्ट्रिय प्रजातन्त्र पार्टी (राप्रपा) को संसदीय दलको नेतामा ज्ञानेन्द्र शाही चयन हुने निश्चित भएको छ। हालै सम्पन्न प्रतिनिधिसभा निर्वाचनमा जुम्लाबाट प्रत्यक्षतर्फ विजयी भएका शाही राप्रपाका एकमात्र प्रत्यक्ष निर्वाचित सांसद हुन्।
राप्रपाले समानुपातिकतर्फ चार सिट प्राप्त गरेको छ। ती सिटमा भरत गिरी, खुश्बु ओली, सरस्वती लामा र ताहिर अली प्रतिनिधित्व गर्नेछन्। यससँगै पाँच सदस्यीय संसदीय दलमा शाहीको नेतृत्व लगभग तय भएको हो।
यसपटकको संसदमा जम्मा ६ राजनीतिक दलको प्रतिनिधित्व रहनेछ भने महावीर पुन स्वतन्त्र सांसदका रूपमा रहनेछन्। प्रतिनिधिसभामा राष्ट्रिय स्वतन्त्र पार्टी सबैभन्दा ठूलो दल बनेको छ, जसले १८२ सिट जित्दै स्पष्ट बहुमत हासिल गरेको छ।
त्यसपछि नेपाली कांग्रेस ३८ सिटसहित दोस्रो स्थानमा रहेको छ भने नेकपा एमाले २५ सिट र नेकपा १७ सिटसहित क्रमशः तेस्रो र चौथो स्थानमा छन्। श्रम संस्कृति पार्टीले प्रत्यक्षतर्फ तीन सिट जित्दै समानुपातिक चारसहित कुल सात सिट सुरक्षित गरेको छ।
अन्य दलहरूमा पनि संसदीय दलको नेतृत्व चयनको तयारी भइरहेको छ। एमालेले रामबहादुर थापालाई नेता बनाउने संकेत गरेको छ भने नेकपामा प्रचण्डकै निरन्तरता हुने देखिएको छ। श्रम संस्कृति पार्टीमा हर्क साम्पाङ स्वयं नेतृत्व सम्हाल्ने तयारीमा छन्।
नेपाली कांग्रेसभित्र भने संसदीय दलको नेताबारे छलफल जारी छ। वरिष्ठ नेता अर्जुननरसिंह केसीको नाम चर्चामा रहे पनि उनी समानुपातिकबाट निर्वाचित भएकाले अन्तिम निर्णय भने बाँकी नै छ।
